1. Waut kunn de Welt äare Jesennunk aun onse Deemoot doonen?

WUAROM es daut eenjemol schwoa, daut notokomen, waut wie en Gott sien Wuat lieren? Eent es, wäajen daut Deemoot brukt, daut rajchte to doonen. Un nu “en de latste Doag” es daut nich leicht, deemootich to bliewen, wiels de Menschen “väl von sikj selfst hoolen, nom Jelt hinjaraun . . . [sent], sikj selfst huachhoolen, jäajenaun . . . [sent]” un “sikj nich beharschen” (2. Tim. 3:1-3). Aus Gott siene Deena weet wie, daut soon Benämen orrajcht es, oba eenjemol kaun sikj ons daut soo späaren, daut soone Menschen daut scheen jeit un fein wiedakomen (Psa. 37:1; 73:3). Dan denkj wie veleicht: “Loont sikj daut verheipts, dolla om aundre todoonen to sennen aus om mie selfst? Woaren aundre fa mie Respakjt haben, wan ekj mie aus ‘de jerinjsta’ benäm?” (Luk. 9:48). Wan wie ons wudden de Welt äare Jesennunk oppschlapen, dan kunn daut de Leew un Eenichkjeit manke Breeda stieren un daut wudd nich mea soo goot to seenen sennen, daut wie woare Christen wieren. Oba wan wie de goode Biespels von Gott  siene Deena ut de Bibeltiet studieren un dee nodoonen, woat ons daut väl goodet brinjen.

2. Waut kjenn wie von Gott siene true Deena lieren?

² Wan wie Gott siene true Deena nodoonen wellen, dan mott wie ons daut unjastonen, waut dee deeden. Woo worden dee Gott siene Frind? Wuarom haud Gott eenen Jefaulen aun dee? Un woo kjrieejen dee de Krauft, sienen Wellen to doonen? Wan wie soo studieren un nodenkjen, dan woat ons Gloowen stoakja woaren.

3-4. (a) Woo lieet Jehova ons? (b) Wuarom es doa toom eenen stoakjen Gloowen haben noch mea needich, aus bloos väl lieren?

³ Jehova jeft ons gooden Rot un lieet ons derch de Schreft, de biblische Bieekja, de Websied jw.org, JW Broadcasting un derch onse Toopkomes un Kongressen. Un Jesus muak en Johanes 4:34 dietlich, daut doa noch mea needich wia, aus bloos väl lieren. Hee säd: “Mien äten es daut, daut ekj däm sienen Wellen doo, dee mie jeschekjt haft, un sien Woakj verechten doo.”

⁴ Gott sienen Wellen to doonen wia fa Jesus soo aus Äten. Wan wie jesunt äten, dan feel wie ons goot un daut moakt onsen Kjarpa stoakja. Un wan wie Gott sienen Wellen doonen, dan woat ons Hoat froo un ons Gloowen woat stoakja. Eenjemol feel wie ons biejlikj nich daut baste, wan wie no de Toopkomes fa dän Prädichtdeenst wanken. Oba woo feel wie ons, wan wie vom Deenst trigjkomen? Dan sent wie schaftich un haben fresche Krauft!

5. Waut fa goodet brinjt de Weisheit?

⁵ Weisheit meent, daut wie deemootich daut doonen, waut Jehova ons lieet (Psa. 107:43). Un dee, waut Weisheit haben, kjrieen väl goodet. De Schreft sajcht: “Weisheit . . . es nich to vejlikjen met waut du die wenschen machst. . . . See es een Läwen jäwenda Boom fa dee, dee äa aunnämen, un jesäajent sent aul dee, dee sikj aun Weisheit hoolen” (Spr. 3:13-18). Jesus säd to siene Jinja: “Wan jie dit nu weeten, dan sent jie seelich [ooda schaftich], wan jie daut uk doonen” (Joh. 13:17). De Jinja kunnen schaftich bliewen, wan dee wieda daut deeden, waut Jesus an jelieet haud. Dee sullen sikj nich bloos eemol aun siene Lia hoolen un sien Biespel nodoonen, oba äa Läwen lank.

6. Wuarom mott wie wieda daut doonen, waut wie lieren?

⁶ Soo aus de Jinja mott wie uk wieda daut nokomen, waut wie lieren. Denkj wie mol aun eenen Mekenikj. Veleicht haft dee een deel Jereetschoft un Repäares un weet uk, woo de Oabeit jedonen mott. Oba wan hee aul daut nich brukt, dan halpt am daut nuscht. Hee mott wieda daut nokomen, waut hee jelieet haft, om eene goode Oabeit to doonen, wan hee uk aul joarenlank Mekenikj es. Biejlikj soo es daut bie ons uk. Aus wie de Woarheit kjanen lieeden, wia wie secha sea schaftich, wiels wie daut deeden, waut wie ut de Schreft lieeden. Oba daut wie uk wieda schaftich sennen kjennen, mott wie jieda Dach deemootich daut nokomen, waut Jehova ons lieet.

7. Waut kjenn wie von Menschen ut de Bibeltiet lieren?

⁷ Nu woa wie eenjet seenen, wua sikj daut utwiest, aus wie deemootich sent. Un wie woaren lieren, woo Gott siene true Deena ieeschtemma en biejlikj soone Loagen deemootich bliewen kunnen. Oba daut es nich jenuach, bloos von dee to läsen. Wie motten doaräwa nodenkjen un daut dan uk fuaz doonen, waut wie lieren.

8-9. Waut wiest Aposteljeschicht 14:8-15 ons äwa dän Apostel Paulus siene Deemoot? (See daut Bilt aum Aunfank.)

⁸ Gott well haben, “daut aule [Sorten] Menschen sellen jerat woaren un de Woarheit kjanen lieren” (1. Tim. 2:4). Woo denkjst du äwa de Menschen, waut noch nich de Woarheit kjanen? De Apostel Paulus prädijd de Juden, waut aul jewesset von Gott wisten. Oba hee prädijd uk dee, waut Aufjetta aunbäden deeden. Doabie wees sikj daut ut, woo deemootich Paulus wia.

⁹ Aus Paulus met Barnabas toop opp siene ieeschte Prädichtreis wia, dochten de Menschen en Liekaonien, daut see Jetta en Menschenjestault wieren. Dee dochten, Paulus un Barnabas wieren de Jetta Zeus un Hermes. Feelden Paulus un Barnabas sikj doaderch jeieet? Jleichten dee daut un dochten, daut wia mol waut aundret, aus emma vefolcht to woaren? Jleewden dee, daut de Menschen bäta wudden no de goode Norecht horchen, wan see soo bekaunt wieren? Soont kjeem dee nich mol en! Dee vereeten sikj de Kjleeda, wäajen see von soone Iedeeen nuscht weeten wullen, un randen mankem Volkj un schrieejen: “Wuarom doo jie dit? Wie sent uk stoafliche Menschen jrod soo aus jie” (Apj. 14:8-15).

10. Wuarom talden Paulus un Barnabas sikj nich fa hecha aus de Menschen von Liekaonien?

¹⁰ Aus Paulus un Barnabas säden, daut see uk Menschen wieren, meenden see nich, daut see met dän Gloowen stemden, waut de Menschen von Liekaonien hauden. See wullen sajen, daut see krakjt soo onvolkomen wieren aus dee. Paulus un Barnabas wieren von Gott aus Missionoaren jeschekjt worden (Apj. 13:2). Dee wieren met dän heiljen Jeist jesaulft un hauden de scheene Hopninj, noch mol em Himmel to läwen. Oba see talden sikj doawäajen nich fa hecha. See wisten, daut de Menschen von Liekaonien deeselwje Hopninj kjrieen kunnen aus see, wan dee de goode Norecht aunneemen.

11. Woo kjenn wie soo deemootich sennen aus Paulus, wan wie prädjen?

¹¹ Woo kjenn wie Paulus siene Deemoot nodoonen? Ieeschtlich mott wie oppaussen, daut wie nich wellen besonda jeieet woaren, wan wie met Jehova siene Help waut tostaund brinjen. Un wie sellen uk äwa nodenkjen: “Woo denkj ekj äwa de Menschen, waut ekj prädjen doo? Sie ekj met eemol krakjt soo jesonnen aus de Menschen en miene Jäajent, waut aundre fa läaja talen?” Oppe gaunze Welt sieekjen Jehova siene Zeijen no soone, waut no de goode Norecht horchen wellen. Dee sent mau rajcht reed, aundre Sproaken to lieren un sikj to daut to wanen, woo soone Velkja daut haben, waut foaken fa läach jetalt woaren. Wie talen ons kjeenmol fa hecha aus dee, waut wie prädjen. Wie proowen to vestonen, woo dee denkjen, toom dee halpen, de goode Norecht auntonämen.

12. Woo wia to seenen, daut Epafras opp iernst om aundre bekjemmat wia?

¹² Wie wiesen uk, daut wie Gott deemootich jehorchen, wan wie fa dee bäden, “dee dän selwjen Gloowen jekjräajen haben aus wie” (2. Pet. 1:1). Epafras deed daut. De Schreft rät bloos dreemol von dän un bloos en Paulus siene Breew. Aus Paulus en Room faust wia, schreef hee no de Christen en Kolossä: “En siene Jebäda kjamft . . . [Epafras] emma wada fa junt” (Kol. 4:12). Epafras kjand de Breeda goot  un hee wia sea om dee bekjemmat. Hee wia met Paulus toop faustjenomen, oba hee docht doawäajen aun daut, waut aundre em jeisteljen fäld (Filem. 23). Un hee deed dan uk waut fa dee. Es daut nich een Bewies, daut hee om aundre bedocht wia? Fa onse Gloowesbreeda bäden kaun väl bewirkjen, besonda wan wie dee en onse Jebäda biem Nomen nanen ooda krakjt fa dee äare Omstend bäden (2. Kor. 1:11; Jak. 5:16).

13. Woo kjenn wie Epafras nodoonen, wan wie bäden?

¹³ Wäm wudd wie en onse Jebäda kjennen biem Nomen nanen? Krakjt soo aus Epafras bäden väle fa dee von äare Vesaumlunk un fa Famieljes, waut en eene schwoare Loag sent, waut waut wichtjet entscheiden motten ooda Vesieekjungen derchgonen. Väle bäden uk fa de Breeda, wua de Artikjel opp jw.org von rät “Zeugen Jehovas, die gegenwärtig wegen ihres Glaubens im Gefängnis sind”. (Sieekj en PRESSE > RECHTLICHE ENTWICKLUNGEN.) Wie kjennen uk fa soone bäden, wua wäa jestorwen es ooda waut korz een grootet Owwada ooda eenen Kjrich beläft haben ooda fa soone, waut daut knaup jeit. Doa sent väl Breeda un Sestren, waut daut aun onse Jebäda fält. Wan wie fa dee bäden, dan wies wie, daut wie nich bloos no daut kjikjen, waut ons selfst intressieet, oba uk no aundre (Filip. 2:4). Jehova horcht no soone Jebäda.

14. Wuarom es Jehova daut baste Biespel, wan daut om toohorchen jeit?

¹⁴ Wie wiesen uk, daut wie deemootich sent, wan wie aundre goot toohorchen. Jakobus 1:19 sajcht: “Siet schwind bie de Sach toom horchen”. Jehova es ons bastet Biespel doafäa (1. Mo. 18:32; Jos. 10:14). Well wie mol seenen, waut wie von de Unjahoolunk en 2. Mose 32:11-14 lieren kjennen (läs). Jehova fäld daut nich aun Moses sienen Rot, oba hee horcht dän doawäajen too. Wudd wie jeduldich wäm toohorchen, waut ea aul em orrajchten wia, un dan daut doonen, waut dee säd? Jehova deit daut. Hee horcht jeduldich no aul dee äare Jebäda, waut Gloowen haben.

15. Woo kjenn wie aundre ieren, soo aus Jehova daut deit?

¹⁵ Jieda eena von ons wudd sellen nodenkjen: “Wan Jehova soo deemootich es un aundre toohorcht, soo aus hee daut bie Abraham, Rahel, Moses, Josua, Manoach, Elia un Hiskia deed, wudd ekj daut dan nich uk sellen? Kaun ekj miene Breeda noch dolla doaderch ieren, daut ekj mie dee äare Iedeeen aunhorch un mie uk doano recht, wan daut waut goodet es? Es doa en miene Vesaumlunk ooda Famielje wäa, om wäm ekj mie kjemren sull? Waut kunn ekj fa dän doonen? Un woo kunn ekj daut doonen?” (1. Mo. 30:6; Rech. 13:9; 1. Kjen. 17:22; 2. Chr. 30:20).

16. Waut deed de Kjennich David, aus Schimi dän toosad?

¹⁶ Deemoot halpt ons uk, daut wie ons beharschen kjennen, wan se ons schlajcht behaundlen (Efs. 4:2). Een goodet Biespel doafäa finj wie en 2. Samuel 16:5-13 (läs). Schimi, waut von Kjennich Saul sien Frintschoft wia, deed David un siene Deena beleidjen un toosaten. David leet sikj daut jefaulen, wan hee doa uk goot haud kunt een Enj met moaken. Waut holp dän, sikj to beharschen? Daut kjenn wie en Psalm 3 seenen.

17. (a) Waut holp David ruich to bliewen? (b) Woo kjenn wie David nodoonen?

 ¹⁷ David schreef Psalm 3, aus sien Sän Absalom am dootmoaken wull. Krakjt to dee Tiet sad Schimi dän uk too. Woo kunn David en dise schwoare Tiet ruich bliewen? En Psalm 3:5 sajcht David: “Ekj schrie dän HARN lud aun un hee auntwuat mie von sienem heiljen Boajch.” Wie kjennen uk bäden, wan ons wäa schlajcht behaundelt. Dan woat Jehova ons sienen heiljen Jeist jäwen, waut ons halpt, daut uttohoolen. Wudd wie ons noch kjennen doarenn vebätren, ons dolla to beharschen ooda leichta to vejäwen, wan ons mol wäa toosad? Velot wie ons doaropp, daut Jehova sitt, waut wie derchmoaken, un daut hee ons halpt un säajent?

18. Woo woat ons daut togood komen, wan wie daut nokomen, waut Jehova ons lieet?

¹⁸ Wan wie weeten, waut rajcht es, un daut dan uk doonen, dan sent wie weis un woaren sea jesäajent. Doawäajen sajcht Spricha 4:7: “Weisheit es äwa aules”. Toom Weisheit kjrieen mott eena Erkjantnis haben. Oba onse Weisheit wiest sikj nich bloos doaraun, woo väl wie vestonen kjennen, oba uk doaraun, woo wie entscheiden un waut wie doonen. Mau rajcht de Eemskje haben Weisheit jekjräajen. Daut es doaraun to seenen, daut dee sikj em Somma äa Äten toopschaufen (Spr. 30:24-25, NW). Christus es “Gott siene Weisheit” un deit emma daut, waut dän Voda jefelt (1. Kor. 1:24; Joh. 8:29). Gott woat ons beloonen, wan wie uk deemootich bliewen un doaderch Weisheit wiesen, daut wie lieren, waut rajcht es, un daut uk doonen (läs Matäus 7:21-23). Well wie wieda doaropp schaufen, daut de Vesaumlunk eene Städ es, wua wie aula Jehova deemootich deenen kjennen. Daut brukt Tiet un Jedult to lieren, waut rajcht es, un daut notokomen. Oba wan wie daut doonen, bewies wie Deemoot un daut woat ons nu un uk fa emma schaftich moaken.