DE Musikj wia waut sea Wichtjet fa de ieeschtemmasche Israeliten. Enne Schreft rät daut foaken doavon, daut dee sinjen deeden un Musikj muaken. Mau rajcht tieen Prozent von de Schreft sent Leeda, soo aus de Psalmen, Daut Scheenste Leet von Salomo un de Kloagleeda. Daut Buak Music in Biblical Life sajcht, daut de Schreft gaunz dietlich wiest, daut de Israeliten bie välet, waut dee deeden, Musikj hauden.

Musikj aune jeweenelje Doag. De Israeliten muaken Musikj toom äare Jefeelen wiesen (Jes. 30:29). De Frues spälden met Hauntdromlen, sungen un daunzten fa Freid bie veschiedne Fasten, biejlikj wan eena toom Kjennich jemoakt wort, wan de Soldoten eenen Kjrich jewonnen hauden ooda bie de Aunbädungsfasten (Rech. 11:34; 1. Sam. 18:6-7; 1. Kjen. 1:39-40). Dee sungen uk Kloagleeda toom wiesen, woo truarich see wieren, wan doa wäa jestorwen wia (2. Chr. 35:25). Dauts gaunz dietlich to seenen, woo sea de Israeliten Musikj jleichten.

Musikj en dän Paulaust. Uk de Kjennichs von Israel jleichten sea Musikj. De Kjennich Saul biejlikj stald David aus Musikjspäla aun (1. Sam. 16:18, 23). Aus David selfst Kjennich wort, muak hee veschiedne Musikj-Instrumenten, schreef scheene Leeda un stald eene Grupp Musikjspäla aun, waut lota en Jehowa sienen Tempel Musikj muaken (2. Chr. 7:6; Amos 6:5). Un Kjennich Salomo haud Mana uk Frues, waut en sienen Paulaust sinjen deeden (Liera 2:8).

Musikj bie de Aunbädunk. Daut mieeschte oba brukten de Israeliten Musikj toom Jehowa Gott aunbäden. Dee hauden 4,000 Musikjspäla aunjestalt toom em Tempel en Jerusalem Musikj moaken (1. Chr. 23:5). Dise spälden met Zimbeln, Trompeeten un soone Sachen aus Zitta un Hoapen (2. Chr. 5:12). Oba dise utjelieede Musikjspäla wieren nich de eensje, waut bie de Aunbädunk fa Jehowa Musikj muaken. Väle Israeliten sungen Leeda, wan see oppe Reis no Jerusalem wieren fa de Joaresfasten. Dise woaren “de Leeda von no Hecht gonen” jenant (Psa. 120-134). No de judische Schreften no sungen de Israeliten eenje Leeda von de Psalmen, wäarent dee daut Passamol fieeden. a

Uk vondoag dän Dach es de Musikj fa Gott siene Deena noch sea wichtich (Jak. 5:13). Wie sinjen Leeda toom Jehowa lowen (Efs. 5:19). Wan wie met onse Breeda un Sestren toop sinjen, feel wie ons met dee vebungen (Kol. 3:16). Un soone Leeda jäwen ons uk Moot un stoakjen ons, wan wie derch Schwoaret gonen (Apj. 16:25). De Musikj es eene sea goode Wajch, onsen Gloowen un onse Leew fa Jehowa to wiesen.