45. ARTIKJEL FA DAUT STUDIUM
Wiest junt wieda truhoatje Leew unjarenaunda
“Siet truhoatich leeftolich un jenstich eena toom aundren” (SACH. 7:9)
LEET 107 Soone Leew bewiesen aus Jehova
WAUT WIE SEENEN WOAREN *
1-2. Wuarom sell wie ons unjarenaunda truhoatje Leew wiesen?
WIE haben goode Uasoak, ons unjarenaunda truhoatje Leew to wiesen. Wuarom sell wie daut doonen? De Schreft sajcht biejlikj: “Lot truhoatje Leew un Woarheit nich von die gonen; . . . dan woascht du bie Gott un Menschen goot aunjeseenen sennen un eenen gooden Nomen haben.” “Metleet [ooda truhoatje Leew] haben es uk goot fa eenem selfst”. “Wäa no jerajcht sennen un truhoatje Leew sträft, finjt Läwen” (Spr. 3:3-4; 11:17; 21:21).
2 Dise Bibelvarzhen wiesen dreeatlei, wuarom wie truhoatje Leew haben sellen. Ieeschtens woat Gott ons väl räakjnen, wan wie aundre truhoatje Leew wiesen. Tweedens kjemt ons daut selfst togood, wiels wie biejlikj goode Frind kjrieen woaren. Un dreddens woa wie väl goodet kjrieen, wan wie truhoatje Leew wiesen, soo aus daut eewje Läwen. Wie haben werkjlich goode Uasoak Jehova sienen Rot notokomen, waut doa sajcht: “Siet truhoatich leeftolich un jenstich eena toom aundren” (Sach. 7:9).
3. Von waut vonne Froagen woa wie nu räden?
3 En disen Artikjel woa wie von vea Froagen räden: Wäm sell wie truhoatje Leew wiesen? Waut kjenn wie von daut Bibelbuak Rut äwa truhoatje Leew lieren? Woo kjenn wie vondoag dän Dach aundre truhoatje Leew wiesen? Un woo woat ons daut togood komen?
WÄM SELL WIE TRUHOATJE LEEW WIESEN?
4. Woo kjenn wie Jehova nodoonen? (Markus 10:29-30).
4 En dän väajen Artikjel hab wie jeseenen, daut Jehova bloos fa soone Menschen truhoatje Leew haft, waut am leewen un deenen (Dan. 9:4). Wie wellen doaropp schaufen, “am emma änelja to woaren”, wiels wie siene leewe Kjinja sent (Efs. 5:1). Doawäajen strenj wie ons aun, truhoatje Leew fa onse Gloowesbreeda to haben (läs Markus 10:29-30).
5-6. Woo kjennen de Menschen jeweenlich “tru sennen” vestonen?
5 Wurscht du nich uk sajen, daut wie onse Gloowesbreeda noch bäta truhoatje Leew wiesen kjennen, wan wie krakjt weeten, waut dise Leew es? Daut wie bäta vestonen kjennen, waut met dee jemeent es, well wie dee mol met “tru sennen” jäajenäwa hoolen, soo aus de mieeschte Menschen daut vestonen. See wie mol een Jlikjnis.
6 Wan doa wäa aul Joaren fa deeselwje Kompanie schauft, dan saj wie veleicht, daut et een trua Oabeida es. Oba veleicht haft hee en aul dise Joaren noch kjeenmol eenen von de Wieets jeseenen. Un hee es uk nich emma met aules envestonen, waut dee entscheiden. Hee schauft doa nich, wiels hee de Kompanie sea jleicht, oba wäajen hee doa jieda Moonat betolt kjricht. Un hee woat doa wiedaschaufen, bat hee Auldpenschen kjricht, buta hee kjricht aundatwäajen eene bätre Oabeit.
7-8. (a) Waut brinjt eenem bat doa, truhoatje Leew to wiesen? (b) Wuarom woa wie ons nu eenje Varzhen ut daut Bibelbuak Rut unjastonen?
7 De Unjascheet von “tru sennen”, wua wie en Varsch 6 von räden, un “truhoatje Leew wiesen” es, wuarom eena waut deit. Wuarom weesen Gott siene Deena en de Bibeltiet truhoatje Leew? Dee deeden daut nich, wiels dee daut schuldich wieren, oba wiels dee daut opp iernst wullen. Daut wia bie David to seenen. Hee wees sienen leewen Frint Jonatan truhoatje Leew, wan Jonatan sien Voda am uk dootmoaken wull. Un David vegaut nich von Jonatan, wan dee uk aul jestorwen wia, un hee hieed nich opp, dän sienen Sän Mefi-Boschet truhoatje Leew to wiesen (1. Sam. 20:9, 14-15; 2. Sam. 4:4; 8:15; 9:1, 6-7).
8 Von daut Bibelbuak Rut kjenn wie väl äwa truhoatje Leew lieren. Waut wiesen de Menschen en dit Buak ons äwa truhoatje Leew? Un woo kjenn wie daut en onse Vesaumlunk nokomen? *
WAUT KJENN WIE UT DAUT BIBELBUAK RUT ÄWA TRUHOATJE LEEW LIEREN?
9. Wuarom docht Noomi, daut Jehova jäajen ar wia?
9 En daut Buak Rut rät daut von Noomi, dee äare Schwieedochta Rut un von eenen gottesferchtjen Maun, waut Boas heet un em Frintschoft met Noomi äaren Maun wia. Wäajen en Israel eene Hungaschnoot wia, trock Noomi met äaren Maun un äare beid Junges toop no Moab. Doa storf Noomi äa Maun. De beid Junges befrieden sikj, oba met de Tiet storwen dee uk (Rut 1:3-5; 2:1). Dit muak Noomi soo truarich, daut see emma mootloosa wort. See haud daut soo schwoa, daut see docht, daut Jehova jäajen ar wia. See säd mau rajcht: “Däm HARN siene Haunt . . . [es] jäajen mie jekomen”! “Dee, dee aule Macht haft, haft mien Läwen betta jemoakt.” See säd uk: “De HAR es jäajen mie, un dee, dee aule Macht haft, brinjt mie lieden” (Rut 1:13, 20-21).
10. Waut deed Jehova, aus Noomi soo vebettat räd?
10 Waut deed Jehova, aus Noomi soo vebettat räd? Hee veleet ar nich. Enne Städ daut wia hee sea metfeelent. Jehova weet, daut eena leicht mol “onbedochte Räd” haben kaun, wan eena daut met waut schwoa haft (Hiob 6:3). Oba Noomi fäld Help, daut see seenen kunn, daut Jehova opp äare Sied wia. Woo holp Jehova ar? (1. Sam. 2:8). Hee brocht Rut bat doa, ar to halpen un ar truhoatje Leew to wiesen. Rut wia reed äare Schwieemame leeftolich bietostonen, daut dee nich mea soo mootloos wia un vestonen kunn, daut Jehova ar noch emma leewd. Waut kjenn wie von Rut lieren?
11. Wuarom halpen leeftolje Breeda un Sestren soone, waut daut schwoa haben?
11 De truhoatje Leew brinjt ons bat doa, soone to halpen, waut daut schwoa haben. Rut stunt Noomi bie, un leeftolje Breeda un Sestren sent vondoag dän Dach wellich reed, deejanje von de Vesaumlunk bietostonen, waut truarich ooda mootloos sent. Dee leewen äare Breeda un Sestren un wellen aules doonen, waut see kjennen, om dee to halpen (Spr. 12:25; Spr. 24:10, NW). Dee komen dän Apostel Paulus sienen Rot no: “Treest dee, dee de Moot verutscht es. Halpt de schwake un haft met aulen Jedult” (1. Tess. 5:14).
Wan wäa mootloos es, kaun dän daut halpen, wan wie dän toohorchen (See Varsch 12)
12. Waut es foaken daut baste, wan wie wäm halpen wellen, waut mootloos es?
12 Wan doa wäa mootloos es, dan kjenn wie dän foaken daut baste biestonen, wan wie dän goot toohorchen un sajen, daut wie dän leewen. Jehova freit sikj sea, wan wie onse Gloowesbreeda leeftolich biestonen (Psa. 41:2). Spricha 19:17 sajcht: “Waut du de oame jefst, liest du däm HARN, un dee woat die daut trigjtolen.”
Rut blift bie äare Schwieemutta Noomi, wan Orpa uk trigj no Moab jeit. Rut sajcht to Noomi: “Wua du han jeist, well ekj han gonen” (See Varsch 13)
13. Waut wia bie Rut aundasch aus bie Orpa, un woo wees Rut truhoatje Leew? (See daut Bilt oppe väaschte Sied.)
13 Wie kjennen noch mea äwa de truhoatje Leew lieren, wan wie ons unjastonen, woo daut met Noomi wiedajinkj, nodäm daut äa Maun un de beid Junges jestorwen wieren. Aus Noomi hieed, “daut de HAR sien Volkj jeholpen haud, un daut doa nu jenuach to äten wia”, wort see sikj eenich trigj no äa Launt to gonen (Rut 1:6). Ieeschtlich jinjen beid Schwieedajchta met ar met. Oba hinjawäajes säd Noomi dreemol to dee, daut see trigj no Moab gonen sullen. Waut deeden dee dan? “Orpa jinkj äare Schwieemutta dän Aufscheets Kuss jäwen. Rut oba, hilt sikj gaunz aun Noomi” (Rut 1:7-14). Orpa deed daut, waut Noomi to ar jesajcht haud, un jinkj trigj. Oba Rut deed mea, aus see schuldich wia. See haud uk kunt trigjgonen, oba ut truhoatje Leew wort see sikj eenich Noomi to halpen (Rut 1:16-17). See bleef nich bie Noomi, wiels see daut must, oba wiels see daut wull un opp iernst truhoatje Leew haud. Waut lia wie doavon?
14. (a) Waut doonen väl Breeda un Sestren vondoag dän Dach? (b) Waut vonne Opfa jefaulen Gott no Hebräa 13:16 no?
14 Wan wie truhoatje Leew haben, dan doo wie mea, aus wie schuldich sent. Ieeschtemma un vondoag dän Dach sent väl Breeda un Sestren sikj eenich jeworden, äare Gloowesbreeda truhoatje Leew to wiesen, endoont aus see dee kjanen ooda nich. Wan dee biejlikj hieren, daut et wua een Owwada jejäft haft, dan froagen dee fuaz, woo see halpen kjennen. Un wan doa wäa von de Vesaumlunk Schwierichkjeiten haft, dan sent see wellich reed dän to halpen un bietostonen. Dee doonen mea, aus waut von an velangt es, un sent krakjt soo aus de Breeda en Mazedonien ieeschtemma, waut wellich waut oppjeewen un “soogoa mea [deeden,] aus see kunnen”, om äare Gloowesbreeda to halpen (2. Kor. 8:3). Daut moakt Jehova sea schaftich! (Läs Hebräa 13:16.)
WOO KJENN WIE TRUHOATJE LEEW WIESEN?
15-16. Aun waut wia daut to seenen, daut Rut aunhoolent bleef?
15 Nu woa wie ons unjastonen, woo Rut Noomi biestunt. Waut kjenn wie doavon lieren?
16 Bliew aunhoolent. Aus Rut säd, daut see met Noomi toop no Juda gonen wull, wia Noomi doa ieeschtlich nich met envestonen. Oba Rut jeef nich opp. Woo kjeem daut ut? “Aus Noomi daut kloa wort, daut Rut sikj nich wudd beräden loten, jeef see opp ar to beräden” (Rut 1:15-18).
17. Waut woat ons halpen aunhoolent to bliewen?
17 De Lia fa ons: Wie motten jeduldich sennen un aunhoolent bliewen, wan wie wäm halpen wellen, waut mootloos es. Wan wie biejlikj eene Sesta halpen wellen, waut doa Help fält, well dee daut ieeschtlich veleicht nich aunnämen. * Oba onse truhoatje Leew brinjt ons bat doa, daut wie daut wieda proowen (Gal. 6:2). Wie hopen, daut wie dee met de Tiet halpen un treesten kjennen, daut see nich mea soo mootloos es.
18. Waut mott Rut sea toojesat haben?
18 Sie nich leicht beleidicht. Aus Noomi un Rut no Betlehem kjeemen, bejäajenden see doa Noomi äare Nobasch von ea. See säd to dee: “Aus wie veleeten, wia mien Hus voll met eenen Maun un twee Säns. Nu haft de HAR mie auleen trigjebrocht met kjeenem, dee fa mie sorcht” (Rut 1:21). Denkj mol han, woo Rut sikj mott jefeelt haben, aus see daut hieed! See haud soo väl jedonen, om Noomi to halpen. See haud met dee toop jeroat, dee jetreest un met dee toop de lange Reis jemoakt. Oba nu säd Noomi, see haud kjeenem, dee fa ar sorjd. Daut hieet sikj soo, aus wan Noomi nich mol dankboa wia fa aul daut, waut Rut fa ar jedonen haud. Rut hieed daut, un secha haft ar daut sea toojesat. Oba see leet Noomi nich em Stäakj.
19. Waut sell wie proowen, wan wie wäm halpen, waut mootloos es?
19 De Lia fa ons: Eene Sesta, waut mootloos es, sajcht veleicht waut, waut ons velazt, wan wie uk aul väl fa dee jedonen haben. Oba wie proowen dan, daut wie nich leicht beleidicht sent. Wie stonen dee wieda bie un froagen Jehova no Help, daut wie dee opp irjenteene Wajch treesten kjennen (Spr. 17:17).
Woo kjennen de Eltestasch vondoag dän Dach Boas nodoonen? (See Varsch 20-21)
20. Waut jeef Rut de Krauft, daut see nich oppjeef?
20 Spräakj aundre Moot too, wan daut fält. Rut haud Noomi truhoatje Leew jewäsen, oba nu fäld ar daut selfst aun Moot. Un Jehova brocht Boas bat doa, ar Moot tootospräakjen. Hee säd to Rut: “Mucht de HAR die daut loten goot utkomen, wäajen waut du jedonen hast. Mucht de HAR, Israel äa Gott, die rikjlich beloonen, nu daut du bie am unjare Flichten Schutz sieekjst.” Dise leeftolje Wieed jinjen Rut sea to Hoaten un see säd to Boas: “Du hast mie jetreest, doamet daut du soo leeftolich to mie räden deetst” (Rut 2:12-13). Wiels Boas Rut to de rajchte Tiet Moot toospruak, kjrieech see fresch Krauft un jeef nich opp.
21. Waut woaren leeftolje Eltestasch doonen, soo aus Jesaja 32:1-2 sajcht?
21 De Lia fa ons: Soone, waut aundre truhoatje Leew wiesen, fält daut eenjemol uk, daut an wäa Moot toosprakjt. Boas lowd Rut, aus hee enwort, woo leeftolich see to Noomi wia. Vondoag dän Dach lowen de Eltestasch de Breeda un Sestren uk, wan dee enwoaren, woo leeftolich dee aundre biestonen. Daut es krakjt daut, waut dise Breeda un Sestren fält, daut see wieda de Krauft haben, nich opptojäwen (läs Jesaja 32:1-2).
WOO KJEMT ONS DAUT TOGOOD, WAN WIE TRUHOATJE LEEW WIESEN?
22-23. Woo kjeem daut, daut Noomi aundasch jesonnen wia, un aun waut wia daut to seenen? (Psalm 136:23, 26).
22 Een Stootje lota jeef Boas Rut un Noomi een schoof Ätwoa (Rut 2:14-18). Waut deed Noomi, aus Boas soo friejäwrich wia? See säd: “Nu see ekj, daut däm HARN siene truhoatje Leew nich oppjehieet haft, nich fa de Läwendje un uk nich de Vestorwne. Mucht de HAR däm Boas säajnen” (Rut 2:20a). Nu wia Noomi gaunz aundasch jesonnen. Ea wia see truarich un säd: “De HAR es jäajen mie”. Oba nu wia see schaftich un säd: “Däm HARN siene truhoatje Leew [haft] nich oppjehieet”. Wuarom docht Noomi nu gaunz aundasch?
23 Met de Tiet wort Noomi kloa, daut Jehova ar emma jeholpen haud. Hee haud ar biejlikj derch Rut opp de lange Reis no Juda biejestonen (Rut 1:16). Noomi wort uk en, daut Jehova Boas aus Looskjeepa brukt, om ar un Rut to halpen (Rut 2:19-20b). * Secha docht see: “Nu weet ekj, daut Jehova mie kjeenmol veloten haft. Hee haft mie dän Tiet äwa biejestonen” (läs Psalm 136:23, 26). Gaunz secha wia Noomi sea dankboa, daut Rut un Boas ar nich em Stäakj jeloten hauden! Un dee wieren aula sea schaftich, daut Noomi Jehova wada met Freid un Moot deend.
24. Wuarom well wie onse Gloowesbreeda uk wieda truhoatje Leew wiesen?
24 Waut hab wie von daut Buak Rut äwa de truhoatje Leew jelieet? Truhoatje Leew halpt ons, daut wie soone Breeda un Sestren wieda biestonen, waut Schwierichkjeiten haben. Dee brinjt ons uk bat doa, ons auntostrenjen, om dee to halpen. De Eltestasch sellen soone, waut aundre truhoatje Leew wiesen, emma wada opprechtich lowen. Wan wie seenen, daut soone, waut Help fält, Jehova wada mootich deenen, dan sent wie selfst uk sea schaftich (Apj. 20:35). Oba waut es de wichtichsta Grunt, wuarom wie aundre truhoatje Leew wiesen? Wie wellen Jehova jefaulen un am nodoonen, wiels hee es “sea leeftolich un truhoatich” (2. Mo. 34:6; Psa. 33:22).
LEET 130 Reed sennen to vejäwen
^ Varsch 5 Jehova well, daut wie truhoatje Leew fa onse Gloowesbreeda haben. Wie kjennen noch bäta vestonen, waut truhoatje Leew es, wan wie seenen, woo Gott siene Deena ieeschtemma soone Leew hauden. En disen Artikjel woa wie seenen, waut wie von Rut, Noomi un Boas lieren kjennen.
^ Varsch 8 Wie roden junt too, de ieeschte beid Kapitels von Rut to läsen, daut jie noch mea ut disen Artikjel rutkjrieen.
^ Varsch 17 Wie räden hia von eene Sesta, waut Help fält, wiels wie Noomi äare Jeschicht unjasieekjen. Oba daut, waut wie hia lieren, es uk fa Breeda.
^ Varsch 23 En dän Artikjel “Ihren Glauben nachahmen: ‘Eine tüchtige Frau’” em Wachtturm vom 1. Oktooba 2012 jeit noch mea doaräwa notoläsen, waut Boas aus Looskjeepa deed.
