47. ARTIKJEL FA DAUT STUDIUM
Lot die derch nuscht von Jehova aufbrinjen
“HAR, ekj velot mie opp die” (PSA. 31:15)
LEET 122 Blieft staunthauft!
WAUT WIE SEENEN WOAREN a
1. Woo weet wie, daut Jehova dicht bie ons sennen well?
JEHOVA well ons Gott, ons Voda un ons Frint sennen. Hee well, daut wie am emma noda komen (Jak. 4:8). Hee beauntwuat onse Jebäda un halpt ons en schwoare Tieden, un derch siene Organisazion belieet un beschizt hee ons. Oba waut mott wie doonen, daut wie am emma noda komen kjennen?
2. Woo kjenn wie Jehova noda komen?
2 Wie kjennen Jehova noda komen, wan wie to am bäden, sien Wuat läsen un doaräwa nodenkjen. Wan wie daut doonen, dan woa wie emma dankboara woaren un mea Leew fa am kjrieen. Wie woaren am dan uk jehorchen wellen un am dee Iea jäwen, waut am uk traft (Opb. 4:11). Je bäta wie Jehova kjanen lieren, je dolla woa wie opp am un siene Organisazion vetruen, waut hee ons aus Help jeef.
3. Woo prooft de Soton ons von Jehova auftobrinjen, un waut kjenn wie doajäajen doonen? (Psalm 31:13-14).
3 De Soton prooft ons oba von Jehova auftobrinjen, besonda en soone Tieden, waut aulmols aul schwoa sent. Woo deit hee daut? Hee prooft, ons Vetruen opp Jehova un de Organisazion soo bie sacht to vedoawen. Oba kjenn wie doa waut jäajen doonen? Jo! Wan ons Gloowen stoakj es un wie nich aun Jehova twiewlen, dan woa wie Gott un siene Organisazion kjeenmol veloten (läs Psalm 31:14-15).
4. Von waut rät dis Artikjel?
4 Dis Artikjel rät von dree Schwierichkjeiten, waut von butakaunt de Vesaumlunk komen. Dee kunnen ons bat doa brinjen, daut wie daut Vetruen opp Jehova un siene Organisazion velieren. Woo wudden ons dise Schwierichkjeiten von Jehova aufbrinjen kjennen? Un waut kjenn wie doonen, om jäajen dise Faulen von dän Soton to stonen?
WAN DOA GROOTE TRUBBELS OPPKOMEN
5. Woo kjennen Trubbels ons bat doa brinjen, daut wie nich mea opp Jehova un siene Organisazion vetruen?
5 Eenjemol komen doa en ons Läwen jratre Trubbels opp. Veleicht es daut Jäajenstaunt enne Famielje ooda daut wie nich mea Oabeit haben. Woo kunnen ons soone Schwierichkjeiten bat doa brinjen, daut wie nich mea opp Jehova vetruen un von siene Organisazion aufkomen? Wan wie aul fa eene lange Tiet Trubbels hauden, dan sent wie veleicht onen Hopninj un mootloos. Krakjt daut well de Soton utnutzen. Hee prooft, ons bat doa to brinjen, daut wie beduaren, aus Jehova ons werkjlich leeft. De Soton well haben, daut wie denkjen sellen, daut Jehova un siene Organisazion ons daut Lieden toosaten. Biejlikj soo wia daut bie de Israeliten en Ägipten. Ieeschtlich jleewden dee daut, daut Jehova Moses un Aaron aunjestalt haud, om dee von de Sklowarie frietomoaken (2. Mo. 4:29-31). Oba lota dan, aus de Farao an daut Läwen schwoa muak, jeewen dee Moses un Aaron de Schult. Dee säden to an: “Jie haben ons Nomen bie däm Kjennich un siene Rejierungs Mana vedorwen. Daut es aus wan jie an haben daut Schwieet enne Haunt jeschowen, wuamet see ons ombrinjen woaren” (2. Mo. 5:19-21). Es daut nich truarich, daut dee Gott siene true Deena de Schult jeewen? Wan du aul fa eene lange Tiet hast must schwoaret derchmoaken, woo kaust du dan dien Vetruen opp Jehova un siene Organisazion hoolen?
6. Waut lia wie doavon, woo Habakuk met siene Trubbels omjinkj? (Habakuk 3:17-19).
6 Saj Jehova, woo die daut jeit un lot die von am halpen. De Profeet Habakuk haud väl Trubbels. Daut lat soo, daut hee opp eene Sauz mau rajcht beduad, aus Jehova werkjlich waut om am romjeef. Doawäajen säd hee Jehova en een Jebäd krakjt, woo am daut jinkj. Hee bäd: “HAR, woo lang saul ekj roopen no diene Help, un du horchst doa nich no? . . . Wuarom moakst du mie oppmoakjsom opp daut waut orrajcht es, un du kjikjst daut too?” (Hab. 1:2-3). Dit Jebäd kjeem von Hoaten un Jehova jeef sienen truen Deena eene Auntwuat (Hab. 2:2-3). Habakuk docht deep doaräwa no, waut Jehova aules fa siene Deena jedonen haud, un doaderch kunn hee wada Freid haben. Hee wist dan wada gaunz secha, daut Jehova waut om am romjeef un am uk halpen wudd, met jieda Schwierichkjeit foadich to woaren (läs Habakuk 3:17-19). Waut lieescht du doavon? Wan du Trubbels hast, dan bäd to Jehova un saj am krakjt, woo die daut jeit – un dan lot die von am uk halpen. Wan du daut deist, dan kaust du die secha sennen, daut Jehova die de Krauft jäwen woat, waut die fält toom uthoolen. Un wan du dise Krauft ieescht selfst späascht, dan woat dien Gloowen noch jrata woaren.
7. Waut wull Shirley äa Frintschoft ar enbillen, un wuarom kunn see äaren Gloowen wieda stoakj hoolen?
7 Hool die aun diene jeistelje Jewanheiten. Daut holp Shirley, eene Sesta en Papua-Nie-Guinea, aus see groote Trubbels derchmuak. b Shirley äare Famielje wia soo oam, daut dee to Tieden mol afens to äten hauden. Eena von äa Frintschoft proowd, ar oppem Twiewel to brinjen. Hee säd to ar: “Du sajchst, daut Gott sien heilja Jeist die halpt, oba wua es dee Help? Kjikj, diene Famielje es noch emma oam! Un du deist diene Tiet bloos met prädjen vekwosen.” Shirley steit too: “Ekj jrebbeld doaräwa no: ‘Jeft Gott werkjlich waut om ons rom?’ Doawäajen bäd ekj fuaz to Jehova un säd am krakjt, waut mie derch dän Kopp jinkj. Ekj hieed uk nich opp, de Bibel un onse Bieekja to läsen, un deed wieda prädjen un wankt no de Toopkomes.” Daut dieed nich lang, bat Shirley enwort, daut Jehova äare Famielje holp – dee wieren schaftich un musten nich Hunga lieden. Shirley sajcht: “Ekj kunn daut späaren, daut Jehova miene Jebäda beauntwuaten deed!” (1. Tim. 6:6-8). Wan du die aun diene jeistelje Jewanheiten helst, woascht du uk nich tooloten, daut Schwierichkjeiten ooda Twiewel die von Jehova aufbrinjen.
WAN BREEDA SCHLAJCHT BEHAUNDELT WOAREN
8. Waut kaun met Breeda passieren, waut en Jehova siene Organisazion Veauntwuatunk haben?
8 Doa woaren eenjemol Läajes vetalt von de Breeda, waut en Jehova siene Organisazion Veauntwuatunk haben. Onse Jäajna moaken dee dan noch bekaunt äwa de Post un daut Internet (Psa. 31:14). Eenje Breeda worden enjestopt un soo aus Vebräakja behaundelt. De ieeschte Christen hauden sea soonen Trubbel, aus de Apostel Paulus ojjerajcht beschulcht un enjestopt wort. Waut deeden dee dan?
9. Waut deeden eenje Christen, aus de Apostel Paulus faustjenomen wia?
9 Aus Paulus en Room faustjenomen wia, hieeden eenje von de ieeschte Christen opp, am to halpen (2. Tim. 1:8, 15). Wuarom deeden dee daut? Veleicht schämden dee sikj, met am toop to sennen, wäajen de Menschen Paulus soo aus eenen Vebräakja aunsagen (2. Tim. 2:8-9). Ooda veleicht hauden dee eefach Angst, daut dee uk wudden enjestopt woaren. Oba stal die mol väa, woo Paulus daut jinkj! Hee wia aul soo väl derch, un hee haud mau rajcht sien Läwen opp Spell jesat fa dee (Apj. 20:18-21; 2. Kor. 1:8). Wie wellen secha kjeenmol soo woaren aus dee, waut Paulus veleeten, aus am daut soo needich aun dee äare Help fäld. Aun waut sell wie denkjen, wan Breeda, waut väl Veauntwuatunk haben, vefolcht woaren?
10. Waut sell wie nich vejäten, wan Breeda vefolcht woaren, waut väl Veauntwuatunk haben, un wuarom?
10 Vejät nich, wuarom wie vefolcht woaren un wäa doahinja steit. Ons vefieet sikj daut nich, wan de Soton besonda dee Breeda aunjript, waut väl Veauntwuatunk haben, wäajen en 2. Timotäus 3:12 sajcht daut: “Aul dee, dee dän fausten Wellen haben aus Christen fromm to läwen, motten met Vefoljunk räakjnen.” De Soton well, daut dise Breeda opphieren, Jehova tru to deenen, un dee well ons engrulen (1. Pet. 5:8).
Wan Paulus uk en Kjäden un enjestopt wia, unjastett Onesiforus am oba wieda. Onse Breeda un Sestren unjastetten vondoag dän Dach uk onse Gloowesbreeda, waut enjestopt sent, soo aus daut nojemoakte Bilt wiest (See Varsch 11-12)
11. Waut lia wie von Onesiforus? (2. Timotäus 1:16-18).
11 Sie diene Breeda tru un unjastett dee (läs 2. Timotäus 1:16-18). Mank de ieeschte Christen wia eena, waut Onesiforus heet. Aus Paulus faustjenomen wia, stald dee sikj nich soo opp aus de aundre. Daut sajcht von am: “[Hee] schämd sikj nich met … [Paulus siene] Kjäden”. Onesiforus socht mau rajcht no Paulus, un aus hee am dan funk, proowd hee am met aules to halpen, waut doa fäld. Daut haud Onesiforus kunt sien Läwen kosten! Waut lia wie doavon? Wie sellen nich tooloten, daut de Menschenforcht ons doavon aufhelt, daut wie onse Breeda nich mea unjastetten, wan dee vefolcht woaren. Wie wellen leewa fa dee enstonen un aules doonen, om dee to halpen (Spr. 17:17). An fält daut aun onse Leew un Unjastettunk.
12. Waut lia wie von onse Breeda un Sestren en Russlaunt?
12 Onse Breeda un Sestren en Russlaunt sent een goodet Biespel, wan daut doarom jeit, Gloowesbreeda to unjastetten, waut enjestopt sent. Wan doa wäa verem Jerecht jebrocht woat, dan komen doa väl Breeda un Sestren han, om dee to unjastetten. Waut lia wie doavon? Wan soone Breeda, waut väl Veauntwuatunk haben, vefolcht ooda enjestopt woaren ooda dee eenen schlajchten Nomen jemoakt woat, dan lot die nich engrulen. Bäd fa dee. Kjemma die om dee äare Famielje un sieekj no aundre Jeläajenheiten, woo du an halpen kaust (Apj. 12:5; 2. Kor. 1:10-11).
WAN WIE VESPOTT WOAREN
13. Waut kaun ons bat doa brinjen, Jehova un siene Organisazion nich mea soo to vetruen, wan se ons vespotten?
13 Eenjemol vespotten de Oabeitspoatna, Schoolpoatna ooda daut Frintschoft ons, wäajen wie prädjen gonen ooda wäajen wie ons no daut rechten, waut Jehova fa rajcht talt (1. Pet. 4:4). Veleicht sajen dee een bät soont aus: “Ekj jleich die äwajens, oba en dienen Gloowen jeft daut too väl Räajlen. Dee helt nich werkjlich waut en.” Eenje jleichen daut veleicht nich, woo wie met Utjeschlotne omgonen un sajen: “Woo kaust du sajen, daut du Leew hast?” Wan wie soont hieren, kaun doa en ons Twiewel oppkomen. Veleicht jrebbel wie doaräwa no: “Velangt Jehova met eemol too väl von mie? Es daut nich soo, daut doa sea väl Räajlen en onse Organisazion sent?” Wan die daut soo jeit, woo kaust du dan dicht bie Jehova un siene Organisazion bliewen?
Aus Hiob von siene faulsche Frind vespott wort, jleewd hee dee äare Läajes nich. Hee wia sikj gaunz eenich, Jehova tru to bliewen (See Varsch 14)
14. Waut sell wie doonen, wan aundre ons vespotten, wäajen wie daut doonen, waut Jehova fa rajcht talt? (Psalm 119:50-52).
14 Sie die eenich, daut to doonen, waut Jehova fa rajcht talt. Wan Hiob uk vespott wort, deed hee doawäajen emma daut, waut Jehova fa rajcht tald. Eena von Hiob siene faulsche Frind proowd am mau rajcht entobillen, daut Gott doa nuscht om romjeef, aus Hiob daut rajchte deed (Hiob 4:17-18; 22:3). Oba Hiob jleewd soone Läajes nich. Hee wist krakjt, daut Jehova siene Jesazen un Gruntsauzen rajcht wieren, un hee wia sikj gaunz eenich, dee to hoolen. Hee leet daut nich too, daut aundre am bat doa brinjen kunnen, daut hee nich mea tru wia (Hiob 27:5-6). Waut lieescht du doavon? Wan se die vespotten, dan lot nich too, daut du aun Jehova siene Jesazen un Gruntsauzen twiewelst. Denkj bloos mol doaraun, woo daut en dien Läwen bat nu utkjeem, wan du daut deetst, waut Jehova fa rajcht tald. Wia daut nich emma daut baste fa die? Sie die uk gaunz eenich, dee Organisazion to unjastetten, waut daut deit, waut Jehova fa rajcht talt. Dan woat die nuscht von Jehova aufbrinjen kjennen, endoont woo sea se die vespotten (läs Psalm 119:50-52).
15. Wuarom wort Brizit vespott?
15 See wie mol daut Biespel von Brizit, eene Sesta von Indien. See wort wäajen äaren Gloowen von äare Famielje vespott. Aune 1997 leet see sikj deepen, un nich lang doano velua äa Maun de Oabeit. Hee wort sikj eenich, daut hee un Brizit un äare Dajchta no siene Elren trakjen wudden, waut enne aundre Staut läwden. Oba Brizit äare Trubbels worden bloos noch jrata. Wäajen äa Maun nich Oabeit haud, must see de Wäakj äwa utschaufen, om fa de Famielje to sorjen. Un dan wia de notste Vesaumlunk noch rom 350 Kilomeeta (220 Miel) auf. De Famielje von äaren Maun wia jäajen ar, wäajen äaren Gloowen. Daut wort soo schlemm, daut see wada omtrakjen musten. Dan storf äa Maun onverhofs, un lota storf noch äare 12-joasche Dochta aun Kjräft. Daut wudd aul schwoa jenuach jewast sennen, oba dan jeef Brizit äa Frintschoft ar noch de Schult fa aules. Dee säden, wan see nich wudd eent von Jehova siene Zeijen jeworden sennen, wudd aules nich passieet sennen. Oba Brizit vetrud wieda opp Jehova un bleef dicht bie siene Organisazion.
16. Waut fa goodet beläwd Brizit doaderch, daut see dicht bie Jehova un siene Organisazion bleef?
16 Wäajen Brizit soo wiet auf vonne Vesaumlunk wond, säd een Kjreisoppsechta to ar, daut see wudd kjennen en äare Jäajent prädjen un bie ar tus de Vesaumlungen aufhoolen. Ieeschtlich docht see, daut wia bloos too schwoa. Oba see kjeem dän Rot no. See räd met aundre von de goode Norecht, hilt tus de Toopkomes auf un neem sikj uk de Tiet fa daut Famieljenstudium met äare Dajchta. Woo jinkj daut wieda? Brizit kunn met väle aunfangen, de Bibel to studieren, un miere von dee leeten sikj deepen. Aune 2005 funk see aun, Pionia to sennen. Daut see opp Jehova un siene Organisazion vetrud, wort beloont. Äare Dajchta deenen Jehova, un en äare Jäajent jeft daut nu twee Vesaumlungen! Brizit weet, daut see daut schwoare bloos met Jehova siene Krauft uthoolen kunn. Hee holp ar uk, met dän Spott von äare Famielje foadich to woaren.
HOOL DIE FAUST AUN JEHOVA UN SIENE ORGANISAZION
17. To waut sell wie ons gaunz eenich sennen?
17 De Soton well ons enbillen, daut Jehova ons tochloten woat, wan wie Trubbels haben. Hee well uk, daut wie jleewen, daut ons Läwen schwanda woat, wan wie Poat von Jehova siene Organisazion bliewen. Hee well ons uk engrulen, wan se Breeda, waut Veauntwuatunk haben, eenen schlajchten Nomen moaken ooda soogoa vefoljen un enstoppen. Un wan wie vespott woaren, well hee ons bat doa brinjen, daut wie nich mea opp Jehova siene Jesazen un Gruntsauzen vetruen un uk nich mea opp Jehova siene Organisazion. Oba wie weeten goot, daut daut Soton siene Faulen sent, un wie loten ons nich hinjarem Licht fieren (2. Kor. 2:11). Sie die gaunz eenich, nuscht von dän Soton siene Läajes to jleewen un die gaunz faust aun Jehova un siene Organisazion to hoolen. Jehova woat die kjeenmol veloten (Psa. 28:7). Doawäajen lot die uk derch nuscht von Jehova aufbrinjen (Reem. 8:35-39).
18. Waut woa wie en dän näakjsten Artikjel seenen?
18 En disen Artikjel hab wie nu äwa Sachen jerät, waut von butakaunt de Vesaumlunk komen un ons von Jehova aufbrinjen kunnen. Oba ons Vetruen opp Jehova un siene Organisazion kaun uk derch soont aufjeprooft woaren, waut von bennakaunt de Vesaumlunk kjemt. Woo kjenn wie dan met soone Schwierichkjeiten omgonen? Daut woa wie en dän näakjsten Artikjel seenen.
LEET 118 “Stoakj ons dän Gloowen!”