1. Wuarom es daut no 2. Korinta 3:1-3 no besonda, wan wie met wäm studieren kjennen, waut sikj deepen lat? (See daut Bilt oppe väaschte Sied.)

ES DAUT nich eene groote Freid, wan Bibelstudiums von onse Vesaumlunk sikj deepen loten? (Mat. 28:19). Un besonda scheen es daut, wan wie met deejanje studieet haben! (1. Tess. 2:19-20). Dee sent dan soo aus “Breew . . ., dee goot von ons räden” un uk von de gaunze Vesaumlunk (läs 2. Korinta 3:1-3).

2. (a) Äwa waut wudd wie sellen nodenkjen, un wuarom? (b) Waut es een Bibelstudium? (See de Footnoot.)

² Wie freien ons sea, daut et en de latste vea Joa oppe gaunze Welt jlikjderch jieda Moonat 10 Millionen Bibelstudiums * jeef. Un doa leeten sikj em Derchschnett uk jieda Joa mea aus 280 000 deepen, wiels dee Jesus Christus nofoljen wullen un Jehova siene Zeijen woaren. Woo kjenn wie noch mea von onse Bibelschiela halpen, daut dee sikj kjennen deepen loten? Nu jeft Jehova de Menschen noch de Jeläajenheit, daut dee kjennen siene Zeijen woaren. Oba de Tiet rant bosich auf! Doawäajen well wie ons bastet doonen, daut onse Bibelstudiums soo schwind aus mäajlich wiedakomen un sikj deepen loten (1. Kor. 7:29a; 1. Pet. 4:7).

3. Waut woa wie en disen Artikjel äwa Bibelstudiums lieren?

 ³ Wäajen daut nu soo needich es, Jinja to moaken, hab wie mol waut Betels jefroacht, woo eena mea Bibelstudiums halpen kaun, daut dee sikj deepen loten. En disen un uk en dän näakjsten Artikjel es Rot bennen, waut von erfoarne Pionieren, Missionoaren un Kjreisoppsechtasch kjemt (Spr. 11:14; 15:22). * Daut woat ons wiesen, waut Bibelliera un Bibelschiela doonen kjennen, daut een Bibelstudium fein wiedakjemt. En disen Artikjel woa wie fief Sachen seenen, waut jieda Bibelschiela doonen mott, daut dee sikj met de Tiet kaun deepen loten.

4. Rieekjt daut too, wan wie emma bloos een bät met wäm studieren? Laj daut ut.

⁴ Väl Breeda un Sestren studieren buten ver Däa met de Menschen de Bibel. Daut es een gooda Aunfank toom wäm nieschierich moaken. Oba jeweenlich studieet eena doa nich lang un veleicht uk nich mol jieda Wäakj. Eenje Breeda froagen dänjanjen uk, aus see dän bieaun fonen ooda schriewen kjennen toom dän een bät waut ut de Schreft wiesen. Soo jeit daut dan veleicht moonatenlank wieda, onen daut daut Bibelstudium fein wiedakjemt. Oba woat deejanja sikj opp iernst Gott hanjäwen un sikj deepen loten, wan dee sikj nich noch mea Tiet nemt un dolla aunstrenjt, om Gott sien Wuat to studieren? Secha nich.

5. Woo kjennen Jesus siene Wieed ut Lukas 14:27-33 ons met onse Bibelstudiums halpen?

⁵ Opp eene Sauz muak Jesus daut dietlich, waut eena doonen must toom am nofoljen. Hee räd von eenen Maun, waut eenen Torm buen wull, un von eenen Kjennich, waut Kjrich fieren wull. Jesus säd, de Maun must sikj “ieescht hansaten un de Kosten äwaräakjnen”, daut hee dän Torm foadich moaken kunn, un de Kjennich must sikj ieescht “dolsaten un sikj daut äwalajen”, aus hee met siene Soldoten jewennen kunn (läs Lukas 14:27-33). Un krakjt soo es daut bie dee, waut Jesus nofoljen wellen. Dee motten sikj daut uk krakjt äwalajen, waut doa aules met en es. Doawäajen sell wie onse Bibelstudiums tooroden, daut dee jieda Wäakj met ons toop studieren. Woo kjenn wie daut doonen?

6. Waut kjenn wie doonen, daut een Bibelstudium fein wiedakjemt?

⁶ Daut ieeschte wudd wie kjennen daut Studium een bät lenja moaken. Veleicht  kjenn wie doa ver Däa jiedatsmol twee Bibelvarzh met dänjanjen derchgonen enne Städ bloos eenen. Un wan deejanja daut jleicht, daut wie een bät lenja räden, dan wudd wie dän kjennen froagen, aus wie ons wudden kjennen een bät dolsaten un doa wiedavetalen. Un doano, waut dee dan sajcht, kjenn wie seenen, woo iernst am daut met daut Bibel studieren es. Wie wudden dän mau rajcht kjennen froagen, aus dee nich tweemol de Wäakj studieren wull toom noch bosja lieren. Oba daut es nich aules, waut wie doonen kjennen.

7. Woo kaun eena sikj fein fa jieda Studium reedmoaken?

⁷ De Bibelliera mott sikj jiedatsmol fein fa daut Studium reedmoaken. Wie wudden daut kjennen derchläsen, waut wie studieren wellen, un de Bibelvarzh noseenen. Kjikj krakjt, om waut et doa jeit. Denkj äwa dän Tietel no un äwa de Äwaschreften, de Froagen, de Läs-Varzh un de Bilda. Un kjikj, aus daut Videos jeft, waut bie daut Teema biepaussen. Dan äwalaj, woo du dienen Bibelschiela daut eefach un kloa utlajen kaust, daut dee daut leicht vestonen un nokomen kaun (Neh. 8:8; Spr. 15:28a).

8. Waut kjenn wie no Kolossa 1:9-10 no fa onse Bibelschiela doonen?

⁸ Wan du die reedmoakst, dan bäd uk fa dienen Bibelschiela un fa daut, waut dän fält. Froag Jehova no Help, daut du dän soo ut de Schreft lieren kaust, daut dän daut to Hoaten jeit (läs Kolossa 1:9-10). Äwalaj die, waut fa dän Bibelschiela veleicht woat schwoa sennen to vestonen ooda to jleewen. Un denkj emma doaraun, daut du dänjanjen halpen west, daut dee sikj kaun deepen loten.

9. Woo kaun eena sienen Bibelschiela halpen, daut dee sikj fein reedmoakt? Laj daut ut.

⁹ Wie hopen, daut soone, waut pinkjlich de Bibel studieren, daut emma mea räakjnen, waut Jehova un Jesus jedonen haben, un mea weeten wellen (Mat. 5:3, NW; 5:6). De Bibelschiela mott daut Studium iernst nämen, daut am daut werkjlich waut halpt. Doawäajen mott wie dän dietlich moaken, daut dee sikj jiedatsmol fa daut Studium reedmoaken saul. Dee saul daut em verut läsen un nodenkjen, woo dee daut nokomen kaun. Woo  kaust du dän doabie halpen? Moak met dän toop een Kapitel reed, daut dee sitt, woo daut schauft. * Wies dän, woo eena de Auntwuaten fa de Froagen finjen kaun un woo eena sikj bloos de wichtichste Wieed tieekjnen kaun, waut eenem halpen, de Froag to beauntwuaten. Un dan saj dän, daut dee de Auntwuaten en siene ieejne Wieed sajen saul. Wan dee daut deit, dan woascht du enwoaren, woo goot dee daut haft kunt vestonen. Un daut jeft noch waut, waut du dienen Bibelschiela wurscht lieren kjennen.

10. (a) Wuarom saul eena jieda Dach en de Bibel läsen? (b) Woo kaun eenem daut Bibel läsen daut mieeschte halpen?

¹⁰ Daut es goot, wan de Bibelschiela jieda Wäakj met sienen Liera toop studieet. Oba daut wudd uk fein sennen, wan dee noch waut deed. Dee mott jieda Dach doano seenen, daut dee Jehova noda kjemt. Woo kaun dee daut doonen? Wan dee Jehova toohorcht un to dän rät. Dee kaun dän toohorchen, wan dee jieda Dach en de Bibel läst (Jos. 1:8; Psa. 1:1-3). Wies dän, woo dee dän “Bibelläsplon” brucken kaun, waut opp jw.org es. Dän kaun eena sikj uk drekjen. * Waut kaun dee noch doonen, daut am daut Bibel läsen daut mieeschte halpt? Rod dän too, doaräwa notodenkjen, waut dee doa äwa Jehova lieet un woo dee daut nokomen kaun, waut dee läst (Apj. 17:11; Jak. 1:25).

11. (a) Woo kaun een Bibelschiela lieren, woo eena bäden saul? (b) Wuarom es daut soo wichtich, daut dee daut foaken deit?

¹¹ Rod dienen Bibelschiela too, jieda Dach to bäden un opp dee Wajch to Jehova to räden. Doo bie jieda Studium aum Aunfank un opp Enj von Hoaten bäden, un bruck doabie uk dän Bibelschiela sienen Nomen. Wan dee hieet, woo du bäden deist, dan woat dee uk lieren, woo dee selfst von Hoaten bäden kaun un daut dee en Jesus sienen Nomen to Jehova bäden saul (Mat. 6:9; Joh. 15:16). Denkj mol han, woo sea dänjanjen daut halpen woat, Jehova noda to komen, wan dee jieda Dach en de Bibel läsen un bäden deit – aulsoo Jehova toohorchen un to dän räden (Jak. 4:8). Daut woat dän halpen, sikj Gott hantojäwen un sikj deepen to loten. Waut saul dee noch doonen?

12. Woo kaun eena eenen Bibelschiela halpen, Frint to woaren met Jehova?

¹² Wie wellen, daut ons Bibelschiela Jehova kjanen lieet. Oba wie wellen uk, daut am daut to Hoaten jeit, waut dee lieet, wiels dan woat dee daut wellen nokomen. Jesus wia een gooda Liera, waut Sachen fein utlajen kunn. Oba de Menschen foljden am no, wäajen hee an uk to Hoaten räd (Luk. 24:15, 27, 32). Ons Bibelschiela mott vestonen, daut et Jehova werkjlich jeft un daut hee sien Voda, sien Gott un sien Frint sennen kaun (Psa. 25:4-5). Moak dän bie daut Bibelstudium dietlich, woo Jehova krakjt es (2. Mo. 34:5-6; 1. Pet. 5:6-7). Daut kaust du bie jieda Teema doonen, waut jie derchnämen. Wies dän Bibelschiela, waut fa wundascheene Ieejenschoften Jehova haft, biejlikj woo leeftolich un frintlich un metliedent hee es. Jesus säd, daut “daut jratste un ieeschte Jeboot” wia, onsen Gott Jehova to leewen (Mat. 22:37-38). Doawäajen halp dienen Bibelschiela, daut dee eene groote Leew kjricht fa Jehova.

13. Woo kjenn wie eenen Bibelschiela daut dietlich moaken, woo Jehova es?

¹³ Wan du met dienen Bibelschiela vetalst, dan räd doavon, wuarom du Jehova leefst. Veleicht woat dee dan en, daut dee selfst uk Jehova noda komen mott un dän sien Frint woaren (Psa. 73:28). Woomäajlich es en daut Buak, waut jie studieren, ooda en eenen Bibelvarsch waut äwa Jehova siene Leew, Weisheit, Jerajchtichkjeit ooda Macht bennen, waut die to Hoaten jeit. Dan saj dienen Bibelschiela daut, un moak dän daut uk dietlich, daut et noch väl mea jeft, wuarom du onsen himlischen Voda leefst. Oba waut mott een Bibelschiela noch doonen, daut dee fein veraunkjemt un sikj kaun deepen loten?

14. Waut lieet Hebräa 10:24-25 ons äwa de Toopkomes, un woo kaun eenen Bibelschiela daut halpen?

¹⁴ Wie aula wellen, daut onse Bibelstudiums sikj deepen loten. Doawäajen es daut needich, daut wie dee tooroden, no de Toopkomes to wanken. Erfoarne Bibelliera sajen, daut deejanje daut bosichste veraunkomen, waut von Aunfank aun no de Toopkomes foaren (Psa. 111:1). Eenje Breeda lajen äare Bibelschiela ut, daut dee bie de Toopkomes krakjt soo väl von de Schreft lieren woaren aus bie daut Bibelstudium.  Läs Hebräa 10:24-25 met dänjanjen toop un laj dän ut, woo am daut togood komen woat, wan dee no de Toopkomes kjemt. Wies dän daut Video Woo es daut en de Vesaumlungshiesa von Jehova siene Zeijen? * un halp dän, daut dee sikj kjeen Toopkomen derchgonen loten well.

15. Waut kjenn wie doonen, daut een Bibelschiela räajelmässich no de Toopkomes wanken well?

¹⁵ Waut, wan ons Bibelschiela noch kjeenmol bie een Toopkomen wia ooda doa bloos bieaun hankjemt? Dan wudd wie dän kjennen vetalen, waut wie latst bie een Toopkomen jleichten. Daut kaun noch mea aun dän doonen, aus wan wie dän bloos enloden wudden. Jeff dänjanjen dän Woaktorm ooda daut Schoolheft fa Läwen un Deenst, waut wie jroz bie de Toopkomes brucken. Wies dän, waut wie doa daut näakjste Mol derchnämen woaren, un froag am, woon Poat am daut dolste intressieren wudd. Waut dee bie sien ieeschtet Toopkomen beläwen woat, woat gaunz aundasch sennen aus daut, waut dee bie de aundre Kjoakjen beläft haft (1. Kor. 14:24-25). Doa woat dee uk aundre kjanen lieren, waut een goodet Väabilt sent un waut am halpen woaren, verauntokomen un sikj deepen to loten.

16. Woo kjenn wie onse Bibelschiela halpen, daut dee sikj kjennen deepen loten, un waut woat de näakjsta Artikjel ons wiesen?

¹⁶ Woo kjenn wie onse Bibelschiela halpen, daut dee sikj kjennen deepen loten? Wie kjennen dän Bibelschiela halpen to vestonen, woo wichtich daut Studium es, doaderch daut wie dän tooroden, jieda Wäakj met ons toop to studieren un sikj fa jieda Studium reedtomoaken. Wie wellen dän uk tooroden, daut dee Jehova jieda Dach noda kjemt un uk selfst Frint woat met am. Un wie wellen dän uk halpen, daut dee jiedatsmol bie de Toopkomes es. (See dän Kausten “ Waut een Bibelstudium doonen mott, daut dee wiedakjemt un sikj deepen lat”.) Oba waut kaun een Bibelliera noch doonen, om sienen Bibelschiela to halpen, daut dee sikj kaun deepen loten? Doatoo woa wie en dän näakjsten Artikjel fief Sachen seenen.