44. ARTIKJEL FA DAUT STUDIUM
Woo kjemt ons Jehova siene truhoatje Leew togood?
“[Jehova] siene truhoatje Leew haft kjeen Enj” (PSA. 136:1)
LEET 108 Gott siene truhoatje Leew
WAUT WIE SEENEN WOAREN *
1. Waut well Jehova von ons haben?
FA Jehova es de truhoatje Leew sea wichtich (Hos. 6:6). Hee well, daut dee fa ons uk sea wichtich es. Derch dän Profeet Micha lat hee ons sajen, daut wie “truhoatich leeftolich” bliewen sellen (Micha 6:8). Oba daut wie daut kjennen, mott wie ieescht mol vestonen, waut truhoatje Leew es.
2. Woo wiest eena truhoatje Leew?
2 Waut es truhoatje Leew? En de Neue-Welt-Übersetzung der Heiligen Schrift rät daut ojjefäa 230 Mol von “truhoatje Leew”. Waut es daut krakjt? Wan doa wäa truhoatje Leew fa wäm haft, dan woat dee nich opphieren dän to leewen un woat dän tru biestonen. Jehova es daut baste Biespel fa truhoatje Leew. En disen Artikjel woa wie seenen, woo Jehova de Menschen truhoatje Leew wiest. Un en dän näakjsten Artikjel woa wie seenen, woo wie aus Gott siene Deena am nodoonen kjennen un ons unjarenaunda truhoatje Leew wiesen.
JEHOVA SIENE TRUHOATJE LEEW ES SEA GROOT
3. Waut säd Jehova to Moses von sikj selfst?
3 Nich lang nodäm de Israeliten von Ägipten veleeten, säd Jehova waut to Moses äwa sienen Nomen un siene Ieejenschoften. Hee säd: “[Jehova] es Gott, metliedent, voll Jnod, nich leicht doll, un sea leeftolich un truhoatich. Ekj hab truhoatje Leew fa dusende Jennerazionen, daut ekj june Sind, jun beeset benämen, un jun wadaspanstjet vejäw” (2. Mo. 34:6-7). Met dise scheene Wieed säd Jehova to Moses waut besondret äwa siene truhoatje Leew. Waut wia daut?
4-5. (a) Waut säd Jehova von sikj selfst? (b) Äwa waut vonne Froagen woa wie nu räden?
4 Jehova säd, daut hee nich bloos truhoatje Leew haud, oba daut hee “sea leeftolich un truhoatich” wia. Un de Schreft moakt daut uk noch opp aundre Städen dietlich, daut Jehova siene truhoatje Leew sea groot es (4. Mo. 14:18; Psa. 106:7). Es daut nich oppfaulent, daut Jehova daut soo kloa moakt, daut hee truhoatje Leew haft? Daut wiest, woo wichtich am daut es. Doawäajen säd de Kjennich David: “Diene truhoatje Leew, oo HAR, rieekjt bat aum Himmel, . . . daut es väl wieet daut du soo leeftolich best; de Menschenkjinja komen bie die unja de Flichten em Schauten stonen” (Psa. 36:6, 8). Es Gott siene truhoatje Leew bie ons krakjt soo väl wieet aus bie David?
5 Daut wie bäta vestonen kjennen, waut truhoatje Leew es, well wie nu mol äwa twee Froagen räden: Wäm wiest Jehova truhoatje Leew? Un woo kjemt ons dee togood?
WÄM WIEST JEHOVA TRUHOATJE LEEW?
6. Fa wäm haft Jehova truhoatje Leew?
6 Wäm wiest Jehova truhoatje Leew? Hee wiest dee nich jieda eenem. Jehova wiest dee bloos siene goode Frind. Hee es dee emma tru. Hee haft dee waut sea scheenet vesproaken un hee woat nienich opphieren, dee to leewen.
Jehova deit väl goodet fa aule Menschen, mau rajcht fa dee, waut am nich mol deenen (See Varsch 7) *
7. Woo haft Jehova aule Menschen Leew jewäsen?
7 Jehova haft aule Menschen oppe Welt siene Leew jewäsen. Jesus säd to eenen Maun, waut Nikodemus heet: “Gott seine Leew fa dise Welt es soo groot, daut hee sienen eensjen Sän jeef, daut aul dee, dee aun am jleewen, nich veloaren gonen, oba daut eewje Läwen haben” (Joh. 3:1, 16; Mat. 5:44-45).
De Kjennich David un de Profeet Daniel säden, daut Jehova deejanje truhoatje Leew wiest, waut am kjanen, am ferchten, am goot sent un siene Jebooten hoolen (See Varsch 8-9)
8-9. (a) Wuarom wiest Jehova siene Deena truhoatje Leew? (b) Äwa waut woa wie nu räden?
8 Soo aus wie aul ea säden, wiest Jehova siene truhoatje Leew bloos siene Frind, aulsoo siene Deena. Dit woat derch daut kloa, waut de Kjennich David un de Profeet Daniel säden. David säd: “Bliew met diene truhoatje Leew bie dee, dee die kjanen”. Hee säd uk: “Dän HARN siene truhoatje Leew es emma un eewich äwa dee, dee am ferchten”. Un Daniel säd to Jehova: “Du [woascht] ons truhoatich Leew bewiesen . . ., wan wie die goot sent un diene Jebooten hoolen” (Psa. 36:11; 103:17; Dan. 9:4). No dit no wiest Jehova siene Deena truhoatje Leew, wiels dee am kjanen, am ferchten, am goot sent un siene Jebooten hoolen. Jehova haft bloos fa deejanje truhoatje Leew, waut am rajcht deenen.
9 Ea eena Jehova deent, wiest hee eenem dee Leew, waut hee fa aule Menschen haft (Psa. 104:14). Oba wan wie am deenen, dan wiest hee ons uk siene truhoatje Leew. Jehova vesechat ons mau rajcht: “Miene truhoatje Leew fa die [woat] nich vegonen” (Jes. 54:10). David selfst beläwd, “daut de HAR sikj siene heilje [ooda True] aufsondat un wundaboa fieet” (Psa. 4:4). Waut sell wie doonen, wiels Jehova soo leeftolich om ons bekjemmat es? De Psalmenschriewa säd: “Wäa weis es, woat doaropp achten un doaräwa denkjen, woo leeftolich de HAR es” (Psa. 107:43). Dis gooda Rot kjemt von Jehova. Doawäajen woa wie nu mol äwa dreeatlei räden, woo Jehova ons siene truhoatje Leew wiest un woo ons dee togood kjemt.
WOO KJEMT ONS JEHOVA SIENE TRUHOATJE LEEW TOGOOD?
Jehova jeft deejanje, waut am deenen, noch oppoat goodet (See Varsch 10-16) *
10. Woo halpt ons daut, to weeten, daut Gott emma truhoatje Leew haft? (Psalm 31:8).
10 Gott siene truhoatje Leew blift fa emma. Von dit rät daut en dän 136. Psalm 26 Mol. En dän ieeschten Varsch sajcht daut: “Dankt dän HARN, wiels hee es ons toojedonen; siene truhoatje Leew haft kjeen Enj” (Psa. 136:1). Uk en dän Varsch 2 bat 26 sajcht daut en jieda Varsch: “Siene truhoatje Leew haft kjeen Enj.” Wan wie disen Psalm läsen, dan jeit ons daut sea to Hoaten, opp woo väl veschiedne Wäaj Jehova siene truhoatje Leew wiest un daut dee kjeen Enj haft. Daut wiest ons, daut hee kjeenmol opphieren woat, sien Volkj to leewen. Jeft ons daut nich väl Moot? Hee leeft dee, waut am deenen, un hee lat dee nich em Stäakj, besonda wan dee Schwierichkjeiten haben. Woo kjemt ons daut togood? To weeten, daut Jehova ons biesteit, jeft ons de Freid un Krauft, waut wie brucken, om met Schwierichkjeiten foadich to woaren un am wieda to deenen (läs Psalm 31:8).
11. Waut brinjt Jehova no Psalm 86:5 no bat doa, aundre to vejäwen?
11 Gott siene truhoatje Leew brinjt am bat doa, aundre to vejäwen. Wan Jehova sitt, daut doa wäm siene Sinden leet sent un daut dee omkjieet, brinjt am siene truhoatje Leew doatoo, dän to vejäwen. De Psalmenschriewa David säd äwa Jehova: “Hee haundelt met ons nich doano aus onse Sinden vedeent haben, un stroft ons nich doano aus wie orrajcht jedonen haben” (Psa. 103:8-11). David selfst haud beläft, woo schuldich un woo truarich eena sikj feelen kaun, wan eena een schlajchtet Jewessen haft. Oba hee wort uk en, daut Jehova “reed to vejäwen” es. Waut brinjt Jehova bat doa, aundre to vejäwen? De Auntwuat finj wie en Psalm 86:5 (läs). Soo aus David en sien Jebäd säd, wiest Jehova deejanje truhoatje Leew, waut am om Vejäwunk prachren.
12-13. Waut woat ons halpen, wan wie ons doaräwa schuldich feelen, waut wie ea mol jedonen haben?
12 Wan wie eene Sind begonen haben, es daut rajcht un mau rajcht goot, wan wie een schlajchtet Jewessen haben. Daut kaun ons bat doa brinjen, no Vejäwunk to froagen un omtokjieren. Oba eenje von Gott siene Deena feelen sikj noch emma schuldich doaräwa, waut see mol jedonen haben. Dee kjennen daut nich jleewen, daut Jehova an jeemols vejäwen woat, endoont woo leet an daut es. Wan die daut soo jeit, dan woat die daut halpen, wan du vesteist, daut Jehova die opp iernst truhoatje Leew wiesen well.
13 Woo kjemt ons daut togood? Wan wie uk onvolkomen sent, kjenn wie Jehova doawäajen met Freid un met een reinet Jewessen deenen, wiels “daut Bloot von sien Sän Jesus Christus moakt ons rein von aule Sind” (1. Joh. 1:7). Wan du wäajen irjenteenen Fäla truarich best, dan denkj doaraun, daut Jehova wellich reed es die to vejäwen, wan die daut leet es. David muak dietlich, waut truhoatje Leew met vejäwen to doonen haud. Hee schreef: “Soo huach aus de Himmel bowa de Ieed es, soo groot es Gott siene truhoatje Leew to dee, dee am ferchten; soo wiet aus de Oosten vom Wasten es, nemt hee onse Sinden von ons wajch” (Psa. 103:11-12). Jehova es werkjlich een Gott, waut “väl vejeft” (Jes. 55:7).
14. Waut säd David doaräwa, woo Gott siene truhoatje Leew ons beschizt?
14 Gott siene truhoatje Leew beschizt ons em jeisteljen. David säd en een Jebäd to Jehova: “Bie die kaun ekj mie vestäakjen; du woascht mie fa Trubbel bewoaren, daut ekj die lowen kaun, daut du mie jerat hast. . . . Dän HARN siene truhoatje Leew es om dee, dee sikj opp am veloten” (Psa. 32:7, 10). Soo aus ieeschtemma eene Stautsmia de Menschen beschizt, soo beschizt Jehova siene truhoatje Leew ons em jeisteljen, daut wie am wieda tru deenen kjennen. Un Jehova siene truhoatje Leew brinjt am uk bat doa, daut hee ons no am trakjt (Jer. 31:3).
15. Wuarom es Jehova siene truhoatje Leew met eenen huagen Torm un met eene vesechade Staut to vejlikjen?
15 David schreef: “Du, Gott, best mien Schutz un mien truhoatich leeftolja Gott.” David brukt uk miere Jlikjnisen toom wiesen, woo Jehova sien Volkj beschizt. Hee schreef: “Mien Leeftolja un miene vesechade Staut, mien huaga Torm un mien Heilant, mien Schilt, un dee, bie wäm ekj Tooflucht näm” (Psa. 59:18; 144:2). Waut haft Jehova siene truhoatje Leew met eenen huagen Torm un met eene vesechade Staut to doonen? Wan wie Jehova tru deenen, dan woat hee ons schitzen, daut wie kjennen siene Frind bliewen, krakjt endoont opp woone Städ wie wonen. Von daut rät daut en Psalm 91 uk. De Psalmenschriewa säd von Jehova: “Du best miene Tooflucht un miene vesechade Staut” (Psa. 91:1-3, 9, 14) Moses säd uk, daut Jehova onse Tooflucht wia (Psa. 90:1). Nich lang ver sienen Doot brukt Moses een scheenet Jlikjnis. Hee schreef: “Diene Wonstäd es de eewja Gott, un hee helt die met siene eewje Oarms” (5. Mo. 33:27). Waut wiesen ons de Wieed äwa Jehova: “Hee helt die met siene eewje Oarms”?
16. Woo halpt Jehova ons? (Psalm 136:23).
16 Wan wie opp Jehova vetruen, dan woa wie ons secha feelen. Oba eenjemol sent doa soone Tieden, wua wie mootloos sent un nich wieda kjennen. Waut woat Jehova dan fa ons doonen? (Läs Psalm 136:23.) Hee woat ons soo to sajen met siene Oarms opphäwen un ons leeftolich halpen, daut wie nich mea truarich sent (Psa. 28:9; 94:18). Woo kjemt ons daut togood? Wie weeten, daut wie ons emma opp Gott veloten kjennen. Dit halpt ons opp twee Wäaj. Ieeschtens woat Jehova ons emma beschitzen, krakjt endoont wua wie wonen. Un tweedens es ons leeftolja himlischa Voda sea om ons bekjemmat.
GOTT WOAT ONS WIEDA SIENE TRUHOATJE LEEW WIESEN
17. Äwa waut kjenn wie ons secha sennen? (Psalm 33:18-22).
17 Soo aus wie jeseenen haben, woat Jehova ons emma halpen am tru to bliewen, wan wie uk Schwierichkjeiten haben (2. Kor. 4:7-9). De Profeet Jeremia schreef: “Däm HARN siene Leew es truhoatich, doa es kjeen Enj von woo jenstich hee es” (Klg. 3:22). Wie kjennen ons secha sennen, daut Jehova ons wieda truhoatje Leew wiesen woat, wiels de Schreft sajcht: “De HAR helt dee em Uag, dee am ferchten, dee met siene truhoatje Leew räakjnen” (läs Psalm 33:18-22).
18-19. (a) Waut well wie em Denkj hoolen? (b) Waut woa wie en dän näakjsten Artikjel seenen?
18 Waut well wie em Denkj hoolen? Ea wie Jehova deenden, leewd hee ons soo, aus hee aule aundre Menschen deit. Oba nu daut wie am deenen, wiest hee ons uk siene truhoatje Leew. Dise Leew brinjt Jehova bat doa, ons met siene stoakje Oarms to beschitzen. Hee woat emma dicht bie ons bliewen un aul daut erfellen, waut hee ons vesproaken haft. Hee well, daut wie eewich siene Frind bliewen (Psa. 46:2-3, 8). Doawäajen woat hee ons emma de Krauft jäwen, daut wie am kjennen tru bliewen, endoont waut fa Schwierichkjeiten wie haben.
19 Wie haben jeseenen, daut Jehova siene Deena truhoatje Leew wiest. Nu well hee, daut wie ons unjarenaunda uk truhoatje Leew wiesen. Woo kjenn wie daut doonen? Daut woa wie en dän näakjsten Artikjel seenen.
LEET 136 Mucht Jehova die “rikjlich beloonen”
^ Varsch 5 Waut es de truhoatje Leew? Wäm wiest Jehova truhoatje Leew un woo kjemt dee daut togood? Daut woa wie en dän ieeschten von twee Artikjels seenen, waut äwa de truhoatje Leew räden.
^ Varsch 53 BILTBESCHRIEWUNK: Jehova wiest aule Menschen Leew un doa sent uk siene Deena met en. Opp de kjliene Bilda bowa de Menschen es to seenen, woo Gott siene Leew wiest. Daut wichtichste es, daut hee sienen Sän aus Leesjelt fa ons jeef.
^ Varsch 61 BILTBESCHRIEWUNK: Dee, waut Jehova aunfangen to deenen un aun daut Leesjelt jleewen, kjrieen von Jehova waut besondret. Jehova leeft dee nich bloos soo aus aule aundre Menschen, oba hee wiest dee uk siene truhoatje Leew. Daut es opp de kjliene Bilda bowen to seenen.
