37. ARTIKJEL FA DAUT STUDIUM
Jehova wellich unjadon sennen
“Woo väl mea sull wie ons dan däm himlischen Voda unjaordnen”! (HEB. 12:9)
LEET 9 Jehova es ons Kjennich!
WAUT WIE SEENEN WOAREN *
1. Wuarom sell wie Jehova unjadon sennen?
WIE sellen Jehova unjadon sennen, * wäajen hee ons jemoakt haft. Doawäajen haft hee daut Rajcht ons to sajen, waut wie doonen sellen (Opb. 4:11). Oba doa es noch eene goode Uasoak, wuarom wie am jehorchen sellen: Hee es de basta Harscha, waut et jeft. Een deel Menschen haben äwa aundre rejieet, oba Jehova es de kjlieekjsta un leeftolichsta Harscha un sest kjeena haft soo väl Metleet un Metjefeel aus hee (2. Mo. 34:6; Reem. 16:27; 1. Joh. 4:8).
2. Wuarom sell wie no Hebräa 12:9-11 no Jehova unjadon sennen?
2 Jehova well, daut wie am jehorchen, wäajen hee ons leeftolja Voda es, un nich bloos ut Angst. Paulus wiest en sienen Breef aun de Hebräa, daut wie ons wellich “däm himlischen Voda unjaordnen” sellen, wiels hee belieet ons “to ons aulabastet” (läs Hebräa 12:9-11).
3. (a) Woo wies wie, daut wie Jehova unjadon sent? (b) Woone Froagen woa wie nu beauntwuaten?
3 Woo wies wie, daut wie Jehova unjadon sent? Wan wie ons bastet doonen, om am en aules jehuarsom to sennen, un ons nich opp ons ieejnet Vestaunt veloten, wan ons daut uk wudd jankren (Spr. 3:5). Je mea wie äwa Jehova siene goode Ieejenschoften lieren, je leichta es daut fa ons, am unjadon to sennen. Wuarom? Wäajen dise Ieejenschoften bie aules to seenen sent, waut hee deit (Psa. 145:9). Je bäta wie Jehova kjanen lieren, je jrata woat onse Leew fa am woaren. Un wan wie Jehova leewen, dan fält ons goanich eene lange List met Räajlen, waut wie doonen sellen un waut nich. Wie strenjen ons dan aun, rajcht to denkjen un to feelen un daut schlajchte utem Stich to gonen (Psa. 97:10). Oba wuarom felt ons daut eenjemol schwoa, Jehova to jehorchen? Un waut kjennen Eltestasch un Elren von dän Vewaulta Nehemia un von Kjennich David un von Jesus siene Mutta Maria lieren? Daut woa wie en disen Artikjel seenen.
WUAROM DAUT SCHWOA SENNEN KAUN, JEHOVA TO JEHORCHEN
4-5. Wuarom kaun daut no Reema 7:21-23 no schwoa sennen, Jehova unjadon to sennen?
4 Een Grunt, wuarom daut schwoa sennen kaun, es, daut wie aula de Sind metjeorwen haben un onvolkomen sent. Doawäajen jankat ons daut nich emma to jehorchen. Aus Adam un Eva Gott ojjehuarsom wieren un de Frucht eeten, deeden see fa sikj selfst entscheiden, waut goot un waut schlajcht wia (1. Mo. 3:22). Un vondoag dän Dach wellen de mieeschte Menschen noch emma nuscht von Jehova weeten un wellen selfst entscheiden, waut goot un waut schlajcht es.
5 Soogoa fa deejanje, waut Jehova kjanen un leewen, es daut eenjemol schwoa, am en aules unjadon to sennen. Soo wia daut biejlikj bie dän Apostel Paulus (läs Reema 7:21-23). Krakjt soo aus Paulus well wie daut doonen, waut Jehova fa rajcht talt. Un doch mott wie emma oppaussen, daut ons daut schlajchte nich jankat.
6-7. Waut kaun ons daut noch schwoa moaken, Jehova unjadon to sennen? Jeff een Biespel.
6 Wuarom kaun daut noch schwoa sennen, Jehova to jehorchen? De Jewanheiten un daut denkjen von de Menschen rom ons kaun väl aun ons doonen. Väle denkjen gaunz aundasch aus Jehova. Doawäajen mott wie emma doaropp schaufen, daut wie nich soo denkjen aus dee. Well wie mol een Biespel seenen.
7 Opp eenje Städen wellen se de junge Menschen bat doa brinjen, daut dee bloos doano sträwen sellen, rikj to woaren. Soo wia daut bie eene Sesta, waut Mary * heet. Ea see Jehova kjanen lieed, jinkj see no eent von de baste Schoolen en äa Launt. Mary äare Famielje wull haben, daut see sikj eene Oabeit sieekjen sull, wua see huach aunjeseenen wia un dia betolt kjrieech. Mary jankad daut uk. Oba aus see dan Jehova kjanen lieed un leewd, wull see no waut aundret sträwen. Un doch sajcht see: “Eenjemol hia ekj von eene feine Oabeit, wua ekj wudd dia betolt kjrieen. Oba ekj wudd dan nich mea soo väl fa Jehova doonen kjennen. Wäajen daut, waut ekj tus jelieet hab, es mie daut noch emma schwoa, soone Oabeit auftosajen. Un ekj mott Jehova om Help prachren, daut ekj nich eene Oabeit aunnäm, waut mie von mienen Deenst auflenkjen kunn” (Mat. 6:24).
8. Waut woa wie nu seenen?
8 Daut es goot fa ons, wan wie Jehova jehorchen. Oba doa es noch waut, wuarom wie Jehova sellen unjadon sennen. Wan deejanje, waut äwa aundre aunjestalt sent, soo aus Eltestasch ooda Elren, Gott siene Aunwiesungen jehorchen, dan woat daut uk aundre toom gooden deenen. Well wie mol een poa Biespels von de Bibeltiet seenen. Dee woaren ons wiesen, woo eena met aundre soo omgonen kaun, aus Jehova daut fa rajcht talt.
WAUT ELTESTASCH VON NEHEMIA LIEREN KJENNEN
De Eltestasch halpen biem Vesaumlungshus met, krakjt soo aus Nehemia holp, Jerusalem wada opptobuen (See Varsch 9-11) *
9. Met waut fa Schwierichkjeiten must Nehemia foadich woaren?
9 Jehova jeef de Eltestasch de wichtje Oppgow, sikj om siene Deena to kjemren (1. Pet. 5:2). De Eltestasch kjennen väl doavon lieren, woo Nehemia met Jehova sien Volkj omjinkj. Aus Vewaulta von daut Launt Juda haud Nehemia väl Macht (Neh. 1:11; 2:7-8; 5:14). Met waut fa Schwierichkjeiten must hee foadich woaren? Nehemia wia enjeworden, daut de Menschen dän Tempel veorreinicht hauden un nich daut Jeboot jehorchten, em tieteljen fa de Leviten to sorjen. De Juden hilden uk nich daut Jesaz von dän Sabat un eenje hauden sikj met utlendsche Frues befriet. De Vewaulta Nehemia wudd met dise schwieeje Loag motten foadich woaren (Neh. 13:4-30).
10. Woo jinkj Nehemia met de Schwierichkjeiten om?
10 Nehemia brukt siene Macht nich, om de Menschen to bemotten, daut to doonen, waut hee fa rajcht tald. Enne Städ daut deed hee opprechtich bäden un fruach Jehova no Help un lieed de Menschen Jehova sien Jesaz (Neh. 1:4-10; 13:1-3). Hee schauft uk deemootich met de aundre Juden toop un holp an mau rajcht, de Mia von Jerusalem wada opptobuen (Neh. 4:9).
11. Woo sellen de Eltestasch met de Vesaumlunk omgonen, soo aus 1. Tessalonicha 2:7-8 sajcht?
11 De Eltestasch haben veleicht nich deeselwje Schwierichkjeiten waut Nehemia, oba dee kjennen doawäajen väl von dän lieren. Dee strenjen sikj biejlikj sea aun, om äare Breeda un Sestren to halpen. Un dee talen sikj nich fa bäta aus de aundre Breeda. Enne Städ daut gonen dee leeftolich met an om (läs 1. Tessalonicha 2:7-8). Wäajen dee deemootich sent un aundre werkjlich leewen, räden dee frintlich met dee. Andrew, waut aul lang Eltesta es, sajcht: “Ekj hab daut jemoakjt, daut de Breeda un Sestren daut to Hoaten jeit, wan eena leeftolich un frintlich es. Daut halpt dee, daut dee wellich met de Eltestasch toopschaufen.” Un Tony, waut uk aul Joaren Eltesta es, sajcht: “Ekj proow, daut notokomen, waut Filippa 2:3 sajcht, un bemieej mie emma, aundre fa hecha to talen aus mie selfst. Daut halpt mie, daut ekj mie nich soo wieetich doo.”
12. Wuarom motten de Eltestasch deemootich sennen?
12 Eltestasch motten soo deemootich sennen aus Jehova. Hee es de Hechsta äwa Himmel un Ieed un doch sticht hee rauf un “häft de oame [ooda de Jerinje] utem Stoff” (Psa. 18:35, NW; 113:6-7). Jehova kaun deejanje nich vedroagen, waut stolt un huachmootich sent (Spr. 16:5).
13. Wuarom mott een Eltesta “siene Tung . . . em Toom hoolen”?
13 Een Eltesta, waut Jehova unjadon es, mott “siene Tung . . . em Toom hoolen”. Aus wan nich, kunn hee leicht kortnatuarich met dee räden, waut am nich respakjten (Jak. 1:26; Gal. 5:14-15). Andrew, wua wie aul ea von räden, sajcht: “Eenjemol späad sikj mie daut soo, daut een Brooda ooda eene Sesta mie nich respakjten deed un dan jankad mie, dee waut hunjsch trigjtosajen. Oba ekj docht äwa de goode Biespels von de Bibeltiet no, un mie wort daut kloa, daut ekj deemootich un saunftmootich sennen mott.” Wan Eltestasch leeftolich met de Breeda un Sestren un met de aundre Eltestasch von de Vesaumlunk räden, dan bewiesen dee, daut see Jehova unjadon sent (Kol. 4:6).
WAUT EEN VODA VON DÄN KJENNICH DAVID LIEREN KAUN
14. (a) Woone Oppgow jeef Jehova dän Voda? (b) Waut velangt Jehova von Vodasch?
14 Jehova haft dän Voda aunjestalt aus Haupt von de Famielje un hee well haben, daut dee de Kjinja lieet un trajchtwiest (1. Kor. 11:3; Efs. 6:4). Oba doamet es nich jesajcht, daut de Voda aules doonen kaun, waut am jankat. Hee mott sikj ver Jehova veauntwuaten, wiels dee haft met de Famielje dän Aunfank jemoakt (Efs. 3:14-15, NW). Wan de Voda siene Macht soo brukt, aus Jehova daut fa rajcht talt, dan bewiest dee, daut dee am unjadon es. Vodasch kjennen väl lieren, wan dee von dän Kjennich David studieren.
Eenen Voda siene Jebäda sellen wiesen, woo deemootich hee es (See Varsch 15-16) *
15. Wuarom es de Kjennich David een goodet Biespel fa Vodasch?
15 David wia daut Haupt von siene Famielje un Jehova stald am uk äwa daut gaunze Volkj Israel aun. Aus Kjennich haud hee väl Macht. Eenjemol brukt hee dee orrajcht un muak groote Fäla (2. Sam. 11:14-15). Oba hee wia Jehova unjadon un leet sikj trajchtwiesen. Hee bäd un schedd sikj bie Jehova ut. Un hee deed sien bastet, om Jehova sienen Rot notokomen (Psa. 51:3-6). Hee wia uk deemootich un neem gooden Rot aun, endoont aus dee von Mana ooda von Frues kjeem (1. Sam. 19:11-12; 25:32-33). David lieed ut siene Fäla un hee wia daut ieeschte doarom bedocht, Jehova to deenen.
16. Waut kjennen Vodasch von David lieren?
16 Waut kaust du von dän Kjennich David lieren, wan du een Voda best? Bruck de Macht rajcht, waut Jehova die jeft. Sto diene Fäla too un nemm daut aun, wan aundre die biblischen Rot jäwen. Dan woat diene Famielje die respakjten, wäajen du deemootich best. Bäd von Hoaten met diene Famielje toop, daut dee hieren, daut du die west von Jehova halpen un leiden loten. Un daut wichtichste es, daut Jehova deenen en dien Läwen daut ieeschte kjemt (5. Mo. 6:6-9). Eent von daut baste, waut du fa diene Famielje doonen kaust, es, daut du dee een goodet Biespel jefst.
WAUT EENE MUTTA VON MARIA LIEREN KAUN
17. Waut vonne Oppgow haft Jehova de Mutta jejäft?
17 Jehova haft de Mutta eene wichtje Oppgow en de Famielje jejäft un dee uk äwa de Kjinja aunjestalt (Spr. 6:20). Waut de Mutta sajcht un deit, kaun de Kjinja äa Läwen lank toom gooden ooda toom schlajchten sennen (Spr. 22:6). Well wie mol seenen, waut eene Mutta von Jesus siene Mame Maria lieren kaun.
18-19. Waut kaun eene Mutta von Maria äa Biespel lieren?
18 Maria kjand de Schreft sea goot. See haud grooten Respakjt fa Jehova un räakjend am väl. See wia reed, daut to doonen, waut Jehova haben wull, wan daut uk gaunz aundasch utkjeem, aus waut see jedocht haud (Luk. 1:35-38, 46-55).
Wan eene Mutta meed ooda mootloos es, dan mott see sikj noch dolla aunstrenjen, äare Famielje Leew to wiesen (See Varsch 19) *
19 Woo kaust du Maria nodoonen, wan du eene Mutta best? Doo fa die selfst studieren un bäden, daut du Frint met Jehova blifst. Sie uk reed, die en jewesse Stekjen to endren, om Jehova to jefaulen. Veleicht best du en eene Famielje oppjewossen, wua de Elren leicht doll worden un hunjsch to de Kjinja räden. Un doawäajen späat sikj die daut veleicht soo, daut daut soo mott. Nu hast du jelieet, waut Jehova fa rajcht talt, oba woomäajlich felt die daut noch emma schwoa, ruich to bliewen un met de Kjinja jeduldich to sennen, besonda wan du meed best un dee sikj nich fein oppstalen (Efs. 4:31). Dan es daut besonda needich, daut du Jehova no Help frajchst. Eene Mutta, waut Lydia heet, sajcht: “Eenjemol must ekj aul sea bäden, daut ekj nich hunjsch to onsen Sän räd, wan dee ojjehuarsom wia. Ekj hieed mau rajcht medden em räden opp un bäd Jehova opp stelles om Help. Daut bäden halpt mie, ruich to bliewen” (Psa. 37:5).
20. (a) Waut kaun fa eene Mutta eenjemol schwoa sennen? (b) Waut kaun eene Mutta doamet doonen?
20 Daut kaun fa eene Mutta uk schwoa sennen, de Kjinja Leew to wiesen (Tit. 2:3-4). Eenje Frues sent en Famieljes oppjewossen, wua de Elren nich sea leeftolich met de Kjinja omjinjen. Wan daut bie die soo wia, dan brukst du nich deeselwje Fäla moaken waut diene Elren. Eene Mutta, waut Jehova unjadon es, mott daut lieren, woo see de Kjinja kaun Leew wiesen. Daut kaun schwoa sennen, aundasch to denkjen un to feelen un sikj aundasch to vehoolen. Oba daut es mäajlich, un daut woat ar un uk äare Famielje toom gooden sennen.
JEHOVA WIEDA UNJADON SENNEN
21-22. Waut fa goodet kjemt no Jesaja 65:13-14 no doabie rut, wan wie Jehova unjadon sent?
21 De Kjennich David wist, woo goot daut wia, Jehova unjadon to sennen. Hee schreef: “Dän HARN siene Befäle sent rajcht, un moaken ons Freid em Hoat. Gott siene Jebooten sent rein, un moaken ons de Uagen op. Un noch mea, dien Kjnajcht woat derch dee uk jewoarnt, un wäa dee hoolen deit haft een grooten Loon” (Psa. 19:9, 12). Vondoag dän Dach es daut kloa to seenen, waut de Unjascheet es tweschen dee, waut Jehova unjadon sent, un dee, waut sienen leeftoljen Rot nich nokomen. Deejanje, waut Jehova jehorchen, “[freien] sikj von Hoaten” (läs Jesaja 65:13-14).
22 Wan de Eltestasch un de Elren Jehova wellich unjadon sent, dan es an daut selfst toom gooden un äare Famieljes sent schaftja un doa es mea Eenichkjeit en de Vesaumlunk. Un daut wichtichste es, daut dee Jehova sien Hoat froo moaken (Spr. 27:11). Kunn daut noch waut bätret jäwen?
LEET 28 Wäa es Jehova sien Frint?
^ Varsch 5 Dis Artikjel haundelt sikj doavon, wuarom wie Jehova sellen unjadon sennen. Wie woaren uk seenen, waut deejanje, waut äwa aundre aunjestalt sent, soo aus Eltestasch ooda Elren, von dän Vewaulta Nehemia un von Kjennich David un von Jesus siene Mutta Maria lieren kjennen.
^ Varsch 1 WIEED UTJELAJCHT: De Wieed unjadon sennen un unjaordnen hieren sikj nich moakhauftich, wan een Mensch bemott woat, wäm to jehorchen. Oba Gott siene Deena jehorchen am friewellich. Doawäajen talen dee daut nich fa waut schlajchtet, am unjadon to sennen.
^ Varsch 7 Eenje Nomes hab wie hia jeendat.
^ Varsch 62 BILTBESCHRIEWUNGEN: Een Eltesta un sien Sän schaufen biem Vesaumlungshus, un Nehemia halpt, de Mia von Jerusalem wada opptobuen.
^ Varsch 64 BILTBESCHRIEWUNK: Een Voda deit met siene Famielje toop von Hoaten to Jehova bäden.
^ Varsch 66 BILTBESCHRIEWUNK: Een Jung späld stundenlank Gäms enne Städ tus to halpen un Schooloppgowen to moaken. Wan de Mame uk meed es, woat dee nich wuttich, oba wiest am trajcht, onen hunjsch to räden.