1. Waut es daut baste, waut eena doonen kaun?

WAN de Elren waut entscheiden, dan wirkjt sikj daut foaken noch lang oppe Kjinja ut. Wan dee schlajchte Entscheidungen moaken, dan kjennen dee de Kjinja em Trubbel brinjen. Oba wan dee goode Entscheidungen moaken, dan halpen dee äare Kjinja, daut dee lota kjennen een schaftjet Läwen haben. Un uk de Kjinja motten sikj fa daut rajchte entscheiden. Daut baste, waut eena doonen kaun, es, daut eena sikj eenich woat, onsen leeftoljen himlischen Voda Jehova to deenen (Psa. 73:28).

2. Waut vonne goode Entscheidungen muaken Jesus un siene Elren?

² Fa Jesus siene Elren wia daut daut wichtichste, Jehova to deenen, un doawäajen wullen dee uk äare Kjinja halpen, daut to doonen (Luk. 2:40-41, 52). Jesus muak uk goode Entscheidungen, daut hee daut doonen kunn, waut Jehova von am haben wull (Mat. 4:1-10). Un aus Jesus ieescht groot wia, wia hee een leeftolja un äwanämenda un trua Mensch. Soonen Sän wudden aule Elren sikj wenschen, waut Jehova leewen!

3. Äwa waut vonne Froagen woa wie en disen Artikjel räden?

³ En disen Artikjel woa wie äwa een poa Froagen räden: Waut vonne goode Entscheidungen muak Jehova, wan daut om Jesus jinkj? Waut kjennen Elren vondoag dän Dach von Josef un Maria lieren? Un waut kjennen junge Menschen von Jesus siene Entscheidungen lieren?

4. Waut wäld Jehova sikj fa sienen Sän ut?

⁴ Jehova wäld sikj feine Elren ut fa Jesus (Mat. 1:18-23; Luk. 1:26-38). Waut wie von Maria äare Wieed en de Schreft läsen kjennen, wiest, daut see Jehova un sien Wuat sea leewd (Luk. 1:46-55). Un daut Josef Jehova jehorcht, wiest, daut hee dän leewd un am jefaulen wull (Mat. 1:24).

5-6. Beschizt Jehova Jesus fa aule Schwierichkjeiten? Laj daut ut.

⁵ Daut es oppfaulent, daut Jehova sikj fa Jesus nich rikje Elren utsocht. Daut Opfa, waut Josef un Maria no Jesus siene Jeburt brochten, wiest, daut dee oam wieren (Luk. 2:24). Josef wia een Holtoabeida un schauft woomäajlich tus en Nazaret, wua see wonden. Dee fieeden secha een eefachet Läwen un hauden met de Tiet oppet weinichste säwen Kjinja (Mat. 13:55-56).

⁶ Jehova beschizt Jesus fa eenje Jefoaren, oba hee veschoond am nich fa aule Schwierichkjeiten (Mat. 2:13-15). Biejlikj haud Jesus Frintschoft, waut am nich jleewden. Stal die mol väa, woo Jesus sikj mott jefeelt haben, aus eenje von siene ieejne Famielje daut aum Aunfank nich jleewden, daut hee de Messias wia (Mar. 3:21; Joh. 7:5). Un woomäajlich storf Josef, aus Jesus noch junk wia. Secha wia daut fa Jesus nich leicht, wiels hee de elsta Sän wia un veleicht dee Oabeit doonen must, waut sien Voda ea deed (Mar. 6:3). Aus Jesus oppwoss, must hee daut uk lieren, sikj om de Famielje to kjemren. Veleicht must hee sea schaufen, om fa dee to sorjen. Doawäajen wist hee krakjt, woo sikj daut späad, zeowes meed to sennen vom schaufen.

7. (a) Äwa waut vonne Froagen kjennen Elren nodenkjen? (b) Woo kaun Spricha 2:1-6 Elren halpen, äare Kjinja fein opptotrakjen?

⁷ Sent jie befriet un wellen Kjinja haben? Dan kjenn jie mol äwalajen: “Sent wie deemootje un jeistelje Menschen? Wudd Jehova sikj ons utläsen, om fa een wieetvollet Bäbe to sorjen?” (Psa. 127:3-4). Un wan du aul Kjinja hast, dan kaust du mol äwalajen: “Lia ekj onse Kjinja, daut daut goot es, flietich to  schaufen?” (Liera 3:12-13). “Doo ekj aules, waut ekj kaun, om onse Kjinja fa aul de Jefoaren to beschitzen, waut et en dän Soton siene Welt jeft?” (Spr. 22:3). Jie kjennen june Kjinja nich fa aule Schwierichkjeiten veschoonen. Oba jie kjennen dee fa de Trubbels reedmoaken, wan jie dee emma wada leeftolich lieren, sikj opp Gott sien Wuat to veloten (läs Spricha 2:1-6). Waut wudd jie biejlikj doonen kjennen, wan doa wäa von daut Frintschoft de Woarheit veloten haft? Dan wiest june Kjinja ut de Schreft, woo wichtich daut es, Jehova emma tru to bliewen (Psa. 31:24). Ooda wan doa wäa jestorwen es, waut jie väl jeräakjent haben, dan wiest june Kjinja Bibelvarzh, waut dee halpen un Troost jäwen (2. Kor. 1:3-4; 2. Tim. 3:16).

8. Waut sullen Josef un Maria no 5. Mose 6:6-7 no doonen?

⁸ Jesus siene Elren holpen am soon Mensch to woaren, wua Jehova eenen Jefaulen aun haud, wiels see daut deeden, waut hee von Elren velangd (läs 5. Mose 6:6-7). Josef un Maria hauden eene groote Leew fa Jehova un dee wullen daut sea jieren, daut äare Kjinja daut uk hauden.

9. Bie waut strenjden Josef un Maria sikj sea aun?

⁹ Josef un Maria strenjden sikj sea aun, Jehova met äare Kjinja toop to deenen. Secha jinjen dee jieda Wäakj no de Judenschool en Nazaret un uk jieda Joa no daut Passafast en Jerusalem (Luk. 2:41; 4:16). Veleicht vetalden see Jesus un äare aundre Kjinja oppem Wajch no Jerusalem von daut, waut Gott sien Volkj mol beläft haud, wan see bie eene Städ vebiekjeemen, wua de Schreft von rät. Secha wia daut fa Josef un Maria nich eefach, sikj aun de jeistelje Jewanheiten to hoolen, aus de Famielje emma jrata wort. Oba daut haft sikj jeloont! Wiels Jehova deenen bie dee emma daut väaschte wia, wia dee äare Famielje em jeisteljen goot auf.

10. Waut kjennen Elren von Josef un Maria lieren?

¹⁰ Waut kjennen Elren, waut Jehova deenen, von Josef un Maria lieren? Daut wichtichste es, daut jie june Kjinja wiesen, woo sea jie Jehova leewen, derch daut,  waut jie sajen un doonen. Denkjt doaraun, daut baste, waut jie fa june Kjinja doonen kjennen, es, dee to halpen Jehova to leewen. Lieet dee goode jeistelje Jewanheiten to haben, daut dee räajelmässich studieren, bäden, no de Toopkomes foaren un em Deenst gonen (1. Tim. 6:6). Secha mott jie fa dee uk em tieteljen sorjen (1. Tim. 5:8). Oba denkjt doaraun, daut de tietelje Sachen june Kjinja nich halpen woaren, daut Enj von dise Welt to äwaläwen. Dee woaren bloos dan en de niee Welt nenkomen, wan dee Frind sent met Jehova (Hes. 7:19; 1. Tim. 4:8). *

11. (a) Woo woat de Rot ut 1. Timotäus 6:17-19 Elren halpen goode Entscheidungen to moaken? (b) Waut wudd june Famielje mol doonen kjennen, un waut fa goodet kaun daut brinjen? (See dän Kausten “ Waut wudd jie mol doonen kjennen?”)

¹¹ Es daut nich scheen, daut soo väl Elren sikj fa daut goode entscheiden un äare Kjinja halpen Jehova noda to komen? Dee sent emma doarom todoonen, Jehova toop to deenen. Dee foaren no de Toopkomes un no de Kongressen. Un dee sent uk em Deenst. Eenje Famieljes kjennen mau rajcht wua methalpen, wua nich soo foaken jeprädicht woat. Aundre beseenen sikj daut Betel ooda halpen bie daut Buwoakj met. Soont to doonen kost Jelt un es uk nich emma leicht. Oba Jehova woat dee doafäa beloonen (läs 1. Timotäus 6:17-19). Kjinja, waut bie kjlien aul soone goode Jewanheiten lieren, woaren foaken doabie bliewen un nuscht beschoden! (Spr. 10:22). *

12. Waut must Jesus doonen, aus hee ella wort?

¹² Jesus sien Voda em Himmel moakt emma goode Entscheidungen. Un uk siene Elren oppe Ieed wisten, waut daut wichtichste wia. Oba aus Jesus ella wort, must hee siene ieejne Entscheidungen moaken (Gal. 6:5). Jesus haud eenen frieen Wellen, krakjt soo aus wie daut haben. Hee wudd je uk haben kunt doonen, waut am jankad. Oba enne Städ daut wull hee leewa daut doonen, waut Jehova jefelt (Joh. 8:29). Waut kjennen junge Menschen vondoag dän Dach von Jesus lieren?

13. Waut deed Jesus wellich, aus hee noch junk wia?

¹³ Aus Jesus noch mau een nata Jung wia, wia hee siene Elren wellich unjadon. Hee docht kjeenmol, daut hee mea wist aus siene Elren un “jehorcht an” en aules (Luk. 2:51). Aus daut elste von de Kjinja  haud Jesus eene jewesse Veauntwuatunk un kjeem dee secha goot no. Hee strenjd sikj secha aun, daut von sienen Steefvoda Josef to lieren, mankem Holt to schaufen, daut hee siene Famielje unjastetten kunn.

14. Woo weet wie, daut Jesus selfst väl en Gott sien Wuat studieren deed?

¹⁴ Veleicht vetalden Jesus siene Elren am, daut hee derch een Wunda jebuaren wia un waut Gott haud loten von am verutsajen (Luk. 2:8-19, 25-38). Oba daut wia nich aules; hee unjastunt sikj daut selfst enne Schreft. Woo weet wie daut? Wiels aus hee noch mau een nata Jung wia, wieren de Lierasch en Jerusalem aul vewundat, “woo hee aules vestunt un beauntwuad” (Luk. 2:46-47). Hee wia noch mau 12 Joa, aus hee sikj daut aul unjastonen haud, daut Jehova sien Voda wia (Luk. 2:42-43, 49).

15. Woo wees Jesus, daut hee emma Jehova sienen Wellen doonen wull?

¹⁵ Aus Jesus daut kloa wort, waut Jehova von am haben wull, neem hee daut wellich aun (Joh. 6:38). Hee wist, daut väle am haussen wudden un daut et nich wudd leicht sennen. Oba hee wull doawäajen Jehova jehuarsom sennen. Aus Jesus sikj aune 29 deepen leet, wia hee sikj eenich, sien Läwen to brucken toom Jehova sienen Wellen doonen (Heb. 10:5-7). Un mau rajcht aus hee aum Pol honk un batem stoawen wia, wull hee noch emma sienen Voda sienen Wellen doonen (Joh. 19:30).

16. Waut kjennen Kjinja von Jesus lieren?

¹⁶ Horch no diene Elren. Soo aus Josef un Maria sent diene Elren uk nich volkomen. Oba Jehova haft diene Elren de Veauntwuatunk jejäft, no die opptopaussen un die waut to lieren. Wan du dee respakjten deist un no daut horchst, waut dee die sajen, dan woat “die daut goot [gonen]” (Efs. 6:1-4).

17. Waut motten junge Menschen no Josua 24:15 no äwalajen?

¹⁷ Äwalaj, wäm du deenen west. Unjasto die daut selfst, wäa Jehova es, waut hee sikj väajenomen haft un woo du doano läwen kaust, waut sien Wellen es (Reem. 12:2). Dan best du reed, de wichtichste Entscheidunk en dien Läwen to moaken, un daut es Jehova to deenen (läs Josua  24:15; Liera 12:1). Wan du räajelmässich de Bibel läsen un studieren deist, dan woat diene Leew fa Jehova emma jrata un du woascht uk eenen stoakjen Gloowen kjrieen.

18. To waut sellen junge Menschen sikj eenich woaren, un woo woat daut utkomen?

¹⁸ Wäl die daut, Jehova sienen Wellen daut ieeschte to doonen. Dän Soton siene Welt well, daut wie daut, wuamet wie ons fein vestonen, bloos fa ons brucken un dan jleewen, daut wie woaren schaftich sennen. Oba dee, waut bloos no daut tietelje hinjaraun sent, haben “sikj selfst . . . väl Weedoag toojesat” (1. Tim. 6:9-10). Oba wan du no Jehova horchst un daut ieeschte dän sienen Wellen deist, dan woascht du goode Entscheidungen moaken un “aules waut du aunfangst, jlekjlich to Enj brinjen” (Jos. 1:8).

19. Aun waut sellen Elren denkjen?

¹⁹ Elren, doot jun bastet, daut june Kjinja Jehova deenen. Velot junt opp am un hee woat junt halpen goode Entscheidungen to moaken (Spr. 3:5-6). Denkjt doaraun, daut daut, waut jie doonen, mea aun june Kjinja deit aus daut, waut jie sajen. Kjikjt doano, daut jie soone Entscheidungen moaken, waut june Kjinja halpen Jehova to jefaulen.

20. Waut fa scheenet woaren junge Menschen beläwen, wan dee Jehova deenen?

²⁰ Junge Menschen, june Elren kjennen junt halpen goode Entscheidungen to moaken. Oba jie motten selfst waut doonen, om Gott to jefaulen. Doot Jesus no un wält junt, onsen leeftoljen himlischen Voda to deenen. Dan woa jie nu aul een drocket, scheenet Läwen haben, waut werkjlich waut enhelt (1. Tim. 4:16). Un lota woa jie noch mol daut scheenste Läwen haben, waut et jeft!