40. ARTIKJEL FA DAUT STUDIUM
LEET 30 Mien Voda, mien Gott un Frint
Jehowa heelt dee, waut een jebroaknet Hoat haben
“Hee heelt, dee een jebroaknet Hoat haben; hee bebinjt an äare Wunden” (PSA. 147:3)
OM WAUT DAUT JEIT
Jehowa es sea om dee todoonen, waut lieden motten wäajen daut, waut dee mol beläft haben. En disen Artikjel woa wie seenen, woo hee ons treest, wan wie lieden motten, un woo hee ons halpt, aundre to treesten.
1. Waut woat Jehowa von siene Deena en?
JEHOWA sitt aules, waut siene Deena derchgonen. Hee sitt daut, wan wie schaftich sent un wan wie truarich sent (Psa. 37:18). Hee freit sikj sea, wan hee sitt, daut wie ons Bastet doonen, om am to deenen, endoont woo truarich wie sent! Un hee deit noch mea: Hee unjastett un treest ons jieren.
2. (a) Waut deit Jehowa fa dee, waut een jebroaknet Hoat haben? (b) Waut mott wie doonen, daut ons daut togood kjemt?
2 Psalm 147:3 sajcht, daut Jehowa dee de Wunden bebinjt, waut een jebroaknet Hoat haben. Dis Varsch wiest, woo leeftolich Jehowa sikj om dee kjemmat, waut sea truarich sent wäajen daut, waut dee mol beläft haben. Oba waut mott wie doonen, daut ons daut togood kjemt, woo Jehowa ons halpt? Doatoo mol een Biespel. Een gooda Dokta kaun wäm halpen, waut sikj velazt haft, daut dee sikj wada bäta feelt. Oba doatoo mott deejanja aules krakjt doonen, waut de Dokta am sajcht. Krakjt soo mott wie uk aules doonen, waut Jehowa ons sajcht, daut wie ons wada bäta feelen kjennen. En disen Artikjel woa wie seenen, waut Jehowa derch sien Wuat to dee sajcht, waut sikj sea truarich feelen, un woo wie sienen Rot nokomen kjennen, waut hee ons ut Leew jeft.
JEHOWA VESECHAT ONS, DAUT WIE SEA VÄL WIEET SENT
3. Wuarom denkjen eenje, daut see nuscht wieet sent?
3 Wie läwen en eene Welt, wua daut kjeene Leew jeft, un väl Menschen jäwen aundre daut Jefeel, daut dee nuscht wieet sent. Eene Sesta, waut Helen a heet, sajcht: “Onse Elren weesen ons verheipts kjeene Leew. Ons Voda behaundeld ons sea schlajcht un säd emma wada, daut wie to nuscht to brucken wieren.” Veleicht haben se die uk mol schlajcht behaundelt, domm jesajcht ooda daut Jefeel jejäft, daut du nuscht wieet best. Wan daut soo es, dan felt die daut veleicht schwoa to jleewen, daut doa wäa werkjlich om die todoonen es.
4. Waut vesechat Jehowa ons en Psalm 34:19?
4 Mau rajcht wan aundre die schlajcht behaundelt haben, kaust du die doawäajen secha sennen, daut du fa Jehowa väl wieet best un daut hee die leeft. Hee “es aul dee no aun, dee een jebroaknet Hoat haben” (läs Psalm 34:19). Wan du die bedrekjt feelst, dan denkj doaraun, daut Jehowa waut Goodet en dien Hoat sach un daut hee selfst die no sikj trock (Joh. 6:44). Hee es emma reed, die to halpen, wäajen du sea wieetvoll best fa am.
5. Waut kjenn wie doavon lieren, woo Jesus met soone omjinkj, waut sikj wieetloos feelden?
5 Wie kjennen väl äwa Jehowa siene Leew lieren, wan wie ons Jesus sien Biespel unjastonen. Aus Jesus oppe Ieed wia, wees hee deejanje Metjefeel, waut schlajcht behaundelt worden un sikj doawäajen wieetloos feelden (Mat. 9:9-12). Waut deed hee biejlikj, aus eene Fru sienen Äwarock aunschieed, waut doa wull von eene schlemme Krankheit jesunt woaren? Hee treest ar un lowd ar fa äaren Gloowen (Mar. 5:25-34). Jesus deit sienen Voda krakjt no (Joh. 14:9). Doawäajen kaust du die secha sennen, daut Jehowa die väl räakjent un daut hee diene goode Sieden sitt – biejlikj daut du Gloowen hast un am leefst.
6. Waut kaust du doonen, wan du die mol wieetloos feelst?
6 Waut kaust du doonen, wan du die mol wieetloos feelst? Läs soone Bibelvarzhen, waut die wiesen, daut du väl wieet best fa Jehowa, un denkj doaräwa no (Psa. 94:19). b Doo die nich met aundre vejlikjen un kjikj uk nich no daut, waut du nich doonen kaust. Jehowa velangt nich mea von die, aus du doonen kaust (Psa. 103:13-14). Wan die ea mol wäa schlajcht behaundelt haft, dan denkj doaraun, daut et nich diene Schult wia. Vejät uk nich, daut Jehowa deejanje halpt, waut schlajcht behaundelt woaren, un daut hee soone rechten woat, waut aundre schlajcht behaundlen (1. Pet. 3:12). Sandra, waut sea schlajcht behaundelt wort, aus see kjlien wia, sajcht: “Ekj froag Jehowa foaken doano, daut hee mie halpt, miene goode Sieden to seenen – dee, waut hee sitt.”
7. Woo kaust du daut en Jehowa sienen Deenst brucken, waut du aul beläft hast?
7 Twiewel doa nienich aun, daut Jehowa die brucken kaun, om aundre to halpen. Hee haft die de Iea jejäft, sien Metoabeida to sennen en daut Prädichtwoakj (1. Kor. 3:9). Wäajen daut, waut du aul beläft hast, kaust du aundre leichta vestonen un met dee metfeelen. Un du kaust väl doonen, om dee to halpen. Helen, von dee wie ea aul räden, kjrieech Help von Jehowa un de Breeda un Sestren, un es nu bäta reed, selfst aundre to halpen. See sajcht: “Ea feeld ekj mie wieetloos. Oba Jehowa haft mie jeholpen, mie jeleeft to feelen, un hee brukt mie nu, om aundre to halpen.” Helen deent nu schaftich aus Pionia.
NEMM JEHOWA SIENE VEJÄWUNK AUN
8. Waut vesechat Jesaja 1:18 ons?
8 Eenje von Jehowa siene Deena feelen sikj noch emma sea schlajcht wäajen de Fäla, waut see mol jemoakt haben – entwäda ver ooda no äare Doop. Oba wie sellen nich vejäten, daut Jehowa ons sea leeft un daut hee daut Leesjelt jejäft haft, daut onse Sinden vejäft woaren. Hee well onen Twiewel, daut wie dit Jeschenkj aunnämen. Jehowa vesechat ons, daut hee ons gaunz vejäwen deit, wan wie de Sach met am “derch räden” c, aulsoo oppem Kloaren brinjen (läs Jesaja 1:18). Sent wie nich dankboa, daut ons leeftolja Voda Jehowa onse Sinden gaunz vejat, oba daut Goode, waut wie jedonen haben, kjeenmol vejat? (Psa. 103:9, 12; Heb. 6:10).
9. Wuarom sell wie nich emma wada aun de Sinden denkjen, waut wie ea mol jedonen haben?
9 Wan du sea truarich best wäajen daut, waut du ea mol jedonen hast, dan strenj die aun, doano to kjikjen, waut du nu deist un waut du lota woascht doonen kjennen. See wie mol daut Biespel von dän Apostel Paulus. Am wia daut sea schod, daut hee de Christen soo sea vefolcht haud, oba hee wist, daut Jehowa am vejäft haud (1. Tim. 1:12-15). Deed hee emma wada aun de Sinden denkjen, waut hee ea jedonen haud? Secha nich. Hee deed je uk nich emma wada doaräwa nodenkjen, waut hee aules deed toom een aunjeseena Farisäa woaren (Filip. 3:4-8, 13-15). Enne Städ daut wia Paulus flietich em Deenst un kjikjt no daut, waut ver am wia. Krakjt soo aus Paulus kaust du daut nich endren, waut du ea mol jedonen hast. Oba du kaust nu dien Bastet doonen, om Jehowa to ieren, un äwa daut Scheene nodenkjen, waut hee die vesproaken haft.
10. Waut kjenn wie doonen, wan wie aundre weejedonen haben?
10 Waut kaun die halpen, wan du die schlajcht feelst, wäajen du aundre mol weejedonen hast? Doo, waut du kaust, om dän Schoden to fiksen, un saj dee uk, daut die daut leet es (2. Kor. 7:11). Froag Jehowa uk, daut hee deejanje halpt, waut du weejedonen hast. Hee kaun die un uk dee halpen, am wieda to deenen un wada Fräd to haben.
11. Waut kjenn wie von dän Profeet Jona sien Biespel lieren? (See daut Bilt oppe.)
11 Lia von diene Fäla un sie wellich reed, daut to doonen, waut Jehowa von die haben well. See wie mol daut Biespel von dän Profeet Jona. Gott schekjt Jona no Niniwe, oba hee reisd krakjt no de aundre Rechtunk. Jeef Jehowa met Jona opp? Nä, Jehowa wees Jona trajcht un hee lieed ut sienen Fäla (Jona 1:1-4, 15 – 2:1, 8-11). Aus Gott am noch eemol no Niniwe schekjt, jehorcht Jona fuaz. Wan hee sikj uk schlajcht feeld äwa dän Fäla, waut hee jemoakt haud, neem hee dise Oppgow oba aun, waut Jehowa am jeef (Jona 3:1-3).
Nodäm daut de Profeet Jona daut äwaläft haud, en eenen Fesch bennen to sennen, schekjt Jehowa am noch eemol no Niniwe, om siene Norecht doa bekaunttomoaken (See Varsch 11)
JEHOWA TREEST ONS DERCH DÄN HEILJEN JEIST
12. Woo jeft Jehowa ons Fräd, wan wie waut Schlemmet beläwen? (Filippa 4:6-7).
12 Wan wie waut sea Schlemmet beläwen, dan treest Jehowa ons derch sienen heiljen Jeist. See wie mol, waut Ron un Carol beläwden, dee äa Sän sikj daut Läwen neem. Dee sajen: “Wie hauden aul mol waut Schwoaret beläft, oba dit wia daut gaunz Schlemste. Wie kunnen miere Nachten nich schlopen; doawäajen bäd wie to Jehowa un kunnen dän Fräd dan krakjt späaren, wua Filippa 4:6-7 von rät” (läs). Wan du die sea schlajcht feelst, wäajen du waut Schlemmet beläft hast, dan schedd die ut to Jehowa. Du kaust soo foaken un fa soo lang to am bäden, aus du west (Psa. 86:3, JHF; 88:2). Froag Jehowa emma wada no sienen heiljen Jeist. Hee woat die emma halpen (Luk. 11:9-13).
13. Woo kaun de heilja Jeist ons halpen, Jehowa wieda tru to deenen? (Efeesa 3:16).
13 Feelst du die onen Krauft, wäajen du eene sea schwoare Loag derchjegonen best? De heilja Jeist kaun die de Krauft jäwen, om Jehowa wieda tru to deenen (läs Efeesa 3:16). See wie mol, waut eene Sesta beläwd, waut Flora heet. See un äa Maun deenden aus Missionoaren, aus äa Maun ar ontru wort, un see leeten sikj scheeden. See sajcht: “Ekj wia gaunz dol, wäajen hee mie ontru wort, un kunn aun sest nuscht denkjen. Ekj bäd Jehowa om sienen heiljen Jeist, daut ekj wiedamoaken kunn. Jehowa treest mie, un wan daut aum Aunfank uk ommäajlich sach, wort ekj oba emma stoakja un kunn met siene Help dise Loag uthoolen.” Flora feelt sikj daut soo, daut Gott ar jeholpen haft, noch dolla opp am to vetruen, un see es sikj secha, daut hee ar bie jieda Proow biestonen woat. Flora sajcht, daut de Wieed en Psalm 119:32 (NW) werkjlich met ar to doonen haben. Doa sajcht daut: “Ekj woa met mien gaunzet Hoat dän Wajch von diene Jebooten ranen, wiels du moakst en mien Hoat Rum fa dee.”
14. Waut mott wie doonen, daut Gott sien Jeist ons halpen kaun?
14 Wan du Jehowa ieescht no sienen heiljen Jeist jefroacht hast, waut saust du dan noch doonen? Doo soont, wuaderch du mea heiljen Jeist kjrieen kaust. Doa es met en, no de Toopkomes to wanken un to prädjen. Läs uk jieda Dach Gott sien Wuat, daut du Jehowa siene Jedanken em Kopp hast (Filip. 4:8-9). Wan du de Bibel läst, dan kjikj besonda no soone Deena, waut Schwoaret beläwden, un denkj doaräwa no, woo Jehowa dee holp, staunthauft to bliewen. Sandra, von dee wie ea aul räden, beläwd mieremol waut Schwoaret. See sajcht: “Josef siene Jeschicht jeft mie werkjlich väl Moot. Hee leet daut nich too, daut de Proowen un daut Ojjerajchte, waut hee beläwd, am von Jehowa aufbrochten” (1. Mo. 39:21-23).
JEHOWA TREEST ONS DERCH ONSE GLOOWESBREEDA
15. Von wäm kjenn wie Troost kjrieen, un woo kjennen dee ons halpen? (See uk daut Bilt.)
15 Onse Gloowesbreeda kjennen fa ons soo aus “eene Kjwal . . . met väl Troost” sennen, wan ons daut schwoa es (Kol. 4:11). Onse Breeda un Sestren sent een kloara Bewies, daut Jehowa ons leeft. Dee kjennen ons treesten, doaderch daut dee ons toohorchen, wan wie ons utschedden, ooda wan dee met ons toop sennen. Veleicht moaken dee ons Moot derch eenen Bibelvarsch ooda dee bäden met ons toop (Reem. 15:4). d Eenjemol kaun een Brooda ooda eene Sesta ons halpen, doaraun to denkjen, woo Jehowa eene Sach sitt, un daut kaun ons halpen, ruja to sennen. Onse Gloowesbreeda kjennen ons biejlikj uk doaderch halpen, daut dee fa ons Äten moaken, wan wie gaunz dol sent.
Erfoarne Frind, opp dee du die veloten kaust, kjennen die väl Troost jäwen un die unjastetten (See Varsch 15)
16. Waut mott wie doonen, daut wie von aundre Help kjrieen?
16 Om daut wie von aundre Help kjrieen, woa wie veleicht doano froagen motten. Onse Breeda un Sestren leewen ons un wellen ons halpen (Spr. 17:17). Oba veleicht weeten dee nich, woo wie ons feelen ooda waut ons fält (Spr. 14:10). Wan du die dol feelst, dan wurscht du kjennen met goode Frind doaräwa räden. Lot dee weeten, waut fa die eene Help wudd sennen. Du wurscht uk kjennen met eenen ooda twee Eltestasch räden, met dee du die maklich feelst. Fa eenje Sestren wia daut een Troost, met eene riepe Sesta to vetalen.
17. (a) Waut kaun ons daut schwoa moaken, dän Moot to kjrieen, waut ons fält? (b) Waut sell wie doawäajen nich doonen?
17 Hool die nich von diene Gloowesbreeda oppoat. Wan du die gaunz dol feelst, jankat die daut veleicht nich, met aundre toop to sennen. Un eenjemol woaren diene Breeda un Sestren die veleicht nich gaunz vestonen kjennen ooda waut sajen, waut die wee deit (Jak. 3:2). Oba trakjt die doawäajen nich trigj von dee. Jehowa kaun diene Gloowesbreeda brucken, om die Moot to moaken. Een Eltesta, waut Gavin heet un Narfen-Trubbel haft, sajcht: “Foaken es mie doa nuscht no, met miene Frind toop to sennen.” Oba Gavin lat sikj nich unjakjrieen von siene Jefeelen un es foaken met de Breeda toop, un doaderch feelt hee sikj foaken bäta. Eene Sesta, waut Amy heet, sajcht: “Wäajen daut, waut ekj ea beläft hab, es mie daut schwoa, opp Menschen to vetruen. Oba ekj schauf doaropp, de Breeda un Sestren soo to leewen un to vetruen, aus Jehowa daut deit. Ekj weet, daut Jehowa doaderch schaftich es un mie moakt daut uk schaftich.”
JEHOWA SIENE VESPRÄAKJUNGEN KJENNEN ONS TROOST JÄWEN
18. Waut woat Jehowa boolt doonen, un waut kaust du nu doonen?
18 Boolt woat Jehowa aules wajchnämen, waut ons opp irjenteene Wajch Lieden veuasoakt un truarich moakt (Opb. 21:3-4). Dan woat aun daut, waut wie beläft haben, “nich mea aun jedocht woaren” (Jes. 65:17). Oba Jehowa kjemmat sikj nu aul om ons, wan wie lieden motten. Nuzt daut ut, waut Jehowa die jeft, om die to halpen un to treesten. Un twiewel doa kjeenmol aun, daut hee fa die sorcht (1. Pet. 5:7).
LEET 7 Jehowa es onse Krauft
a Eenje Nomes hab wie hia jeendat.
b See daut Hock “ Jehowa räakjent die väl”.
c Om eene Sach met Jehowa derchtoräden, ooda oppem Kloaren to brinjen, mott wie wiesen, daut ons daut leet es, waut wie jedonen haben. Wie motten am om Vejäwunk froagen un opphieren, daut Schlajchte to doonen. Un wan wie eene groote Sind begonen haben, dan mott wie uk no Help sieekjen bie de Eltestasch enne Vesaumlunk (Jak. 5:14-15).
