1. Waut beläwd de Apostel Johanes rom daut Joa 95 n. Chr.?

ROM daut Joa 95 n. Chr. muak de Apostel Johanes eene schwoare Tiet derch. Hee wia aul ella un wia faust opp de Insel Patmos un woomäajlich wieren de aundre Apostel aul aula jestorwen (Opb. 1:9). Hee wist, daut doa Jäajna wieren, waut de Vesaumlungen veleiden deeden un Spoolungen veuasoakten. Veleicht leet daut soo, daut et boolt kjeene woare Christen mea jäwen wudd (Jud. 4; Opb. 2:15, 20; 3:1, 17).

2. Waut fa eene besondre profeetische Vision sach Johanes, soo aus Openboarunk 7:9-14 sajcht? (See daut Bilt oppe väaschte Sied.)

² En dise schwoare Tiet sach Johanes eene besondre profeetische Vision. Doa säd een Enjel to vea aundre Enjel, see sullen dän Wint von de groote Triebsaul trigjhoolen, bat se eene Grupp von Gott siene Deena toom latste Mol tieekjnen wudden (Opb. 7:1-3). Dise Grupp sent de 144 000, waut met Jesus toop em Himmel rejieren woaren (Luk. 12:32; Opb. 7:4). Dan sach Johanes noch eene aundre Grupp, waut soo groot wia, daut hee säd: “Aus dit äwa wia, sach ekj von aule Raussen, Volkjsstam, Sproaken un Menschen, eene Häad, dee kjeena talen kunn, ver dän Troon bie daut Laum . . . stonen” (läs Openboarunk 7:9-14). Secha freid Johanes sikj sea, aus hee enwort, daut et lota noch mol wudd sea väl Menschen jäwen, waut Gott rajcht deenen wudden.

3. (a) Wuarom saul Johanes siene Vision ons em Gloowen stoakjen? (b) Waut woa wie en disen Artikjel seenen?

³ Onen Twiewel stoakjt dise Vision Johanes sienen Gloowen. Un dee saul onsen Gloowen noch väl dolla stoakjen, wiels wie en de Tiet läwen, wua dee sikj erfelt. Bat nu sent  aul millionende Menschen toopjebrocht worden, waut hopen, no de groote Triebsaul fa emma oppe Ieed to läwen. En disen Artikjel woa wie seenen, woo Jehova äwa 80 Joa trigj siene Deena wees, wäa to de groote Häad jehieren wudd. Un dan woa wie noch tweeatlei von dise Grupp seenen: 1. Woo groot dee es, un 2. daut dee von aulawäajen oppe Ieed kjemt. Daut woat aul dee em Gloowen stoakjen, waut to dise besondre Grupp jehieren wellen.

4. (a) Waut fa eene biblische Lia vestonen de mieeschte christelje Kjoakjen nich? (b) Waut kunnen de Bibelforscha vestonen?

⁴ De Schreft lieet, daut de Menschen, waut Gott jehorchen, noch mol fa emma oppe Ieed läwen woaren, oba de mieeschte christelje Kjoakjen lieren waut aundret (2. Kor. 4:3-4). Dee sajen, daut aule goode Menschen nom Himmel komen, wan dee stoawen. Oba de kjliene Grupp Bibelforscha, waut von 1879 aun dän Woaktorm rutjeewen, säden daut nich. Dee vestunden, daut Gott wada een Paradies oppe Ieed moaken wudd un daut millionende jehuarsome Menschen wudden hia oppe Ieed läwen un nich em Himmel. Oba daut dieed een Stoot, bat dee daut kloa hauden, wäa dise jehuarsome Menschen krakjt sennen wudden (Mat. 6:10).

5. Waut kunnen de Bibelforscha von de 144 000 vestonen?

⁵ De Bibelforscha kunnen daut vestonen, daut de Schreft lieed, daut eenje “von de Ieed loosjekoft wieren” toom met Jesus toop em Himmel rejieren (Opb. 14:3). To dise Grupp wudden 144 000 flietje Christen jehieren, waut sikj Gott hanjejäft hauden un am hia oppe Ieed tru jedeent hauden. Oba waut dochten de Bibelforscha von de groote Häad?

6. Waut dochten de Bibelforscha von de groote Häad?

⁶ En siene Vision sach Johanes, daut dise Grupp “ver dän Troon bie daut Laum” stunt (Opb. 7:9). Doawäajen dochten de Bibelforscha, daut de groote Häad em Himmel komen wudd, soo aus de 144 000. Waut wudd dan de Unjascheet sennen tweschen de 144 000 un de groote Häad? De Bibelforscha dochten, daut soone Christen to de groote Häad jehieren wudden, waut Gott oppe Ieed nich en aules jehuarsom wieren. Veleicht wieren daut soone, waut een goodet Läwen fieeden, oba waut äare oole Kjoakj nich veloten hauden. De Bibelforscha hauden daut soo tohoolen, daut deejanje Gott leewden, oba nich soo sea, daut see met Jesus toop rejieren kunnen. Un wäajen äare Leew fa Gott nich groot jenuach wia, kunnen see em Himmel bloos ver däm Troon stonen, oba nich opp eenen Troon setten.

7. (a) Waut dochten de Bibelforscha, wäa en de Tiet von daut dusentjoasche Rikj oppe Ieed läwen wudd? (b) Waut dochten de Bibelforscha von de true Menschen ut de Bibeltiet?

⁷ Wäa wudd dan oppe Ieed läwen? De Bibelforscha dochten, daut de 144 000 un uk de groote Häad nom Himmel komen wudden, un no daut wudd Christus sien dusentjoaschet Rikj väl goodet brinjen un millionende Menschen oppe Ieed wudden daut beläwen kjennen. De Bibelforscha dochten, daut dise Menschen Jehova nich wudden jedeent haben, ea Christus sien dusentjoaschet Rikj aunfangen wudd. Dee jleewden, daut dee Jehova en de dusent Joa kjanen lieren wudden. Deejanje, waut Jehova jehorchen wudden, wudden dan eewich oppe Ieed läwen un deejanje, waut sikj jäajen am stalden, wudden venicht woaren. De Bibelforscha dochten uk, daut woomäajlich eenje, waut en de dusent Joa  oppe Ieed aus “Prinsen” aunjestalt sennen wudden, no daut noch opp irjenteene Wajch eewjet Läwen em Himmel kjrieen wudden, biejlikj de true Menschen ut de Bibeltiet, waut ver Christus jestorwen wieren (Psa. 45:17).

8. Waut dochten de Bibelforscha, en woone Gruppen Gott de Menschen endeelen wudd?

⁸ De Bibelforscha dochten, daut et dree Gruppen jeef: 1. de 144 000, waut met Jesus toop wudden em Himmel rejieren, un 2. de groote Häad Christen, waut nich soo flietich wieren un em Himmel ver dän Troon bie daut Laum stonen wudden, un 3. millionende Menschen, waut Jehova en de Tiet von Christus sien dusentjoaschet Rikj kjanen lieren wudden. * Oba lota leet Jehova daut Licht von de Woarheit emma dacha woaren (Spr. 4:18).

9. (a) Woo kaun de groote Häad hia oppe Ieed “ver dän Troon bie daut Laum” stonen? (b) Wuarom stemt daut met de Schreft toop, woo wie Openboarunk 7:9 vestonen kjennen?

⁹ Aune 1935 kunnen Jehova siene Zeijen daut kloa vestonen, wäa de groote Häad von Johanes siene Vision wia. Dee worden en, daut de groote Häad nich opp iernst em Himmel sennen mott toom “ver dän Troon bie daut Laum” stonen. Daut dee “ver dän Troon” stonen, es een Bilt doafäa, daut dee Jehova aus hechsten Harscha unjadon sent un jehorchen, wan dee uk oppe Ieed läwen (Jes. 66:1). Un daut dee “bie daut Laum” stonen, bediet, daut dee aun Jesus sien Opfa jleewen. En Matäus 25:31-32 sajcht et je uk, daut “aule Velkja” – mau rajcht de schlajchte – ver Jesus sienen harlichen Troon “toopkomen [woaren]”. Daut es kloa, daut aul dise Velkja nich em Himmel sent, oba oppe Ieed. Soo aus wie daut nu vestonen kjennen, stemt daut fein met de Schreft toop, wiels doa sajcht et nich, daut de groote Häad em Himmel komen woat. De Schreft rät mau von eene Grupp, waut eewjet Läwen em Himmel kjrieen woat. Daut sent de 144 000, waut met Jesus toop “aus Kjennichs äwa de Ieed rejieren” woaren (Opb. 5:10, NW).

10. Wuarom mott de groote Häad Jehova kjanen lieren un am deenen, ea daut dusentjoasche Rikj aunfangt?

¹⁰ Von 1935 aun kunnen Jehova siene Zeijen daut vestonen, daut de groote Häad von Johanes siene Vision eene Grupp true Christen wieren, waut de Hopninj hauden, fa emma oppe Ieed to läwen. Daut dee de groote Triebsaul äwaläwen kjennen, motten dee Jehova kjanen lieren un am deenen, ea daut dusentjoasche Rikj aunfangt, wiels dee brucken je eenen stoakjen Gloowen toom aules utem Wajch komen, “waut doa passieren saul”, ea Christus fa dusent Joa rejieren woat (Luk. 21:34-36).

11. Wuarom dochten eenje Bibelforscha woomäajlich, daut eenje no de dusent Joa wudden em Himmel komen?

¹¹ Wuarom dochten de Bibelforscha ieeschtemma, daut eenje true Menschen, waut oppe Ieed läwden, no de dusent Joa em Himmel komen wudden? De Wacht-Turm von Mei 1913 jeef daut auntovestonen. Veleicht dochten eenje soo: “Wuarom sullen de true Menschen ut de Bibeltiet bloos met eewjet Läwen oppe Ieed beloont woaren, oba Christen, waut woomäajlich nich soo flietich wieren, sullen em Himmel komen?” Dee dochten daut, wiels dee tweeatlei nich rajcht vestunden: Ieeschtens jleewden dee, daut de  groote Häad em Himmel komen wudd, un tweedens, daut daut Christen wieren, waut nich soo tru wieren aus de aundre.

12-13. Waut weeten de Jesaulwde un de groote Häad von äare Beloonunk?

¹² Oba soo aus wie aul jeseenen haben, kjennen Jehova siene Zeijen daut von 1935 aun vestonen, daut de groote Häad von Johanes siene Vision deejanje sent, waut Harmagedon äwaläwen woaren. Dee woaren hia oppe Ieed ut de “groote Triebsaul” komen un “met lude Stemm [schrieen]: Onse Radunk kjemt von onsen Gott, dee opp däm Troon sett, un von daut Laum!” (Opb. 7:10; 7:14, Reimerbibel). Un de Schreft lieet uk, daut deejanje, waut vom Doot oppjewakjt woaren toom eewich em Himmel läwen, “waut bätret” kjrieen woaren aus de true Menschen ut de Bibeltiet (Heb. 11:40). Aus onse Breeda daut ieescht vestonen kunnen, fungen see flietich aun doavon to prädjen, daut de Menschen, waut Jehova deenen wudden, noch mol fa emma oppe Ieed läwen kunnen.

¹³ Deejanje, waut to de groote Häad jehieren, freien sikj to de Hopninj, waut see haben. Dee weeten, daut Jehova daut entscheiden deit, wäa von siene true Deena am noch mol woat em Himmel deenen un wäa oppe Ieed. De Jesaulwde un uk de groote Häad weeten, daut see sikj äare Beloonunk nich selfst vedeenen kjennen. See woaren dee bloos kjrieen, wiels Jehova derch Jesus Christus fa daut Leesjelt jesorcht haft (Reem. 3:24).

14. Wuarom wundaden ieeschtemma väle, woo de Profezeiunk von de groote Häad sikj erfellen wudd?

¹⁴ Von 1935 aun kunnen Jehova siene Deena daut bäta vestonen, woo daut met de groote Häad stunt. Oba väle wundaden doawäajen noch, woo daut von deejanje, waut de Hopninj hauden, fa emma oppe Ieed to läwen, noch mol eene groote Häad jäwen sull. Ronald Parkin biejlikj wia 12 Joa, aus daut utjelajcht wort, waut de groote Häad wia. Hee sajcht: “To jane Tiet jeef et oppe gaunze Welt ojjefäa 56 000 Vekjindja un väle ooda de mieeschte von dee wieren Jesaulwde. Daut sach doa nich no, daut de groote Häad sea groot wia.”

15. Woo neem de groote Häad too?

¹⁵ Lota worden dan väl Missionoaren no veschiedne Lenda jeschekjt un daut jeef emma mea von Jehova siene Zeijen. Un von 1968 aun brukten Jehova siene Zeijen daut Buak Die Wahrheit, die zu ewigem Leben führt, om met aundre de Bibel to studieren. Dit Buak läd  de biblische Woarheit soo eefach ut, daut mea Menschen Jehova kjanen lieeden aus jeemols ea. Benna vea Joa leeten sikj äwa eene haulwe Million deepen. Un doa leeten sikj noch millionende mea deepen, aus de katoolsche Kjoakj en Latien-Amerika un en aundre Lenda nich mea soo stoakj wia un ons Woakj en Oost-Europa un uk en veschiedne Lenda en Afrika frie wort (Jes. 60:22). Lota jeef Jehova siene Organisazion dan noch een deel feine Bieekja rut un uk aundret, waut de Menschen holp to vestonen, waut de Schreft lieed. Nu es daut gaunz dietlich, daut doa eene groote Häad toopjebrocht woat, wua aul äwa acht Millionen bie sent.

16. Von wua kjemt de groote Häad?

¹⁶ Aus Johanes siene Vision oppschreef, säd hee, daut de groote Häad “von aule Raussen, Volkjsstam, Sproaken un Menschen” kjeem. Un de Profeet Sacharja haud aul ea biejlikj soowaut verutjesajcht. Hee schreef: “En dee Tiet woaren tieen Menschen von veschiedne Velkja sikj aun jieda Jud aunhenjen un sajen: Wie wellen met junt gonen. Wie haben jehieet, daut Gott met junt es!” (Sach. 8:23).

17. Waut woat doa jedonen, om Menschen von aule Velkja un Sproaken to halpen?

¹⁷ Jehova siene Zeijen weeten, daut de  goode Norecht opp een deel Sproaken jeprädicht mott toom Menschen von aule Velkja toopbrinjen. Wie äwasaten aul äwa 130 Joa biblische Bieekja, oba noch kjeenmol ea soo väl aus nu un opp hundade Sproaken. Daut es gaunz dietlich to seenen, daut Jehova doano sitt, daut eene groote Häad von aule Velkja toopjebrocht woat. Un dee kjennen Jehova en Eenichkjeit deenen, wäajen daut opp emma mea Sproaken jeisteljet Äten jeft. Jehova siene Zeijen sent doafäa bekaunt, daut dee flietich prädjen un opp iernst Leew unjarenaunda haben. Stoakjt ons daut nich em Gloowen, soont to seenen? (Mat. 24:14; Joh. 13:35).

18. (a) Wuarom äwarauscht ons daut nich, daut Jehova de Profezeiunk von de groote Häad erfelt haft, wan wie aun Jesaja 46:10-11 denkjen? (b) Wuarom feelen deejanje sikj nich tosied jeschowen, waut hopen, eewich oppe Ieed to läwen?

¹⁸ Hab wie nich goode Uasoak, ons äwa de Profezeiunk von de groote Häad to freien? Daut äwarauscht ons nich, daut Jehova dee opp soone besondre Wajch erfelt haft (läs Jesaja 46:10-11). Deejanje, waut to de groote Häad jehieren, sent dankboa fa de Hopninj, waut Jehova dee jeft. Dee feelen sikj nich tosied jeschowen, wan dee uk nich met Gott sienen Jeist jesaulft sent toom met Jesus toop em Himmel sennen. De Schreft rät von een deel true Mana un Frues, waut derch dän heiljen Jeist jeleit worden, oba waut nich to de 144 000 jehieeden. Mank dee sent biejlikj Johanes de Deepa un David (Mat. 11:11; Apj. 2:34). Dee un noch väl aundre woaren vom Doot oppstonen un dan em Paradies oppe Ieed läwen. Dee aula woaren dan met de groote Häad toop bewiesen kjennen, daut see Jehova aus äaren Harscha tru jehorchen.

19. Waut woa wie doonen, wan wie daut vestonen, waut Johanes siene Vision von de groote Häad bediet?

¹⁹ Noch kjeenmol ea haft Gott millionende Menschen von aule Velkja toopjebrocht, daut dee am toop deenen. Wie motten soo väl Menschen aus mäajlich halpen, daut dee uk to de groote Häad “aundre Schop” jehieren kjennen, endoont aus wie de Hopninj haben, eewich em Himmel ooda oppe Ieed to läwen (Joh. 10:16). Boolt woat Jehova doano seenen, daut de groote Triebsaul kjemt, waut verutjesajcht es un wua aule Rejierungen un Gloowes venicht woaren, waut de Menschen toojesat haben. Dan woaren aul deejanje, waut to de groote Häad jehieren, waut besondret beläwen kjennen: Dee woaren Jehova kjennen fa emma oppe Ieed deenen! (Opb. 7:14).