1. Waut es daut, waut ons em jeisteljen fält, un waut haft daut met schaftich sennen to doonen?

 WERKJLICH schaftich sennen bediet nich, daut eena mol haustich schaftich es un daut haustich uk wada wajch es. Eena kaun daut gaunze Läwen werkjlich schaftich sennen. Woo? Jesus säd en de Boajchprädicht: “Schaftich sent dee, dee sikj doaräwa em kloaren sent, daut an daut jeistelje fält” (Mat. 5:3, NW). Jesus wist, daut de Menschen soo jemoakt sent, daut dee eenen grooten Wensch haben, äaren Schepfa Jehova Gott kjanen to lieren un uk to deenen. Daut es daut, waut ons em jeisteljen fält. Un wäajen Jehova de schaftja Gott es, kjennen dee, waut am deenen, uk schaftich sennen (1. Tim. 1:11, NW).

2-3. (a) Wäa kaun noch schaftich sennen, soo aus Jesus säd? (b) Waut woa wie en disen Artikjel seenen, un wuarom es daut needich?

² Kjenn wie bloos dan schaftich sennen, wan wie nich Trubbels haben? Nä. En de Boajchprädicht säd Jesus waut besondret: “Dee, dee truaren” – entwäda wäajen dee unjadrekjt sent, wäajen äare Sind ooda wäajen dee schwoare Omstend em Läwen haben – kjennen schaftich sennen. Jesus säd dautselwje äwa “dee, dee wäajens Jerajchtichkjeits haulwen vefolcht woat” ooda dee, waut lieden, wäajen se an “domm sajen”, wäajen see Christus siene Nofolja sent (Mat. 5:4, 10-11, NW). Oba woo es daut mäajlich, en soone Omstend werkjlich schaftich to sennen?

³ Jesus lieed ons, daut schaftich sennen nich doavon kjemt, daut wie nich Trubbels em Läwen haben, oba doavon, wan wie doano seenen, daut wie daut haben, waut ons em jeisteljen fält, un Gott noda komen (Jak. 4:8). Woo kjenn wie daut doonen? En disen Artikjel woa wie dreeatlei seenen, waut ons kaun werkjlich schaftich moaken.

4. Waut es daut ieeschte, waut wie doonen motten toom werkjlich schaftich sennen? (Psalm 1:1-3).

⁴ IEESCHTENS: Toom werkjlich schaftich sennen mott wie ons em jeisteljen näaren. Menschen un uk Tieren motten sikj näaren, daut see läwen bliewen. Oba bloos Menschen kjennen sikj em jeisteljen näaren, un ons fält daut uk doaraun. Daut es, wuarom Jesus säd: “De Mensch läft nich bloos von Broot, oba von aule Wieed, dee Gott jerät haft” (Mat. 4:4). Doawäajen sull wie doano seenen, daut nich een Dach vebiejeit, onen daut wie ons em jeisteljen näaren von Gott sien Wuat, de Schreft. De Psalmenschriewa schreef: “Jesäajent es dee, dee . . . siene Freid aun däm HARN sien Jesaz haft, un sikj Dach un Nacht doamet beschafticht” (läs Psalm 1:1-3).

5-6. (a) Waut kjenn wie en de Schreft lieren? (b) Woo kaun ons daut halpen, de Schreft to läsen?

⁵ Wäajen Jehova ons leeft, wiest hee ons en de Bibel, waut wie doonen motten, daut wie kjennen een schaftjet Läwen haben. Wie lieren, waut hee sikj fa ons Läwen väajenomen haft. Wie lieren uk, woo wie am kjennen noda komen un Vejäwunk fa onse Sinden kjrieen. Un wie lieren, waut vonne wundascheene Hopninj wie haben fa lota (Jer. 29:11). Aul daut, waut wie kjrieen von de Bibel studieren, jeft ons ennaliche Freid.

⁶ Soo aus wie weeten, es de Schreft voll von Rot fa daut jeweenelje Läwen. Wan wie disen Rot nokomen, dan kjenn wie schaftich sennen. Wan wie mol mootloos sent wäajen de Trubbels em Läwen, dan kunn wie ons veleicht Tiet nämen, mea en  Jehova sien Wuat to läsen un doaräwa notodenkjen. Jesus säd: “Jesäajent sent dee, dee Gott sien Wuat hieren, un doonen, waut daut sajcht” (Luk. 11:28).

7. Woo kaust du daut mieeschte doabie haben, wan du Gott sien Wuat läst?

⁷ Wan du Gott sien Wuat läst, dan nemm die uk Tiet, daut du Freid kaust aun daut haben, waut du läst. Haft die daut uk mol soo jegonen, daut irjentwäa dien bastet Äten jemoakt haft? Oba wäajen du veleicht too bosich wieescht ooda Sorjen hautst, schlukst du daut bloos bosich dol, onen daut jescheit to schmakjen. Aus du ieescht foadich hautst met äten, wortst du dan veleicht en, woo bosich du jejäten hautst un wenschst die leewa, daut du die hautst jieda Haups loten scheenschmakjen. Daut kaun biejlikj soo sennen, wan wie de Schreft läsen. Eenjemol läs wie veleicht soo bosich, daut wie nich werkjlich Freid doaraun haben, waut Jehova ons lieet. Nemm die de Tiet un doo daut soo, daut du kaust Freid doaraun haben, Gott sien Wuat to läsen. Stal die väa, waut doa aunjinkj, woo de Stemmen sikj hieeden un denkj doaräwa no, waut du läst. Wan du daut deist, dan woascht du schaftich sennen.

8. Woo kjemt de “trua, weisa Kjnajcht” daut no, to waut dee aunjestalt es? (See uk de Footnoot.)

⁸ Jesus haft eenje aunjestalt, “de trua, weisa Kjnajcht” to sennen, daut dee ons met daut jeistelje Äten to de rajchte Tiet vesorjen. Doawäajen sent wie em jeisteljen sea goot auf (Mat. 24:45). b Aules, waut de trua Kjnajcht veschauft, stett sikj oppe Schreft, waut von Gott kjemt (1. Tess. 2:13). Daut jeistelje Äten halpt ons to weeten, woo Jehova denkjt, soo aus daut en de Bibel beschräwen woat. Dit es, woosoo wie dän Woaktorm un daut Woat waka! läsen un de Artikjels opp jw.org. Wie moaken ons uk fa onse Toopkomes enne Wäakj un utgangs Wäakj reed un wie kjikjen uk daut JW Broadcasting^® Program jieda Moonat, wan et daut opp onse Sproak jeft. Wan wie daut jeistelje Äten goot nutzen, woat ons daut halpen, daut tweede to doonen, waut ons fält toom werkjlich schaftich sennen.

9. Waut es daut tweede, waut ons halpen kaun, werkjlich schaftich to sennen?

⁹ TWEEDENS: Toom werkjlich schaftich sennen mott wie soo läwen, aus Jehova daut fa rajcht talt. De Psalmenschriewa schreef: “Jesäajent sent aul dee, dee dän HARN ferchten, dee en siene Wäaj waundlen” (Psa. 128:1). Jehova to ferchten meent, am soo sea respakjten, daut eena nuscht deit, waut am nich jefelt (Spr. 16:6). Doawäajen sträw wie doano, ons aun daut to hoolen, waut Gott fa rajcht un orrajcht talt, soo aus de Bibel daut sajcht (2. Kor. 7:1). Wie woaren schaftich sennen, wan wie daut doonen, waut Jehova leeft un von daut wajchbliewen, waut hee haust (Psa. 37:27; 97:10, NW; Reem. 12:9).

10. Waut mott wie no Reema 12:2 no doonen?

¹⁰ Läs Reema 12:2, NW. Een Mensch weet veleicht, daut Jehova daut Rajcht haft to sajen, waut rajcht un orrajcht es, oba dee mott sikj uk eenich woaren, sikj doaraun to hoolen. Krakjt soo weet een Mensch veleicht, daut de Rejierunk daut Rajcht haft to sajen, woo sea eena opp eenen Heiwä foaren kaun. Oba es dee sikj uk eenich, sikj doaraun to hoolen? Wan  nich, foat dee veleicht bosja, aus dee saul. Met daut, waut wie doonen, wies wie, aus wie werkjlich jleewen, daut daut fa ons daut baste es, daut notokomen, waut Jehova velangt (Spr. 12:28). Fa David wia daut soo, wäajen hee säd von Jehova: “Du moakst mie met däm Läwenswajch bekaunt; en diene Jäajenwuat es de Freid soo groot aus dee woaren kaun. Bie die to rajchte Haunt sent eewje Freiden” (Psa. 16:11).

11-12. (a) No waut mott wie oppaussen, wan wie mootloos sent? (b) Woo kjennen de Wieed en Filippa 4:8 ons halpen, Tietvedrief to wälen?

¹¹ Wan wie mootloos sent, dan denkj wie veleicht, ons fält eenen Romwajch, om onse Trubbels utem Stich to gonen, un daut es uk to vestonen. Oba wie motten oppaussen, daut wie doawäajen nich waut doonen, waut Jehova haust (Efs. 5:10-12, 15-17).

¹² De Apostel Paulus foddad de Christen en sienen Breef aun de Filippa opp, daut see wieda sullen soont doonen, “waut jerajcht es, waut rein es, waut leeftolich es . . . [un] waut goode Ieejenschoften haft” (läs Filippa 4:8). Wan Paulus uk nich jlikjtoo von dän Tietvedrief schreef, sull daut, waut hee säd, oba waut doaraun doonen, waut von Tietvedrief wie ons utwälen. Proow mol bie jieda Sach, waut en dän Varsch oppjerieecht woat, daut Wuat “Leeda”, “Films”, “Bieekja” ooda “Videogäms” ver to doonen. Daut kaun eenem halpen to seenen, waut Gott veleicht jäajenaun es un waut nich. Wie wellen ons no aules rechten, waut Jehova fa rajcht un orrajcht talt (Psa. 119:1-3). Dan woa wie met een reinet Jewessen daut näakjste kjennen doonen, waut ons halpen woat, werkjlich schaftich to sennen (Apj. 23:1).

13. Waut es daut dredde, waut ons halpt, werkjlich schaftich to sennen? (Johanes 4:23-24).

¹³ DREDDENS: Kjikj doano, daut Jehova deenen daut ieeschte es en dien Läwen. Wäajen Jehova ons Schepfa es, haft hee daut opp iernst vedeent, daut wie am deenen (Opb. 4:11; 14:6-7). Soo, daut wichtichste en ons Läwen sull sennen, daut wie Jehova soo deenen, aus hee daut haben well, un daut es “em Jeist un en de Woarheit” (läs Johanes 4:23-24). Wie wellen, daut onse Aunbädunk fa Jehova met de Woarheit ut Gott sien Wuat tooppaust, un doatoo fält ons daut aun sienen heiljen Jeist. Onse Aunbädunk mott daut ieeschte komen, mau rajcht wan wie en soon Launt wonen, wua ons Woakj veboden es ooda nich en aule Stekjen frie. Nu jeft daut äwa 100 von onse Breeda un Sestren, waut enjestopt sent, bloos wäajen see Jehova siene Zeijen sent. c Oba mau rajcht dan sent dee schaftich, wäajen see aules doonen, waut see kjennen toom bäden, studieren un aundre von Gott sien Kjennichrikj vetalen. Wan Menschen ons domm sajen ooda vefoljen, sent wie doawäajen schaftich, daut Jehova ons halpt uttohoolen, un daut hee ons beloonen woat (Jak. 1:12; 1. Pet. 4:14).

14. Waut beläwd een junga Brooda en Tadschikistan, un wuarom?

¹⁴ Eene woare Jeschicht wiest, daut dise dree Sachen, waut wie jroz derchjegonen sent, eenem kjennen werkjlich Freid jäwen, endoont waut vonne Omstend eena haft. See mol, waut de 19-joascha Jovidon  Bobojonov von Tadschikistan beläwd, waut nich wull em Millitäadeenst sennen. Dän 4. Oktooba 2019 wort am von Tus fuatjeholt, fa Moonaten enjestopt un aus Vebräakja behaundelt. Daut am soo schlajcht behaundelt wort, wort en miere Lenda bekauntjemoakt. Doa wort bekauntjemoakt, daut se am vekjielt hauden un doamet jeprooft, am unja Druck to saten, daut hee sikj sull Soldotenkjleeda auntrakjen un daut hee sull schwieren, daut hee daut Millitäa wudd tru sennen. No daut wort am veuadeelt un no een Oabeitsloaga jeschekjt, bat de Präsident von daut Launt am daut schlieslich vejeef un säd, daut am sull friejeloten woaren. Bie aul dit bleef Jovidon tru un hilt siene Freid. Woo? Wiels hee daut emma oppem kloaren haud, daut am daut aun daut jeistelje fäld.

15. Woo kunn Jovidon sikj em jeisteljen näaren, aus hee em Jefenkjnis wia?

¹⁵ Aus Jovidon em Jefenkjnis wia, näad hee sikj em jeisteljen, mau rajcht wan hee uk nich eene Bibel haud un uk nich von onse Bieekja. Woo wia daut mäajlich? De Breeda un Sestren von doa brochten am Äten un schreewen am dän Varsch fa dän Dach opp de Luschen. Soo kunn hee jieda Dach de Bibel läsen un doaräwa nodenkjen. Aus hee ieescht wada friejekomen  wia, haud hee eenen Rot fa soone, waut noch nich soon schwoaret beläft hauden. Hee sajcht: “Daut es besonda wichtich, daut jie daut sea utnutzen, wan jie frie sent, mea von Jehova to lieren, doaderch, daut jie sien Wuat un onse Bieekja läsen.”

16. Äwa waut docht Jovidon no?

¹⁶ Ons Brooda läwd doano, waut Jehova fa rajcht tald. Hee docht nich äwa schlajchte Wenschen no un deed uk nich schlajchte Sachen. Enne Städ daut docht hee äwa Jehova no un waut Jehova jleicht. Jovidon bewundad sikj Gott siene schmocke Schepfunk. Jieda Zemorjes hieed hee de Väajel piepren un sinjen. Un aum Zeowes kjikjt hee no de Mon un Stierns. Hee säd: “Dee Jeschenkja von Jehova muaken mie schaftich un jeewen mie Moot.” Wan wie dankboa sent fa aul daut, waut Jehova ons em jeisteljen un em tieteljen jeft, dan hab wie Freid. Un dee Freid halpt ons uttohoolen.

17. Woo kjennen de Wieed von 1. Petrus 1:6-7 eenen Mensch halpen, waut en biejlikj soone Loag es, aus Jovidon wia?

¹⁷ Jovidon stald uk Jehova deenen aune ieeschte Städ. Hee wist, woo wichtich daut wia, dän woaren Gott tru to bliewen. Jesus säd: “Du saust sest kjeenem aus Gott, dienen Harn, aunbäden un eensich am saust du deenen” (Luk. 4:8). De Väaschte vom Millitäa un de Soldoten wullen Jovidon bat doa brinjen, sienen Gloowen auftosajen. Oba hee bäd iernstlich jieda Dach un jieda Nacht to Jehova, daut dee am halpen sull, nich opptojäwen un tru to bliewen. Un doawäajen kaun hee nu, nodäm daut se am metneemen, vekjielden un enstopten, groote Freid haben, wiels hee nu waut haft, waut hee ea nich haud. Hee haft nu eenen stoakjren Gloowen, wäajen dee aufjeprooft wort (läs 1. Petrus 1:6-7).

18. Woo kjenn wie onse Freid hoolen?

¹⁸ Jehova weet, waut ons fält toom werkjlich schaftich sennen. Wan du dise dree Sachen nokjemst, waut ons halpen werkjlich schaftich to sennen, dan kaust du de Freid hoolen, wan du uk schwoare Trubbels hast. Dan woascht du uk sajen kjennen: “Jesäajent es daut Volkj dän äa Gott de HAR es” (Psa. 144:15).