OPPE gaunze Welt räakjnen Eltestasch de Oppgowen sea väl, waut see en Gott sien Volkj haben. Soone Breeda sent fa ons aula een Säajen! Oba nich lang trigj jeef daut eene Endrunk. Elre Eltestasch wort jesajcht, daut von nu aun jinjre Eltestasch eenje von äare schwandre Oppgowen doonen sullen. Waut krakjt wort doa jeendat?

Nu es daut soo, daut Breeda, waut 70 Joa sent, nich mea Kjreisoppsechta ooda Liera von jewesse Bibelschoolen sent. Un Eltestasch, waut aul 80 Joa sent, äwajäwen eenje von äare Oppgowen aun jinjre Eltestasch. Biejlikj sent dee nich mea Leida von daut Betelkommitee uk nich Leida von de Eltestasch en de Vesaumlunk. Woo jinjen onse leewe elre Breeda met dise Endrungen om? See deeden Jehova un siene Organisazion tru unjastetten.

Ken wia meist 49 Joa de Leida von een Betelkommitee. Hee sajcht: “Ekj wia gaunz met dise Endrunk envestonen. Krakjt dän Zemorjes aus ekj doavon hieed, haud ekj jebät un Jehova jesajcht, daut ons fa daut Betelkommitee een jinjra Leida fäld.” Een deel true elre Breeda oppe gaunze Welt jinkj daut biejlikj soo aus Ken. Oba wäajen dee daut soo jleichten, waut fa äare Breeda to doonen, wieren eenje  uk een beskje truarich, aus see von de Endrunk hieeden.

Esperandio wia en siene Vesaumlunk de Leida von de Eltestasch. Hee sajcht: “Ekj wia een bät truarich, aus ekj daut enwort.” Oba hee säd uk: “Ekj sie nich mea soo goot auf un doawäajen bruck ekj mea Tiet, mie om de Jesuntheit to kjemren.” Esperandio deent Jehova noch emma tru un deit wieda väl goodet fa siene Vesaumlunk.

Woo jinkj de Breeda daut, waut lang reisende Oppsechta wieren un dan eene aundre Oppgow kjrieejen? Allan wia 38 Joa reisenda Oppsechta. Hee sajcht: “Ekj kunn daut meist nich foten, aus ekj daut enwort.” Oba am es uk kloa, woo wichtich daut es, jinjre Mana fa soone Oppgowen entolieren, un hee deent Jehova wieda tru.

Russell wia 40 Joa reisenda Oppsechta un Liera fa jewesse Bibelschoolen. Hee vetald, daut hee un siene Fru truarich wieren, aus see von de Endrunk hieeden. Hee säd: “Wie jleichten onse Oppgowen sea un dochten, wie hauden de Krauft, dee wieda to doonen.” Daut, waut Russell un siene Fru derch äare Oppgowen un äaren Deenst jelieet haben, kjemt äare Vesaumlunk nu togood, un de Breeda doa freit daut sea, daut see met an toopschaufen kjennen.

Veleicht hab wie ons noch kjeenmol soo jefeelt aus de Breeda, wua wie aul von räden. Oba eene Jeschicht von 2. Samuel kaun ons halpen, dee bäta to vestonen.

Aus Absalom sikj jäajen sienen Voda Kjennich David stald, must David von Jerusalem no Mahanajim flichten, waut oosten vom Jordan-Riefa wia. Doa hauden David un siene Mana nich aules, waut see toom läwen brukten. Weetst du, waut dan wort?

Dree Mana von doa holpen an un brochten an Baden, veschiednet Ätwoa un waut see sest noch brukten. Eent von dee Mana wia Barsillai (2. Sam. 17:27-29). Aus Absalom daut nich jlekjt, Kjennich to woaren, kunn David wada trigj no Jerusalem reisen un Barsillai kjeem met am batem Jordan-Riefa met. David wull haben, daut dee sull met no Jerusalem komen. Hee boot am aun, hee wudd fa am sorjen, wan Barsillai uk “sea goot auf” wia un am daut goanich aun daut Äten vom Kjennich fäld (2. Sam. 19:32-34). David deed daut secha, wäajen hee sach, daut Barsillai goode Ieejenschoften haud un am mol wudd gooden Rot jäwen kjennen. Un fa Barsillai wudd daut secha uk sennen eene Iea jewast, bie dän Kjennichshoff to wonen un to schaufen.

Oba Barsillai wia uk bescheiden un sach siene Loag en. Doawäajen räd hee doavon, daut hee aul 80 Joa wia, un säd noch: “Kaun etj Goodet en Schlajchtet unjascheede?” (2. Sam. 19:36, Friesenbibel). Waut meend hee doamet? Wäajen Barsillai aul ella wia, haud dee secha väl Weisheit un wudd dän Kjennich haben kunt gooden Rot jäwen, soo  aus “de oole Mana” daut lota bie dän Kjennich Rehabeam deeden (1. Kjen. 12:6-7; Psa. 92:13-15; Spr. 16:31). Aus Barsillai doavon räd, daut hee nich goodet un schlajchtet unjascheeden kunn, meend hee woomäajlich, daut hee nich mea soo jesunt wia ooda nich mea soo väl doonen kunn. Hee säd je, daut hee wäajen sien Ella aul nich mea soo goot schmakjen un hieren kunn (Liera 12:4-5). Daut es, wuarom Barsillai haben wull, daut David dän jinjren Kimham met no Jerusalem nämen sull, waut woomäajlich Barsillai sien Sän wia (2. Sam. 19:37-41).

Wäajen biejlikj soowaut, waut Barsillai säd, haben se uk de Endrungen jemoakt, wua dis Artikjel von rät. Oba en onse Tiet musten se nich bloos aun de Omstend von eene elre Persoon denkjen, soo aus bie Barsillai. De Breeda musten goot äwalajen, waut daut baste wia fa de true elre Eltestasch oppe gaunze Welt.

Dise bescheidne elre Breeda kunnen vestonen, daut Jehova siene Organisazion wudd jestoakjt woaren toom wieda waussen, wan jinjre Breeda de Oppgowen äwaneemen, waut see lang jedonen hauden. Mieeschtens wieren daut dise elre Breeda, waut de Jinjre utjelieet hauden, krakjt soo aus Barsillai daut woomäajlich bie sienen Sän deed un de Apostel Paulus bie Timotäus (1. Kor. 4:17; Filip. 2:20-22). Un de jinjre Breeda haben bewäsen, daut see “Gowen” sent un methalpen kjennen, daut “Christus sien Kjarpa . . . jebut woat” (Efs. 4:8-12; see uk 4. Mose 11:16-17, 29).

Mank Gott siene Deena oppe gaunze Welt sent väle, waut jewesse Oppgowen aun aundre wiedajejäft haben, un nu haben dee aundre ooda jratre Mäajlichkjeiten, en Jehova sien Woakj mettohalpen.

Marco, waut 19 Joa reisenda Oppsechta wia, sajcht: “Nu kaun ekj mie om de Mana von de Sestren en onse Vesaumlunk kjemren, waut noch nich enne Woarheit sent.”

Geraldo, waut 28 Joa reisenda Oppsechta wia, sajcht: “Nu hab wie ons väajenomen deejanje, waut nich mea prädjen ooda waut nich mea no de Toopkomes wanken, to halpen un mea Bibelstudiums to fieren.” Hee un siene Fru haben nu 15 Bibelstudiums un nu komen uk een deel wada no de Vesaumlunk, waut ea aul nich deeden.

Allan, von dän wie aul ea räden, sajcht: “Nu hab wie de Mäajlichkjeit, ons gaunz fa daut Prädichtwoakj entosaten. Wie doonen effentlich un bie de Jeschafta prädjen un jäwen uk onse Nobasch Zeichnis. Twee von dee sent aul no de Vesaumlunk jekomen.”

Wan du een erfoarna un trua Brooda best un eene niee Oppgow jekjräajen hast, dan kaust du en Gott sien Volkj opp eene besondre Wajch methalpen. Wäajen du soo väl Erfoarunk hast, kaust du de jinjre Mana en de Vesaumlunk biestonen un opp dee Wajch Jehova sien Woakj unjastetten. Russell, von dän wie aul ea räden, sajcht: “Jehova lieet feine junge Breeda ut, waut hee en sien Woakj goot brucken kaun. Daut kjemt aulem togood, daut dee aundre met soo väl Iewa lieren un sikj om Gott siene Schop kjemren.” (See dän Kausten “ Halpt jinjre Mana verauntokomen”.)

Wan du korz eene fresche Oppgow jekjräajen hast, dan bliew mootich. Diene flietje Oabeit es aul väl Menschen togood jekomen, un soo kaun daut uk wieda sennen. De Breeda haben die ea väl jeräakjent, un daut woaren dee uk fa wieda.

Waut noch wichtja es: Jehova woat nienich vejäten, woo tru du wieescht. Hee woat nich “june Woakjen un june Leew vejäten . . ., dee jie en sienen Nomen beweesen aus jie de heilje deenden un noch deenen” (Heb. 6:10). Dis Bibelvarsch rät nich bloos von daut, waut du ea jedonen hast, oba uk von daut, waut du noch emma fa am deist. Dee wiest die, daut du Jehova  soo väl wieet best, daut hee daut kjeenmol vejäten woat.

Veleicht hab wie nich eene aundre Oppgow jekjräajen, soo aus de Breeda, wua wie aul von räden. Oba dise Endrunk kaun ons doawäajen togood komen. Wuarom?

Wan wie eenen truen elren Brooda kjanen, waut eene aundre Oppgow jekjräajen haft, dan wudd wie kjennen väl von dän lieren, wäajen dee väl Erfoarunk un eenen stoakjen Gloowen haft. Froag dän no Rot un woo hee eenjet doonen wudd. Un kjikj uk, woo hee siene niee Oppgow tru nokjemt un doabie daut brukt, waut hee ea jelieet haft.

Best du aul ella un hast eene aundre Oppgow jekjräajen? Ooda best du een Brooda ooda eene Sesta, waut von soone lieren kaun? Dan hool em Denkj, daut Jehova deejanje sea väl räakjent, waut am aul lang tru jedeent haben un daut uk wieda doonen.