43. ARTIKJEL FA DAUT STUDIUM
LEET 90 Ons unjarenaunda Moot toospräakjen
Woo kjenn wie Twiewel oppem Kloaren brinjen?
“Unjasieekjt daut, woo daut met aules steit” (1. TES. 5:21)
OM WAUT DAUT JEIT
Woo wie soone Twiewel oppem Kloaren brinjen kjennen, waut ons em Deenst fa Jehowa toosaten kjennen.
1-2. (a) Waut wundren eenje von Jehowa siene Deena? (b) Om waut jeit daut en disen Artikjel?
WIE aula haben noch mol Twiewel a, endoont woo oolt wie sent. Denkj biejlikj mol aun eenen jungen Mensch, waut doa wundat, aus Jehowa waut om am romjeft. Doawäajen es hee sikj veleicht nich secha, aus hee sikj saul deepen loten. Ooda denkj mol aun eenen Brooda, waut daut Kjennichrikj emma aune ieeschte Städ stald, aus hee junk wia, enne Städ nom Tieteljen hinjaraun to sennen. Oba nu motten see aus Famielje sea doano seenen, daut daut Jelt toorieekjt, un doawäajen wundat hee, aus daut ea werkjlich de baste Entscheidunk wia. Ooda stal die mol eene elre Sesta väa, waut nich mea soo väl Krauft un Moot haft aus ea. Veleicht es see mootloos, wiels see nich mea soo väl doonen kaun. Du hast veleicht uk mol äwa soont aus dit jejrebbelt: “Jeft Jehowa opp iernst waut om mie rom? Wia daut, waut ekj fa Jehowa oppjeef, emma eene weise Entscheidunk? Es daut, waut ekj nu fa Jehowa doo, noch waut wieet?”
2 Wan wie met soone Froagen nuscht doonen, kaun ons daut sea toosaten un mau rajcht bat doa brinjen, Jehowa nich mea to deenen. Dis Artikjel woat ons wiesen, woo de Schreft ons halpen kaun, wan wie wundren, (1) aus Jehowa waut om ons romjeft, (2) aus onse Entscheidungen emma de baste wieren ooda (3) aus daut, waut wie vondoag fa Jehowa doonen, noch waut wieet es.
WOO DU DIENEN TWIEWEL OPPEM KLOAREN BRINJEN KAUST
3. Woo kaust du dienen Twiewel oppem Kloaren brinjen?
3 Wan wie wellen onsen Twiewel oppem Kloaren brinjen, dan mott wie en Gott sien Wuat no de Auntwuaten sieekjen. Daut woat ons halpen, noch jratre Frind met Jehowa to woaren, em Jeisteljen to waussen un ons secha to sennen, daut wie “em Gloowen” fauststonen (1. Kor. 16:13).
4. Woo kjenn wie unjasieekjen, woo daut met aules steit? (1. Tessalonicha 5:21).
4 Läs 1. Tessalonicha 5:21. Enne Schreft woat ons toojerot: “Unjasieekjt daut, woo daut met aules steit.” Daut kjenn wie doonen, wan wie ons Denkjen met daut vejlikjen, waut de Schreft lieet. Denkj wie noch mol aun dän jungen Mensch, waut doa wundat, aus Gott waut om am romjeft. Sull hee disen Twiewel eefach tochloten? Nä, enne Städ daut wudd hee sikj daut sellen unjastonen, woo Jehowa äwa de Sach denkjt.
5. Waut mott wie doonen, daut Jehowa onse Froagen beauntwuaten kaun?
5 Wan wie Gott sien Wuat läsen, dan rät Jehowa soo to sajen to ons. Oba wan wie vestonen wellen, woo hee äwa onse Froag denkjt, mott wie mea doonen, aus bloos enne Bibel läsen. Wie motten rutfinjen, woone Bibelvarzhen met onsen Twiewel to doonen haben un ons dee noch dolla unjastonen. Doatoo kjenn wie de Bieekja toom nosieekjen brucken, waut Jehowa siene Organisazion ons jeft (Spr. 2:3-6). Wie kjennen Jehowa om Help froagen, daut wie vestonen kjennen, woo hee doaräwa denkjt. Dan kjenn wie no biblische Gruntsauzen un Rot sieekjen, waut to onse Loag paussen. Waut ons uk halpen kaun, es, äwa daut Biespel von true Deena en de Bibel notodenkjen, waut biejlikj soo waut beläft haben aus wie.
6. Woo halpen ons de Toopkomes, onsen Twiewel oppem Kloaren to brinjen?
6 En de Toopkomes rät Jehowa soo to sajen uk to ons. Wan wie doa räajelmässich sent, kjenn wie veleicht krakjt daut en eene Räd ooda en eene Auntwuat hieren, wua wie äwa Twiewel hauden (Spr. 27:17). Well wie nu mol seenen, waut wie jäajen eenje Twiewel krakjt doonen kjennen.
JEFT JEHOWA WAUT OM MIE ROM?
7. Waut von Twiewel haben eenje veleicht?
7 Hast du mol jejrebbelt, aus Jehowa verheipts waut om die romjeft? Wan du denkjst, daut et met die nich väl meent, dan kaust du die daut meist nich väastalen, Frind to sennen met dänjanjen, waut daut gaunze Uniwersum jemoakt haft. Kjennich David haud uk äwa dise Froag nojedocht. Un hee must sikj bloos wundren, aus hee vestunt, daut Jehowa waut om ons kjliene Menschen romjeft. Doawäajen säd hee: “Oo HAR, waut sent Menschen, daut du an aunerkjanst, ooda de Menschenkjinja, daut du aun an denkjst?” (Psa. 144:3). Wua wurscht du kjennen de Auntwuat opp dise Froag finjen?
8. No waut kjikjt Jehowa bie eenen Mensch, soo aus 1. Samuel 16:6-7, 10-12 sajcht?
8 Enne Schreft lia wie, daut Jehowa sikj uk fa soone Menschen intressieet, om dee aundre veleicht nuscht om romjäwen. Soo wia daut biejlikj, aus Jehowa Samuel no Isai schekjt. Hee sull eent von dän siene Säns aus dän näakjsten Kjennich von Israel saulwen. Isai brocht säwen von siene acht Säns ver Samuel, oba hee docht nich aun sienen jinjsten Sän David. b Oba Jehowa wäld sikj tolatst krakjt dän (läs 1. Samuel 16:6-7, 10-12). Wuarom? Wiels hee no David sien Hoat kjikjt un sach, daut et een junga Mensch wia, waut daut Jeistelje sea väl räakjend.
9. Wuarom kaust du die secha sennen, daut Jehowa sikj fa die intressieet? (See uk daut Bilt.)
9 Denkj doch mol doaräwa no, woo Jehowa die aul jewäsen haft, daut hee sikj fa die intressieet. Hee jeft die Rot, waut krakjt fa diene Loag paust (Psa. 32:8). Denkj mol han: Woo wudd hee die soonen Rot jäwen kjennen, wan hee die nich goot kjand? (Psa. 139:1). Wan du daut nokjemst, waut Jehowa die toorot, woascht du beläwen, woo goot daut utkjemt. Un du woascht die dan secha sennen, daut hee väl om die romjeft (1. Chr. 28:9, JHF; Apj. 17:26-27). Jehowa sitt, woo sea du die aunstrenjst, un hee räakjent diene goode Ieejenschoften sea väl. Doawäajen well hee dien Frint sennen (Jer. 17:10). Hee wenscht sikj uk, daut du met am Frind sennen west (1. Joh. 4:19).
“Wan du am sieekjst, woat hee sikj von die finjen loten” (1. Chr. 28:9, JHF) (See Varsch 9) c
WIEREN MIENE ENTSCHEIDUNGEN WERKJLICH DE BASTE?
10. Waut fa Froagen kjennen veleicht oppkomen, wan wie doaräwa nodenkjen, waut wie fa Jehowa oppjejäft haben?
10 Eenje denkjen nu veleicht trigj un äwalajen, aus see mol de rajchte Entscheidunk jemoakt hauden. Veleicht haben dee eene Oabeit aufjesajcht, wua see wudden haben dia betolt jekjräajen ooda dee haben nich met äa ieejnet Jeschaft aunjefongen. Nu, no väle Joaren, fangen dee veleicht aun to wundren, aus daut werkjlich de baste Entscheidunk wia. Daut kaun sennen, daut dee aundre bekaunde Menschen seenen, waut sikj doafäa entschieden haben, em Tieteljen wiedatokomen. Daut lat soo, dee sent väl bäta auf un haben een jemieteljet Läwen. Doawäajen haft eena veleicht soone Froagen aus dit: “Wia daut werkjlich kluak, waut ekj Joaren trigj fa Jehowa oppjeef? Hab ekj mie daut veleicht derchgonen loten, een leichtret Läwen to haben?”
11. Waut vonne Jedanken baudaden dän Schriewa von dän 73. Psalm?
11 Wan die daut uk soo jeit, dan denkj mol doaraun, woo de Schriewa von dän 73. Psalm sikj feeld. Am leet daut soo, daut dee, waut Jehowa nich deenden, een goodet Wiedakomen hauden un jesunt un sondasorj wieren (Psa. 73:3-5, 12). Doawäajen späad sikj am daut soo, daut aul siene Mieej, Jehowa to deenen, vejäfs wia. Hee wort soo mootloos, daut hee säd, daut hee “dän dachäwa jeploacht” wia (Psa. 73:13-14). Woo kunn hee met dise schwoare Jedanken foadich woaren?
12. Waut deed de Psalmenschriewa, daut hee sikj nich leet von siene schwoare Jedanken unjakjrieen? (Psalm 73:16-18).
12 Läs Psalm 73:16-18. Aus de Psalmenschriewa no Jehowa sien Heilichtum jinkj, funk hee doa de Ru toom met eenen kloaren Kopp äwa de Sach nodenkjen. Am dakjt daut op, daut et met dee, waut doa minkj een goodet un leichtet Läwen hauden, enne Lenjd nich wudd goot utkomen. Daut to vestonen, jeef am ennalich Fräd, un am wort daut kloa, daut et daut Baste wia, no Jeisteljet hinjaraun to sennen. Soo haud hee wada Moot, en sienen Deenst fa Jehowa sien Bastet to jäwen (Psa. 73:23-28).
13. Waut kaun die halpen, wan du waut äwa diene Entscheidungen beschoden deist? (See uk daut Bilt.)
13 Woo kaust du uk ennalich Fräd finjen soo aus de Psalmenschriewa? Derch Gott sien Wuat. Denkj mol doaraun, woo väl daut wieet es, waut du nu hast – biejlikj daut Jehowa met die tofräd es. Vejät uk nich, woo de aundre daut gonen woat, waut bloos opp daut räakjnen kjennen, waut dise Welt auntobeeden haft. Dee motten sikj gaunz opp daut veloten, waut see en dit Läwen volbrinjen kjennen un haben kjeene Hopninj fa de Tookunft. Oba Jehowa jeft die nu aul väl Goodet un woat die väl dolla säajnen, aus waut du die väastalen kaust (Psa. 145:16, NW). Denkj uk äwa dise Froag no: Kaust du daut werkjlich weeten, woo dien Läwen wudd jewast sennen, wan du hautst aundre Entscheidungen jemoakt? Eent es secha: Wan sikj diene Entscheidungen opp Leew fa Gott un fa dän Näakjsten stetten, dan woat die daut aun nuscht Goodet fälen un du woascht werkjlich schaftich sennen.
Denkj aun aul daut Goode, waut Jehowa die vesproaken haft, un frei die doatoo (See Varsch 13) d
ES DAUT, WAUT EKJ FA JEHOWA DOONEN KAUN, WERKJLICH WAUT WIEET?
14. Wuarom sent eenje äwa sikj beduat, un äwa waut wundren dee veleicht?
14 Eenje von ons kjennen nich soo väl doonen, aus dee wellen, wäajen dee aul ella sent, Trubbel met de Jesuntheit haben ooda behindat sent. Doawäajen feelen see sikj veleicht soo, daut Jehowa nich väl om äant romjäwen kaun. Dee wundren noch mol: “Sie ekj fa Jehowa verheipts noch to brucken?”
15. Äwa waut wia de Schriewa von dän 71. Psalm sikj secha?
15 De Schriewa von dän 71. Psalm wia krakjt soo beduat äwa sikj un säd en een Jebäd: “Velot mie nich wan ekj schwak woa” (Psa. 71:9, 18). Wan hee sikj uk soo feeld, daut hee kjeene Krauft mea haud, wia hee sikj oba gaunz secha, daut Jehowa am aunleiden un halpen wudd, soo lang aus hee wieda tru bleef. Am wort daut kloa, daut Jehowa eenen Jefaulen aun dee haft, waut am äa Bastet jäwen, wan dee uk nich väl doonen kjennen (Psa. 37:23-25).
16. Waut kjennen dee, waut aul ella sent, fa Jehowa doonen? (Psalm 92:13-16).
16 Wan du uk aul ella best, dan proow, die soo to seenen, aus Jehowa die sitt. Hee halpt die wellich em Jeisteljen wieda to waussen un tru to bliewen, wan diene Krauft veleicht uk nolat (läs Psalm 92:13-16). Enne Städ no daut to kjikjen, waut du nich mea doonen kaust, kjikj doano, waut du nu doonen kaust. Du kaust aundre biejlikj väl Moot moaken derch dien goodet Biespel un wan du die fa dee intressieescht. Du wurscht aundre uk vetalen kjennen, woo Jehowa die met de Joaren biejestonen haft un to waut du die besonda freist, waut Jehowa ons vesproaken haft. Vejät uk nich, woo väl Goodet daut aun aundre doonen kaun, wan du von Hoaten fa äant bätst (1. Pet. 3:12). Endoont waut onse Omstend sent, jieda eena von ons kaun waut fa Jehowa uk fa aundre doonen.
17. Wuarom sell wie proowen, ons nich met aundre to vejlikjen?
17 Feelst du die mootloos, wäajen du nich mea soo väl fa Jehowa doonen kaust? Dan denkj doaraun, daut am daut väl wieet es, waut du noch doonen kaust. Veleicht hast du daut uk soo, daut du foaken no daut kjikjst, waut aundre doonen kjennen. Oba proow, die nich met dee to vejlikjen. Wuarom? Wiels nich mol Jehowa soont deit (Gal. 6:4). Denkj mol aun daut, waut twee Frues vonne Bibeltiet deeden. Maria biejlikj brukt sea diere Parfum-Eelj fa Jesus (Joh. 12:3-5). De oame Wätfru oba läd em Tempel twee kjliene Zenten en, waut mau weinich wieet wieren (Luk. 21:1-4). Jesus kjikjt nich doano, woo väl dise beid Frues jeewen. Oba hee tald beides aus een Bewies fa dee äaren Gloowen. Dit wiest, woo sien Voda Jehowa äwa die denkjt. Du kaust die secha sennen, daut am daut väl wieet es, waut du ut Gloowen un Leew fa am deist, wan sikj die daut uk soo späat, daut et mau weinich es.
18. Waut woat ons halpen, onsen Twiewel oppem Kloaren to brinjen? (See uk daut Hock “ Jehowa kaun die met sien Wuat halpen, Twiewel oppem Kloaren to brinjen”.)
18 Wie aula haben bieaun mol Twiewel. Oba soo aus wie jeseenen haben, kjenn wie met de Help von Gott sien Wuat waut doajäajen doonen. Doo dien Bastet, diene Froagen oppem Kloaren to brinjen, soo daut du nich lenja twiewelst, oba Jehowa wieda voll Vetruen un mootich deenen kaust. Du kaust die secha sennen, daut Jehowa die perseenlich kjant un väl om die romjeft. Hee räakjent daut uk väl, daut du waut fa am oppjeefst, un vesprakjt, die doafäa to beloonen. Denkj uk doaraun, daut fa Jehowa to beseenen, jieda eena von siene true Deena daut wieet es, daut hee ons leeft un sikj om ons kjemmat.
LEET 111 Wie haben väl Jrind, ons to freien
a WIEED UTJELAJCHT: Wan daut en disen Artikjel von Twiewel rät, meent daut, daut wie ons nich secha sent, woo väl wieet wie fa Jehowa sent ooda aus wie emma de baste Entscheidungen jemoakt haben. Daut rät nich von dee Sort Twiewel, waut wiest, daut eenem daut aun Gloowen aun Jehowa ooda aun siene Vespräakjungen fält.
b Wan de Schreft ons uk nich krakjt sajcht, woo väl Joa David wia, aus Jehowa am utwäld, weet wie oba, daut hee noch een Jugentlicha wia. Läs doatoo dän Woaktorm vom 1. Septamba 2011, S. 29, V. 2.
