En dit Joa endad de Organisazion eenjet, daut de Bibelforscha derch de Toopkomes kunnen dolla veeent woaren. De Wacht-Turm funk biejlikj aun, dän Varsch uttolajen, waut se jieda Wäakj bie daut “Toopkomen toom bäden, preisen un Zeichnis jäwen” derchjinjen. De Bibelforscha muaken uk noch eenen Kalenda, wua de Bibelvarsch fa dee Wäakj bennen wia, un wua uk Leeda bennen wieren, waut see sinjen kunnen, wan see fa sikj ooda met de Famielje toop studieren deeden.

Bie äare Toopkomes jeewen de Bibelforscha een “Zeichnis”. Daut wia veleicht eene Erfoarunk, waut see em Deenst hauden, ooda dee deeden Jehova fa waut danken ooda een Leet sinjen ooda een Jebäd sajen. Eva Barney, leet sikj aune 1923 deepen, aus see 15 Joa wia. See säd: “Wan doa wäa wull een Zeichnis jäwen, dan brukt dee bloos oppstonen un soowaut sajen aus dit: ‘Ekj well dän Harn danken fa aul daut goode, waut hee fa mie jedonen haft.’” Eenje Breeda jinkj daut sea scheen, een Zeichnis to jäwen. Sesta Barney sajcht noch: “Brooda Godwin wia een leeftolja, oola Brooda un hee haud emma sooväl, wua hee dän Harn fäa danken wull. Oba wan siene Fru sach, daut de Leida von daut Toopkomen ojjeduldich wort, dan reet see een beskje aun sienen Wanikj. Dan hieed hee opp met räden un sad sikj dol.”

Een mol de Moonat haud jieda Vesaumlunk een besondret “Toopkomen toom bäden, preisen un Zeichnis jäwen”. Der Wacht-Turm vom 1. Aprell 1923 säd äwa dit Toopkomen: “De haulwe Tiet von daut Toopkomen sellen de Breeda Zeichnis jäwen, äwa waut see em Deenst beläft haben un de Vekjindja Moot toospräakjen. . . . Wie jleewen, daut dise Toopkomes de Breeda halpen woaren, dolla veeent to sennen.”

Charles Martin, waut 19 Joa wia, wia een Vekjindja en Vancouver, Kanada, un am kjeemen dise Toopkomes sea togood. Lota säd hee: “Bie dise Toopkomes lieed ekj, waut ekj sajen kunn, wan ekj von Hus to Hus prädjen deed. Foaken deed doa wäa waut vetalen, waut dee em Prädichtdeenst beläft haud. Doaderch kjrieech ekj eenje Iedeeen, waut ekj sajen kunn ooda woo ekj auntwuaten kunn, wan doa wäa wull de Vetal to Enj brinjen.”

De “Prädichdeenst-Doag” holpen uk met, daut de Breeda dolla veeent wieren. Der Wacht-Turm vom 1. Aprell 1923 muak bekaunt: “Om daut wie aula kjennen veeent deeselwje Oabeit doonen, . . . woat Dinjsdach, dän 1. Mei 1923, een Prädichtdeenst-Dach sennen. Von dan aun woat emma de  ieeschta Dinjsdach enne Moonat een Prädichtdeenst-Dach sennen. . . . Jieda eena von de Vesaumlunk saul doa opp irjenteene Wajch metmoaken.”

Mau rajcht de junge Bibelforscha muaken bie dit Woakj met. Hazel Burford wia to jane Tiet noch mau 16 Joa. Lota säd see: “Daut Heft Bulletin jeef ons Iedeeen toom prädjen, waut wie ons utwendich lieren kunnen. a Ekj un miene Groospape deeden toop sea flietich bie aul dit metmoaken.” Oba Sesta Burford must sikj sea wundren, waut een Brooda doaräwa docht, daut see prädjen jinkj. See säd: “Eenen leewen, elren Brooda wia daut sea jäajenaun, daut ekj de Menschen prädjen deed. To dee Tiet kunnen eenje daut nich vestonen, daut aule Bibelforscha, mau rajcht ‘junge Mana un Mejales’, doa metmoaken sullen, onsen grooten Schepfa to preisen” (Psa. 148:12-13). Oba Sesta Burford jeef nich opp. Lota wort see no de tweede Klauss von de Gilead-School jekroacht un no Panama aus Missionoa jeschekjt. Met de Tiet endaden dise Breeda äare Enstalunk un jleewden nich mea, daut et orrajcht wia, daut de junge Menschen em Deenst metmuaken.

De Kongressen holpen uk, daut de Breeda kunnen dolla veeent sennen. Bie väl Kongressen jeef daut uzhent Doag toom prädjen. Biejlikj opp eenen Kongress en Winnipeg, Kanada, wort dän 31. Moaz aule enjelot, en dee Staut prädjen to gonen. Derch soone Prädichtdeenst-Doag aus dit kunn väl mea Menschen jeprädicht woaren, un daut kjeem sea goot ut. Dän 5. August wieren rom 7,000 Menschen opp eenen aundren Kongress en Winnipeg. Bat dan wieren opp eenen Kongress en Kanada noch kjeenmol soo väl Menschen jewast aus opp disen.

Een sea wichtja Kongress von Jehova siene Zeijen wia en Los Angeles, Kalifornien, dän 18.-26. August 1923. De Wäakjen ver disen Kongress wort dee enne Post bekauntjemoakt un de Bibelforscha vedeelden äwa 500,000 Enlodungszadels. Zeins toom dän Kongress bekauntmoaken worden aun eene Sort Bossen aunjemoakt un uk aun de Breeda äare ieejne Koaren.

 Aum Sindach dän 25. August, haud Brooda Rutherford de Räd “De Schop un de Kosen”, wua hee dietlich muak, daut “de Schop” soone Menschen wieren met de rajchte Enstalunk, waut oppe Ieed en een Paradies läwen woaren. Hee jeef uk eene Entscheidunk bekaunt, waut “Eene Woarnunk” heet. En dise Entscheidunk wort de christelje Kjoakjen veuadeelt, un aule Opprechtje toojerot, von daut Groote Babel wajchtogonen (Opb. 18:2, 4). Lota holpen een deel flietje Bibelforscha äwa de gaunze Welt met, millionende Zadels met dise Entscheidunk to vedeelen.

Dän latsten Dach von dän Kongress wieren doa äwa 30,000 Menschen, waut Brooda Rutherford siene Räd hieeden, met daut Teema: “Aule Velkja gonen Harmagedon entjäajen, oba Millionende, waut nu läwen, woaren kjeenmol stoawen”. Wäajen de Bibelforscha aul dochten, daut doa soon deel Menschen hankomen wudden, pachten dee een Stadium en Los Angeles, waut jroz nie jebut wia. Toom secha moaken, daut jieda eena daut Program goot hieren kunn, brukten de Breeda de Lautspiekers von daut Stadium; daut wia to dee Tiet een gaunz nieet Jereetschoft. Väl aundre hieeden daut Program uk äwa Rädio.

En daut Joa 1923 wia daut to seenen, woo daut Prädichtwoakj tooneem en Afrika, Europa, Indien un Sied-Amerika. En Indien wia een Brooda, waut A. J. Joseph heet. Dee haud eene Fru un sas Kjinja, oba holp doawäajen met, Bieekja to moaken opp de Sproaken Hindi, Tamil, Telugu un Urdu.

En Sierra Leone schreewen Alfred Joseph un Leonard Blackman, waut Bibelforscha wieren, no de Hauptoffiz en Brooklyn, New York, un fruagen no Helpa. Aun dän 14. Aprell 1923, kjrieejen see eene Auntwuat. Alfred säd: “Eenen Sinowent lot zeowes fond mie onverhofs wäa.” Alfred hieed eene lude Stemm, waut am fruach: “Best du dee, waut bie de Watch Tower Society no Helpa fruach?” Alfred säd: “Jo”. Dee säd: “Na, dee haben mie jeschekjt.” Daut wia de Stemm von William R. Brown. Hee wia jroz met siene Fru Antonia un siene twee Dajchta Louise un Lucy von de Karibik aunjekomen. Daut dieed nich lang, bat de Breeda dee kunnen kjanen lieren.

Alfred säd wieda: “Fuaz dän näakjsten Dach zemorjes, aus ekj un Leonard toop de Schreft studieeden, soo aus jieda Wäakj, sag wie opp eenst eenen grooten Mensch ver de Däa stonen. Daut wia Brooda Brown. Hee wia soo iewrich fa de  Woarheit, daut hee fuaz dän näakjsten Dach eene Räd wull hoolen.” Daut dieed nich mol eene Moonat, bat Brooda Brown aul de Bieekja utjedeelt haud, waut hee metjebrocht haud. Boolt nodäm kjrieech hee noch eemol 5,000 Bieekja, un daut dieed wada nich lang, dan brukten dee noch mea Bieekja. Oba wäajen Brooda Brown en aul siene Joaren, wua hee Jehova flietich deend, soo sea de Bibel brukt en siene Räden, wia hee aus “Bibel-Brown” bekaunt un nich, aus een Bieekja-Vekjeepa.

En Dietschlaunt worden de Breeda sikj eenich, von daut Betel en Barmen ruttotrakjen, wäajen daut too kjlien wia. Un dan hauden dee noch jehieet, daut de fraunzeesische Armee boolt wudd dee Staut ennämen. De Bibelforscha fungen een Jebied en Magdeburg, waut paussent wia toom Bieekja drekjen. Dän 19. Juni hauden de Breeda verecht met de Sachen enpaken von de Drekjarie un uk aul de aundre Sachen un brochten daut no daut niee Betel en Magdeburg. Fuaz dän näakjsten Dach, nodäm daut see de Hauptoffiz daut weeten jeloten hauden, daut see omjetrocken wieren, wort daut enne Post bekauntjemoakt, daut Frankreich de Staut Barmen enjenomen haud. Aun dit kunnen de Breeda daut kloa seenen, daut Jehova an beschizt un jeholpen haud.

En Brasilien deed George Young, waut väl reisd toom de goode Norecht prädjen, met een nieet Betel aunfangen un funk uk aun, dän Woaktorm opp Portugiesisch ruttojäwen. Benna een poa Moonat jeef hee mea aus 7,000 Tietschreften un Hefta wajch. Sarah Ferguson freid sikj sea, aus Brooda Young äare Famielje besocht. Aul vonne 1899 aun haud see dän Woaktorm jeläst, oba see haud noch nich de Jeläajenheit jehaut, sikj deepen to loten. Oba een poa Moonat lota kunnen Sesta Ferguson un äare vea Kjinja sikj entlich deepen loten.

Aum Enj von daut Joa säd daut em Wacht-Turm vom 15. Dezamba 1923, woo väl daut aun de Bibelforscha jedonen haud, daut sikj eenjet en de Toopkomes un Kongressen un em Prädichtdeenst jeendat haud. Daut säd: “Daut es kloa to seenen, daut de Vesaumlungen . . . stoakj em Gloowen sent. . . . Well wie reed sennen toom mea doonen un wieda Gott iewrich un met Freiden deenen en daut Joa 1924.”

Daut Joa 1924 wia uk een sea besondret Joa fa de Bibelforscha. De Breeda em Betel hauden aul fa Moonaten opp een Biet Launt en Staten Island jebut, waut dicht bie de Hauptoffiz en Brooklyn wia. De Jebieda opp dise fresche Städ worden aunfangs 1924 foadich. Un daut holp, daut de Breeda noch dolla veeent wieren un daut de goode Norecht opp veschiedne Wäaj jeprädicht wort, soo aus daut noch kjeenmol ea mäajlich jewast wia.