44. ARTIKJEL FA DAUT STUDIUM
LEET 33 Laj de Sorjen opp Jehowa
Woo eena kaun met Ojjerajchtichkjeit foadich woaren
“Lot junt nich von daut Schlajchte dolkjrieen, oba brukt daut Goode toom daut Schlajchte dolkjrieen” (REEM. 12:21)
OM WAUT DAUT JEIT
Woo wie met Ojjerajchtichkjeit rajcht omgonen kjennen, daut de Loag nich noch schlemma woat.
1-2. Wäa kunn ons schlajcht behaundlen? Laj daut ut.
JESUS vetald een Jlikjnis von eene Wätfru, waut eenen Rechta emma wada no Help fruach, jerajcht behaundelt to woaren. Onen Twiewel kunnen Jesus siene Jinja dise Jeschicht fein vestonen, wiels en dee Tiet sea väl Menschen ojjerajcht behaundelt worden (Luk. 18:1-5). Oba uk fa ons es dise Jeschicht sea intressaunt, wiels wie aula mol Ojjerajchtichkjeit beläft haben.
2 Vondoag dän Dach woat väl Unjascheet manke Menschen jemoakt un väle sent nich leeftolich unjarenaunda un sent sea bejierich. Doawäajen wundad ons daut goanich, wan wie ojjerajcht behaundelt woaren (Liera 5:7). Oba wuamet wie veleicht nich räakjnen, es, daut een Brooda ooda eene Sesta ons schlajcht behaundelt. Secha doonen dee daut nich met Fliet, oba daut kaun passieren, wiels dee onvolkomen sent. Wie kjennen väl doavon lieren, woo Jesus met de Ojjerajchtichkjeit von beese Jäajna omjinkj. Wan wie aul met de Jäajna Jedult haben, waut ons ojjerajcht behaundlen, woo väl mea sull wie dan nich met onse Gloowesbreeda jeduldich sennen! Woo feelt Jehowa sikj, wan hee sitt, daut wie von de Breeda ooda sestwäm ojjerajcht behaundelt woaren? Jeft hee doa waut om rom?
3. Jeft Jehowa doa waut om rom, wan wie unja Ojjerajchtichkjeit lieden motten, un wuarom?
3 Jehowa es sea doarom todoonen, woo ons behaundelt woat. De Schreft sajcht: “De HAR räakjent jerajcht sennen sea väl” (Psa. 37:28). Jesus vesechad ons, daut Jehowa “bosich doano seenen [woat], daut . . . [aulem] jerajcht behaundelt woat”, wan daut ieescht de rajchte Tiet doatoo es (Luk. 18:7-8). Un boolt woat Gott aul dän Schoden wada gootmoaken, waut wie jeläden haben, un aule Ojjerajchtichkjeit utroden (Psa. 72:1-2).
4. Woone Help jeft Jehowa ons vondoag dän Dach?
4 Äwadäm daut wie no de Tiet luaren, wua aules woat jerajcht sennen, halpt Jehowa ons, met Ojjerajchtichkjeit rajcht omtogonen (2. Pet. 3:13). Hee lieet ons, nuscht Onkluaket to doonen, wan ons wäa ojjerajcht behaundelt. Derch sienen Sän jeft hee ons daut baste Biespel, woo wie met Ojjerajchtichkjeit rajcht omgonen kjennen. Un hee jeft ons uk gooden Rot, waut wie doonen kjennen, wan ons ojjerajcht behaundelt woat.
PAUSS OPP, WOO DU MET OJJERAJCHTICHKJEIT OMJEIST
5. Wuarom mott wie oppaussen, woo wie met Ojjerajchtichkjeit omgonen?
5 Ojjerajchtichkjeit kaun ons sea toosaten un mootloos moaken (Liera 7:7, JHF). Soo jinkj daut mau rajcht true Deena von ieeschtemma soo aus Hiob un Habakuk (Hiob 6:2-3; Hab. 1:1-3). Dauts gaunz jeweenlich, ons soo aus dit to feelen, oba wie motten doawäajen oppaussen, daut wie nich waut Dommet doonen.
6. Waut lia wie von Absalom siene Jeschicht? (See uk daut Bilt.)
6 Wan doa waut Ojjerajchtet passieet, well wie veleicht selfst fa Jerajchtichkjeit sorjen. Oba doaderch kunn de Loag noch schlemma woaren. See wie mol de Jeschicht von Absalom, dän Kjennich David sien Sän. Hee wia flaument doll, aus hee enwort, daut sien Haulfbrooda Amnon siene Sesta Tamar bemott haud, met am Sex to haben. Nom Jesaz Moses no haud Amnon doafäa dän Doot vedeent (3. Mo. 20:17). Dauts to vestonen, daut Absalom soo doll wia, oba hee haud doawäajen nich de Frieheit, Amnon doottomoaken (2. Sam. 13:20-23, 28-29).
Absalom wia doll äwa daut, waut siene Sesta Tamar aunjedonen wort, un leet sikj von siene Wutt metrieten (See Varsch 6)
7. Waut deed de Ojjerajchtichkjeit aun eenen Psalmenschriewa?
7 Eenjemol lat daut soo, daut dee, waut Ojjerajchtet doonen, kjeene Strof doafäa kjrieen. Dan wunda wie veleicht, aus sikj daut verheipts loont, daut Rajchte to doonen. Soo jinkj daut eenen Psalmenschriewa. Hee sach, daut goode Menschen von aundre schlajcht behaundelt worden, un daut dise schlajchte Menschen een goodet Läwen hauden. Hee säd: “Dit es soo aus de gottloose sent, onen Sorjen” (Psa. 73:12). Wäajen de Ojjerajchtichkjeit, waut hee sach, wia hee gaunz vetwiewelt un docht, daut sikj daut goanich loond, Jehowa to deenen. Hee säd: “Aus ekj dit aula proowd to vestonen, wia daut too unjadrekjent fa mie” (Psa. 73:14, 16). Hee säd mau rajcht noch: “Oba waut mie aunbelangt, miene Feet hauden meist jejlept; ekj wia sea meist jefollen” (Psa. 73:2). Een Brooda, waut wie Alberto nanen, haft sea dautselwje beläft.
8. Waut deed Ojjerajchtichkjeit aun eenen Brooda?
8 Waut Breeda hauden Alberto orrajcht beschulcht, daut hee Jelt von de Vesaumlunk jestolen haud. Doawäajen kunn hee nich mea aus Eltesta deenen un väl Breeda, waut doavon enworden, respakjten am nich mea. Hee sajcht: “Ekj wia vebettat, doll un enteischt.” Hee leet daut bat doa komen, daut hee opphieed, no de Toopkomes to wanken, un deed mau rajcht fief Joa nich mea prädjen. Dise Erfoarunk wiest, waut doa passieren kaun, wan wie daut tooloten, daut de Ojjerajchtichkjeit ons vebettat.
DOO JESUS NO, WAN DU OJJERAJCHT BEHAUNDELT WOASCHT
9. Waut must Jesus aules uthoolen? (See uk daut Bilt.)
9 Jesus jeef ons daut baste Biespel doarenn, met Ojjerajchtichkjeit foadich to woaren. Hee wort von väle schlajcht behaundelt – mau rajcht von siene Famielje. Eenje von sien Frintschoft säden biejlikj, daut hee dwautsch wia; de Gloowesleidasch säden, daut hee met de beese Jeista toopschauft; de reemische Soldoten hauden sikj domm äwa am, kjwälden am un muaken am schlieslich doot (Mar. 3:21-22; 14:55; 15:16-20, 35-37). Wan Jesus uk soo väl uthoolen must, deed hee oba kjeenmol met Schlajchtet trigjtolen. Waut kjenn wie von sien Biespel lieren?
Jesus jeef ons daut baste Biespel, woo wie met Ojjerajchtichkjeit omgonen kjennen (See Varsch 9-10)
10. Woo jinkj Jesus met Ojjerajchtichkjeit om? (1. Petrus 2:21-23).
10 Läs 1. Petrus 2:21-23. a Jesus jeef ons daut baste Biespel, woo wie ons vehoolen sellen, wan wie ojjerajcht behaundelt woaren. Hee wist krakjt, wanea daut goot wia, stell to sennen ooda to räden (Mat. 26:62-64). Hee deed nich emma waut trigjsajen, wan se Läajes von am vetalden (Mat. 11:19). Un wan hee waut säd, deed hee siene Jäajna kjeenmol beleidjen ooda proowen, dee entoenjsten. Jesus haud sikj emma unja Kontroll, wäajen hee jeef “Gott daut aun Haunt, dee doa rajcht rechten woat.” Hee wist, daut Jehowa daut sach, daut am ojjerajcht behaundelt wort. Un hee veleet sikj doaropp, daut Jehowa daut to de rajchte Tiet trajchtstalen wudd.
11. Woo kjenn wie daut unja Kontroll hoolen, waut wie sajen? (See uk de Bilda.)
11 Wan ons ojjerajcht behaundelt woat, kjenn wie Jesus nodoonen, doaderch daut wie oppaussen, waut wie sajen. Bieaun fält daut verheipts goanich, waut to sajen, wiels daut mau eene kjliene Sach es. Ooda wie sajen veleicht met Fliet nuscht, om mea Trubbels väatobieejen (Liera 3:7; Jak. 1:19-20). Näakjstemol wada es daut veleicht needich, waut to sajen, wan doa wäa schlajcht behaundelt woat ooda wan doa schlajcht äwa de Woarheit jerät woat (Apj. 6:1-2). Oba wan wie waut sajen, dan sell wie ons aunstrenjen, daut ruich un respakjtvoll to doonen (1. Pet. 3:15). b
Wan wie waut Ojjerajchtet beläwen, kjenn wie soo aus Jesus ieescht goot äwalajen, wanea un woo wie räden (See Varsch 11-12)
12. Woo kjenn wie Gott aules aun Haunt jäwen, “dee doa rajcht rechten woat”?
12 Wie kjennen Jesus uk doarenn nodoonen, daut wie Gott aules aun Haunt jäwen, “dee doa rajcht rechten woat.” Wan aundre orrajcht äwa ons denkjen ooda ons schlajcht behaundlen, vetru wie doaropp, daut Jehowa krakjt om de Sach omweet. Daut Vetruen doaropp, daut Jehowa to siene Tiet aules trajchtstalen woat, kaun ons halpen, soone schlemme Loag uttohoolen. Wan wie aules en Jehowa siene Henj loten, kjenn wie daut väabieejen, daut sikj de Wutt en ons Hoat nich faustsat ooda daut wie aunfangen, aundre to haussen. Wutt un Hauss wudden ons kjennen bat doa brinjen, waut Dommet to doonen, onse Freid to velieren un ons Frind-Sennen met Jehowa to schoden (Psa. 37:8).
13. Äwa waut kaust du die secha sennen, wan die daut schwoa felt, met Ojjerajchtichkjeit foadich to woaren?
13 Secha kjenn wie Jesus sien Biespel nich hundat Prozent nodoonen. Bieaun woa wie veleicht waut sajen ooda doonen, waut wie lota beschoden (Jak. 3:2). Un eenjemol kjrie wie von Ojjerajchtichkjeit veleicht soonen Schoden, wua wie ons Läwen lank met to kjamfen haben. Wan daut bie die soo es, kaust du die gaunz secha sennen, daut Jehowa weet, waut du derchmoakst. Un Jesus weet uk, woo die daut jeit, wiels hee selfst unja Ojjerajchtichkjeit lieden must (Heb. 4:15-16). Buta Jesus sien goodet Biespel jeft Jehowa ons uk feinen Rot toom ons halpen, met Ojjerajchtichkjeit foadich to woaren. Well wie ons doatoo mol twee Varzhen von daut Bibelbuak Reema unjastonen.
“ÄWALOT GOTT DAUT EN SIENEN JERAJCHTEN OAJA”
14. Woo kjenn wie Paulus sienen Rot en Reema 12:19 nokomen?
14 Läs Reema 12:19. De Apostel Paulus jeef de Christen disen Rot: “Äwalot Gott daut en sienen jerajchten Oaja.” Woo kjenn wie disen Rot nokomen? Wie äwaloten Jehowa daut en sienen jerajchten Oaja, wan wie am loten entscheiden, woo un wanea hee fa Jerajchtichkjeit sorjen woat. Een Brooda, waut John heet, säd, nodäm daut hee ojjerajcht behaundelt wort: “Ekj must mie sea trigjhoolen, de Sach nich opp miene Wajch proowen trajchttostalen. Reema 12:19 haft mie sea jeholpen, jeduldich to sennen un opp Jehowa to vetruen.”
15. Wuarom es daut daut Baste, ons doaropp to veloten, daut Jehowa aules trajchtstalen woat?
15 Ons kjemt daut sea togood, wan wie jeduldich sent un doano luaren, daut Jehowa aules trajchtstalt. Opp dise Wajch mott wie ons nich selfst doamet romploagen un gonen dän Stress utem Stich, waut doavon kjemt, wan wie selfst eenen Trubbel leesen wellen. Jehowa deit je ons siene Help aunbeeden. Dauts soo, aus wan hee säd: “Äwalot mie dise Ojjerajchtichkjeit. Ekj woa mie doarom kjemren.” Hee vesprakjt ons uk noch: “Ekj woa trigjtolen”. Wan wie ons Vetruen opp dit Vespräakjen saten, dan kjenn wie de Sach gaunz tochloten, wiels wie weeten, daut hee daut oppe baste Wajch leesen woat. Dit Vetruen holp uk John, von dän wie ea räden. Hee säd: “Wan ekj bloos jeduldich sie un mie opp Jehowa velot, dan woat hee de Sach väl bäta trajchtstalen, aus ekj jeemols woa kjennen.”
“BRUKT DAUT GOODE TOOM DAUT SCHLAJCHTE DOLKJRIEEN”
16-17. Woo kaun ons daut Jebäd halpen, dän Rot notokomen: “Brukt daut Goode toom daut Schlajchte dolkjrieen”? (Reema 12:21).
16 Läs Reema 12:21. Paulus deed de Christen uk noch dit tooroden: “Brukt daut Goode toom daut Schlajchte dolkjrieen.” Un Jesus säd en siene Boajchprädicht: “Leeft wieda june Fiend un bät fa dee, waut junt vefoljen” (Mat. 5:44). Dauts krakjt, waut hee deed. Wie haben veleicht aul doaräwa nojedocht, woo sea Jesus must lieden, aus hee von de reemische Soldoten aum Pol jenoagelt wort. Oba wie kjennen daut nich gaunz bejriepen, woo grausom hee behaundelt wort un woo ommenschlich hee lieden must.
17 Jesus leet sikj nich von de Ojjerajchtichkjeit dolkjrieen. Enne Städ de Soldoten uttoflieekjen, bäd hee: “Voda, vejeff dee, wiels dee weeten nich, waut dee doonen” (Luk. 23:34). Fa dee to bäden, waut ons schlajcht behaundlen, halpt ons, ruich to bliewen un nich soo doll to woaren un soogoa daut to endren, woo wie äwa dee denkjen.
18. Woo holp daut Jebäd Alberto un John, met Ojjerajchtichkjeit foadich to woaren?
18 Daut Jebäd holp uk de beid Breeda, von dee wie en disen Artikjel aul räden, met Ojjerajchtichkjeit foadich to woaren. Alberto sajcht: “Ekj bäd fa de Breeda, waut mie ojjerajcht behaundelt hauden. Ekj fruach Jehowa foaken doano, mie to halpen, doavon to vejäten.” Dauts scheen to weeten, daut Alberto vondoag dän Dach Jehowa wada tru deent. Un John vetalt: “Ekj bäd mieremol fa dän Brooda, waut mie velazt haud. Dise Jebäda holpen mie, nich mea doll met am to sennen un opptohieren, am to rechten. Dee jeewen mie uk ennalichen Fräd.”
19. Waut mott wie doonen, soo lang aus wie en dise schlajcht Welt läwen? (1. Petrus 3:8-9).
19 Wie kjennen daut nich weeten, waut wie aules fa Ojjerajchtichkjeiten beläwen woaren, ea daut Enj von dise Welt komen woat. Oba endoont woo daut es, well wie niemols opphieren, bie Jehowa no Help to sieekjen. Well wie ons eenich sennen, dän Rot ut de Schreft wieda notokomen un Jesus doarenn notodoonen, woo hee met Ojjerajchtichkjeit omjinkj. Wan wie daut doonen, woa wie fa secha von Jehowa jesäajent woaren (läs 1. Petrus 3:8-9).
LEET 38 Hee moakt die stoakj
a En 1. Petrus, Kapitel 2 un 3 rät Petrus von Christen, waut von äare hunjsche Wieets schlajcht behaundelt worden, ooda von äare Ehemana, waut nich Christen wieren (1. Pet. 2:18-20; 3:1-6, 8-9).
b See daut Video Woo de Leew to woaren Fräd fieet opp jw.org.
