1-2. Waut fa “een goodet Woakj” doonen de Eltestasch?

 WAN du aul fa een Stoot een Vesaumlungshelpa best, best du secha em Jeisteljen aul wiet veraunjekomen. Wurscht du daut jleichen, een Eltesta to woaren un doaderch no “een goodet Woakj” to sträwen? (1. Tim. 3:1).

² Wauts bie dit goode Woakj aules met en? De Eltestasch gonen em Prädichtdeenst veropp, kjemren sikj sea om de Breeda un Sestren, lieren dee un stoakjen de Vesaumlunk derch daut, waut see sajen un derch äa Biespel. De Schreft sajcht doawäajen met Rajcht, daut Jehowa dise “Mana aus Jeschenkja” jeef (Efs. 4:8).

3. Woo kaun een Brooda bat doa komen, een Eltesta to sennen? (1. Timotäus 3:1-7; Titus 1:5-9).

³ Woo kaust du een Eltesta woaren? Een Eltesta woaren es nich soo, aus wan du no eene Oabeit sieekjst. Bie eene Oabeit rieekjt daut foaken aul too, wan eena sikj bloos met soont vesteit, waut dän Wieet fält. Oba wan eena bat doa komen well, Eltesta to woaren, es doa mea needich, aus daut eena bloos vesteit to prädjen un to lieren. Du motst uk daut nokomen, waut no de Schreft no von Eltestasch velangt woat. Dit finjst du en 1. Timotäus 3:1-7 un Titus 1:5-9 (läs). En disen Artikjel woa wie ons eenjet von dise Varzhen unjastonen. Wie woaren seenen, woo een Brooda sikj eenen gooden Nomen moaken kaun, woo dee een goodet Haupt von siene Famielje sennen kaun un waut dän halpen kaun, reed to sennen, de Vesaumlunk to deenen.

MOAK DIE EENEN GOODEN NOMEN

4. Waut meent daut, daut eenen Brooda “met nuscht to beschuljen” jeit?

⁴ Daut du een Eltesta woaren kaust, mott die “met nuscht to beschuljen gonen”. Daut meent, daut du eenen gooden Nomen  hast enne Vesaumlunk, wäajen du die soo veheltst, daut kjeena waut jäajen die sajen kaun. Dan saust du uk noch “eenen gooden Nomen haben bie dee, waut nich Poat von de Vesaumlunk sent”. Soone, waut Jehowa nich deenen, woaren veleicht schlajcht äwa onsen Gloowen räden, oba dee sellen kjeenmol doaraun twiewlen, aus du een opprechtja un gooda Mensch best (Dan. 6:5-6). Denkj mol äwa no: “Denkjen de Breeda von de Vesaumlunk un uk aundre, daut ekj een gooda Mensch sie?”

5. Woo kaust du wiesen, daut du “daut Goode leefst”?

⁵ Wan du “daut Goode leefst”, woascht du bie aundre no daut Goode kjikjen un dee doafäa lowen. Du woascht uk wellich Goodet fa aundre doonen, mau rajcht noch mea aus von die velangt woat (1. Tes. 2:8; see de tweede Erkjläarunk toom studieren en de Studiabibel von Titus 1:8). Wuarom es daut wichtich, daut een Eltesta daut Goode leeft? Wäajen dan woat hee sikj wellich Tiet nämen, om fa de Vesaumlunk to sorjen un siene Oppgowen notokomen (1. Pet. 5:1-3). Uk wan daut väl Oabeit es, woaren de Eltestasch oba väl mea Freid haben, wan dee aundre halpen (Apj. 20:35).

6. Woo kaust du “oppnäment sennen”? (Hebräa 13:2, 16). (See uk daut Bilt.)

⁶ Du kaust “oppnäment sennen”, wan du fa aundre Goodet deist, uk to dee, waut nich diene baste Frind sent (1. Pet. 4:9). En een Bibel-Wieedbuak sajcht daut, daut een Maun, waut oppnäment es, mau rajcht to soone Menschen leeftolich es, waut hee nich kjant, un kroacht dee wellich no sien Hus. Denkj mol äwa dit: “Sie ekj doafäa bekaunt, daut ekj de Jast enne Vesaumlunk goot oppnäm?” (Läs Hebräa 13:2, 16.) Een Maun, waut oppnäment es, woat to aule leeftolich sennen. Biejlikj to de Oame, to soone, waut en de Vesaumlunk eene Räd hoolen, un uk to soone, waut sikj aunstrenjen, de Breeda un Sestren Moot tootospräakjen, soo aus de Kjreisoppsechtasch (1. Mo. 18:2-8; Spr. 3:27; Luk. 14:13-14; Apj. 16:15; Reem. 12:13).

7. Woo kaun een Eltesta wiesen, daut hee “nich daut Jelt leeft”?

⁷ “Nich daut Jelt leewen.” Daut meent, daut daut Jelt fa die nich daut Wichtichste es. Aus du rikj ooda oam best, du satst daut Kjennichrikj aun de ieeschte Städ (Mat. 6:33). Du brukst diene Tiet,  Krauft un aundret fa Jehowa, fa diene Famielje un fa de Vesaumlunk (Mat. 6:24; 1. Joh. 2:15-17). Denkj mol äwa no: “Woo wichtich es daut Jelt fa mie. Sie ekj tofräd met daut Needichste ooda sie ekj bloos doano ut, mea Jelt to vedeenen un mie mea Sachen to kjeepen?” (1. Tim. 6:6, 17-19).

8. Woone Sachen wiesen, daut du utjejlikjt best un die kontrollen kaust?

⁸ “En siene Jewanheiten utjejlikjt sennen” un“sikj kontrollen kjennen”, meent, en aule Stekjen nich äwadräwen to sennen. Doa es met en, nich too väl äten un drinkjen un nich äwadräwen sennen en oppfiksen un en Tietvedrief. Du moakst uk nich bie aule Mooden met, waut de Menschen enne Welt auntobeeden haben (Luk. 21:34; Jak. 4:4). Du blifst ruich, wan aundre Menschen die uk nich leeftolich behaundlen. Du woascht uk “nich een Drinkja sennen”, un aundre woaren die uk nich doafäa hoolen. Denkj mol äwa no: “Wies ekj en mien Läwen, daut ekj en miene Jewanheiten utjejlikjt sie un mie kontrollen kaun?”

9. Waut es bie “kloa denkjen kjennen” un “ordentlich sennen” aules met en?

⁹ “Kloa denkjen kjennen”, meent, daut du die opp biblische Gruntsauzen stettst. Du hast doa deep äwa nojedocht, un daut haft die jeholpen, de Sachen bäta to vestonen un goode Entscheidungen to trafen. Du woascht nich eefach haustich waut entscheiden. Enne Städ daut woascht du doaräwa nodenkjen, waut doa aules met en es (Spr. 18:13). Doaderch woascht du kjennen Entscheidungen moaken, waut met Jehowa sienen Wellen tooppaussen. Un bie “ordentlich sennen” es met en, daut du aules goot plonst un enne Tiet best. Du best doafäa bekaunt, daut du opp to veloten best un Aunwiesungen nokjemst. Aul dise Ieejenschoften, waut wie bat nu jeseenen haben, woaren die eenen gooden Nomen moaken. Well wie nu mol seenen, waut de Schreft doaräwa sajcht, woo een Eltesta kaun een goodet Biespel sennen aus een Famieljenhaupt.

SIE EEN GOODET FAMIELJENHAUPT

10. Waut meent daut, daut een Maun “dee von sien Hus veroppjeit”?

¹⁰ Wan du befriet best un west een Eltesta woaren, dan mott diene Famielje eenen gooden Nomen haben. Doawäajen motst du “dee von dien Hus veroppgonen”. Du motst doafäa bekaunt sennen, daut du leeftolich met dee omjeist un diene Veauntwuatunk aus Haupt nokjemst. Doa es met en, daut du em Jeisteljen en aules veroppjeist. Wuarom es daut soo wichtich? De Apostel Paulus säd: “Wan een Maun nich weet, dee von sien Hus veropptogonen, woo woat dee sikj dan kjennen om Gott siene Vesaumlunk kjemren?” (1. Tim. 3:5).

11-12. Wuarom es daut soo wichtich, daut eenen Brooda siene Kjinja sikj fein oppstalen, wan dee well een Eltesta woaren? (See uk daut Bilt.)

¹¹ Wan du een Voda best, waut nate Kjinja haft, dan motten dee “unjadon sennen un sikj derchjedocht un iernst oppstalen.” Du motst dee lieren un leeftolich opptrakjen. De Kjinja haben daut soo, daut dee spälen un lachen. Oba wäajen du dee fein oppjetrocken hast, woaren dee jehuarsom un respakjtvoll sennen un sikj fein oppstalen. Du motst uk proowen, dien Bastet to doonen, om de Kjinja to halpen, een goodet Veheltnis met Jehowa to haben, no de biblische Gruntsauzen to läwen un bat de Doop to komen.

¹² “Siene Kjinja sellen em Gloowen sennen un nich beschulcht woaren, daut dee sikj nich kontrollen kjennen ooda jäajenaun sent.” Waut deit daut aun eenen Voda, wan dän sien Kjint, waut em Gloowen es, eene groote Sind bejeit? Wan een Voda nich siene Fliet jedonen haft un sien Kjint nich fein belieet  un trajchtjewäsen haft, dan wudd dee nich aus een Eltesta deenen kjennen (See de Utgow em Woaktorm vom 15. Oktooba 1996, S. 21, V. 6-7).

DEEN DE VESAUMLUNK

13. Aun waut es to seenen, daut doa wäa “nich bloos opp sienen Stekj stonen blift” un “nich ieejenkoppich” es?

¹³ De Breeda, waut goode, christelje Ieejenschoften haben, sent eene groote Help fa de Vesaumlunk. Eena, “waut nich bloos opp sienen Stekj stonen blift”, sitt doano, daut doa Fräd es. Dee horcht aundre too un prooft to vestonen, woo dee denkjen. Wurscht du biejlikj reed sennen, bie een Eltestatoopkomen daut to unjastetten, waut de Mieeschte entscheiden, wan daut nich jäajen een Jesaz ooda Gruntsauz ut de Bibel jeit? “Nich ieejenkoppich sennen”, meent, daut du nich velangst, daut aules soo jedonen woat, aus du daut haben west. Du weetst, woo wichtich daut es, no aundre äare Iedeeen to horchen (1. Mo. 13:8-9; Spr. 15:22). Du saust eena sennen, waut “nich opp strieden helt” un uk “nich leicht doll woat”. Enne Städ kort to sennen, saust du leeftolich un respakjtvoll sennen. Wäajen du frädlich best, nemst du dän ieeschten Schrett, om met aundre Fräd to moaken – mau rajcht en schwoare Loagen (Jak. 3:17-18). Wan du leeftolich rätst, kaun daut halpen, daut aundre, mau rajcht onse Jäajna, nich soo doll sent (Rech. 8:1-3; Spr. 20:3; 25:15; Mat. 5:23-24).

14. Waut bediet daut, daut doa wäa nich “korz toom Gloowen jekomen es” un daut dee “tru” es?

¹⁴ Een Brooda, waut doa well aus een Eltesta deenen, kaun “nich een Maun sennen, waut korz toom Gloowen jekomen es”. Du brukst nich väle Joaren jedeept sennen, oba die fält doawäajen Tiet, een riepa Christ to woaren. Ea du aus Eltesta aunjestalt woascht, motst du ieescht wiesen, daut du soo aus Jesus deemootich best, un du motst uk reed sennen to wachten, bat Jehowa die mea Oppgowen jeft (Mat. 20:23; Filip. 2:5-8). Du kaust uk wiesen, daut du “tru” best, doaderch daut  du die aun Jehowa siene jerajchte Jesazen helst un aun de Aunwiesungen, waut hee derch siene Organisazion jeft (1. Tim. 4:15).

15. Waut bediet daut, daut een Eltesta “emstaund es, aundre to lieren”?

¹⁵ De Schreft sajcht gaunz kloa, daut een Eltesta mott “emstaund sennen, aundre to lieren.” Bediet daut, daut dee mott een sea gooda Rädna sennen? Nä. Nich aule Eltestasch kjennen goode Räden hoolen. Oba dee motten doawäajen em Prädichtdeenst un bie Hoadbesuchs aundre goot lieren kjennen. (See uk de Erkjläarunk toom studieren “lehrfähig” en de Studiabibel von 1. Timotäus 3:2; vejlikj 1. Korinta 12:28-29 un Efeesa 4:11.) Doawäajen saust du wieda doaraun schaufen, een gooda Liera to woaren. Waut kaun die doabie halpen?

16. Woo kaust du een bätra Liera woaren? (See uk daut Bilt.)

¹⁶ “Sikj faust aun daut true Wuat hoolen”. Om een bätra Liera to woaren, motst du die emma opp Gott sien Wuat stetten, wan du aundre lieescht ooda dee Rot jefst. Doatoo motst du de Bibel un onse Bieekja goot studieren (Spr. 15:28; 16:23; see de ieeschte Erkjläarunk toom studieren en de Studiabibel von Titus 1:9). Wan du studieren deist, dan pauss goot opp, woo de Bibelvarzhen en onse Bieekja utjelajcht woaren, daut du weetst, woo du daut nokomen kaust. Un wan du eene Räd helst, dan proow, diene Toohiera to Hoaten to räden. Wan du erfoarne Eltestasch no Iedeeen frajchst un daut nokjemst, waut dee die sajen, dan woascht du een bätra Liera woaren (1. Tim. 5:17). Eltestasch motten uk emstaund sennen, äare Gloowesbreeda “Moot tootospräakjen”, un eenjemol motten dee uk wäm Rot jäwen ooda “trajchtwiesen”. Oba de Eltestasch motten doabie emma leeftolich sennen. Wan du daut opp dise Wajch deist un die emma opp Gott sien Wuat stettst, dan woascht du een gooda Liera sennen, wiels du woascht daut soo doonen aus de basta Liera, Jesus (Mat. 11:28-30; 2. Tim. 2:24).

 STRENJ DIE WIEDA AUN

17. (a) Waut kaun de Vesaumlungshelpa halpen, sikj wieda auntostrenjen? (b) Waut sellen de Eltestasch em Denkj hoolen, wan dee doaräwa räden, aus doa een Brooda aus Eltesta deenen kaun? (See daut Hock “ Siet nich too strenj, wan jie doaräwa räden, aus doa een Brooda aus Eltesta deenen kaun”.)

¹⁷ Eenje Vesaumlungshelpa denkjen veleicht, daut dee kjeenmol woaren kjennen een Eltesta woaren, wäajen dee soo väl Ieejenschoften haben motten. Oba denkj doaraun, daut Jehowa un de Organisazion daut nich velangen, daut du dise Ieejenschoften volkomen nokjemst (1. Pet. 2:21). Jehowa sien stoakja Jeist woat die halpen, daut du dise Ieejenschoften haben kaust (Filip. 2:13). Es doa eene Ieejenschoft, en dee du die wurscht wellen vebätren? Dan bäd to Jehowa. Studia mea doaräwa un froag een Eltesta, woo du die vebätren kaust.

18. Waut woat aule Vesaumlungshelpa toojerot?

¹⁸ Well wie aula wieda aun de Ieejenschoften schaufen, waut wie en disen Artikjel jeseenen haben – uk dee, waut aul Eltestasch sent (Filip. 3:16). Best du een Vesaumlungshelpa? Dan strenj die wieda aun! Froag Jehowa, daut hee die utlieet, soo daut du am un de Vesaumlunk noch bäta deenen kaust (Jes. 64:7). Jehowa woat die fa aul daut säajnen, waut du deist, om een Eltesta to woaren.