1. Waut vespruak Jesus en Matäus 11:28-30?

JESUS vespruak de Menschen, waut am toohorchten, waut wundascheenet. Hee säd: “Komt aula no mie . . . un ekj woa junt Ru jäwen” (läs Matäus 11:28-30). Jesus meend daut soo. Daut es biejlikj aun daut to seenen, waut hee fa eene Fru deed, waut eene schlemme Krankheit haud.

2. Waut deed Jesus fa eene kranke Fru?

² Dise Fru wist nich mea ut noch en. See haud aul sea jedoktat, oba daut holp bloos nuscht. Twalf Joa lota wia see noch emma nich jesunt un no daut Jesaz no wia see orrein (3. Mo. 15:25). Dan hieed see, daut Jesus de Kranke heelen kunn, un socht sikj am opp. Soofroo aus see de Frensen von siene Kjleeda aunschieed, wort see jesunt! Oba nich mau bloos daut. Jesus nand ar uk “Dochta”, un wia soo fein to ar, daut see sikj jeleeft un väl wieet feeld. Daut jeef ar secha väl Moot un Krauft! (Luk. 8:43-48).

3. Waut fa Froagen woa wie derchgonen?

³ De Fru socht sikj Jesus opp. Dee luad nich, daut hee no ar kjeem. Krakjt soo mott wie waut doonen toom no Jesus komen. Vondoag dän Dach heelt hee de Kranke nich mea derch een Wunda. Oba hee vesprakjt ons noch emma: “Komt aula no mie, . . . un ekj woa junt Ru jäwen.” En disen Artikjel woa wie äwa fief Froagen räden: Woo kjenn wie no Jesus komen? Waut meend Jesus, aus hee säd: “Lajcht junt mien Joch opp”? Waut kjenn wie von Jesus lieren? Wuarom jeft ons daut Moot, waut hee ons oppjejäft haft? Un woo  kaun Jesus sien Joch ons wieda Moot jäwen?

4-5. Woo kjenn wie no Jesus komen?

⁴ Wie kjennen biejlikj no Jesus komen, wan wie ons soo väl aus mäajlich met siene Lieren un Woakjen aufjäwen (Luk. 1:1-4). Jieda eena mott daut selfst studieren; daut kaun kjeen aundra fa ons doonen. Un wie komen uk no Jesus, wan wie ons eenich woaren, ons deepen to loten un am notofoljen.

⁵ Wie komen uk no Jesus, wan wie de Eltestasch daut weeten loten, wan ons Help fält. Dee sent soo aus “Gowen”, waut Jesus brukt toom fa siene Schop sorjen (Efs. 4:7-8, 11; Joh. 21:16; 1. Pet. 5:1-3). Oba dee weeten daut nich veselfst, waut wie denkjen un waut ons fält. Wie motten no dee gonen un dee no Help froagen. Een Brooda, waut Julian heet, sajcht: “Ekj kunn nich lenja em Betel bliewen, wäajen ekj krank wort, un een Frint rod mie too, daut ekj de Eltestasch froagen sull, aus see mie besieekjen kunnen. Ieeschtlich docht ekj, daut wia nich needich. Oba lota fruach ekj dee doch no Help un dee äa Besuch wia eent von de baste Jeschenkja, waut ekj jekjräajen hab.” Soone true Eltestasch kjennen ons halpen, “Christus . . . siene Jesennunk” to haben, aulsoo sien denkjen un siene Enstalunk kjanen to lieren un soo to sennen aus hee (1. Kor. 2:16; 1. Pet. 2:21). Daut es opp iernst eent von de baste Jeschenkja, waut dee ons jäwen kjennen.

6. Waut bedieden Jesus siene Wieed: “Lajcht junt mien Joch opp”?

⁶ Aus Jesus säd: “Lajcht junt mien Joch opp”, meend daut woomäajlich, daut wie am sullen unjadon sennen. Oba siene Wieed kjennen uk bedieden, daut wie met am toop unja daut Joch komen sellen, om toop fa Jehova to schaufen. Beid Sachen jäwen auntovestonen, daut wie ons aunstrenjen motten.

7. (a) Waut sell wie no Matäus 28:18-20 no doonen? (b) Äwa waut kjenn wie ons secha sennen?

⁷ Wie komen no Jesus, wan wie ons Jehova hanjäwen un deepen loten. Jesus kroacht aulem no sikj un woat kjeenmol wäm aufwiesen, waut Gott opp iernst deenen well (Joh. 6:37-38). Aule, waut Jesus nofoljen, kjennen bie daut Woakj metmoaken, waut Jehova am oppjeef. Wie kjennen ons secha sennen, daut Jesus emma bie ons sennen un ons halpen woat (läs Matäus 28:18-20).

8-9. (a) Wuarom kjeemen de deemootje Menschen wellich no Jesus? (b) Äwa woone Froagen sell wie nodenkjen?

⁸ De deemootje Menschen kjeemen wellich no Jesus (Mat. 19:13-14; Luk. 7:37-38). Wuarom? Wiels Jesus gaunz aundasch wia aus de Farisäa. Dee wieren stolt un nich leeftolich (Mat. 12:9-14). Oba Jesus wia leeftolich un deemootich. De Farisäa wullen emma jeieet sennen un deeden sikj wunda wäa. Jesus tald daut fa orrajcht un lieed siene Jinja, deemootich to sennen un aundre to deenen (Mat. 23:2, 6-11). De Farisäa grulden de Menschen en, daut see dee kunnen väasajen (Joh. 9:13, 22). Oba Jesus siene leeftolje Wieed un Woakjen jeewen dee Moot.

⁹ Waut hast du von Jesus jelieet? Denkj mol äwa de Froagen no: “Sie ekj doafäa bekaunt, daut ekj leeftolich un deemootich sie? Doo ekj wellich eefache Oabeiten fa aundre? Woo behaundel ekj aundre?”

12-14. Wuarom jeft ons daut Moot, wan wie daut Woakj doonen, waut Jesus ons oppjeef?

¹² Wuarom finj wie Ru, wan wie daut doonen, waut Jesus ons oppjeef? Well wie mol eenjet betrachten, waut ons Moot jeft.

¹³ Wie haben de baste Oppsechta. Jehova es ons bowaschta Oppsechta un hee es nich ondankboa ooda hunjsch. Hee räakjent daut väl, waut wie doonen (Heb. 6:10). Un hee jeft ons de Krauft toom ons Woakj doonen, ooda onse Laust droagen (2. Kor. 4:7; Gal. 6:5). Ons Kjennich Jesus es een goodet Väabilt fa ons (Joh. 13:15). Un de Eltestasch, waut fa ons sorjen, wellen “dän grooten Schophoad” Jesus nodoonen (Heb. 13:20; 1. Pet. 5:2). Dee lieren un beschitzen ons un bemieejen sikj, leeftolich un äwanäment to sennen un ons Moot tootospräakjen.

¹⁴ Wie haben de baste Frind. Sest noanich es soone Leew aus mank Jehova siene Deena un dee äa Läwen haft werkjlich eenen Senn. Wie kjennen met onse Breeda un Sestren toopschaufen, waut sikj sea fein oppstalen un aundre nich rechten. Dee weeten sikj met väl, oba puchen nich met sikj un talen aundre fa hecha aus sikj selfst. Fa dee sent wie nich bloos Metoabeida, oba Frind. Un dee äare Leew es soo groot, daut dee mau rajcht reed sent, äa Läwen fa ons to jäwen!

15. Woo sell wie äwa daut Woakj denkjen, wua wie metmoaken?

¹⁵ Wie kjennen bie daut baste Woakj metmoaken. Wie lieren aundre de Woarheit von Jehova un dakjen dän Fient siene Läajes op (Joh. 8:44). De Soton lajcht de Menschen Lausten opp, waut dee nich droagen kjennen. Un dee well ons uk enbillen, daut Jehova ons nich togoodhoolen woat ooda daut kjeena waut om ons romjeft. Soont kaun eenem dolrieten, oba daut es plaut jeloagen! Wan wie no Christus komen, dan woaren ons de Sinden vejäft. Un Jehova räakjent jiedrem eenen von ons sea väl! (Reem. 8:32, 38-39). Es daut nich eene groote Freid, daut wie aundre halpen kjennen, opp Jehova to vetruen un een bätret Läwen to haben?

16. Wuarom es daut, waut Jesus ons oppjeft, aundasch aus aundret, waut wie doonen motten?

¹⁶ Daut, waut Jesus ons oppjeft, es nich soo aus aundret, waut wie doonen motten. Wan eena biejlikj dän Dach äwa jeschauft haft, dan es eena foaken nich bloos meed, oba uk ontofräd. Oba wan wie onse Tiet  jebrukt haben toom Jehova un Jesus deenen, dan feel wie ons schaftich un tofräd. Veleicht sent wie meed, wan wie von de Oabeit no Hus komen un ons jankat daut aul nich, no de Vesaumlunk to foaren. Oba wan daut Toopkomen ieescht derch es un wie no Hus komen, dan feel wie ons foaken mootich un oppjefrescht. Un krakjt soo es daut, wan wie prädjen ooda de Bibel studieren. Daut jeft ons soo väl Moot, daut wie von ons meedet vejäten!

17. Wuarom mott wie oppaussen un goode Plons moaken?

¹⁷ Wie motten daut enseenen, daut wie nich de Krauft haben, aules to doonen, waut wie wellen. Doawäajen mott wie goode Plons moaken. Wie kunnen onse Krauft biejlikj doamet vekwosen, no tieteljet to sträwen. Opp eene Sauz fruach een rikja junga Maun Jesus: “Waut mott ekj doonen om daut eewje Läwen to jewennen?” De junga Maun hilt sikj aun Gott sien Jesaz. Secha wia hee een gooda Mensch, wäajen en Markus sajcht daut, daut Jesus “am goot [wia]”. Jesus säd to dän: “Go un vekjeep aules, waut du hast, . . . un dan komm un folj mie no.” Dis Maun wort sea veläajen, oba daut späat sikj soo, daut hee sien “grootet Vemieejen” doawäajen nich tochloten kunn (Mar. 10:17-22). Hee wull Jesus sien Joch nich aunnämen un deend wieda “daut Rikjtum” (Mat. 6:24). Waut wurscht du jedonen haben?

18. (a) Waut sell wie eenjemol doonen? (b) Wuarom wudd daut goot sennen?

¹⁸ Daut es goot, wan wie ons eenjemol de Tiet nämen un doaräwa nodenkjen, waut en ons Läwen daut ieeschte kjemt. Wuarom? Daut woat ons halpen, daut wie onse Krauft rajcht brucken. Een junga Brooda, waut Mark heet, sajcht: “Joarenlank docht ekj, daut ekj een eefachet Läwen fieed. Ekj wia Pionia, oba ekj docht emma äwa Jelt no un doaräwa, woo ekj mien Läwen noch bäta enrechten kunn. Ekj wundad, wuarom mien Läwen soo schwoa dreid. Oba dan wort ekj en, daut ekj daut ieeschte om mie selfst bedocht wia un Jehova bloos de Tiet un Krauft jeef, waut mie äwableef.” Mark endad sien denkjen un muak sien Läwen eefacha, daut hee mea fa Jehova doonen kunn. Hee sajcht: “Eenjemol moak ekj mie noch Sorjen, oba Jehova un Jesus haben mie jeholpen, dolla om dän Deenst bedocht to sennen.”

19. Wuarom sell wie rajcht aun onse Oppgow naunkjikjen?

¹⁹ Jesus sien Joch woat ons wieda Moot jäwen, wan wie dreeatlei doonen. Daut ieeschte sell wie rajcht aun onse Oppgow naunkjikjen. Wie halpen bie Jehova sien Woakj met un doawäajen mott wie daut soo doonen, aus hee daut haben well. Wie sent de Oabeida un Jehova es ons Wieet (Luk. 17:10). Wan wie dit Woakj soo doonen wellen, aus ons daut jankat, dan moak wie ons daut bloos schwanda. Mau rajcht een stoakja Boll kaun sikj velazen un meed moaken, wan dee emma doa hangonen well, wua am daut jankat, un daut Joch looswoaren well, waut sien Wieet am aunjemoakt haft. Oba wan wie ons von Jehova leiden loten, dan kjenn wie mea doonen, aus wie ons jeemols jedocht haben, un met aule Schwierichkjeiten foadich woaren. Kjeena kaun daut tonuscht moaken, waut Jehova sikj väajenomen haft! (Reem. 8:31; 1. Joh. 4:4).

20. Ut waut fa eenen Senn sell wie ons Jesus sien Joch opplajen?

²⁰ Tweedens sell wie aules utem rajchten Senn doonen. Wie wellen onsen leeftoljen Voda Jehova ieren. En Jesus siene Tiet worden deejanje ontofräd, waut bejierich  wieren un bloos fa sikj streeden, un dee wullen Jesus sien Joch looswoaren (Joh. 6:25-27, 51, 60, 66; Filip. 3:18-19). Oba deejanje, waut woare Leew fa Gott un dän Näakjsten hauden, bleewen äa Läwen lank wellich unja Jesus sien Joch un hauden de Hopninj, noch mol met am toop em Himmel to sennen. Krakjt soo aus dee woa wie uk schaftich sennen, wan wie utem rajchten Senn unja Jesus sien Joch bliewen.

21. Waut woat Jehova no Matäus 6:31-33 no fa ons doonen?

²¹ Dreddens sell wie ons doaropp veloten, daut Jehova ons halpen woat. Wäa sikj Jesus sien Joch opplajcht, jeft väl opp un es sea drock. Jesus säd, daut wie wudden vefolcht woaren. Oba wie kjennen ons doaropp veloten, daut Jehova ons de Krauft jäwen woat, met aule Trubbels foadich to woaren. Je mea wie uthoolen, je stoakja woa wie (Jak. 1:2-4). Wie kjennen ons uk doaropp veloten, daut Jehova fa ons sorcht un daut Jesus ons Hoad es un daut onse Breeda un Sestren ons Moot toospräakjen (läs Matäus 6:31-33; Joh. 10:14; 1. Tess. 5:11). Wie haben werkjlich aules, waut ons fält, daut wie kjennen tru uthoolen!

22. Fa waut kjenn wie dankboa sennen?

²² De Fru, waut no Jesus kjeem, kjrieech krakjt dän Dach fresche Krauft, aus see jeheelt wort. Oba daut see uk wieda Krauft kjrieech, must see Jesus tru nofoljen. Waut jleefst du, waut dee deed? Stal die mol väa, waut fa eene groote Beloonunk dee woat jekjräajen haben, wan dee sikj woat sennen eenich jeworden, sikj Jesus sien Joch opptolajen! Dan kunn dee met Jesus toop em Himmel deenen! Es daut nich väl mea wieet aus aules, waut dee woomäajlich oppjeef? Endoont aus wie de Hopninj haben, noch mol em Himmel ooda oppe Ieed eewich to läwen, wie kjennen sea dankboa sennen, daut wie no Jesus siene Wieed horchten, aus hee säd: “Komt aula no mie”!