ES DIE daut schwoa, pinkjlich de Bibel to studieren ooda woat die daut leicht enoolent? Ons jeit daut aula mol soo. Denkj mol aun aundre Sachen, waut wie uk pinkjlich doonen, biejlikj ons boden. Sikj boden brukt Tiet un Aunstrenjunk, oba doahinja feelt eena sikj maklich! De Bibel to studieren, kaun die uk soon scheenet Jefeel jäwen (Efs. 5:26). See wie mol een poa Iedeeen, waut die doabie halpen kjennen:

• Moak eenen Plon. De Bibel to studieren, es eent von “daut gaunz Wichtichste”, waut Christen nich utloten sellen (Filip. 1:10). Waut kaun die halpen, die aun dienen Plon to hoolen? Doo dän wua han, wua du dän leicht seenen kaust; biejlikj aun eene Waunttofel ooda aum Iesschaup. Ooda du wurscht uk kjennen eene Alarma enstalen, waut die een Stootskje ea denkjen halpt, daut du studieren saust.

• Finj ut, waut die halpt, dienen Kopp bie de Sach to haben. Woo es die daut leichta, dienen Kopp bie de Sach to haben, wan du lang studieescht ooda mieremol fa eene korte Tiet? Du kjanst diene Omstend daut baste. Soo, recht die doano, wan du diene Tiet enplonst. Oba woo es daut, wan du saust studieren un die daut oba nich jankat? Dan wurscht kjennen proowen, daut bloos fa tieen Minuten to doonen. Wan du uk mau fa eene korte Tiet studieet hast, hast du oba väl mea jelieet, aus wan du nich studieet hautst. Un wan du bloos mol aunfangst, dan woat die daut veleicht fa eene lenjre Tiet jankren (Filip. 2:13).

• Wäl die een Teema ut, ea du studieescht. Saust du ieescht dan, wan du studieren west, doaräwa nodenkjen, waut du studieren west? Dan wurscht du nich diene “Tiet opp de baste Wajch” brucken (Efs. 5:16). Wuarom moakst die nich eene List, wua du die Teemasch un Artikjels oppschrifst, waut du wurscht jleichen to studieren? Wan die irjentwaut biefelt, waut du nich gaunz vestonen kaust, dan schriew die daut opp. Opp Enj von jieda Studium kaust du die veleicht uk oppschriewen, waut du noch wurscht jleichen to studieren.

• Pauss die aun. Wan du aul eenen Plon hast, dan pauss dän aun, doano aus daut fält; biejlikj woo väl Tiet du hast ooda woone Teemasch du studieren west. Waut doa talt, es, daut du räajelmässich studieescht, un nich wanea, woo lang ooda waut.

Ons woat daut uk sea toom Gooden sennen, wan wie räajelmässich studieren woaren. Wie woaren doaderch Jehowa noda komen, lieren goode Entscheidungen to trafen un mootich sennen (Jos. 1:8).