1. Waut meent daut, derchjedocht to bliewen? (2. Timotäus 4:5).

 WAN doa waut oppkjemt, waut ons toosat, dan kaun ons daut oppe Proow stalen, aus wie Jehova un siene Organisazion werkjlich tru sent. Woo kjenn wie met soone Schwierichkjeiten omgonen? Wie motten onbedinjt derchjedocht un waka bliewen un faust em Gloowen stonen (läs 2. Timotäus 4:5, NW). Wie kjennen derchjedocht sennen, wan wie ruich bliewen, kloa denkjen un proowen, Sachen soo to seenen, aus Jehova dee sitt. Dan woaren nich onse Jefeelen de Macht haben äwa onse Jedanken, oba wie selfst.

2. Waut woa wie en disen Artikjel seenen?

² De väaja Artikjel rät von dree Schwierichkjeiten, waut von butakaunt de Vesaumlunk komen kjennen. En disen Artikjel woa wie von dree Schwierichkjeiten räden, waut von bennakaunt de Vesaumlunk komen kjennen, waut ons aufproowen kunnen, aus wie Jehova werkjlich tru sent. Woo kjenn wie derchjedocht bliewen un ons tru aun Jehova un siene Organisazion hoolen, (1) wan sikj ons daut soo späat, daut een Gloowesbrooda ons ojjerajcht behaundelt haft, (2) wan wie strenjen Rot kjrieen un (3) wan sikj en de Organisazion waut endat, wua wie uk met en sent?

3. Woo jeit ons daut veleicht, wan ons een Gloowesbrooda velazt haft?

³ Haft sikj die daut aul mol soo jespäat, daut een Brooda ooda eene Sesta die ojjerajcht behaundelt haft, veleicht mau rajcht soona, waut väl Veauntwuatunk haft, soo aus een Eltesta? Secha wull dee die nich velazen (Reem. 3:23; Jak. 3:2). Oba daut, waut dee deed, haft die veleicht doawäajen toojesat. En dien Vestaunt dreid daut veleicht dän Tiet äwa, un du kust nich mol mea schlopen. Veleicht dochst du soo: “Kaun daut werkjlich Jehova siene Organisazion sennen, wan een Brooda soont deit?” Daut es krakjt, waut de Soton well, woo  wie denkjen sellen (2. Kor. 2:11). Soon denkjen kunn ons bat doa brinjen, daut wie ons von Jehova un siene Organisazion trigjtrakjen. Wan sikj die daut soo späat, daut die een Brooda ooda eene Sesta ojjerajcht behaundelt haft, woo kaust du dan doafäa oppaussen, nich soo to denkjen, aus de Soton daut haben well, oba uk en soone Omstend derchjedocht bliewen?

4. Woo kunn Josef derchjedocht bliewen, aus hee schlajcht behaundelt wort, un waut lia wie doavon? (1. Mose 50:19-21).

⁴ Lot die nich vebetren. Aus Josef een Jugentlicha wia, wort hee von siene elre Breeda schlajcht behaundelt. Dee hausten am un eenje von dee wullen am mau rajcht ombrinjen (1. Mo. 37:4, 18-22). Dan vekoften see am aus eenen Sklow. Wäajen daut must Josef fa rom 13 Joa sea väl schwoaret derchmoaken. Josef haud kunt beduaren, aus Jehova am werkjlich leewd. Hee haud uk kunt doaräwa nojreblen, aus Jehova am en dise schwoare Tiet veloten haud. Oba Josef leet sikj nich vebetren. Hee bleef ruich un derchjedocht. Aus hee ieescht de Mäajlichkjeit haud, sikj aun siene Breeda to rajchnen, deed hee daut nich, oba wees dee Leew un vejeef dee (1. Mo. 45:4-5). Daut kunn Josef bloos, wäajen hee kloa denkjen deed. Hee docht nich bloos äwa siene ieejne Trubbels no. Fa am wia daut wichtja, waut Jehova wull (läs 1. Mose 50:19-21). Waut lieescht du doavon? Wan du schlajcht behaundelt woascht, dan lot die nich vebetren un denkj kjeenmol, daut Jehova die veloten haft. Daut es väl bäta, wan du doaräwa nodenkjst, woo Jehova die jroz halpt, daut schwoare uttohoolen. Un wan aundre die schlajcht behaundlen, dan wies dee diene Leew un proow, dee äare Onvolkomenheiten to äwaseenen (1. Pet. 4:8).

5. Woo kunn Miqueas derchjedocht bliewen, wan hee uk docht, daut hee ojjerajcht behaundelt wort?

⁵ See wie mol, waut Miqueas, een Eltesta en Sied-Amerika, beläwd. b Am denkjt daut noch goot, aus hee sikj mol soo feeld, daut hee von eenje Breeda ojjerajcht behaundelt wort, waut väl Veauntwuatunk hauden. Hee vetalt: “Ekj haud daut noch kjeenmol ea beläft, daut ekj mie wäajen eene Sach soo schlajcht feeld. Ekj haud Angst un kunn de Nacht nich schlopen un ekj must eefach roaren, wäajen ekj docht, daut ekj nuscht endren kunn.” Oba Miqueas bleef derchjedocht un proowd, sikj sea to beoabeiden. Hee bäd foaken un fruach Jehova no sienen heiljen Jeist un Krauft, doamet foadich to woaren. Hee socht sikj uk waut en onse Bieekja, waut am halpen kunn. Waut lieescht du doavon? Wan du denkjst, daut een Brooda ooda eene Sesta die ojjerajcht behaundelt haft, un du fangst aun, schlajcht to denkjen, dan bliew ruich un proow, die to beoabeiden. Du woascht doa veleicht nich omweeten, waut disen Mensch doatoo brocht, daut hee soont deed ooda säd. Doawäajen räd met Jehova un froag am no Help, de Sachen soo to seenen, aus de Brooda dee sitt. Dan woascht du veleicht doaraun denkjen kjennen, daut de Brooda ooda de Sesta die nich schoden wull, un du woascht an uk vejäwen kjennen (Spr. 19:11). Denkj emma doaraun: Jehova weet om diene Loag krakjt om un hee woat die de Krauft jäwen, doamet foadich to woaren (2. Chr. 16:9; Liera 5:7).

6. Wuarom es daut soo wichtich, doano to kjikjen, daut Jehova ons siene Leew wiest, wan hee ons trajchtwiest? (Hebräa 12:5-6, 11).

⁶ Trajchtjewäsen to woaren, kaun weedoonen. Wan wie bloos doaraun denkjen, woo schlajcht wie ons feelen, dan kjenn wie veleicht bat doa komen, daut wie denkjen, daut ons dän Rot goanich traft ooda  daut dee väl too strenj wia. Daut kunn ons bat doa brinjen, daut wie nich mea seenen, daut daut Jehova es, waut ons trajchtwiest, wäajen hee ons leeft (läs Hebräa 12:5-6, 11). Wan wie emma bloos doano kjikjen, woo schlajcht wie ons äwa dän Rot feelen, dan jäw wie Soton de Jeläajenheit, ons auntojriepen. Hee well nich bloos haben, daut wie sellen dän Rot aufwiesen, oba hee well mau rajcht, daut wie opphieren, Jehova to deenen un de Vesaumlunk veloten. Wan die strenjen Rot jejäft woat, woo kaust du dan derchjedocht bliewen?

7. (a) Woo kunn Jehova Petrus brucken, nodäm daut hee dän Rot aunneem? (See uk daut Bilt.) (b) Waut kjenn wie von Petrus lieren?

⁷ Nemm dän Rot aun. Jesus wees Petrus mieremol ver de aundre Apostel trajcht (Mar. 8:33; Luk. 22:31-34). Petrus schämd sikj daut secha sea! Oba hee neem dän Rot aun un lieed von siene Fäla. Petrus bleef Jesus tru, un Jehova beloond Petrus doafäa un jeef am wichtje Veauntwuatungen enne Vesaumlunk (Joh. 21:15-17; Apj. 10:24-33; 1. Pet. 1:1). Waut kjenn wie von Petrus sien Biespel lieren? Ons selfst un uk aundre kjemt daut togood, wan wie nich bloos doano kjikjen, woo sea sikj ons daut schämt, wan wie Rot kjrieen, oba dän aunnämen. Jehova woat ons dan noch bäta brucken kjennen un wie woaren mea fa de Breeda doonen kjennen.

8-9. Woo feeld Bernardo sikj, aus hee trajchtjewäsen wort, un waut holp am, wada rajcht to denkjen?

⁸ Woo wia daut met Bernardo, een Brooda en Mosambik? De Eltestasch säden, daut hee nich mea kunn Eltesta sennen. Woo feeld Bernardo sikj doaräwa? Hee vetalt: “Ekj jleicht daut nuscht un wia veoajad äwa aul dit.” Hee muak sikj uk Sorjen, woo de aundre en de Vesaumlunk äwa am wudden denkjen. Hee sajcht: “Mie dieed daut een poa Moonat, daut ekj kunn rajcht aun miene Loag naunkjikjen un wada opp Jehova un siene Organisazion vetruen.” Waut holp Bernardo?

⁹ Bernardo endad sien denkjen. Hee sajcht: “Aus ekj noch een Eltesta wia, brukt ekj foaken Hebräa 12:7, om aundre to halpen, daut dee doa kunnen rajcht naunkjikjen, wan Jehova an trajchtjewäsen haud. Un dan docht ekj soo: ‘Na, dän Rot von disen Varsch motten je nich bloos de aundre nokomen! Ekj mott dän selfst uk nokomen!’” Bernardo deed noch mea, daut hee wada opp Jehova un siene Organisazion vetruen  kunn. Hee läsd mea en de Schreft un docht doa noch deepa äwa no. Wan hee sikj uk noch emma Sorjen muak, woo de Breeda un Sestren äwa am dochten, schauft hee oba wieda em Deenst met dee toop un muak uk bie de Toopkomes met. Met de Tiet wort Bernardo wada een Eltesta. Wan die daut soo jeit aus Bernardo un du Rot jekjräajen hast, dan proow, nich too sea doano to kjikjen, woo sea sikj die daut schämt, oba proow, dän Rot auntonämen (Spr. 8:33; 22:4). c Dan kaust du die secha sennen, daut Jehova die doafäa beloont, daut du die faust aun am un siene Organisazion helst.

10. Waut endad sikj doa bie de Israeliten, waut an oppe Proow stald, aus see tru wieren?

¹⁰ Wan sikj doa en de Organisazion waut endat, kaun daut oppe Proow jestalt woaren, aus wie werkjlich tru sent. Wan wie nich oppaussen, kunn ons daut von Jehova aufbrinjen. See wie mol, woo daut fa de Israeliten wia, aus sikj doa waut endad. Ea Jehova an daut Jesaz jeef, haud daut Haupt vonne Famielje väl Oppgowen, waut lota de Priesta deeden. Biejlikj buden dee Aultoaren un deeden Jehova fa de Famielje Opfa brinjen (1. Mo. 8:20-21; 12:7; 26:25; 35:1, 6-7; Hiob 1:5). Oba aus Jehova an dan daut Jesaz jeef, kunn daut Haupt von de Famielje dise Sachen nich mea doonen, wäajen Jehova nu von Aaron siene Famielje Priestasch aunjestalt haud, om Opfa to brinjen. Wan daut Haupt von eene Famielje nu Sachen deed, waut bloos eenen Priesta toostunden, oba hee nich eent von Aaron siene Nokomen wia, kunn hee dootjemoakt woaren (3. Mo. 17:3-6, 8-9). d Wia daut veleicht de Uasoak, wuarom Korach, Datan, Abiram un de 250 Leida vom Volkj sikj jäajen Moses un Aaron stalden? (4. Mo. 16:1-3). Wie weeten daut nich krakjt, oba waut wie weeten, es, daut Korach un de aundre Mana Jehova nich tru bleewen. Wan du oppe Proow jestalt woascht, aus du tru best, wäajen sikj doa waut enne Organisazion endat, waut kaust du dan doonen?

11. Waut lia wie von eenje Kehatita?

¹¹ Moak met, wan sikj doa waut en de Organisazion endat. Aus de Israeliten en de Wiltnis wieren, hauden de Kehatita eene sea besondre Oppgow. Jiedatsmol wan dee wiedatrocken, wieren eenje von de Kehatita aunjestalt, de Bundeskjist veropp to droagen (4. Mo. 3:29, 31; 10:33; Jos. 3:2-4). Daut wia eene groote Iea! Oba aus de Israeliten ieescht en daut vesproakne Launt aunkjeemen, endad sikj doa waut fa de Kehatita. Nu must de Bundeskjist nich emma wiedajedroacht woaren. Rom de Tiet aus Salomo de Kjennich wia, worden eenje Kehatita aunjestalt aus Sinja, aundre aus Puatenwajchta un noch aundre musten sikj om de oppbewoade Sachen kjemren (1. Chr. 6:16-18; 26:1, 24). Doa es noanich wua oppjeschräwen, daut de Kehatita beleidicht wieren ooda eene wichtjere Oppgow wullen, wäajen dee ea soo väl Veauntwuatunk hauden. Waut lia wie doavon? Wan sikj doa en Jehova siene Organisazion waut endat, un ons daut uk traft, dan mott wie daut met ons gaunzet Hoat unjastetten. Du kaust Freid haben, endoont waut du fa eene Oppgow kjrichst. Un denkj emma doaraun: nich diene Veauntwuatunk moakt die wieetvoll  fa Jehova. Fa am es daut wichtja, daut du jehuarsom best, aus daut du irjenteene Oppgow hast (1. Sam. 15:22).

12. Woo jinkj Zaina daut, aus see utem Betel rutjeschekjt wort?

¹² See wie mol daut Biespel von Zaina. See wia fa äwa 23 Joa em Betel. Oba dan kjrieech see eene aundre Oppgow. Dit besondre Väarajcht to velieren, wia fa ar sea schwoa. See wort aus Sondapionia rutjeschekjt. Zaina sajcht: “Mie vefieed sikj daut sea. Ekj feeld mie to nuscht to brucken un docht bloos noch doaräwa no: ‘Waut deed ekj orrajcht?’” Eenje Breeda un Sestren enne Vesaumlunk muaken daut noch schlemma, aus see säden: “Wan dee met die wudden tofräd jewast sennen, dan wudd de Organisazion die nich rutjeschekjt haben.” Fa eene jewesse Tiet feeld Zaina sikj soo truarich, daut see jieda zeowes road. Oba see sajcht: “Ekj leet daut nich too, daut ekj aunfunk, aun Jehova siene Leew ooda de Organisazion to twiewlen.” Woo kunn Zaina en dise Omstend derchjedocht bliewen?

13. Waut deed Zaina, daut see met äare schlajchte Jefeelen foadich woaren kunn?

¹³ Woo kunn Zaina met äare schlajchte Jefeelen foadich woaren? See läsd en onse Bieekja soone Artikjels, waut fa äare Loag paussent wieren. De Artikjel “Met Mootloosichkjeit foadich woaren” em Woaktorm vom 1. Feebawoa 2001 holp ar besonda. En disen Artikjel wort utjelajcht, woo dän Bibelschriewa Markus daut jinkj, aus hee met biejlikj soone Jefeelen foadich woaren must, aus hee eene aundre Oppgow kjrieech. Zaina sajcht: “Markus sien Biespel wia fa mie soo aus Medizien, waut mie holp, met Mootloosichkjeit foadich to woaren.” Zaina hilt sikj uk aun äare Frind un trock sikj nich trigj. See bejaumad sikj uk nich selfst. See wort en, daut de heilja Jeist de Entscheidungen von Jehova siene Organisazion aunleit un daut de veauntwuatliche Breeda sea om ar bekjemmat wieren. See kunn uk enseenen, daut de Organisazion daut doonen must, waut daut baste wia, daut Jehova sien Woakj kaun derchjefieet woaren.

14. Waut fa eene Endrunk wia schwoa fa Vlado, un waut holp am, doawäajen mettomoaken?

¹⁴ Vlado es een 73-joascha Eltesta en Sloweenien. Am wia daut schwoa, aus se siene Vesaumlunk met eene aundre toopschmeeten, un dan daut Vesaumlungshus, wua hee hanwanken deed, toomuaken. Hee sajcht: “Ekj kunn daut eefach nich vestonen, wuarom  se soon schmocket Vesaumlungshus wudden toomoaken. Ekj wia uk een bät doll, wäajen wie hauden noch mol korz daut Vesaumlungshus oppjefrescht. Ekj sie een Descha un haud waut von de Meeblen jemoakt. Un besonda fa ons elre Vekjindja wia daut schwoa, ons aun aul daut auntopaussen, waut sikj nu jeendat haud.” Waut holp Vlado, de Endrungen to unjastetten? Hee sajcht: “Wan eena metmoakt, wan sikj waut en Jehova siene Organisazion endat, brinjt daut bloos goodet. Daut moakt ons uk reed, wan doa noch jratre Endrungen komen.” Hast du daut jroz schwoa, wäajen doa Vesaumlungen toopjeschmäten worden ooda du eene aundre Oppgow jekjräajen hast? Du kaust die secha sennen, daut Jehova vesteit, woo die daut jeit. Wan du soone Endrungen unjastetten deist un die faust aun Jehova un siene Organisazion helst, woascht du secha väl goodet beläwen (Psa. 18:26).

15. Woo kjenn wie derchjedocht bliewen, wan doa bennakaunt de Vesaumlunk Schwierichkjeiten oppkomen?

¹⁵ Wie räakjnen doamet, daut doa noch mea Schwierichkjeiten von bennakaunt de Vesaumlunk komen, wäajen daut Enj emma noda kjemt. Doawäajen mott wie derchjedocht bliewen. Soone Schwierichkjeiten kunnen eene Proow sennen, aus wie Jehova werkjlich tru sent. Wan du die velazt feelst wäajen daut, waut een Gloowesbrooda deed, dan lot die nich vebetren. Wan du von Jehova trajchtjewäsen woascht, dan kjikj nich doano, woo sea sikj die daut schämt, oba nemm dän Rot aun. Un wan sikj doa en Jehova siene Organisazion waut endat, wua du selfst met en best, dan moak doa von gaunzem Hoaten met un sie jehuarsom.

16. Woo kaust du wieda opp Jehova un siene Organisazion vetruen?

¹⁶ Du kaust opp Jehova un siene Organisazion vetruen, wan daut uk oppe Proow jestalt woat. Oba om tru to bliewen, motst du derchjedocht bliewen. Daut bediet, ruich to bliewen, kloa to denkjen un de Sachen soo to seenen, aus Jehova dee sitt. Studia äwa soone Menschen ut de Schreft, waut biejlikj soont derchmuaken un denkj äwa dee äa Biespel no. Bäd Jehova om Help un trakj die kjeenmol vonne Vesaumlunk trigj. Dan kaun doa komen, waut doa well – de Soton woat die kjeenmol von Jehova ooda siene Organisazion aufbrinjen kjennen (Jak. 4:7).