45. ARTIKJEL FA DAUT STUDIUM
Woo Jehova ons biem prädjen halpt
“See sellen nu weeten, daut doa een Profeet mank an es” (HES. 2:5)
LEET 67 “Prädj daut Wuat”
WAUT WIE SEENEN WOAREN a
1. Opp waut kjenn wie räakjnen, un äwa waut kjenn wie ons secha sennen?
WIE kjennen doamet räakjnen, daut wie woaren Jäajenstaunt haben, wan wie prädjen. Daut kaun met de Tiet goot noch schlemma woaren (Dan. 11:44; 2. Tim. 3:12; Opb. 16:21). Oba wuarom kjenn wie ons doawäajen secha sennen, daut Jehova ons dee Help jäwen woat, waut wie brucken? Jehova haft siene Deena noch emma jeholpen, äare Oppgow derchtofieren – krakjt endoont woo schwoa daut wia. Een Biespel es de Profeet Hesekiel, waut de faustjenomne Juden en Babel prädijd. Well wie mol eenjet seenen, waut hee beläwd.
2. Waut säd Jehova äwa de Menschen, waut Hesekiel prädjen deed, un waut woa wie en disen Artikjel seenen? (Hesekiel 2:3-6).
2 Woo wieren de Menschen, waut Hesekiel prädjen deed? Jehova säd, daut dee “jäajenaun”, “stieekoppich” un hoat enjestalt wieren. Dee deeden wee soo aus Spekjasch un wieren jefäadlich, soo aus Skorpionen. Daut es nich toom wundren, daut Jehova emma wada to Hesekiel säd: “Oba enjst die nich”! (Läs Hesekiel 2:3-6.) Hesekiel kunn sienen Deenst derchfieren, wäajen hee (1) von Jehova jeschekjt wia, wäajen hee (2) Krauft kjrieech derch Gott sienen heiljen Jeist, un wäajen hee (3) sikj dän Gloowen stoakjen deed derch Gott siene Wieed. Woo holpen am dise dree Sachen? Un woo halpen dee ons?
HESEKIEL WIA VON JEHOVA JESCHEKJT
3. (a) Waut haft Hesekiel woomäajlich Krauft jejäft? (b) Woo vesechad Jehova am, daut hee am unjastetten wudd?
3 Jehova säd to Hesekiel: “Ekj well haben, daut du saust … gonen” (Hes. 2:3-4). Dise Wieed motten Hesekiel väl Moot jejäft haben. Wuarom? Secha docht am doa noch von, daut Jehova meist soone Wieed jebrukt haud, aus hee Moses un Jesaja aus Profeeten aunstald (2. Mo. 3:10; Jes. 6:8). Hesekiel wist uk, daut Jehova dise beid Profeeten jeholpen haud, met Schwierichkjeiten foadich to woaren. Aus Jehova twee Mol to Hesekiel säd: “Ekj well haben, daut du … jeist”, haud hee jenuach Uasoak, opp Jehova to vetruen, daut hee am unjastetten wudd. Un dan noch, aus Jehova met Hesekiel räd, säd Hesekiel foaken: “Un mie wort kloa waut de HAR to sajen haud” (Hes. 6:1). Un wie läsen uk emma wada, daut hee bie soone Jeläajenheiten säd: “Mie wort wada kloa, waut de HAR to sajen haud” (Hes. 12:1). Hesekiel wia sikj secha, daut Jehova am jeschekjt haud. Un hee wia uk noch een Sän von eenen Priesta. Meist secha haft sien Voda am uk jelieet, daut Jehova emma vesproaken haud, siene Profeeten to halpen. To Isaak säd hee: “Ekj sie met die”, un to Jakob un Jeremia säd hee uk soowaut (1. Mo. 26:24; 28:15; Jer. 1:8).
4. Met waut vonne Wieed treest Jehova Hesekiel?
4 Woo wudden de Israeliten sennen, wan Hesekiel prädjen wudd? Jehova säd: “De Israeliten wellen nich no die horchen, wiels see wellen mie nich hieren” (Hes. 3:7). Met dise Wieed wort Hesekiel daut kloa, daut hee aus Profeet nuscht waut orrajcht jedonen haud, wan de Menschen nich no am horchten. Wäajen dee nich no Hesekiel horchten, horchten dee en Werkjlichkjeit nich no Jehova. Jehova säd noch waut to Hesekiel. Wan de Menschen seenen wudden, daut sikj daut Uadeel erfeld, waut hee verutjesajcht haud, wudden dee “weeten, daut doa een Profeet mank an es” (Hes. 2:5; 33:33). Gaunz secha jeef Hesekiel dit dee Krauft, waut hee brukt toom sienen Deenst derchfieren.
WIE SENT UK VON JEHOVA JESCHEKJT
Bie ons es daut veleicht krakjt soo aus bie Hesekiel, daut de Menschen endoontich ooda soogoa jäajen ons sent, oba wie weeten, daut Jehova met ons es (See Varsch 5-6)
5. Waut jeft ons Krauft no Jesaja 44:8 no?
5 Wie haben uk de Krauft to prädjen, wäajen wie weeten, daut wie von Jehova jeschekjt sent. Hee nant ons mau rajcht siene “Zeijen” (Jes. 43:10, NW). Es daut nich eene groote Iea? Krakjt soo aus Jehova to Hesekiel säd: “Enjst die nich”, soo sajcht Jehova uk to ons: “Enjst junt nich”. Wuarom wudd wie ons dan fa onse Jäajna ferchten? Wie sent krakjt soo aus Hesekiel von Jehova jeschekjt un hee steit ons bie (läs Jesaja 44:8).
6. (a) Woo wiest Jehova, daut hee ons biesteit? (b) Waut jeft ons Troost un Krauft?
6 Jehova vesprakjt, ons to halpen. Biejlikj een Stootje ea, aus Jehova säd: “Jie sent miene Zeijen”, säd hee: “Uk wan jie woaren motten derch deepet Wota gonen, woa ekj junt biestonen. Wan de Riefa junt metrieten well, woat dee junt nich unjakjrieen. Un wan jie em Fia nenn komen, woa jie junt nich brennen” (Jes. 43:2). Wan wie prädjen, dan kjemt doa eenjemol waut opp, waut soo schwoa es, aus wan een Riefa ons metrieten well ooda waut ons soo aufprooft aus Fia. Oba Jehova woat ons halpen, daut wie wiedaprädjen kjennen (Jes. 41:13). De Menschen horchen nu krakjt soo goot nich no de Norecht aus en Hesekiel siene Tiet. Oba wie motten doaraun denkjen, daut daut nich bediet, daut wie nich fein jeprädicht haben. Ons treest daut to weeten, daut Jehova doamet tofräd es, wan wie wiedaprädjen doonen. De Apostel Paulus säd: “Gott woat eenem jiedren doano beloonen, aus hee jeoabeit haft” (1. Kor. 3:8; 4:1-2). Eene Sesta, waut aul lang Pionia es, sajcht: “Mie jeft daut Freid, doaraun to denkjen, daut Jehova ons beloont, wan wie ons aunstrenjen.”
HESEKIEL KJRIEECH KRAUFT DERCH JEHOVA SIENEN JEIST
Hesekiel sitt Jehova sienen himlischen Woagen en eene Vision, waut am daut Vetruen jeft, daut Jehova am halpen woat, sienen Deenst derchtofieren (See Varsch 7)
7. Waut deed daut aun Hesekiel, wan hee äwa de Vision nodocht? (See daut Bilt oppe väaschte Sied.)
7 Hesekiel sach, woo väl Krauft Gott sien Jeist haud. Waut Hesekiel en siene Vision sach, holp am to seenen, daut Jehova de Enjel holp un daut dee de Räda von dän himlischen Woagen bewäajen deeden (Hes. 1:20-21). Hee schreef, woo hee sikj äwa daut feeld: “Aus ekj daut sach, foll ekj dol, plaut opp mien Jesecht”. Hesekiel wia soo vewundat, daut hee hanfoll (Hes. 1:28). Emma wan Hesekiel äwa dise besondre Vision nodocht, jeef am daut de Krauft un de Sechaheit, daut Gott sien Jeist am halpen wudd, sienen Deenst derchtofieren.
8-9. (a) Waut deed daut aun Hesekiel, aus Jehova to am säd: “Sto opp”? (b) Woo jeef Jehova Hesekiel noch de Krauft fa dän Deenst?
8 Jehova säd to Hesekiel: “Menschensän, sto opp. Ekj well met die räden.” Dit Jeboot, met Gott sienen Jeist toop, jeef Hesekiel de Krauft, waut hee brukt, wada opptostonen. Hesekiel schreef: “De Jeist [kjeem] en mie un recht mie opp” (Hes. 2:1-2). De gaunze Tiet von sienen Deenst wort Hesekiel von Gott siene Haunt, ooda Krauft, jeleit, aulsoo derch Gott sienen heiljen Jeist (Hes. 3:22; 8:1; 33:22; 37:1; 40:1). Gott sien Jeist jeef Hesekiel de Krauft, siene Oppgow derchtofieren, aulsoo dee Menschen to prädjen, waut “heltablessich [ooda hoat enjestalt] un ieejenkoppich” wieren (Hes. 3:7). Jehova säd to Hesekiel: “Ekj woa dien Jesecht soo stiew moaken aus äat es, un dien Stiern soo hoat aus äara es. Ekj hab dienen Stiern soo hoat aus een Diamaunt jemoakt, dee doch hoada aus een Fiasteen es. Nu brukst du die nich enjsten, un die daut nich aunjriepen loten, wäajen waut see doonen” (Hes. 3:8-9). Dit wia soo, aus wan Jehova to Hesekiel säd: “Lot die von dee ieejenkopje Menschen nich mootloos moaken. Ekj woa die Krauft jäwen.”
9 No aul dit brocht Gott sien Jeist Hesekiel doahan, wua hee prädjen sull. Hee schreef: “De Krauft vom HARN kjeem stoakj opp mie”. De Profeet brukt eene Wäakj, om dit aula to bejriepen un dan gaunz äwazeicht doavon to räden (Hes. 3:14-15). Dan brocht Jehova am opp eene Stap un hee säd: “De Jeist fua en mie nenn” (Hes. 3:23-24). Nu wia hee gaunz reed, sienen Deenst auntofangen.
WIE KJRIEEN UK KRAUFT DERCH JEHOVA SIENEN JEIST
Waut holp Hesekiel sienen Deenst derchtofieren, un waut halpt ons? (See Varsch 10)
10. Waut vonne Help bruck wie toom prädjen, un wuarom?
10 Waut vonne Help bruck wie, om onsen Deenst derchtofieren? Denkj mol trigj, woo daut bie Hesekiel wia. Ea hee aunfunk to prädjen, jeef Gott sien Jeist am dee Krauft, waut hee brukt. Wie kjennen vondoag dän Dach uk, krakjt soo aus Hesekiel, bloos met de Help von Gott sienen Jeist prädjen. Wuarom? Wiels de Soton kjamft jäajen ons un well, daut wie opphieren met prädjen (Opb. 12:17). Väl Menschen denkjen, daut de Soton aulmols stoakja es aus wie. Oba wan wie prädjen, kjenn wie dän Soton jewennen (Opb. 12:9-11). Wan wie em Deenst sent, dan wies wie, daut wie nich Angst haben fa dän Soton. Un jiedatsmol wan wie prädjen, mott de Soton fa ons vespälen. Daut wie bie Jäajenstaunt noch wieda prädjen kjennen, es de kloara Bewies doafäa, daut wie Krauft von Gott sienen heiljen Jeist kjrieen un daut Jehova eenen Jefaulen aun ons haft (Mat. 5:10-12; 1. Pet. 4:14).
11. Woo kjenn wie Gott sienen Jeist kjrieen, un waut woat dee fa ons doonen?
11 Waut kjenn wie noch doavon lieren, wan wie doaräwa nodenkjen, woo Jehova Hesekiel de Krauft jeef, waut hee brukt toom prädjen? Jehova kaun ons krakjt soo aus bie Hesekiel de Krauft jäwen, met jieda Schwierichkjeit foadich to woaren, dee wie em Deenst beläwen (2. Kor. 4:7-9). Waut kjenn wie doonen, daut wie wieda Gott sienen Jeist kjrieen? Wie motten aunhoolent bäden un faust doaropp vetruen, daut Gott no onse Jebäda horcht. Jesus lieed siene Jinja, daut see wieda froagen un wieda sieekjen un wieda aunkloppen sullen, wiels Jehova woat “dee dän Heiljen Jeist jäwen, dee am doano froagen” (Luk. 11:9, 13; Apj. 1:14; 2:4).
HESEKIEL STOAKJT SIKJ DÄN GLOOWEN DERCH GOTT SIENE WIEED
12. Von wua kjeem dise Schreftroll, un waut wia doabowen jeschräwen? (Hesekiel 2:9 – 3:3).
12 Gott sien Jeist jeef Hesekiel dee Krauft, waut hee brukt toom prädjen. Oba daut wia nich aules. Hee stoakjt sikj sienen Gloowen uk derch Gott siene Wieed. En siene Vision sach hee eene Haunt met eene Schreftroll (läs Hesekiel 2:9 – 3:3). Von wua kjeem dise Schreftroll? Waut wia doabowen jeschräwen? Woo stoakjt am daut em Gloowen? Well wie mol seenen. De Schreftroll kjeem von Gott sienen Troon. Veleicht brukt Jehova eent von de vea Enjel, waut Hesekiel ea sach, toom am de Schreftroll jäwen (Hes. 1:8; 10:7, 20). Opp de Schreftroll wieren Gott siene Wieed, aulsoo de lange Jerechtsbootschoft, waut Hesekiel de faustjenomne Israeliten bekauntmoaken sull, waut soo jäajenaun wieren (Hes. 2:7). De Schreftroll wia von beid Sieden beschräwen met dise Bootschoft.
13. Waut sull Hesekiel met de Schreftroll doonen, un wuarom wia dee seet?
13 Jehova säd to dän Profeet, daut hee de Schreftroll oppäten sull “un … [sienen] Buck doamet fellen”. Hesekiel wia jehuarsom un eet de gaunze Schreftroll opp. Waut meent daut krakjt? Hesekiel sull dise Bootschoft, waut hee de Menschen brinjen sull, gaunz kloa vestonen kjennen. Wuarom? Wäajen bloos dan wudd dee am bat doa brinjen to prädjen. Dan wia Hesekiel vewundat, daut dise Schreftroll “soo seet [wia] aus Honnich” (Hes. 3:3). Wuarom wia dee seet? Fa Hesekiel wia daut eene Iea, daut Jehova am utjewält haud, de Menschen met dise Bootschoft bekaunttomoaken, un daut wia fa am soo aus seet, ooda aunjenäm (Psa. 19:9-12). Hee wia uk sea dankboa, daut Jehova am aus Profeet bestemt haud.
14. Waut holp Hesekiel, reed to sennen, siene Oppgow auntonämen?
14 Lota säd Jehova to Hesekiel: “Horch no aules waut ekj die saj, un nemm [die] daut to Hoat[en]” (Hes. 3:10). Met dit wull Jehova sajen, daut hee sikj dise Wieed moakjen sull un doaräwa nodenkjen. Doaderch wort Hesekiel selfst em Gloowen jestoakjt un wia soo voll doavon, daut hee uk to aundre Menschen von dise besondre Norecht räden deed (Hes. 3:11). Aus Hesekiel Gott siene Bootschoft ieescht gaunz kloa vestonen haud un gaunz doavon äwazeicht wia, wia hee reed to prädjen un daut soolang, bat siene Oppgow derch wia (see uk Psalm 19:15).
WIE STOAKJEN ONS UK DÄN GLOOWEN DERCH GOTT SIENE WIEED
15. Waut mott wie ons to Hoaten nämen, wan wie uthoolen wellen?
15 Wan wie en onsen Deenst uthoolen wellen, dan mott wie onsen Gloowen uk derch Gott siene Wieed stoakjen. Wie motten ons aul “daut to Hoat[en]” nämen, waut Jehova to ons sajcht. Vondoag dän Dach rät Jehova derch sien Wuat, de Bibel, to ons. Woo kjenn wie ons secha moaken, daut Gott sien Wuat wieda waut aun onse Jedanken un Jefeelen deit un ons bat doa brinjt, waut to doonen?
16. Waut mott wie met Gott sien Wuat doonen, un woo kaun ons daut to Hoaten gonen?
16 Wan wie äten un daut vedeiwen, dan woat ons Kjarpa stoakja. Un wan wie studieren un äwa Gott sien Wuat nodenkjen, dan woat ons Gloowen stoakja. Dit well Jehova ons met daut Biespel von de Schreftroll lieren. Wan daut om Gott sien Wuat jeit, well Jehova, daut wie ons onsen “Buck doamet fellen”, aulsoo, daut goot vestonen. Wie kjennen daut doonen, wan wie bäden, läsen un nodenkjen. Ieeschtens mott wie bäden, daut wie ons Hoat doafäa reedmoaken, waut Gott ons sajen well. Dan mott wie de Bibel läsen, un dan stellhoolen un doa deep äwa nodenkjen, waut wie jeläst haben. Waut woat ons daut halpen? Je dolla wie nodenkjen, je mea woa wie vestonen, un daut woat ons em Gloowen stoakjen.
17. Wuarom es daut wichtich, äwa daut notodenkjen, waut wie en de Bibel jeläst haben?
17 Wuarom es daut soo wichtich, de Bibel to läsen un doaräwa notodenkjen? Daut woat ons de Krauft jäwen, daut wie nu von daut Kjennichrikj prädjen kjennen un lota de Jerechtsbootschoft bekauntmoaken kjennen. Soo, wan wie äwa Jehova siene goode Ieejenschoften nodenkjen, woa wie am emma noda komen. Doaderch woa wie ennalich Fräd un Tofrädenheit haben, waut seet, ooda aunjenäm, es (Psa. 119:103).
ONS EENICH SENNEN UTTOHOOLEN
18. Waut woaren de Menschen enseenen motten?
18 Hesekiel wia een Profeet, un daut sent wie oba nich. Wie sent ons doawäajen eenich, de Norecht to prädjen, waut Gott haft loten oppschriewen. Daut woa wie soo lang doonen, bat Jehova sajcht, daut daut goot es. Wan de Tiet toom rechten kjemt, woaren de Menschen nich sajen kjennen, daut see nich haben de Jeläajenheit jehaut ooda daut Gott om an nuscht romjejäft haft (Hes. 3:19; 18:23). Enne Städ daut woaren dee enseenen motten, daut de Norecht, waut wie prädjen deeden, von Gott kjeem.
19. Waut woat ons de Krauft jäwen, onsen Deenst derchtofieren?
19 Waut woat ons de Krauft jäwen, onsen Deenst derchtofieren? Deeselwje dree Sachen, waut Hesekiel holpen. Wie prädjen wieda, wiels wie weeten, daut Jehova ons jeschekjt haft, un wie kjrieen Krauft derch Gott sienen heiljen Jeist un wie stoakjen ons dän Gloowen derch Gott sien Wuat. Met Jehova siene Help sent wie ons gaunz eenich, daut wie onsen Deenst derchfieren “bat aum Enj” (Mat. 24:13).
LEET 65 Sto nich stell!
a De Profeet Hesekiel haud de Oppgow, daut hee prädjen sull. En disen Artikjel woa wie dree Sachen seenen, waut am doabie holpen. Wan wie seenen, woo Jehova disen Profeet jeholpen haft, dan jeft ons daut uk de Krauft un de Sechaheit, daut Jehova ons halpen woat, onsen Deenst derchtofieren.