1-2. (a) Äwa waut vonne Froagen woa wie nu räden? (b) Waut wiest, daut Jehova ons jieren halpen well?

 JEHOVA kaun ons halpen, met aul onse Schwierichkjeiten trajchttokomen un daut wie Freid haben aun onsen Deenst. Woo halpt hee ons? Woo kaun Jehova siene Help ons daut dolste togood komen? Äwa dise Froagen woa wie en disen Artikjel räden. Oba ea wie daut doonen, well wie ons noch eene aundre Froag unjastonen: Well Jehova ons werkjlich halpen?

² Daut, waut de Apostel Paulus en sienen Breef aun de Hebräa schreef, kaun ons halpen, de Auntwuat to finjen. Hee schreef: “De Har es dee, dee mie halpt, ekj woa mie nich ferchten. Waut kaun een Mensch mie aundoonen?” (Heb. 13:6). Een Bibel-Wieedbuak sajcht, daut daut Wuat, waut en disen Varsch met “dee, dee mie halpt,” ooda Helpa, äwasat woat, von wäm rät, waut eenen aundren schwind uthalpt, waut no Help schricht. Stal die väa, woo bosich Jehova reed es, wäm to halpen, dän daut needich fält. Du woascht nu secha uk sajen, daut dit bewiest, daut Jehova reed es, ons to halpen – un daut soogoa jieren well. Wie kjennen met Freiden uthoolen, wiels wie Jehova opp onse Sied haben.

3. Woo halpt Jehova ons, daut wie ons schwoaret met Freiden uthoolen kjennen?

³ Opp waut vonne veschiedne Wäaj halpt Jehova ons, daut wie ons schwoaret met Freiden uthoolen kjennen? Well wie doatoo mol en daut Buak Jesaja nennkjikjen. Wuarom? Wiels een deel von dise Profezeiungen, waut Jehova Jesaja openboad, sent sea goot fa Gott siene Deena vondoag dän Dach. Un dan räd Jesaja uk noch foaken soo von Jehova,  daut wie daut leicht vestonen kjennen. Daut see wie biejlikj en Jesaja, Kapitel 30. Doa beschrift Jesaja daut soo, daut wie ons daut uk leicht väastalen kjennen, woo Jehova ons halpt. Hee deit daut opp dree Wäaj: Hee horcht oppmoakjsom no onse Jebäda un beauntwuat dee. Hee leit ons uk aun, un hee säajent ons nu aul un uk lota. Well wie ons dise Sachen mol een bätje neiwa unjastonen.

4. (a) Waut säd Jehova von de Juden en Jesaja siene Tiet, un waut leet hee too? (b) Waut vonne Hopninj jeef Jehova dee, waut Gloowen hauden? (Jesaja 30:18-19).

⁴ Aum Aunfank von Jesaja, Kapitel 30 sajcht Jehova, daut de Juden “jäajenaun sent” un daut dee äare Sinden bloos noch oaja muaken. Dan sajcht hee wieda: “See sent een onjehuarsomet Volkj … un dee horchen nich no waut de HAR väasajcht” (Jes. 30:1, 9). Wiels de Menschen nich jehorchen deeden, säd Jesaja verut, daut Jehova dee wudd lieden loten (Jes. 30:5, 17; Jer. 25:8-11). Un krakjt soo kjeem daut rom, aus de Babelonia dee met no Babel neemen. Doa wieren oba uk soone mank, waut Gloowen beweesen. Jesaja säd, daut daut fa an eene Hopninj jeef, daut Jehova an irjenteenen Dach wudd trigj no Jerusalem brinjen (läs Jesaja 30:18-19, NW b). Un daut erfeld sikj krakjt, aus Jehova dee von Babel friemuak. Oba daut erfeld sikj nich fuaz. De Sauz, “Jehova luat jeduldich doano, daut hee junt goot sennen kaun”, wiest, daut doa ieescht wudd motten eene Tiet vegonen, bat hee de True wudd trigjbrinjen. Doawäajen musten de Israeliten 70 Joa en Babel faust sennen, ea eenje trigj no Jerusalem kunnen (Jes. 10:21; Jer. 29:10). Aus dee ieescht trigj wieren, roaden dee nich mea, wiels dee jefangen wieren, oba wieren schaftich, wiels see wada trigj en äa Launt wieren.

5. Waut vesechat Jesaja 30:19 ons?

⁵ Vondoag dän Dach kjennen ons dise Wieed väl Moot jäwen, wan daut sajcht: “Wan du om Help schrichst, woat hee die gaunz secha goot sennen” (Jes. 30:19, NW). Jesaja vesprakjt ons, daut Jehova ons oppmoakjsom toohorcht, wan wie om Help schrieen, un ons bosich auntwuaten woat, wan wie am doano froagen. Jesaja sajcht wieda: “Soo schwind aus hee die hieet, woat hee die auntwuaten”. Dit halpt ons denkjen, daut ons Voda ons halpen well ooda soogoa een Velangen haft, dee to halpen, waut am doano froagen. Dit to weeten, woat ons halpen, nich onse Freid to velieren, wan wie schwoaret derchmoaken.

6. Woo jäwen de Wieed en Jesaja auntovestonen, daut Jehova no jieda Jebäd horcht, waut jieda Deena am sajcht?

⁶ Waut kjenn wie von disen Varsch noch äwa onse Jebäda lieren? Jehova horcht oppmoakjsom no jiedrem eenen sien Jebäd. Woo weet wie daut? Aum Aunfank von Jesaja, Kapitel 30 woaren de Wieed “jie” un “junt” jebrukt, wiels Jehova doa to eene Grupp Menschen rät. Oba en Varsch 19 woaren de Wieed “du” un “die” jebrukt, wäajen hee doa met eenselne Menschen rät. Jesaja schreef: “Du [woascht] secha nich mea roaren. … Hee [woat] die gaunz secha goot sennen; … hee [woat] die auntwuaten”. Jehova es een leeftolja Voda, un hee woat nich to eenen onmootjen Sän  ooda Dochta sajen: “Du saust soo stoakj sennen aus dien Brooda ooda diene Sesta!” Väl mea kjikjt hee no ons un horcht selfst no jiedrem eenen sien Jebäd (Psa. 116:1; Jes. 57:15).

7. Woo muaken Jesaja un Jesus daut dietlich, daut wie sellen aunhoolent bäden?

⁷ Wan wie ver Gott komen un am waut sajen wellen, waut ons oppem Hoaten licht, dan es siene Auntwuat veleicht daut ieeschte, daut hee ons Krauft jeft, met de Loag foadich to woaren. Un wan daut met onse Trubbels veleicht lenja dieet, aus waut wie jedocht haben, dan mott wie Jehova veleicht foaken om Krauft bäden, daut wie uthoolen kjennen. Hee well, daut wie daut doonen, wiels daut wiesen de Wieed en Jesaja, wua daut sajcht: “Lot am kjeene Ru” (Jes. 62:7, JHF). Waut meent daut krakjt? Wie sellen soo aunhoolent to Jehova bäden, aus wudd wie am kjeene Ru loten. Wan wie dise Wieed en Jesaja läsen, dan komen ons veleicht Jesus siene Jlikjnisen em Kopp, wua hee en Lukas 11:8-10, 13 von rät. Doa rot Jesus ons too, daut wie “aunhoolent” bäden un wieda om sienen heiljen Jeist froagen. Wie kjennen Jehova uk doarom prachren, daut hee ons aunleit, soo daut wie kjennen goode Entscheidungen trafen.

8. Woo erfeld sikj Jesaja 30:20-21 en de ieeschtemmasche Tiet?

⁸ Läs Jesaja 30:20, NW; 30:21. Aus de Armee von Babel Jerusalem fa eentunhaulf Joa beloagat haud, wieren de Menschen daut schwoare soo jewant, aus dee daut ea jewant wieren, Broot un Wota to haben. Oba no Varsch 20 un 21 no vespruak Jehova de Juden, daut hee an raden wudd, wan see wudden omkjieren un äa Läwen endren. Jesaja nand Jehova dän “Groota Liera”, un vespruak de Menschen, daut Jehova an lieren wudd, woo see am aunbäden sullen, daut hee daut aunnämen kunn. Aus de Juden von Babel trigjkjeemen, wees sikj daut werkjlich ut, daut Jehova äa Groota Liera wia. Unja siene Leidunk kunnen dee de woare Aunbädunk wada oppstalen. Daut es een Säajen, daut wie Jehova uk aus onsen Grooten Liera haben kjennen.

9. Waut es eene Wajch, woo Jehova ons aunleit?

⁹ En dise Varzhen sajcht Jesaja, daut wie soo sent aus Schiela, waut opp twee Wäaj von Jehova belieet woaren. Ieeschtens sajcht Jesaja: “Du woascht dienen Grooten Liera met diene ieejne Uagen seenen.” Hia jeft daut auntovestonen, daut de Liera ver siene Schiela steit. Wie haben de groote Iea, daut Jehova ons uk belieet. Derch siene  Organisazion kjrie wie gaunz kloare Aunwiesungen: biejlikj derch de Toopkomes, de Kongressen, derch de biblische Bieekja un JW Broadcasting^® Programs. Sent wie doafäa nich dankboa? Aul daut un noch väl aundret halpt ons, met Freiden uttohoolen.

10. Opp waut vonne Wajch hia wie Gott siene Stemm von hinja ons?

¹⁰ Jesaja rät noch von eene aundre Wajch, woo Jehova ons lieet un sajcht: “Jiedatsmol, wan jie eenen Wajch ooda dän aundren aufdreien wellen, woa jie von hinja junt [een Wuat] hieren”. De Profeet jeft hia auntovestonen, daut de Liera gaunz oppmoakjsom hinja siene Schiela jeit un dee dän Wajch wiest un an aunleit. Woo hia wie Gott siene Stemm hinja ons? Wan wie sien Wuat, de Bibel, läsen. Dee es von Gott enjejäft un aul lang trigj oppjeschräwen (Jes. 51:4).

11. Waut mott wie doonen, om daut wie met Freiden uthoolen kjennen, un wuarom?

¹¹ Woo kjenn wie daut mieeschte doavon haben, woo Jehova ons derch sien Wuat un siene Organisazion leit? Kjikj mol jeneiw, waut Jesaja säd. Hee säd ieeschtens: “Daut es de Wajch”, un tweedens: “Go doa” (Jes. 30:21). Daut rieekjt nich too, bloos to weeten, woont “de Wajch” es. Wie motten uk doabowen gonen. Derch Jehova sien Wuat un woo de Organisazion daut utlajcht, lia wie, waut Jehova von ons haben well. Wie lieren uk, woo wie daut nokomen kjennen. Daut wie met Freiden en Jehova sienen Deenst uthoolen kjennen, mott wie beid Sachen doonen. Bloos wan wie daut lieren un daut uk nokomen, kjenn wie ons secha sennen, daut Jehova ons doafäa beloonen woat.

12. Waut säd Jehova en Jesaja 30:23-26, woo hee siene Deena säajnen wudd?

¹² Läs Jesaja 30:23-26. Woo erfeld sikj dise Profezeiunk aun de Juden, waut von Babel trigj no daut Launt Israel kjeemen? Jehova deed sea väl fa de Juden. Hee jeef dee to äten un waut dee toom läwen brukten. Daut wichtichste wia oba, daut dee aules kjrieejen, waut dee brukten toom am noda komen un am wada aunfangen, oppe rajchte Wajch to deenen. Gott siene Deena hauden noch kjeenmol ea soo väl goode Sachen von am jekjräajen. De Varsch 26 wiest, daut Jehova dee mea Licht jeef – aulsoo daut dee sien Wuat noch bäta vestonen kunnen (Jes. 60:2). Derch aul dise Säajnungen kunnen dee “sikj von Hoaten freien” un kunnen am wieda deenen un hauden wada Krauft, met Freiden uttohoolen (Jes. 65:14).

13. Woo es de woare Aunbädunk en onse Tiet wada häajestalt worden?

 ¹³ Haft dise Profezeiunk, daut de woare Aunbädunk wada häajestalt woat, uk waut met ons to doonen? Gaunz secha! Woo? Von aune 1919 aun sent millionende Menschen von daut Groote Babel, waut aule faulsche Gloowes väastalt, friejekomen. Dee sent no eene Städ jekomen, waut noch bäta wia aus daut vesproakne Launt en Israel. Dee sent no daut jeistelje Paradies jekomen (Jes. 51:3; 66:8). Waut meent daut krakjt?

14. Waut es daut jeistelje Paradies, un wäa läft doa vondoag dän Dach bennen? (See de Footnoot “Wieed utjelajcht”.)

¹⁴ Von aune 1919 aun läwen de Jesaulwde aul en een jeisteljet Paradies. c Dee, waut de Hopninj haben, oppe Ieed to läwen, aulsoo de “aundre Schop”, sent uk en daut jeistelje Launt nennjekomen un kjennen doaderch uk Jehova sienen Säajen beläwen (Joh. 10:16; Jes. 25:6; 65:13).

15. Wua es daut jeistelje Paradies nu?

¹⁵ Wua es daut jeistelje Launt, ooda Paradies, vondoag dän Dach? Jehova siene Deena sent äwa de gaunze Welt. Doawäajen jeft daut daut jeistelje Paradies uk aulawäajen oppe Welt. Krakjt endoont wua wie sent, wie kjennen emma en daut jeistelje Paradies sennen, soo lang aus wie de woare Aunbädunk unjastetten.

16. Woo kjenn wie wieda doano kjikjen, woo schmock daut jeistelje Paradies lat?

¹⁶ Doa es eenjet, waut wie doonen motten, daut wie kjennen en daut jeistelje Paradies bliewen, un eent doavon es, daut wie dankboa sent fa onse Breeda äwa de gaunze Welt. Woo kjenn wie daut? Wan wie nich too sea no de Breeda äare schwake Sieden kjikjen, oba no daut goode (Joh. 17:20-21). Wuarom es daut soo needich? Denkj mol han, du best en eenen schmocken Woolt, un du sitst doa een deel veschiedne Beem. Krakjt soo es daut uk en daut jeistelje Paradies. Daut lat soo schmock, wäajen daut soo väl veschiedne Breeda jeft, waut soo sent aus de veschiedne Beem (Jes. 44:4;  61:3). Wie motten ons aunstrenjen, doano to kjikjen, woo schmock dän Woolt lat, un nich no de schwake Sieden von de eenselne Beem rom ons. Wie wudden nich sellen tooloten, daut onse ieejne Onvolkomenheiten ooda de aundre äare von de Vesaumlunk, ons doavon auflenkjen kunnen, to seenen, woo schmock onse jeistelje Famielje em gaunzen lat.

17. Waut kaun jieda eena doonen, daut daut en de Vesaumlunk Eenichkjeit jeft?

¹⁷ Waut mott jieda eena von ons doonen, daut doa enne Vesaumlunk Eenichkjeit es? Wie motten aula no Fräd sträwen (Mat. 5:9; Reem. 12:18). Jiedatsmol, wan wie waut doatoo doonen, daut daut Fräd mank onse Breeda jeft, moak wie daut jeistelje Paradies noch schmocka. Wie sellen uk em Denkj hoolen, daut Jehova jieda eenselnen, waut en daut jeistelje Paradies es, no de woare Aunbädunk jetrocken haft (Joh. 6:44). Denkj mol han, woo schaftich Jehova es, wan hee sitt, woo sea wie doaropp schaufen, daut doa Fräd un Eenichkjeit mank siene Deena es, dee hee soo väl räakjent! (Jes. 26:3; Hag. 2:7).

18. Äwa waut sell wie foaken nodenkjen, un wuarom?

¹⁸ Jehova jeft siene Deena een deel goodet. Woo kjenn wie daut mieeschte doavon haben? Wan wie deep doaräwa nodenkjen, waut wie en Gott sien Wuat un en de biblische Bieekja studieet haben. Aul dit kaun ons halpen, christelje Ieejenschoften to kjrieen un ons “aus Breeda” to leewen un ons en de Vesaumlunk “unjarenaunda von Hoaten goot” to sennen (Reem. 12:10). Wan wie äwa de Säajnungen nodenkjen, waut wie nu kjrieen, woa wie noch jratre Frind met Jehova woaren. Un wan wie äwa daut goode nodenkjen, waut Jehova ons lota jäwen woat, woat onse Hopninj noch stoakja, daut wie am noch mol woaren fa emma deenen kjennen. Aul dit woat ons halpen, daut wie Jehova noch met mea Freid deenen kjennen.

19. (a) Äwa waut kjenn wie ons secha sennen no Jesaja 30:18 no? (b) Waut woat ons halpen, met Freiden uttohoolen?

¹⁹ Wan Jehova een Enj moaken woat met dise schlajchte Welt, “woat [hee] oppstonen” fa ons (Jes. 30:18, NW). Wie kjennen ons gaunz secha sennen, daut “Jehova … een Gott [es] von Jerajchtichkjeit” un nich tooloten woat, daut dän Soton siene Welt eenen Dach lenja besteit, aus needich es (Jes. 25:9). Wie luaren met Jehova toop jeduldich no dän Dach, wan wie woaren friejemoakt woaren. Un soo lang well wie aunhoolent bäden, studieren un daut uk nokomen. Wie kjennen uk äwa de Säajnungen nodenkjen. Dan woat Jehova ons halpen, en sienen Deenst met Freiden uttohoolen.