EKJ wort aune 1934 jebuaren. Miene Elren Fred un Edna Molohan wieren dan aul 20 Joa Bibelforscha (Jehova siene Zeijen). Ekj sie sea dankboa, daut see mie lieeden Jehova to leewen. Wie wonden en Parsons; daut es eene kjliene Staut em Siedoosten von Kansas. Meist aule en onse Vesaumlunk wieren Jesaulwde. Onse Famielje wankt emma no de Toopkomes un em Prädichtdeenst. Aum Sinowent no Meddach deed wie jeweenlich oppe Gauss prädjen; daut wia biejlikj soo aus vondoag dän Dach daut effentliche prädjen. Eenjemol word wie een bät meed, oba wan wie ieescht verecht hauden, koft Pape ons emma Eiskriem.

Onse kjliene Vesaumlunk haud een grootet Jebiet toom prädjen. Doa wieren eenje kjliene Städa un een deel Foarms met en. Wan wie bie de Foarms prädijden, dan jeewen dee ons foaken Jreens ut äaren Goaden ooda fresche Eia utem Nast ooda mau rajcht läwendje Heena fa de Bieekja, waut wie an leeten. Dit Ätwoa wia eene goode Help fa de Famielje, wiels Pape haud ea aul Jelt utjejäft fa de Bieekja.

Miene Elren brukten een Gramafoon em Deenst. Ekj wia too kjlien toom daut brucken, oba ekj jleicht daut sea, Mame un Pape to halpen, wan dee bie Wadabesuchs un Bibelstudiums Schiewen äwaspälden von Brooda Rutherford siene Räden.

Pape bud eenen grooten Lautspieker opp onsen 1936-Moddel Ford nopp, daut wie dän fein toom prädjen brucken kunnen. Jeweenlich leet wie doa ieescht Musikj äwaspälen, daut de Menschen horchen kjeemen, un dan späld wie eene biblische Räd äwa. No daut fruag wie deejanje, waut intressieet wieren, aus see waut toom läsen wullen.

En de kjliene Staut Cherryvale en Kansas säden de Poliezen Pape daut auf, daut Foatich met dän  Lautspieker em Park to brucken, wua Sindach een deel Menschen wieren. Oba butarem Park haud hee de Frieheit. Doawäajen fieed hee daut Foatich doa dicht bie opp eene Gauss han, un von doa kunnen de Menschen em Park daut uk fein hieren. Mie jinkj daut emma sea scheen, met miene Pape un mienen elren Brooda Jerry toop soont to doonen.

To dee Joaren muak wie uk bie een besondret Prädichtwoakj met opp soone Städen, wua de Menschen sea jäajenaun wieren. Soo aus ekj ea aul säd, stund wie medden en de Nacht opp un leeten gaunz stell bie jieda Hus een Zeichnisblaut ooda een Buakje unjare Däa. Nodäm troff wie ons aula butakaunt Staut toom seenen, aus de Poliezen kjeenem von ons faustjenomen hauden.

Noch waut besondret, waut wie deeden, wia, daut wie Zeins brukten toom prädjen. Wie hongen ons dee aun un jinjen enne Rieej derche Staut toom Gott sien Kjennichrikj bekauntmoaken. Ekj weet noch krakjt, woo de Breeda daut eemol en onse Staut deeden. Dee hauden Zeins, wua bowen stunt: “De Relijion es eene Schlenj un Scheewarie”. Dee jinjen bie ons Hus loos un jinjen soo bie eentunhaulf Kilomeeta (1 Miel) derche Staut un dan wada trigj no ons Hus. Daut goode wia, daut doa kjeena jäajenaun wia un daut väle nieschierich worden, waut doa aunjinkj.

Onse Famielje fua foaken von Kansas no Texas toom Kongress. Pape schauft fa eene Zuachkompanie un doawäajen kunn wie emsonst no de Kongressen reisen un uk no ons Frintschoft. Mame äa elra Brooda Fred Wismar un siene Fru Eulalie wonden en de Staut Temple en Texas. Onkel Fred lieed de Woarheit irjentwanea no daut Joa 1900 kjanen, aus hee een Jugentlicha wia, un leet sikj deepen. Hee räd met miene Mame un met sien aundret Jeschwista äwa de Woarheit. Hee wia sea bekaunt manke Breeda en dise Jäajent en Texas, wiels hee de Oppgow haud, de Vesaumlungen doa to besieekjen, soo aus een Kjreisoppsechta daut vondoag dän Dach deit. Hee wia een leeftolja, schaftja Maun un daut wia emma scheen, met am toop to sennen. Hee wia sea flietich em jeisteljen un hee wia een goodet Väabilt fa mie.

Aune 1941 reisd onse Famielje metem Zuach no St. Louis, Missouri, no eenen grooten Kongress. Doa sullen aule Kjinja un Jugentliche toop dicht biem Plautform setten, om Brooda Rutherford siene Räd to hieren met daut Teema “Dän Kjennich siene Kjinja”. Aus de Räd to Enj wia, freiden de äwa 15 000 junge Menschen sikj sea, daut Brooda Rutherford un siene Helpa jieda eenem von dee daut niee Buak Kinder jeewen. Ekj kjrieech uk eent.

En Aprell 1943 wia wie bie eenen kjlienen Kongress en Coffeyville en Kansas met daut Teema “Aun daut Woakj naungonen”. Doa wort bekauntjemoakt, daut aule Vesaumlungen met de School fa dän christeljen Deenst aunfangen wudden, un doa wort uk een Buakje fa dise niee School rutjejäft, waut 52 Kapitels haud. Lota en dautselwje Joa haud ekj en dise School dan miene ieeschte Oppgow. Doa wia uk noch waut besondret fa  mie opp disen Kongress. Ekj un een poa aundre leeten ons doa dicht bie opp eenen Foarm en een koldet Wota deepen.

Aune 1951 wia ekj met miene School derch un must entscheiden, waut ekj met mien Läwen doonen wudd. Mien Brooda Jerry haud ea em Betel metjeholpen. Un ekj wull uk jieren em Betel schaufen un doawäajen jeef ekj mie doa aun. Nich lang lota wort ekj dan enjelot un dän 10. Moaz 1952 funk ekj doa aun. Daut wia eene sea goode Entscheidunk, waut mie em jeisteljen sea jeholpen haft.

Mie jankad sea, bie de Drekjarie to schaufen un mettohalpen, Tietschreften un aundret to moaken. Oba se jeewen mie eene Oabeit aus Deschenbedeena un lota enne Koakstow. Ekj jleicht de Oabeit doawäajen un lieed een deel. Ekj kunn nienich bie de Drekjarie schaufen. Oba wiels de Oabeitsstunden en de Koakstow veschieden wieren, haud ekj foaken äwadach Tiet toom en de groote Bibliotäkj em Betel studieren. Daut holp mie, em jeisteljen wiedatokomen un mienen Gloowen to stoakjen. Mie wort daut uk noch kloara, daut ekj Jehova wull soo lang aus mäajlich em Betel deenen. Jerry haud aune 1949 daut Betel veloten un befried sikj met Patricia. Dee wonden dan en Brooklyn dicht bie daut Betel un spruaken mie emma Moot too un holpen mie, aus ekj nie em Betel wia.

Korz nodäm aus ekj no daut Betel kjeem, muaken se Proowstekjs toom mea Breeda sieekjen, waut se aus Betelrädna no de Vesaumlungen schekjen kunnen. De Betelrädna sullen dan de Vesaumlungen rom Brooklyn besieekjen, waut nich wieda auf wieren aus 320 Kilomeeta (200 Miel). Doa sullen dee eene Räd hoolen un met de Vesaumlunk toop prädjen. Mie wort uk utjeläst doatoo. Ekj wia sea nerwees, aus ekj miene ieeschte Räd haud. To dee Tiet wieren de Räden eene Stund. Jeweenlich fua ekj metem Zuach no de Vesaumlungen. Ekj weet noch krakjt, waut eenen Sindach no Meddach em Winta 1954 passieed, aus ekj oppem Wajch trigj no New York wia. Ekj sull aunfangs Owent em Betel aunkomen, oba hinjawäajes kjeem een groota Storm opp un daut wia ieskolt un schnied un dän Zuach siene ellektrische Mootasch hieeden opp met schaufen. Doawäajen kjeem ekj mau Mondach Klock fief zemorjes en New York City aun. Von doa neem ekj eenen aundren Zuach no Brooklyn un jinkj fuaz en de Koakstow schaufen. Ekj kjeem een bät lot un wia sea meed, wäajens ekj de gaunze Nacht nuscht jeschlopen haud. De Reisen aus Betelrädna hauden eenjemol waut opp sikj, oba ekj deed daut wellich, wäajen mie daut soo väl Freid jeef, de Vesaumlungen to unjastetten un väl niee Breeda un Sestren kjanen to lieren.

En miene ieeschte Joaren em Betel kunn ekj uk bie daut Rädio-Stäschen WBBR metmoaken. Daut Stäschen wia don oppem tweeden Stock von daut Jebied Numma 124 opp de Gauss Columbia Heights. Ekj wia eena von dee, waut doa bie een Bibelstudium metmuaken, waut jieda Wäakj äwa Rädio kjeem. Brooda A. H. Macmillan, waut aul lang em Betel wia, muak uk räajelmässich bie dit Rädio-Stäschen met. Wie nanden am Brooda Mac, un hee wia een sea goodet Biespel fa ons jinjre Breeda em Betel, wäajen hee Jehova emma tru jebläwen wia, wan hee uk väl Schwierichkjeiten beläft haud.

Aune 1958 kjrieech ekj eene aundre Oabeit em Betel. Ekj sull de Breeda, waut de Gilead-School derchjegonen wieren, halpen, Papieren to kjrieen von de Lenda, wua see hanjeschekjt worden, un uk plonen, woo see doa hankjeemen. Zhett-Tickets wieren to dee Tiet sea dia, doawäajen reisden de mieeschte von dee, waut no Afrika un Asien jeschekjt worden, met Frachtschäp doahan. Joaren lota worden de Zhett-Tickets dan bilja un de mieeschte Missionoaren kunnen metem Zhett reisen.

Aune 1960 wia ekj sea drock doamet, de Reisen fa de Breeda to plonen, waut doa aune 1961 von de Stäts no Europa flieejen wullen no de  internazionale Kongressen doa. Ekj reisd uk no eent von dise Kongressen, waut en Hamburg, Dietschlaunt, wia. No dän Kongress lieden ekj un dree aundre Breeda vom Betel ons eene Koa un fuaren derch Dietschlaunt no Room en Italien, wua wie daut Betel besochten. Von doa reisd wie no Frankreich un dan derch de Pyrenäen-Boaj no Spaunien, wua ons Woakj veboden wia. Wie kunnen de Breeda en Barcelona noch waut Bieekja brinjen, waut wie hauden soo enjepakt, daut daut no Jeschenkja leet. Wie freiden ons sea, dee kjanen to lieren! Von doa fua wie no Amsterdam un doa neem wie dän Zhett toom trigj no New York flieejen.

Ojjefäa een Joa lota sull ekj dan methalpen, de Reisen fa de 583 Breeda un Sestren to plonen, waut aune 1963 no de besondre internazionale Kongressen opp veschiedne Städen oppe Welt reisen kunnen. Daut wieren de Kongressen met daut Teema “Eewje goode Norecht”. De Breeda wullen no de Kongressen en Europa, en Asien un em Sied-Pazifik reisen un dan no Honolulu en Hawaii un tolatst no Pasadena, Kalifornien. Dee wullen uk no Libanon un no Jordanien reisen toom sikj doa de Städen von de Bibeltiet beseenen. Onse Aufdeelunk em Betel deed daut aules plonen met de Breeda äare Zhett-Tickets un Hotels un holp dee uk met de Papieren, waut dee brukten toom no aul dise Lenda reisen.

Daut Joa 1963 wia fa mie gaunz besonda. Dän 29. Juni befried ekj mie met Lila Rogers von Missouri, waut aul dree Joa ea em Betel nenjekomen wia. Eene Wäakj no onse Kjast reisden ekj un Lila met de Grupp met, waut no de Kongressen oppe gaunze Welt reisd. Wie fuaren no Griechenlaunt, Ägipten un Libanon. Von Beirut, Libanon, fluag wie no eenen kjlienen Zhett-Plauz en Jordanien. Wäajen ons Woakj doa nich en aule Stekjen frie wia un se ons jesajcht hauden, daut se Jehova siene Zeijen doa nich wudden nenloten, sorjd ons daut een bät, woo daut sennen wudd, wan wie doa hankjeemen. Wie wieren sea vewundat, aus wie doa aunkjeemen un sagen, daut eene Grupp Breeda un Sestren doa biem Zhett-Plauz stunden met een Zein, wua daut säd: “Welkom, Jehova siene Zeijen”. Daut wia wundascheen, de Lenda to besieekjen, wua de Bibel von rät, un de Städen to seenen, wua Abraham, Isaak un Jakob jewont hauden, wua Jesus un de Apostel jeprädicht hauden un wua de Christengloowen aunjefongen haud, sikj “äwa de gaunze Welt” to vebreeden (Apj. 13:47).

Lila unjastett mie nu aul 55 Joa tru bie aul miene Oppgowen. Wie kunnen ieremol toop no Spaunien un Portugal reisen, aus ons Woakj doa noch veboden wia. Wie spruaken de Breeda un Sestren doa Moot too un brochten dee Bieekja un Sachen, waut dee sest noch brukten. Wie hauden soogoa de Mäajlichkjeit, eenje Breeda to besieekjen, waut en Cádiz en Spaunien em Jefenkjnis wieren. Daut jeef mie soo väl Freid, daut ekj fa dee kunn eene biblische Räd hoolen, waut dee Moot jeef!

Vonne 1963 aun kunn ekj methalpen, veschiedne Reisen no internazionale Kongressen to plonen,  biejlikj no Afrika, Australien, Meddel-Amerika, Sied-Amerika, Europa, Asien, Hawaii, Nie-Seelaunt un Puerto Rico. Ekj un Lila wieren toop opp väl Kongressen, waut wie kjeenmol vejäten woaren, biejlikj aune 1989 en Warschau, Poolen. Doa kjeemen väl Breeda von Russlaunt han un daut wia dee äa ieeschta groota Kongress. Wie lieeden doa uk Breeda un Sestren kjanen, waut en de Sowjetunion wäajen äaren Gloowen joarenlank wieren enjestopt wast.

Eene aundre sea scheene Oppgow, waut ekj kjrieech, wia, veschiedne Betels oppe Welt to besieekjen un de Betelfamielje un Missionoaren doa Moot tootospräakjen. Bie onse latste Reis nom Betel en Sied-Korea kunn wie 50 Breeda besieekjen, waut en de Staut Suwon em Jefenkjnis wieren. Dee wieren aula sea mootich un freiden sikj to dee Tiet, wan see Jehova wada wudden frie deenen kjennen. Dee kjanen to lieren haft ons väl Moot jejäft! (Reem. 1:11-12).

Ekj hab jeseenen, woo sea Jehova sien Volkj jesäajent haft. Aus ekj mie aune 1943 deepen leet, jeef daut rom 100 000 Vekjindja, un nu sent daut äwa 8 Millionen, waut Jehova en 240 Lenda deenen. De flietje Breeda, waut de Gilead-School derchjegonen sent, haben väl doatoo jedonen, daut daut Woakj soo toojenomen haft. Daut haft mie väl Freid jejäft, met väle von dise Missionoaren tooptoschaufen un dee to halpen, no de Lenda to reisen, wua see deenen sullen.

Ekj sie soo dankboa, daut ekj mie en miene junge Joaren entschieden hab, noch mea fa Jehova to doonen un mie em Betel aunjeef. Jehova haft mie en aul dise Joaren sea jesäajent. Mie un Lila jeit daut sea scheen, em Betel mettohalpen. Un wie haben daut uk sea jejleicht, äwa 50 Joa met veschiedne Vesaumlungen en Brooklyn toop to prädjen un doa hab wie uk een deel woare Frind jefungen.

Ekj sie noch emma em Betel un Lila unjastett mie jieda Dach. Ekj sie nu aul äwa 84 Joa, oba ekj kaun doawäajen noch emma methalpen en de Aufdeelunk, wua de Breew nenkomen un rutgonen.

Daut es eene groote Freid, een Poat von Jehova siene wundascheene Organisazion to sennen un to seenen, woo woa de Wieed von Maleachi 3:18 sent. Doa sajcht daut: “Dan woa jie wada seenen, waut de Unjascheet es tweschen de jerajchte un de gottloose, un tweschen dee waut am deenen, un dee waut am nich deenen.” Wie seenen, daut dän Soton siene Welt jieda Dach schlajchta woat un daut de Menschen doa kjeene Hopninj haben un mau weinich Freid em Läwen. Oba dee, waut Jehova leewen un am deenen, haben mau rajcht en dise schwoare Tieden een tofrädnet Läwen un eene sechre Hopninj. Woo scheen es daut nich, daut wie kjennen de goode Norecht von Gott sien Kjennichrikj bekauntmoaken! (Mat. 24:14). Gott sien Kjennichrikj woat boolt met dise schlajchte Welt een Enj moaken un de Ieed to een Paradies moaken. Wie freien ons aul sea to dee Tiet! Dan woaren aule oppe Ieed jesunt un schaftich sennen un woaren fa emma läwen.