Dis Vetrach säd uk, daut et eene niee Organisazion jäwen sull, waut “Velkjabunt” heet. Dee sull “doafäa sorjen, daut de veschiedne Lenda toopschauften un daut et oppe Welt Fräd un Sechaheit jeef”. Een deel christelje Jemeenten deeden dän Velkjabunt unjastetten. De Generalrat der Kirchen Christi in Amerika (eene Grupp christelje Jemeenten, waut sikj toopjestonen hauden) lowden dän Velkjabunt un säden, daut Gott sien Kjennichrikj hia oppe Ieed derch dise polietische Organisazion schaufen wudd. Dee unjastetten dän Velkjabunt doaderch, daut see Veträda no dit Toopkomen en Paris schekjten. Eena von dise Veträda säd, daut derch dit Toopkomen “eene bätre Tiet fa de Menschheit aunfangen wudd”.

Doa funk opp iernst eene bätre Tiet aun, oba daut wia nich wäajen deejanje, waut bie dit Toopkomen en Paris metmuaken. Aune 1919 kjeem daut Prädichtwoakj soo rajcht em Schwunk, wiels Jehova deed siene Deena stoakjen toom dolla prädjen aus jeemols ea. Woo neem sikj daut rom? See wie mol, waut sikj doa aules endad bie de Bibelforscha.

Sinowent, dän 4. Jaunewoa 1919, sullen soo aus jieda Joa de Väaschte jewält woaren von de Watch Tower Bible and Tract Society. Joseph F. Rutherford, waut to jane Tiet de Leidunk haud äwa Gott sien Volkj, wia dan jroz met säwen aundre Breeda toop ojjerajcht enjestopt en Atlanta, Georgia, Stäts. Doawäajen kjeem de Froag opp, aus de väaschte Breeda, waut em Jefenkjnis wieren, wada sullen jewält woaren ooda nich.

Brooda Rutherford muak sikj em Jefenkjnis Sorjen, woo daut met de Organisazion wiedagonen wudd. Hee wist, daut eenje Breeda dochten, daut doa sestwäa toom Präsident jewält sull. Doawäajen haud hee eenen Breef jeschräwen, daut se Evander J. Coward aus Präsident wälen sullen, wiels dee “ruich”, “väabedocht” un “dän Harn tru” wia. Oba aus dis Breef bie de Joaresvesaumlunk väajeläst wort, wullen väle leewa sas Moonat wachten, ea see de Väaschte wälen wudden. De Ofkoten, waut de enjestopte Breeda verem  Jerecht biejestonen hauden, wieren doamet envestonen. Oba je lenja de Joaresvesaumlunk dieed, je iewalicha worden eenje Breeda doa.

Dan passieed waut besondret un Richard H. Barber säd lota, daut dit soo jewast wia, aus wan doa wäa “daut Fia utgoot”. Een Brooda vemuld sikj doa bie de Joaresvesaumlunk un säd: “Ekj weet mie nich met Jesazessachen, oba ekj weet, waut tru sennen bediet. Gott velangt, daut wie tru sent. Un daut baste kjenn wie wiesen, daut wie Gott tru sent, wan wie nu wälen un Brooda Rutherford aus Präsident bestädjen” (Psa. 18:26).

Alexander H. Macmillan, waut don uk enjestopt wia, vetald lota, daut Brooda Rutherford eenen Dach no de Joaresvesaumlunk aune Waunt von siene Stow puttad un to am säd: “Strakj mol diene Haunt rut.” Dan jeef dee am eene korte Norecht. Brooda Macmillan sach dän Zadel un wist fuaz, waut daut to bedieden haud. Doabowen stunt: “RUTHERFORD WISE VAN BARBER ANDERSON BULLY UN SPILL PRÄSIDENT DE DREE VÄASCHTE LEEWE JREESSEN.” Daut bedied, daut de Breeda wada deeselwje aus Väaschte jewält hauden un daut Joseph Rutherford un William Van Amburgh wada krakjt daut huage Aumt kjrieejen waut ea. Brooda Rutherford wudd de Präsident bliewen.

Aus de acht Breeda enjestopt wieren, schekjten de true Bibelforscha eenen Breef rom, daut se dee sullen frieloten. Dee wieren äwanäment un fruagen de Menschen, aus see dän unjaschriewen wullen, un äwa 700 000 deeden daut. Oba aum Medwäakj, dän 26. Moaz 1919, noch ea dee Breef bie de Rejierunk enjehendicht wort, worden Brooda Rutherford un de aundre väaschte Breeda friejeloten.

Aus Brooda Rutherford frie wia, kjeemen de Breeda am bejreessen un dan säd hee en eene Räd: “Ekj sie mie secha, daut daut, waut wie derchjemoakt haben, ons fa noch schwandre Tieden reedmoakt. . . . Aul daut, waut jie deeden, wia nich, daut june Breeda utem Jefenkjnis friekomen sullen. Daut wia nich de Hauptsach. . . . Jie haben doafäa jekjamft, fa de Woarheit Zeichnis to jäwen, un dee, waut doa metmuaken, worden sea jesäajent.”

Daut sitt soo, daut Jehova daut lenkjen deed, aus onse Breeda verem Jerecht wieren. Aus dee äare Sach dän 14. Mei 1919 fresch unjasocht wort, säd daut Jerecht: “Daut väaje Jerecht behaundeld de Aunjekloagde nich . . . soo jerajcht, aus daut haud sult, un doawäajen woat jan Uadeel nu oppjehowen.” Dit wia sea fein, wiels wan de Breeda bloos wieren friejeloten worden ooda wan dee weinja Strof jekjräajen hauden, dan wia daut doawäajen noch opp äare Papieren jewast, daut see mol wieren wäajen een Vebräakjen schuldich jesproaken worden. Oba nu worden dee met nuscht mea beschulcht. Doaderch wia daut mäajlich, daut Rechta Rutherford Jehova siene Deena wada aus Ofkot ver daut hechste  Jerecht von de Stäts veteidjen kunn, un daut deed hee uk foaken, aus hee wada frie wia.

Brooda Macmillan vetald: “Wie wullen nich bloos setten un de Henj enne Schoot lajen, bat de Har ons wudd met nom Himmel nämen. Wie worden en, daut wie daut wudden utfinjen motten, waut dän Harn sien Wellen wia.”

Oba de Breeda en de Hauptoffiz kunnen nich eefach met de Oabeit wiedamoaken, waut see joarenlank jedonen hauden. Wuarom nich? Aus de väaschte Breeda enjestopt wieren, wieren aule Ploten tweijemoakt worden, waut se toom Bieekja drekjen jebrukt hauden. De Breeda wieren sea truarich un eenje wundaden, aus daut Prädichtwoakj nu wudd to Enj sennen.

Jeef daut noch Menschen, waut de goode Norecht hieren wullen, waut de Bibelforscha prädijden? Brooda Rutherford wort sikj eenich, eene Räd to hoolen, om daut uttofinjen. De Bibelforscha kroagden aulem no dise Räd. Brooda Macmillan säd: “Wan doa kjeena komen wudd, dan wudd wie weeten, daut daut Prädichtwoakj derch wia.”

Aum Sindach, dän 4. Mei 1919, hilt Brooda Rutherford dan en Los Angeles, Kalifornien, de Räd “De Hopninj fa de bedrekjte Menschheit”, wan hee uk sea krank wia. Ojjefäa 3 500 Menschen horchten too un hundade musten veloten, wäajen doa nich mea Rum wia. Dän näakjsten Dach kjeemen noch eemol 1 500 no de Räd. Nu wisten de Breeda, daut de Menschen de goode Norecht opp iernst hieren wullen!

Daut, waut de Breeda dan deeden, wia biejlikj soo aus daut Prädichtwoakj, waut Jehova siene Zeijen bat vondoag dän Dach noch doonen.

De enjlischa Wacht-Turm vom 1. August 1919 säd, daut aunfangs Septamba en Cedar Point, Ohio, een groota Kongress sennen wudd.  Clarence B. Beaty, een junga Bibelforscha von Missouri, vetald: “Wie aula wullen onbedinjt doa sennen!” Äwa 6 000 Breeda un Sestren kjeemen doa han – väl mea, aus waut dee sikj äwajetalt hauden! Un besonda scheen wia, daut äwa 200 Stekj sikj en de Erie-Likj deepen leeten, waut doa dicht bie wia.

Dän feften Dach von dän Kongress, waut de 5. Septamba 1919 wia, säd Brooda Rutherford en siene “Räd fa de Metoabeida”, daut et eene niee Tietschreft jäwen wudd. Dee wudd Das Goldene Zeitalter * heeten un “sikj von wichtje Norechten haundlen un doavon, wuarom dise Norechten no de Schreft no soo besonda [wieren]”.

Aule Bibelforscha wort toojerot, daut see mootich met dise niee Tietschreft prädjen sullen. En eenen Breef säd daut von dit Prädichtwoakj: “Jieda eena, waut jedeept es, saul em Denkj hoolen, waut vonne groote Iea daut es to deenen. Lot junt de Jeläajenheit nich derchgonen un halpt met, daut oppe gaunze Welt een grootet Zeichnis jejäft woat.” Sea väl deeden daut. De Vekjindja wieren soo flietich, daut bat Dezamba äwa 50 000 Persoonen dise niee Tietschreft bestalden.

Utgangs Joa 1919 wia daut Woakj von Jehova siene Deena wada fein enjerecht un dee hauden wada Moot. Un doa hauden uk miere wichtje Profezeiungen sikj erfelt von de latste Tiet. Soo aus daut en Maleachi 3:1-4 verutjesajcht wia, wia daut unjasieekjen un reinjen von Gott sien Volkj to Enj. Jehova siene Deena wieren uk friejekomen von daut groote Babel un Jesus haud dän truen, weisen Kjnajcht aunjestalt (Opb. 18:2, 4; Mat. 24:45). * Nu wieren de Bibelforscha reed fa daut Woakj, waut see noch doonen sullen.