1. Waut kaun Jehova doonen, daut sien Väanämen sikj erfelt?

WAUT jeft Jehova sien Nomen auntovestonen, soo aus väl Jelieede daut sajen? Ieeschtlich es doa met en, daut Jehova to aules woaren kaun, waut doa needich es, daut sien Väanämen sikj erfelt. Hee wort biejlikj een Liera un een Treesta un eena, waut eene goode Norecht prädijd, un noch väl mea (Jes. 48:17; 2. Kor. 7:6; Gal. 3:8). Un foaken brukt hee Menschen toom sienen Wellen doonen (Mat. 24:14; 28:19-20; 2. Kor. 1:3-4). Tweedens bediet sien Nomen uk, daut Jehova jiedrem eenen von ons Weisheit un Krauft jäwen kaun, daut wie to aules woaren kjennen, waut doa needich es, om sienen Wellen to doonen.

2. (a) Wuarom bedua wie veleicht, aus wie waut fa Jehova doonen kjennen? (b) Waut woa wie en disen Artikjel seenen?

² Wie aula wellen, daut Jehova ons brucken kaun toom sienen Wellen doonen. Oba eenje beduaren veleicht, aus Jehova daut aun an fält. Wuarom? Wiels dee denkjen, daut see wäajen äa Ella ooda äare Omstend nich väl doonen kjennen, ooda wiels see sikj nich met soo väl vestonen. Aundre wada sent gaunz tofräd met daut, waut see doonen, un denkjen nich, daut see noch wudden wieda veraunkomen sellen. En disen Artikjel woa wie doavon räden, woo Jehova ons aulem halpen kaun, sienen Wellen to doonen. Dan woa wie noch unjasieekjen, woo Jehova Mana un Frues ut de Bibeltiet dän Wunsch un de Krauft jeef, jewesset to doonen. Un tolatst  woa wie betrachten, woo wie kjennen reed sennen, waut fa Jehova to doonen.

3. Woo kaun Jehova ons halpen, daut wie dän Wunsch kjrieen, waut to doonen, soo aus Filippa 2:13 sajcht?

³ Läs Filippa 2:13. * Jehova kaun ons halpen, daut wie dän Wunsch kjrieen, waut to doonen. Woo deit dee daut biejlikj? Veleicht woa wie en, daut doa en onse Vesaumlunk Help fält. Ooda de Eltestasch läsen eenen Breef vom Betel väa, daut doa aundatwäajen waut to doonen fält. Dan denkj wie veleicht soo: “Woo wudd ekj kjennen methalpen?” Daut kaun uk sennen, daut wie eene besondre Oppgow kjrieen un beduaren, aus wie ons met dee vestonen. Ooda wie läsen en Gott sien Wuat un äwalajen dan: “Woo kaun ekj dise Bibelvarzh brucken toom aundre halpen?” Jehova bemott ons nich, irjentwaut to doonen. Oba wan hee sitt, daut wie nodenkjen, waut wie doonen kjennen, dan kaun hee ons halpen, daut wie daut uk werkjlich doonen wellen.

4. Woo kaun Jehova ons de Krauft jäwen, waut to doonen?

⁴ Jehova kaun ons uk de Krauft jäwen, waut to doonen (Jes. 40:29). Hee kaun ons met sienen heiljen Jeist halpen, daut wie daut, wua wie ons aulmols met vestonen, noch bäta doonen kjennen (2. Mo. 35:30-35). Jehova kaun ons uk derch siene Organisazion utlieren, veschiednet to doonen. Wan du mol eene Oppgow kjrichst un nich krakjt weetst, woo du dee nokomen saust, dan froag wäm no Help. Du kaust uk onsen leeftoljen himlischen Voda no siene butajeweenelje “jeistliche Krauft” froagen (2. Kor. 4:7; Luk. 11:13). En de Schreft rät daut foaken von Mana un Frues, waut Jehova dän Wunsch un de Krauft jeef, waut to doonen. Well wie ons mol eenje Biespels unjastonen un nodenkjen, woo Jehova ons uk soo brucken kaun aus dee.

5. Waut lia wie von daut, wanea Jehova Moses brukt, om sien Volkj frietomoaken?

⁵ Jehova brukt Moses, om de Israeliten frietomoaken. Oba wanea deed Jehova daut? Daut wia nich dan, aus Moses sikj doafäa reed feeld, wäajen hee “de Ägipta äare Weisheit aula jelieet” haud (Apj. 7:22-25). Jehova brukt Moses mau dan, aus hee am jelieet haud, deemootich un leeftolich to sennen (Apj. 7:30, 34-36). Hee jeef am Moot, om met dän hechsten Harscha von Ägipten to räden (2. Mo. 9:13-19). Waut lia wie von daut, wanea Jehova Moses brukt? Jehova brukt deejanje, waut siene Ieejenschoften nodoonen un sikj opp siene Krauft veloten (Filip. 4:13, NW).

6. Waut kjenn wie doavon lieren, woo Jehova Barsillai brukt toom dän Kjennich David halpen?

⁶ Hundade Joaren lota brukt Jehova Barsillai, om fa dän Kjennich David to sorjen. David un eenje aundre musten sikj fuatbrinjen fa sienen Sän Absalom un musten “darschten, un hungren, un . . . [wieren] meed”. Barsillai wia dan aul ella, oba hee un aundre saden äa Läwen opp Spell, om David un siene Helpa bietostonen. Barsillai docht nich, daut hee nuscht mea fa Jehova doonen kunn, wäajen hee soo oolt wia. Enne Städ daut brukt hee von sien Hab un Goot toom Gott siene Deena en äare schwieeje Loag halpen (2. Sam. 17:27-29). Waut lia wie doavon? Jehova kaun ons brucken, om Gloowesbreeda en onse Jäajent ooda en aundre Lenda bietostonen,  waut en Noot sent, endoont woo oolt wie sent (Spr. 3:27-28; 19:17). Veleicht kjenn wie dee nich selfst halpen, oba wie kjennen Gowen jäwen fa daut Woakj oppe gaunze Welt, un dee kjennen dan jebrukt woaren toom onse Breeda un Sestren halpen, wuaemma daut fält (2. Kor. 8:14-15; 9:11).

7. (a) Waut leet Jehova Simeon beläwen? (b) Woo kaun siene Jeschicht ons Moot jäwen?

⁷ Simeon wia een trua elra Maun, waut en Jerusalem wond. Jehova vespruak am, daut hee ver sienen Doot noch dän Messias seenen wudd. Dit jeef Simeon secha väl Moot, wiels hee luad je aul Joaren no dän. Un Jehova beloond am fa sienen Gloowen un siene Jedult. Eemol “jinkj hee, vom Jeist jedrungen, em Tempel nenn” un sach doa dän kjlienen Jesus. Jehova leet Simeon dan waut von dit Kjint verutsajen, waut lota de Christus sennen wudd (Luk. 2:25-35). Secha storf hee, ea Jesus met sienen Deenst aunfunk, oba Simeon wia dankboa fa daut, waut hee fa Jehova doonen kunn. Un hee woat uk en de niee Welt noch väl goodet beläwen, wan hee seenen woat, daut aule Velkja oppe Welt derch Jesus siene Harschoft jesäajent woaren (1. Mo. 22:18). Wie kjennen uk sea dankboa sennen fa aules, waut Jehova ons en sienen Deenst doonen lat!

8. Woo kaun Jehova ons krakjt soo brucken aus Barnabas?

⁸ Josef läwd en de Aposteltiet. Hee haud väl toom äwajen un wia wellich reed, waut fa Jehova to doonen (Apj. 4:36-37). De Apostel nanden am “Barnabas” un daut bediet “eena dee doa treesten deit”. Woomäajlich kjrieech hee disen Nomen, wäajen hee aundre besonda fein treesten kunn. Aus biejlikj Saul een Christ wort, hauden väl Breeda Angst, met dän toop to sennen, wiels hee de Christen ea vefolcht haud. Oba Barnabas treest Saul un holp am, un secha räakjend hee daut väl (Apj. 9:21, 26-28). Lota wullen de Eltestasch von Jerusalem de Breeda Moot toospräakjen, waut wiet auf en Antiochia en Sierien wonden. Wäm schekjten see doahan? Barnabas! Daut wia eene goode Iedee. De Schreft sajcht: “Barnabas . . . spruak an Moot too, daut see dän Harn von gaunzem Hoaten tru bliewen sullen” (Apj. 11:22-24). Krakjt soo kaun Jehova uk ons halpen, daut wie onse Gloowesbreeda treesten kjennen. Biejlikj kaun hee ons brucken toom soone treesten, waut äwa wäm truaren. Ooda hee kaun ons bat doa brinjen, daut wie wäm besieekjen ooda fonen, waut krank ooda betriept es, un dänjanjen met leeftolje Wieed Moot toospräakjen. Woascht du die krakjt soo von Jehova brucken loten aus Barnabas? (1. Tess. 5:14).

9. Woo holp Jehova Vasily een feina Hoad to woaren, un waut kjenn wie doavon lieren?

⁹ Jehova holp eenen Brooda, waut Vasily heet, daut hee een feina Hoad fa de Vesaumlunk woaren kunn. Aus Vasily 26 Joa wia un een Eltesta wort, docht hee nich, daut hee de Breeda em jeisteljen wudd halpen kjennen, besonda wan dee schwoaret beläwden. Oba hee wort fein utjelieet derch erfoarne Eltestasch un derch de Kjennichrikjsdeenst-School. Vasily strenjd sikj sea aun, sikj to vebätren. Hee schreef sikj biejlikj miere kjliene Sachen opp, waut hee doonen wull. Un je bäta hee daut nokjeem, je sechra feeld hee sikj. Un nu sajcht hee: “Wuafäa ekj mie ieeschtemma gruld, daut jeft mie nu väl Freid. Wan Jehova mie halpt, dän rajchten Bibelvarsch to finjen toom eenen Brooda ooda eene Sesta von de Vesaumlunk treesten, dan moakt mie daut sea tofräd.” Breeda, wan jie krakjt soo aus Vasily reed sent, junt von Jehova brucken  to loten, dan kaun hee junt halpen, enne Vesaumlunk noch väl mea to doonen.

10. (a) Waut deed Abigajil? (b) Waut kjenn wie von dee lieren?

¹⁰ David un siene Poatna musten sikj von dän Kjennich Saul fuatbrinjen un dee fäld Help. David siene Poatna fruagen dän rikjen Israelit Nabal no een bät Äten, endoont waut daut wia. Dee deeden daut, wiels see siene Häaden en de Wiltnis beschizt hauden. Oba Nabal docht bloos aun sikj un wull an nuscht jäwen. David wort sea doll un wull Nabal un aul siene Mana dootmoaken (1. Sam. 25:3-13, 22). Oba Nabal siene Fru Abigajil wia krakjt soo väabedocht, aus ar schmock leet. See wia sea äwanäment un kjneed sikj ver David bat gaunz oppe Ieed un prachad am, daut hee sikj nich sull aufrajchnen un Blootschult opp sikj brinjen. See rod am leeftolich too, daut hee sikj opp Jehova veloten sull. Abigajil äare deemootje Wieed un leeftolje Woakjen jinjen David to Hoaten. Hee wort en, daut Jehova ar jeschekjt haud (1. Sam. 25:23-28, 32-34). Abigajil kunn waut fa Jehova doonen, wäajen see soone feine Ieejenschoften haud. Un wan Sestren vondoag dän Dach väabedocht un leeftolich sent, dan kaun Jehova an uk doatoo brucken, äare Famielje un aundre von de Vesaumlunk opptobuen (Spr. 24:3; Tit. 2:3-5).

11. (a) Waut deeden Schalum siene Dajchta? (b) Wäa deit an vondoag dän Dach no?

¹¹ Een poa hundat Joa lota wieren Schalum siene Dajchta wellich reed, waut fa Jehova to doonen. See holpen met, de Mia von Jerusalem wada opptobuen (Neh. 2:20; 3:12). Schalum wia een huaga Aunjestalda un doch deeden siene Dajchta dise schwoare un jefäadelje Oabeit (Neh. 4:9-12). Dee wieren gaunz aundasch aus de “väanäme Mana” von Tekoa, waut sikj “wäaden . . . dän Deenst to doonen” un mettobuen (Neh. 3:5). Stal die väa, woo dee sikj motten jefreit haben, aus de Mia en mau 52 Doag foadich wia! (Neh. 6:15). Vondoag dän Dach sent uk een deel Sestren wellich reed, bie eene besondre Sort Deenst mettohalpen. Dee halpen met, wan Jebieda jebut ooda oppjefrescht woaren, waut Jehova jehieren. Wie brucken dise true, flietje Sestren, waut soone feine Oabeit doonen, daut ons Buwoakj goot wiedakjemt!

12. Woo kaun Jehova ons krakjt soo brucken aus Tabita?

¹² Jehova brocht Tabita bat doa, daut “dee . . . emma goodet deed un de oame holp” un besonda de Wätfrues (Apj. 9:36). Aus see storf, wieren väle sea truarich, wiels see soo leeftolich wia un soo väl toom äwajen haud. Oba dee wieren sea schaftich, aus de Apostel Petrus ar vom Doot oppwuak (Apj. 9:39-41). Waut kjenn wie von Tabita lieren? Wie aula kjennen waut doonen toom onse Breeda un Sestren halpen, endoont aus wie Mana ooda Frues sent ooda woo oolt wie sent (Heb. 13:16).

13. (a) Waut kunn Ruth em Deenst fa Jehova doonen, wan see uk bleed wia? (b) Waut säd Ruth?

¹³ Eene Sesta, waut Ruth heet un bleed wia, wull Missionoa woaren. Aus see eene junge Mejal wia, jinkj see bosich von een Hus no daut aundre toom doa Zeichnisbläda loten. See vetald: “Daut jinkj mie sea scheen!” Oba ar foll daut schwoa, em Deenst met de Menschen to räden un dee von Gott sien Kjennichrikj to vetalen. Aus Ruth 18 Joa wia, wort see Pionia, wan see uk bleed wia. Aune 1946 jinkj see no de Gilead-Bibelschool un lota deend see en Hawaii un en Jaupaun. Met Jehova siene Help kunn see doa sea väl prädjen. Aus Ruth  aul meist 80 Joa jeprädicht haud, säd see: “Jehova jeef mie emma Krauft. Hee holp mie, met mien bleedet foadich to woaren. Ekj sie mie gaunz secha, daut Jehova jiedrem eenen brucken kaun, waut sikj opp am velat.”

14. Waut es no Kolossa 1:29 no needich toom waut fa Jehova doonen?

¹⁴ Jehova haft siene Deena noch emma jeholpen, väl veschiednet fa am to doonen. To waut woat hee die woaren loten? Daut haft doamet to doonen, woo sea du die aunstrenjen west (läs Kolossa 1:29). Wan du reed best, waut fa Jehova to doonen, dan kaun hee die to eenen flietjen Vekjindja woaren loten ooda to eenen feinen Liera ooda Treesta ooda to eenen gooden Oabeida, eenen feinen Frint ooda wautemma doa needich es toom sienen Wellen doonen.

15. No waut sellen de junge Breeda Jehova prachren, soo aus 1. Timotäus 4:12, 15 sajcht?

¹⁵ Waut kjenn jie Breeda fa Jehova doonen, waut noch en de Jugentjoaren sent? Doa fälen een deel junge Mana, waut väl Krauft haben un aus Deenstaumthelpa deenen kjennen. En väl Vesaumlungen jeft et mea Eltestasch aus Deenstaumthelpa. Wudden eenje von junt junge Breeda kjennen doaropp schaufen, dän Wunsch to haben, mea en de Vesaumlunk to doonen? Eenje sajen veleicht: “Ekj sie gaunz tofräd, wan ekj bloos kaun Vekjindja sennen.” Wan die daut uk soo jeit, dan pracha Jehova, daut hee die halpt, dän Wunsch to haben, een Deenstaumthelpa to woaren, un daut hee die de Krauft jeft, am soo goot aus mäajlich to deenen (Liera 12:1). Ons fält daut aun die! (Läs 1. Timotäus 4:12, 15.)

16. No waut sell wie Jehova froagen, un wuarom?

¹⁶ Jehova kaun die to aules woaren loten, waut doa needich es, daut sien Wellen jedonen woat. Froag am doano, daut hee die dän Wunsch jeft, sienen Wellen to doonen, un daut hee die uk de Krauft jeft, waut die fält. Bruck nu diene Tiet un Krauft un waut du sest noch hast toom Jehova ieren, endoont woo oolt du best (Liera 9:10). Lot die kjeenmol goode Jeläajenheiten derchgonen, em Deenst fa Jehova dien bastet to doonen, wiels du Angst hast ooda denkjst, du vesteist daut nich. Daut es werkjlich eene Freid, daut wie aula opp irjenteene Wajch methalpen kjennen, daut ons leeftolja himlischa Voda de Iea kjricht, waut am traft!