1. Wuarom vedeent Jehova daut, daut wie bloos am deenen?

JEHOVA vedeent daut, daut wie bloos am deenen, wiels hee ons jemoakt haft un ons daut Läwen jejäft haft (Opb. 4:11). Wie leewen un respakjten am, un doch sent wie enne Jefoa. Daut kaun leicht bat doa komen, daut aundre Sachen fa ons wichtja woaren, aus Jehova soo to deenen, aus hee daut vedeent. Wie motten weeten, woo daut bat doa komen kaun. Oba daut ieeschte well wie seenen, waut daut bediet, bloos Jehova to deenen.

2. Waut woa wie no 2. Mose 34:14 no doonen, wan wie bloos Jehova deenen?

² De Schreft wiest, daut wie eene groote Leew fa Jehova haben motten, wan wie bloos am deenen wellen. Dan woa wie “onjedeelde Ieaforcht” fa am haben un daut nich tooloten, daut irjentwaut ooda irjentwäa bie ons en Jehova siene Städ kjemt (läs 2. Mose 34:14).

3. Wuarom hab wie goode Uasoak, Jehova to leewen?

³ Wie haben goode Uasoak, Jehova to leewen un bloos am to deenen, wiels wie väl von am jelieet haben un siene goode Ieejenschoften väl räakjnen. Wie weeten uk, waut Jehova jleicht un waut hee haust, un denkjen krakjt soo aus hee. Un wie weeten, waut hee sikj met de Menschen väajenomen haft, un unjastetten am doamet. Daut es eene Iea fa ons, daut hee opp ons vetrut un daut wie kjennen siene Frind sennen (Psa. 25:14). Un derch aules, waut wie von onsen Schepfa lieren, kom wie am noda (Jak. 4:8).

4. (a) Waut deit de Fient, daut wie Jehova weinja leewen sellen? (b) Waut woa wie en disen Artikjel seenen?

 ⁴ De beesa Fient harscht äwa dise Welt un hee brukt dee toom ons enbillen, daut wie ons sellen selfst toom Jefaulen läwen un schlajchte Wenschen nogonen (Efs. 2:1-3; 1. Joh. 5:19). Hee well ons auflenkjen, daut wie nich mea bloos Jehova deenen. Well wie mol tweeatlei seenen, woo dee daut deit. Ieeschtlich well dee ons enjankren, daut wie sellen nom Jelt hinjaraun sennen, un tweedens well dee, daut wie ons schlajchten Tietvedrief utläsen.

5. Wuarom mott wie oppaussen, daut wie nich nom Jelt hinjaraun sent?

⁵ Wie aula wenschen ons, daut wie jenuach to äten haben un schmocke Kjleeda un een feinet Hus. Oba wie motten oppaussen, daut wie nich daut Jelt leewen. En dän Soton siene Welt sent väle “nom Jelt hinjaraun” un no daut, waut eena sikj met daut kjeepen kaun (2. Tim. 3:2). Jesus wist, daut siene Nofolja uk leicht aunfangen kunnen, daut Jelt to leewen. Doawäajen säd hee: “Kjeena kaun twee Haren deenen. Hee woat eenen nich lieden kjennen un von dän aundren väl hoolen. Ooda hee woat aun eenen henjen un dän aundren veachten. Du kaust nich Gott deenen un daut Rikjtum” (Mat. 6:24). Wan wie Jehova deenen un oba too väl Tiet un Krauft brucken, om rikj to woaren, dan deen wie soo to sajen twee Haren. Wie deenen dan nich mea eensich Jehova.

6. Waut kjenn wie von daut lieren, waut Jesus to de Vesaumlunk en Laodizea säd?

⁶ Meist 2 000 Joa trigj puchten eenje von de Vesaumlunk en Laodizea un säden: “Ekj sie rikj, hab vollopp un mie fält daut aun nuscht!” Oba Jehova un Jesus kunnen seenen, daut dee “een jaumalich oamet, miserobeljet, blinjet, noaktjet Wrak” wieren.  Jesus wees dee nich trajcht, wäajen dee rikj wieren, oba wäajen dee dolla nom Jelt hinjaraun wieren aus doano, met Jehova Frind to bliewen (Opb. 3:14-17). Wan wie enwoaren, daut wie daut tietelje too sea leewen, dan mott wie doa fuaz waut aun doonen (1. Tim. 6:7-8). Aus wan nich, woat ons Hoat opp twee Sieden stonen un Jehova woat onse Aunbädunk nich aunnämen, wiels hee “kaun kjeene aundre Jetta vedroagen” (5. Mo. 4:24). Woo kaun daut bat doa komen, daut daut Jelt fa ons too wichtich woat?

7-9. Waut kjenn wie von eenen Eltesten lieren, waut David heet?

⁷ David es een flietja Eltesta, waut en de Stäts wont. Hee sajcht, hee jleicht daut noch emma, flietich to schaufen. Doawäajen kjrieech hee en de Kompanie, wua hee schauft, eene bätre Oabeit un mea Jelt. Hee wort uk mank de baste Oabeida en daut Launt jetalt, waut dise Oabeit deeden. David sajcht: “Ekj docht, daut aul daut een Tieekjen doafäa wia, daut Jehova mie säajend.” Oba wia daut werkjlich soo?

⁸ Met de Tiet wort David en, daut hee derch siene Oabeit emma wieda aufkjeem von Jehova. Hee sajcht: “Ekj docht bie de Toopkomes un mau rajcht em Deenst äwa de Trubbels no, waut ekj bie de Oabeit haud. Ekj kjrieech sea dia betolt, oba ekj feeld mie emma dolla unja Druck un wie hauden Trubbels em Ehestaunt.”

⁹ David dakjt daut op, daut hee entscheiden must, waut en sien Läwen sull daut ieeschte komen. Hee sajcht: “Ekj wort mie gaunz eenich, doa waut met to doonen.” David wull sikj de Oabeit aundasch endeelen un hee räd doa to sienen Wieet von. Woo kjeem daut ut? David velua siene Oabeit! Waut deed hee dan? Hee sajcht: “Fuaz dän näakjsten Dach jeef ekj mie aun toom  fa wieda Pioniahelpa sennen.” Een Stootje no daut wort David dan Pionia un lota funk siene Fru uk met dän Pioniadeenst aun. Dee beid muaken fa aundre rein, daut see äa Läwen moaken kunnen. See worden sikj eenich, eene läach aunjeseene Oabeit to doonen, oba fa an wia daut nich daut wichtichste, waut see schauften. Nu vedeenen see bloos noch 10 Prozent von daut, waut see ea vedeent haben, oba see haben doawäajen noch jieda Moonat krakjt daut, waut an fält toom äare Onkosten betolen. Dee wellen, daut Jehova en äa Läwen daut ieeschte kjemt, un haben utjefungen, daut Jehova fa soone sorcht, waut daut ieeschte no sien Kjennichrikj sträwen (Mat. 6:31-33).

10. Woo kjenn wie no ons Hoat oppaussen?

¹⁰ Wie motten no ons Hoat oppaussen, endoont aus ons daut knaup jeit ooda aus wie riew haben. Woo kaun eena daut doonen? Lot die daut nich jankren, rikj to woaren. Un pauss opp, daut diene Oabeit nich wichtja fa die woat aus dien Deenst fa Jehova. Woo kjenn wie daut enwoaren, aus daut bie ons aul soo es? Wie wudden kjennen äwalajen: “Denkj ekj en de Toopkomes ooda em Deenst foaken aun miene Oabeit? Moak ekj mie dän Tiet äwa Sorjen, aus ekj fa lota woa jenuach Jelt haben? Haben ekj un mien Ehepoatna Trubbels wäajen daut Jelt ooda wäajen tietelje Sachen? Wudd ekj reed sennen, eene läach aunjeseene Oabeit to doonen, wan ekj dan mea Tiet fa Jehova haud?” (1. Tim. 6:9-12). Wan wie äwa dise Froagen nodenkjen, dan well wie emma em Denkj hoolen, daut Jehova ons leeft un daut hee deejanje, waut am deenen, waut vesproaken haft. Hee säd: “Ekj woa die nich veloten, die nich em Stich loten.” Doawäajen schreef de Apostel Paulus: “Siet nich hungrich no Jelt” (Heb. 13:5-6).

11. Waut kaun Tietvedrief aun ons doonen?

¹¹ Jehova well, daut ons daut scheen jeit, un de Tietvedrief kaun doa väl too doonen. Gott sien Wuat sajcht mau rajcht: “De Mensch kaun nuscht bätret doonen, aus äten un drinkjen un sikj to siene Oabeit freien” (Liera 2:24). Oba en dise Welt jeft et väl Tietvedrief, waut ons schoden kaun. Soon Tietvedrief kaun de Menschen bat doa brinjen, daut dee Sachen fa goot talen ooda soogoa leewen, waut Gott sien Wuat fa schlajcht talt.

12. Wuarom mott wie no 1. Korinta 10:21-22 no väasechtich sennen met onsen Tietvedrief?

 ¹² Wie wellen bloos Jehova deenen un doawäajen kjenn wie nich “aun däm Harn sien Desch” äten un “aun de beese Jeista äa Desch” (läs 1. Korinta 10:21-22). Wan wie met wäm toop äten, dan es daut foaken een Tieekjen doafäa, daut wie met dän Frind sent. Un wan wie ons Tietvedrief utläsen, wua Grausomkjeit, Hakjsarie, een orreinet Läwen ooda aundre schlajchte Sachen fa goot jetalt woaren, dan es daut soo, aus wan wie met Gott siene Fiend toop eene Moltiet äten, waut dee reedjemoakt haben. Wäa soont deit, dee schot sikj selfst un kaun uk nich mea Frint met Jehova sennen.

13-14. Woo moakt Jakobus 1:14-15 daut dietlich, daut wie oppaussen motten, wan wie ons Tietvedrief utläsen? Met waut jeit daut to vejlikjen?

¹³ Well wie mol seenen, en waut fa Stekjen Tietvedrief soo es aus Äten. Wan wie äten, dan kjenn wie selfst entscheiden, waut wie ons em Mul stoppen. Oba wan wie daut ieescht oppjeschlukt haben, dan kjenn wie nich mea entscheiden, waut daut Äten aun onsen Kjarpa doonen woat. Wan wie waut jesundet äten, dan es daut fa onse Jesuntheit toom gooden, oba wan wie waut ojjesundet äten, dan schot ons daut. Veleicht woa wie daut nich fuaz en, oba met de Tiet woa wie daut moakjen.

¹⁴ Soo es daut uk met dän Tietvedrief. Wan wie ons dän utläsen, dan kjenn wie selfst entscheiden, waut wie en ons Vestaunt nenloten. Oba lota kjenn wie nich mea entscheiden, waut ons Tietvedrief aun ons denkjen un aun ons Hoat doonen woat. Gooda Tietvedrief kaun ons freschen Moot jäwen, oba schlajchta Tietvedrief woat ons schoden (läs Jakobus 1:14-15). Veleicht woa wie daut nich fuaz en, woo dee ons schot, oba met de Tiet woa wie daut moakjen. Doawäajen woarnt de Schreft ons un sajcht: “Ert junt nich! Gott lat sikj nich spotten. Waut een Mensch seit, woat hee uk arnten. Wäa doa seit sien Fleesch to jefaulen, woat von däm Fleesch vedoawen arnten” (Gal. 6:7-8). Daut es sea wichtich, daut wie aulen Tietvedrief tochloten, wua Sachen fa goot hanjestalt woaren, waut Jehova haust! (Psa. 97:10).

15. Waut fa een Jeschenkj haft Jehova ons jejäft?

¹⁵ Een deel von Jehova siene Deena jleichen JW Broadcasting^®, ons Tellewizhen-Stäschen em Internet. Eene Sesta, waut Marilyn heet, sajcht: “JW Broadcasting haft mie jeholpen, tofrädna to sennen, un ekj mott doa nich oppaussen, aus ekj aules kjikjen kaun, waut doa es. Wan ekj mie auleen feel ooda ommootich sie, dan sieekj ekj mie doa eene Räd ooda eene Morjenaundacht, waut mie Moot jeft. Dan feel ekj mie dolla vebungen met Jehova un met siene Organisazion. JW Broadcasting haft mien Läwen gaunz veendat.” Deist du dit Jeschenkj von Jehova uk utnutzen? Opp JW Broadcasting jeft daut jieda Moonat een freschet Moonatsprogram un doa kaun eena uk väl oppjeschnaktet finjen un een deel Videos, waut eena irjentwanea kjikjen kaun.

16-17. (a) Wuarom mott wie oppaussen, woo väl Tiet wie fa Tietvedrief brucken? (b) Woo kjenn wie onse Tiet rajcht brucken?

¹⁶ Wie motten nich bloos oppaussen, waut von Tietvedrief wie haben, oba uk woo väl Tiet wie doafäa brucken. Sest bruck wie woomäajlich mea Tiet fa Tietvedrief aus fa Jehova. Fa väle es daut schwoa, de rajchte Mot to finjen. Eene Sesta, waut Abigail heet un 18 Joa es, sajcht: “Wan ekj eenen drocken Dach hab, dan  kaun ekj mie biem Tellewizhen kjikjen vereiwen. Oba wan ekj nich oppauss, dan kjikj ekj doa stundenlank.” Een junga Brooda, waut Samuel heet, sajcht: “Eenjemol kjikj ekj em Internet een deel korte Videos. Ieeschtlich well ekj bloos eent kjikjen un met eemol woa ekj en, daut doa dree ooda vea Stund vegonen sent.”

¹⁷ Woo kjenn wie de rajchte Mot finjen? Daut ieeschte mott wie weeten, woo väl Tiet wie nu aul fa Tietvedrief brucken. Wurscht du die daut mol kjennen fa eene Wäakj oppschriewen? Du wurscht die daut kjennen en eenen Kalenda oppschriewen, woo väl Stund du Tellewizhen kjikjst, die em Internet romsieekjst un met dien Fon ooda Tablet spälst. Wan sikj die daut dan soo späat, daut du too väl Tiet fa soont brukst, wurscht du die kjennen eenen Plon moaken. Äwalaj daut ieeschte, wanea du de wichtichste Sachen doonen west, un dan moak Plons fa dienen Tietvedrief. Froag Jehova no Help, daut du die no dienen Plon rechten kaust. Opp dee Wajch woascht du Tiet un Krauft haben toom fa die selfst studieren un fa daut Famieljenstudium un de Toopkomes un toom prädjen un lieren, waut to onsen Deenst fa Jehova jehieet. Un du woascht die daut dan uk nich doamet schwoa moaken, daut du too väl Tiet fa Scheengonen vekwosen deist.

18-19. Woo kjenn wie daut bewiesen, daut wie bloos Jehova deenen?

¹⁸ De Apostel Petrus schreef von daut Enj von dän Soton siene Welt un von de niee Welt, waut boolt komen wudd, un säd dan: “Leewe Breeda, wiels jie doano luaren, sträft doano, daut jie woaren Fräd haben, un rein un fälaloos sennen” (2. Pet. 3:14). Wan wie disen Rot nokomen un ons bastet doonen, om een reinet Läwen to fieren un Jehova rajcht to deenen, dan bewies wie, daut wie bloos Jehova aunbäden.

¹⁹ De Soton un siene Welt woaren wieda proowen, ons bat doa to brinjen, daut aundre Sachen bie ons wichtja sent aus Jehova (Luk. 4:13). Oba endoont met waut dee ons vesieekjen, wie woaren daut nich tooloten, daut irjentwäa ooda irjentwaut bie ons en Jehova siene Städ kjemt. Wie sent ons gaunz eenich, Jehova daut to jäwen, waut bloos hee vedeent – daut wie eensich am deenen!