1-2. Waut beläwden twee von Jesus siene Jinja, aus dee oppem Wajch no Emmaus wieren?

 JESUS siene Jinja hauden sea Angst un wieren fa Truarichkjeit gaunz benomen aun dän 16. Nissan 33 n.Chr. Twee von dee veleeten Jerusalem un jinjen no Emmaus, een kjlienet Darp soo bie 11 Kjlomeeta (7 Miel) auf von Jerusalem. Dise Mana wieren gaunz mootloos, wäajen Jesus wia omjebrocht worden, dän see nofoljden. Dee äare Hopninj, waut dee dochten, waut de Messias wudd fa de Juden doonen, wia nu gaunz wajch. Oba dan passieed doa gaunz onverhofs waut.

² Een framda Maun kjeem un jinkj met äant met. De Jinja vetalden am, woo enteischt see wieren äwa daut, woo daut met Jesus romjekomen wia. Dan funk de framda Maun aun, “von Moses un aul de Profeeten” uttolajen, wuarom de Messias haud must lieden un stoawen. Un aus de dree Mana en Emmaus aunkjeemen, leet hee äant weeten, daut hee Jesus wia, waut vom Doot oppjestonen wia. Dise Vetal woaren dee kjeenmol vejäten haben. Woo schaftich motten dise Jinja nich jewast sennen, aus dee enworden, daut Jesus wada aum Läwen wia! (Luk. 24:13-35).

3-4. Waut beläwden Jesus siene Jinja, un waut woa wie en disen Artikjel lieren? (Aposteljeschicht 1:3).

³ Jesus leet sikj välmol von siene Jinja seenen en de latste 40 Doag, aus hee oppe Ieed wia (läs Aposteljeschicht 1:3). Hee nuzt dise Tiet goot ut, om siene Jinja to treesten, waut  truarich wieren un Angst hauden. Doahinja hauden dee wada Freid un Moot, de goode Norecht von daut Kjennichrikj to prädjen un to lieren. a

⁴ Ons woat daut sea togood komen, wan wie ons daut nostudieren, waut Jesus en dise Tiet jedonen haft. En disen Artikjel woa wie lieren, woo Jesus siene Tiet brukt (1) toom siene Jinja Moot toospräakjen, (2) toom dee halpen, de Schreft bäta to vestonen un (3) toom dee lieren, mea Veauntwuatunk to äwanämen. Jiedatsmol woa wie uk seenen, woo wie Jesus sien Biespel nodoonen kjennen.

AUNDRE MOOT TOOSPRÄAKJEN

5. Wuarom fäld Jesus siene Jinja daut aun Moot?

⁵ Wuarom fäld Jesus siene Jinja daut aun Moot? Eenje hauden äa Tus, äare Famieljes un uk äare Oabeit tochjeloten, om met Jesus mettogonen (Mat. 19:27). Aundre worden schlajcht behaundelt, wäajen dee siene Jinja worden (Joh. 9:22). Dee neemen aul dit opp sikj, wäajen dee doaraun jleewden, daut Jesus de vesproakna Messias wia (Mat. 16:16). Oba aus Jesus dootjemoakt wort, wieren dee sea truarich un mootloos, wäajen dee nich wisten, woo daut wudd wiedagonen.

6. Waut deed Jesus, nodäm daut hee vom Doot oppjestonen wia?

⁶ Jesus wist, daut et gaunz jeweenlich wia, daut siene Jinja truarich wieren, wiels hee jestorwen wia un nich, wiels dee too weinich Gloowen hauden. Noch aun dänselwjen Dach, aus hee vom Doot oppstunt, funk hee aun, siene Frind Moot tootospräakjen. Biejlikj leet hee sikj von Maria Magdalena seenen, aus see bie sien Grauf wia un road (Joh. 20:11, 16). Hee leet sikj uk von de twee Jinja seenen, wua wie aum Aunfank von disen Artikjel aul von räden. Un hee leet sikj uk von dän Apostel Petrus seenen (Luk. 24:34). Waut kjenn wie von Jesus lieren? Well wie mol seenen, woo daut wia, aus hee sikj daut ieeschte Mol seenen leet.

7. Waut sach Jesus von Maria, un waut deed hee fa ar? (Johanes 20:11-16). (See uk daut Bilt.)

 ⁷ Läs Johanes 20:11-16. Aum 16. Nissan, tiedich zemorjes, jinjen eenje Frues no Jesus sien Grauf (Luk. 24:1, 10). Eent von dise Frues wia Maria Magdalena. Aus Maria no daut Grauf kjeem, wia daut ladich. See rand no Petrus un Johanes un vetald äant daut. Dise Mana randen dan no daut Grauf un Maria kjeem dee hinjaraun. Nodäm daut dee sagen, daut daut Grauf ladich wia, jinjen dee trigj. Oba Maria bleef doa un road. Jesus beoobacht Maria, oba see wort daut nich en. Hee sach, daut see wäajen am road un wull ar treesten. Doawäajen leet hee sikj von Maria seenen un deed waut Kjlienet, waut ar oba väl Moot jeef. Hee räd to ar un jeef ar eene wichtje Oppgow: See sull siene Jinja daut vetalen, daut hee vom Doot oppjestonen wia (Joh. 20:17-18).

8. Woo kjenn wie Jesus nodoonen?

⁸ Woo kjenn wie Jesus nodoonen? Soo aus Jesus kjenn wie om aundre bekjemmat sennen un doaropp achten, aus dee waut Schwoaret derchgonen un dee Metjefeel wiesen. Daut kaun dee dan halpen, Jehowa wieda to deenen. Well wie mol de Erfoarunk seenen von eene Sesta, waut Jocelyn heet. Äare Sesta kjeem en een schlemmet Ekjsident todood. See sajcht: “Fa Moonaten feeld ekj mie dän Tiet äwa sea truarich.” Oba een Ehepoa kroagd ar no äant, horchten ar goot too un vesechaden ar, daut see bie Jehowa väl wieet wia. Jocelyn sajcht: “Daut wia fa mie soo, aus wan Jehowa mie derch dise Breeda ut een deepet, orrujet Wota rutholp, opp een Boot nopp, wua ekj en Sechaheit wia. Dee holpen mie, wada dän Wunsch to kjrieen, Jehowa wieda to deenen.” Wie kjennen aundre uk Moot toospräakjen, wan wie dee goot toohorchen, wan dee äa Hoat utschedden, un wan wie dee treesten, daut dee de Krauft kjrieen, Jehowa wieda to deenen (Reem. 12:15).

AUNDRE HALPEN, DE SCHREFT BÄTA TO VESTONEN

9. Waut wia Jesus siene Jinja schwoa, un woo holp Jesus äant doamet?

⁹ Jesus siene Jinja jleewden aun Gott sien Wuat un proowden sea, daut notokomen (Joh. 17:6). Oba dee wia daut schwoa to vestonen, wuarom Jesus wia aus een Vebräakja aun eenen Pol omjebrocht worden. Jesus wist, daut siene Jinja Gloowen hauden un Jehowa leewden. Oba hee wist uk, daut äant daut fäld, de Schreft noch bäta to vestonen (Luk. 9:44-45; Joh. 20:9). Doawäajen holp hee äant, soo daut see de deepe Bediedunk von de Schreft vestonen kunnen. Well wie mol seenen, woo hee daut deed, aus hee sikj von de twee Jinja seenen leet oppem Wajch no Emmaus.

10. Woo holp Jesus siene Jinja to vestonen, daut hee werkjlich de Messias wia? (Lukas 24:18-27).

¹⁰ Läs Lukas 24:18-27. Dauts oppfaulent, daut Jesus dise Mana nich fuaz säd, wäa hee wia. Enne Städ daut stald hee äant Froagen. Wuarom deed hee daut? Veleicht wull hee doamet rutfinjen, waut dee dochten un em Hoat hauden. Dee vetalden am, daut see jedocht hauden, daut Jesus de Israeliten fuaz wudd von de Reema friemoaken. Nodäm daut see am jesajcht hauden, äwa waut see besorcht wieren, brukt Jesus de Schreft, om de Mana halpen to vestonen, woo daut met dise Sach stunt. b Dän Zeowes neem Jesus sikj dan uk noch Tiet, om aundre von siene Jinja doavon to vetalen (Luk. 24:33-48). Waut lia wie von dit?

11-12. (a) Waut kjenn wie doavon lieren, woo Jesus de Bibel utläd? (See uk daut Bilt.) (b) Woo holp Nortey sien Bibelliera am?

¹¹ Woo kjenn wie Jesus nodoonen? Wan du met wäm de Bibel studieescht, dan stal dän paussende Froagen, om ruttofinjen, waut  dee em Hoaten haft (Spr. 20:5). Wan du ieescht vesteist, woo dee denkjt, dan kaust du dän halpen, paussende Bibelvarzhen fa siene Loag to finjen. Saj dän nich, waut dee doonen saul. Enne Städ daut halp dän to seenen, waut de Schreft werkjlich sajcht un woo dee daut en sien Läwen nokomen kaun. Well wie mol seenen, waut een Brooda en Ghana beläwd, waut Nortey heet.

¹² Aus Nortey 16 Joa wia, funk hee aun, de Bibel to studieren. Oba boolt stald siene Famielje sikj doajäajen. Waut holp am, doawäajen wiedatomoaken? Sien Bibelliera haud am aul derch Matäus, Kapitel 10 doaropp reedjemoakt, daut aule woare Christen wudden vefolcht woaren. Nortey sajcht: “Aus daut dan met dän Jäajenstaunt aunfunk, wia ekj mie gaunz secha, daut ekj de Woarheit jefungen haud.” Sien Bibelliera haud am uk derch Matäus 10:16 jeholpen to vestonen, woo hee kunn väasechtich un respakjtvoll met sien Frintschoft äwa sienen Gloowen räden. Aus Nortey sikj ieescht haud deepen loten, wull hee Pionia woaren. Oba sien Voda haud jeräakjent, daut hee wudd no de Uniwersität gonen. Enne Städ Nortey to sajen, waut hee doonen sull, stald sien Bibelliera am paussende Froagen un holp am, äwa biblische Gruntsauzen notodenkjen. Woo kjeem daut ut? Nortey wort sikj eenich, Pionia to woaren – un sien Voda schekjt am von tus. Haft Nortey siene Entscheidunk jeemols beschot? Hee sajcht: “Ekj sie mie gaunz secha, daut et de rajchte Entscheidunk wia.” Wan wie ons uk de Tiet nämen toom aundre halpen, de Schreft bäta to vestonen, dan woaren dee kjennen eenen stoakjen Gloowen kjrieen un Jehowa wieda deenen (Efs. 3:16-19).

DE BREEDA HALPEN, MEA VEAUNTWUATUNK TO ÄWANÄMEN

13. Waut deed Jesus, daut sienen Voda sien Woakj kunn wiedagonen? (Efeesa 4:8).

¹³ Aus Jesus oppe Ieed wia, deed hee krakjt daut, waut sien Voda am oppjejäft haud (Joh. 17:4). Oba Jesus docht doawäajen nich, daut hee de eensja wia, waut dise Oppgow wudd rajcht doonen kjennen. En de dreeunhaulf Joa, waut hee oppe Ieed prädijd, lieed hee aundre, dise Oabeit uk to doonen. Ea hee trigj nom Himmel fua, wees Jesus, woo sea hee opp siene Jinja vetrud. Hee jeef äant de Veauntwuatunk to prädjen un aundre to lieren un fa Jehowa siene wieetvolle Schop to sorjen (läs Efeesa 4:8). Eenje von dise  Jinja wieren woomäajlich noch mau väaren enne 20. Dise Mana hauden sea met Jesus toopjeschauft un wieren am tru. Woo brukt Jesus siene latste 40 Doag oppe Ieed, om dee to halpen, daut von äant lota kunn jesajcht woaren, daut see soo “aus Jeschenkja” wieren? (See uk de Erkjläarunk toom studieren von Efeesa 4:8 en de Studiabibel.)

14. Woo holp Jesus siene Jinja en siene latste 40 Doag oppe Ieed, em Jeisteljen verauntokomen? (See uk daut Bilt.)

¹⁴ Jesus jeef siene Jinja uk Rot, oba hee deed daut leeftolich. Biejlikj wort hee en, daut eenje emma wada Twiewel hauden, un hee holp äant doamet (Luk. 24:25-27; Joh. 20:27). Hee holp äant uk to vestonen, daut see sikj sullen dolla doarom kjemren, fa Jehowa siene Schop to sorjen, enne Städ Jelt to vedeenen (Joh. 21:15). Hee säd äant uk, daut see daut, waut see em Deenst fa Jehowa deeden, nich met daut vejlikjen sullen, waut aundre doonen kunnen (Joh. 21:20-22). Un aus hee enwort, daut eenje orrajchte Iedeeen äwa daut Kjennichrikj hauden, holp hee äant uk, doa rajcht nauntokjikjen un daut Prädichtwoakj vonne goode Norecht aune ieeschte Städ to stalen (Apj. 1:6-8). Waut kjennen Eltestasch von Jesus lieren?

15-16. (a) Woo kjennen Eltestasch Jesus nodoonen? Laj daut ut. (b) Woo kjeem Patrick daut togood, daut hee Rot kjrieech?

¹⁵ Woo kjennen de Eltestasch Jesus nodoonen? De Eltestasch sellen doano seenen, aule Breeda – uk de junge – uttolieren un to halpen, daut dee kjennen reed sennen, mea Veauntwuatunk to äwanämen. c Dee denkjen doaraun, daut dise Breeda een deel to lieren haben, un doawäajen velangen dee nich too väl von dee. De Eltestasch jäwen äant leeftolich Rot un halpen dise junge Breeda opp dee Wajch, mea Erfoarunk to kjrieen un to vestonen, woo wichtich daut es, deemootich un tru to sennen un reed uk to sennen, de Breeda to deenen (1. Tim. 3:1; 2. Tim. 2:2; 1. Pet. 5:5).

¹⁶ Well wie mol seenen, woo een Brooda, waut Patrick heet, daut togood kjeem, daut  hee Rot kjrieech. Aus hee noch jinja wia, räd hee leicht kort to aundre un wia nich sea leeftolich, nich mol to Sestren. Een Eltesta wort daut en, daut Patrick doamet Help fäld, un jeef am leeftolich, oba dietlich Rot. Patrick sajcht: “Ekj sie froo, daut hee daut deed. Ea wort ekj foaken mootloos, wan ekj sach, daut aundre Breeda dee Veauntwuatungen kjrieejen, waut mie jankaden. Oba sien Rot holp mie to vestonen, daut ekj mie must aunstrenjen, miene Breeda un Sestren deemootich to deenen, enne Städ bloos doaraun to denkjen, mea Veauntwuatunk enne Vesaumlunk to kjrieen.” Wiels Patrick daut nokjeem, kunn hee aus Eltesta aunjestalt woaren, aus hee noch mol väaren enne 20 wia (Spr. 27:9).

17. Woo wees Jesus, daut hee opp siene Jinja vetrud?

¹⁷ Jesus säd to siene Jinja nich bloos, daut see prädjen sullen, oba hee jeef äant uk de Veauntwuatunk, aundre to lieren (see uk mwbr18.04 S. 2 “Lieet an”). Siene Jinja dochten veleicht, daut dee nich emstaund wieren, dit Woakj to doonen. Oba Jesus twieweld doa nich aun un säd dee daut uk, daut hee gaunz opp äant vetrud. Hee säd: “Krakjt soo aus de Voda mie jeschekjt haft, soo schekj ekj junt” (Joh. 20:21).

18. Woo kjennen de Eltestasch Jesus nodoonen?

¹⁸ Woo kjennen de Eltestasch Jesus nodoonen? Erfoarne Eltestasch lieren aundre Breeda ut, daut dee Veauntwuatungen äwanämen kjennen (Filip. 2:19-22). Dee wudden de jinjre Breeda kjlandre Oppgowen jäwen kjennen, biejlikj biem Vesaumlungshus reinmoaken un unjahoolen. Dee wiesen äant uk, woo dee dise Oppgowen doonen kjennen un vetruen dan doaropp, daut de Breeda daut uk woaren rajcht doonen. Matthew, een Brooda, waut korz Eltesta wort, sajcht, daut hee daut sea schazt, wan de Eltestasch am fa eene Sach utlieren un am späaren loten, daut see doaropp vetruen, daut hee daut woat nokomen kjennen. Hee sajcht: “Wan ekj eenen Fäla muak, wieren de Eltestasch jeduldich met mie, wiels dee wisten, daut ekj noch aum Lieren wia, un dee holpen mie dan, mie doarenn to vebätren.” d

19. Bie waut well wie proowen, ons Bastet to doonen?

¹⁹ Jesus brukt siene latste 40 Doag oppe Ieed om aundre Moot to moaken, dee mea to lieren un om eenje uttolieren, daut dee kunnen mea Veauntwuatunk äwanämen. Well wie ons eenich sennen, sien Biespel notodoonen (1. Pet. 2:21). Hee woat ons doabie halpen, wiels hee vespruak je ons: “Ekj sie dän Tiet äwa bie junt bat daut Enj von dise TIET” (Mat. 28:20).