1-2. (a) Waut woaren de Rejierungsmana boolt bekauntmoaken? (b) Om waut vonne Froagen mott wie omweeten?

WOO woat daut sennen, wan de Rejierungsmana ieescht bekauntmoaken, daut “aules . . . ruich un secha [es]”, wua wie aul lang no luaren? Veleicht puchen dee dan doamet, daut de Welt noch kjeenmol ea soo secha wia. Dee wellen ons enbillen, daut see met aule Schwierichkjeiten oppe Welt kjennen foadich woaren. Oba dan woat waut komen, wua dee nich woaren met foadich woaren. Waut es daut? De Schreft sajcht: “Dan woat äa vedoawen plazlich äwa an komen . . . Doa woat daut kjeen doavonkomen jäwen” (1. Tess. 5:3).

² Nu woa wie een poa wichtje Froagen beauntwuaten: Waut woat en de “groote Triebsaul” passieren? Waut well Jehova, waut wie dan doonen sellen? Un woo kjenn wie ons nu aul doaropp reedmoaken, daut wie en de groote Triebsaul tru bliewen kjennen? (Mat. 24:21, Reimerbibel).

3. Woo woat Gott no Openboarunk 17:5, 15-18 no “daut groote Babel” venichten?

³ Läs Openboarunk 17:5, 15-18. “Daut groote Babel” woat venicht woaren! Un soo, aus wie aul jeseenen haben, es daut, waut doa passieren woat, nich en de Rejierungsmana äare Macht. Wuarom nich? Wiels “Gott . . . an daut en daut Hoat . . . [jäwen woat], om sienen Wellen uttofieren”. Waut es sien Wellen? Daut aule faulsche Gloowes oppe Welt venicht woaren, un doa sent uk soone Gloowes met en, waut sikj Christen nanen. * Gott woat “de tieen Hieena” von “een dunkelroodet Tia” daut enjäwen, daut see dee venichten sellen. De tieen Hieena sent  een Jlikjnis fa aule Rejierungen, waut “daut Tia” unjastetten, un daut Tia stalt de Veeende Nazionen väa (Opb. 17:3, 11-13; 18:8). Daut dise Rejierungen jäajen de faulsche Gloowes komen, woat daut Tieekjen sennen, daut de groote Triebsaul aunjefongen haft. Daut woat opp iernst eene schlemme Tiet oppe gaunze Welt sennen!

4. (a) Waut woaren de Rejierungsmana woomäajlich sajen, wuarom see jäajen daut groote Babel komen? (b) Waut woaren deejanje, waut ea to dise Jemeenten jehieeden, dan woomäajlich doonen?

⁴ Wie weeten daut nich, waut de Rejierungsmana sajen woaren, wuarom see jäajen daut groote Babel komen. Veleicht woaren dee sajen, daut et de Gloowes äare Schult wia, daut doa nich Fräd wia, un daut dee sikj emma manke Politikj menjden. Ooda dee woaren woomäajlich sajen, daut de Gloowes too väl Rikjtum un tietelje Sachen oppjeklompt hauden (Opb. 18:3, 7). Wan de faulsche Gloowes venicht woaren, dan meent daut woomäajlich nich, daut uk de Menschen aula venicht woaren, waut doa biejehieren. Enne Städ daut späat sikj daut soo, daut de veschiedne Jemeenten oppe Welt venicht woaren. Wan dee ieescht veschwungen sent, dan woaren de Menschen enwoaren, daut äare Gloowesleidasch an aunjeschmäat haben. Doawäajen woaren deejanje, waut ea to dise Jemeenten jehieeden, dan woomäajlich nuscht mea wellen met dee to doonen haben.

5. Waut haft Jehova vesproaken, un wuarom?

⁵ De Schreft sajcht nich, woo lang daut dieren woat, bat daut groote Babel venicht es, oba dee jeft auntovestonen, daut et nich sea lang sennen woat (Opb. 18:10, 21). Jehova haft vesproaken, daut hee de “Doag . . . vekjartren” wudd von de groote Triebsaul, daut “siene utjewälde” äwaläwen kjennen un uk de woara Gloowen (Mar. 13:19-20). Oba waut well Jehova, waut wie doonen sellen, wan de groote Triebsaul aunjefongen haft un noch ea de Kjrich von Harmagedon kjemt?

6. Wuarom es daut nich jenuach, ons bloos von dän faulschen Gloowen loostomoaken?

⁶ Soo aus wie en dän väajen Artikjel jeseenen haben, well Jehova haben, daut siene  Deena von daut groote Babel wajchbliewen. Oba daut es nich jenuach, ons bloos von dän faulschen Gloowen loostomoaken. Wie motten ons uk eenich sennen, fa dän woaren Gloowen entostonen un Jehova rajcht to deenen. Well wie mol tweeatlei seenen, woo daut schauft.

7. (a) Woo kjenn wie fa daut enstonen, waut Jehova fa rajcht talt? (b) Woo wiest Hebräa 10:24-25 ons, daut et nu besonda wichtich es, no de Toopkomes to wanken?

⁷ Daut ieeschte mott wie emma fa daut enstonen, waut Jehova fa rajcht talt. Wie kjennen ons nich no daut rechten, woo de Welt daut haft. Biejlikj tal wie aule Sorten Huararie fa schlajcht, uk wan Mana met Mana ooda Frues met Frues doonen ooda wan soone sikj befrieen (Mat. 19:4-5; Reem. 1:26-27). Tweedens mott wie ons wieda met onse Gloowesbreeda vesaumlen toom Gott aunbäden. Wie woaren daut doa doonen, wua daut mäajlich es, endoont aus en een Vesaumlungshus ooda bie Breeda ooda em jeheemen. Wie woaren kjeenmol opphieren, no de Toopkomes to wanken, endoont waut doa passieet, un “daut es wichtich, wiels de latsta Dach noda kjemt, soo aus . . . [wie] seenen kjennen” (läs Hebräa 10:24-25).

8. Waut woat sikj lota woomäajlich bie ons prädjen endren?

⁸ En de groote Triebsaul woa wie woomäajlich eene aundre Norecht prädjen. Nu moak wie de goode Norecht von daut Kjennichrikj bekaunt un wellen Jinja moaken. Oba daut es goot mäajlich, daut wie lota eene Norecht prädjen woaren, waut sea jlikjtoo es un met groote Hoagelbieta vejlikjt woat (Opb. 16:21). Veleicht woa wie bekauntmoaken, daut dän Soton siene Welt meist fuaz gaunz oppjeriemt woat. Met de Tiet woa wie utfinjen, waut wie dan krakjt sajen woaren un woo wie daut doonen woaren. Woa wie daut opp deeselwje Wajch doonen, aus wie daut aul äwa hundat Joa doonen, ooda aundasch? Daut mott wie aufwachten. Endoont woo daut sennen woat, daut sitt doano, daut wie de Oppgow kjrieen woaren, Jehova siene Jerechtsbootschoft mootich bekaunttomoaken! (Hes. 2:3-5).

9. (a) Waut woaren de Velkja woomäajlich doonen, wan wie de Jerechtsbootschoft prädjen? (b) Opp waut kjenn wie ons veloten?

⁹ Daut späat sikj soo, daut onse Norecht de Velkja dan bat doa brinjen woat, daut see ons fa emma stell moaken wellen. Oba krakjt soo aus wie ons nu doaropp veloten, daut Jehova ons em Deenst halpt, woa wie ons uk dan opp am veloten motten. Wie kjennen ons secha sennen, daut ons Gott ons stoakjen woat toom sienen Wellen doonen (Micha 3:8).

10. Woo woat et de mieeschte Menschen en de groote Triebsaul gonen, soo aus Lukas 21:25-28 sajcht?

¹⁰ Läs Lukas 21:25-28. De Menschen woaren sikj en de groote Triebsaul sea vefieren, wan dee enwoaren, daut aules nuscht enhelt, wua see sikj opp veloten haben. Daut woat een “enjstelja Dach” sennen, wiels dee beduaren woaren, aus dee en de schwanste Tiet, waut et jeemols jeef, äwaläwen kjennen (Zef. 1:14-15). To dee Tiet woat daut Läwen woomäajlich uk fa Jehova siene Deena schwanda woaren. Wäajen wie noch emma nich Poat von dise Welt sennen woaren, woa wie veleicht em Trubbel komen un nich emma daut needichste haben, waut ons fält.

11. (a) Wuarom woaren se Jehova siene Zeijen opp Ziel haben? (b) Wuarom bruck wie ons nich fa de groote Triebsaul ferchten?

¹¹ Daut sitt soo, daut de Menschen irjentwanea woaren doll woaren, wäajen äa Gloowen venicht es, oba Jehova siene Zeijen  wieda no äaren Gloowen läwen. Secha woaren dee aulem weeten loten, woo oppjeräacht see sent, biejlikj äwa Internet. De Velkja un de Soton, waut äwa dee harscht, woaren ons haussen, wäajen ons Gloowen de eensja sennen woat, waut nich woat venicht sennen. Dee woaren enwoaren, daut an daut nich jejlekjt haft, aule Gloowes oppe Ieed uttoroden. Doawäajen woaren dee ons opp Ziel haben. To dee Tiet woaren de Velkja dan Gog von Magog woaren. * Dee woaren sikj toopstonen un jäajen Gott siene Deena komen, soo sea aus see woaren kjennen (Hes. 38:2, 14-16). Wiels wie nu noch nich aule Eenselheiten kjanen, wudd wie ons daut kjennen schwoa moaken met aul daut, waut doa noch woaren kunn. Oba eent weet wie gaunz secha: Wie brucken ons nich fa de groote Triebsaul ferchten. Jehova woat ons daut weeten loten, woo wie kjennen jerat woaren (Psa. 34:20). Wie woaren kjennen “de Kjap opp[häwen]”, wiels wie weeten, daut sikj onse “Radunk nodat”. *

12. Woo haft “de trua, weisa Kjnajcht” ons opp daut reedjemoakt, waut noch komen woat?

¹² “De trua, weisa Kjnajcht” moakt ons aul lang emma doaropp reed, daut wie en de groote Triebsaul kjennen tru bliewen (Mat. 24:45). Eent, woo dee daut deed, wieren biejlikj de dreedoagsche Kongressen, waut wie von 2016 bat 2018 hauden. Doa wort ons toojerot, daut wie aun de Ieejenschoften schaufen sullen, waut ons fälen, wiels Jehova sien Dach emma noda kjemt. Well wie noch mol een bät von dise Ieejenschoften räden.

13. (a) Woo kjenn wie doaropp schaufen, Jehova tru to sennen? (b) Wuarom mott wie daut nu lieren, Jehova tru to sennen?

¹³ Tru sennen: De Kongress von 2016 haud daut Teema “Bliew Jehova tru!” Doa hab wie jelieet, daut wie groote Frind met Jehova sennen motten, daut wie am kjennen tru bliewen. Wie haben uk jeseenen, daut wie Jehova noda komen, wan wie von Hoaten bäden un flietich sien Wuat studieren. Soo kjenn wie mau rajcht met de jratste Schwierichkjeiten foadich woaren. Wie kjennen ons doaropp veloten, daut wie noch jratre Proowen derchgonen woaren un noch dolla bewiesen motten, daut wie Gott un sien Kjennichrikj tru sent, je noda daut Enj von dän Soton siene Welt kjemt. Un secha woaren de Menschen wieda äwa ons spotten (2. Pet. 3:3-4). Woomäajlich woaren dee daut besonda doawäajen doonen, wäajen wie nuscht von dän Soton siene Welt unjastetten. Wie motten nu doaropp schaufen, Gott tru to sennen, daut wie uk en de groote Triebsaul kjennen tru bliewen.

14. (a) Waut woat sikj bie de Breeda endren, waut oppe Ieed de Leidunk haben? (b) Wuarom woa wie dan motten tru sennen?

¹⁴ En de groote Triebsaul woat sikj daut endren, wäa äwa Gott sien Volkj woat aunjestalt sennen. Irjentwanea woaren aule Jesaulwde, waut dan noch oppe Ieed sent, em Himmel jenomen woaren toom bie dän Kjrich von Harmagedon metmoaken (Mat. 24:31; Opb. 2:26-27). Daut bediet, daut de Väastaunt nich mea woat bie ons oppe Ieed sennen. Oba bie de groote Häad woat wieda aules siene Ordnunk haben, wiels Breeda  von de aundre Schop de Leidunk kjrieen woaren, waut sikj fein doamet vestonen. Woo kjenn wie dan wiesen, daut wie Jehova tru sent? Wan wie dise Breeda unjastetten un daut nokomen, waut Jehova ons derch dee sajen lat. Sest woa wie nich kjennen äwaläwen!

15. (a) Waut halpt ons, bäta uttohoolen? (b) Wuarom mott wie daut nu aul lieren?

¹⁵ Uthoolen: De Kongress von 2017 haud daut Teema “Jeff nich opp!” Doa wort ons jewäsen, woo wie bäta met Trubbels foadich woaren kunnen. Wie haben jelieet, daut wie emma uthoolen kjennen, wan wie ons opp Jehova veloten, endoont woo onse Omstend sent (Reem. 12:12). Well wie emma aun daut denkjen, waut Jesus ons vesproaken haft. Hee säd: “Wäa bat aum Enj uthelt, woat jerat woaren” (Mat. 24:13). Daut bediet, daut wie tru bliewen motten, endoont waut doa oppkjemt. Wan wie nu en aule Proowen tru bliewen, dan woat ons Gloowen stoakja woaren, ea de groote Triebsaul aunfangt.

16. (a) Von wua kjemt ons Moot? (b) Woo kjenn wie nu aul lieren, mootja to woaren?

¹⁶ Moot haben: De Kongress von 2018 haud daut Teema “Hab Moot!” Doa wort ons denkjen jeholpen, daut ons Moot nich doavon kjemt, daut wie ons opp ons selfst veloten. Wie motten ons opp Jehova veloten, daut wie kjennen uthoolen un opp iernst Moot haben. Woo kjenn wie daut lieren, ons noch dolla opp am to veloten? Wan wie jieda Dach sien Wuat läsen un doaräwa nodenkjen, woo Jehova ieeschtemma siene Deena rad (Psa. 68:21; 2. Pet. 2:9). Wan de Velkja en de groote Triebsaul jäajen ons komen woaren, dan woa wie noch mea Moot brucken un noch dolla opp Jehova vetruen motten aus jeemols ea (Psa. 112:7-8; Heb. 13:6). Wan wie ons nu aul opp Jehova veloten, dan woa wie kjennen Moot haben, wan Gog jäajen ons kjemt. *

17. Wuarom sell wie ons nich fa Harmagedon ferchten? (See daut Bilt oppe väaschte Sied.)

¹⁷ Soo aus wie en dän väajen Artikjel jeseenen haben, haben de mieeschte von ons äa Läwen lank en de latste Tiet jeläft.  Oba wie kjennen doaropp hopen, de groote Triebsaul to äwaläwen. De Kjrich von Harmagedon woat met dise Welt eent un fa aulemol een Enj moaken. Wuarom bruck wie ons nich fa dän ferchten? Wiels daut woat Jehova sien Kjrich sennen (Spr. 1:33; Hes. 38:18-20; Sach. 14:3). Wan Jehova ieescht sajcht, dan woat Jesus Christus met dän Kjrich aunfangen. De Jesaulwde, waut vom Doot oppjestonen sent, un tieendusende Enjel woaren met am toop kjamfen. Dee woaren Kjrich fieren jäajen dän Soton un de beese Jeista un jäajen dee äare Helpa oppe Ieed (Dan. 12:1; Opb. 6:2; 17:14).

18. (a) Waut haft Jehova vesproaken? (b) Woo wiest Openboarunk 7:9, 13-17 ons, daut wie väl goodet em Verhop haben?

¹⁸ Jehova haft vesproaken: “Kjeena kaun soont häastalen, waut junt venichten woat” (Jes. 54:17). “Eene [groote] Häad” von siene true Deena woaren “de groote Vefoljunk”, ooda Triebsaul, äwaläwen un am dan wieda tru deenen (läs Openboarunk 7:9, 13-17). De Schreft wiest ons, daut wie väl goodet em Verhop haben! Wie weeten, daut Jehova deejanje bewoat, “dee am tru bliewen” (Psa. 31:24). Un aule, waut am leewen un preisen, woaren sikj sea freien, wan see seenen, woo Jehova sienen heiljen Nomen reinmoaken woat (Hes. 38:23).

19. Waut fa scheenet woa wie boolt beläwen kjennen?

¹⁹ Stal die mol väa, waut daut en 2. Timotäus 3:2-5 sajen wudd, wan daut doa von de Menschen en de niee Welt räden wudd, wua de Soton nich mea mankspälen kunn. (See dän Kausten “ Woo de Menschen lota sennen woaren”.) Brooda George Gangas, waut em Väastaunt deend, säd mol: “Woo wundascheen woat et opp dise Welt nich sennen, wan doa jieda eena Jehova deenen woat! Boolt woascht du kjennen en de niee Welt läwen. Du woascht kjennen soo lang läwen aus Jehova. Wie woaren eewich läwen.” Woo scheen woat daut nich sennen!