1-2. (a) Wuarom kjenn wie ons to Harmagedon freien? (b) Von woone Froagen woa wie en disen Artikjel räden?

EENJE jleewen, daut de Ieed noch mol woat derch eenen grooten Kjrich ooda een grootet Owwada venicht woaren. Oba de Schreft sajcht nich soont. Dee lieet, daut doa boolt een Kjrich kjemt, waut väl goodet brinjt. Dee woat “Harmagedon” jenant, un wie kjennen ons to daut freien, waut de Schreft von dän sajcht (Opb. 1:3). Dis Kjrich woat de Menschheit nich venichten, oba raden. Wuahäa?

² De Schreft wiest, daut de Kjrich von Harmagedon de Menschheit opp veschiedne Wäaj raden woat. Dee woat de menschelje Rejierungen oppriemen. Doa woaren uk de Jerajchte jerat un de Schlajchte venicht woaren. Un dee woat doafäa oppkomen, daut onse Ieed nich vedorwen, ooda venicht woat (Opb. 11:18). Räd wie nu mol von vea Froagen: Waut es Harmagedon? Waut woat ver Harmagedon passieren? Woo kjenn wie jerat woaren? Woo kjenn wie nu ver Harmagedon tru bliewen?

3. (a) Waut bediet daut Wuat “Harmagedon”? (b) Wuarom kjenn wie no Openboarunk 16:14, 16 no sajen, daut Harmagedon nich werkjlich een Plauz oppe Ieed es?

³ Läs Openboarunk 16:14, 16. Daut Wuat “Harmagedon” steit mau eemol enne Schreft bennen un kjemt von een hebräischet Wuat, waut “Boajch von Megiddo” bediet. Megiddo wia ieeschtemma eene Staut en Israel (Jos. 17:11). Oba Harmagedon es nich werkjlich een Plauz oppe Ieed. Rajcht jesajcht es daut de Loag, wua “de Kjennichs opp de Ieed” toopjebrocht woaren, waut jäajen Jehova sent (Opb. 16:14). Oba en disen Artikjel woa wie daut Wuat “Harmagedon” uk fa dän Kjrich brucken, waut fuaz aunfangen woat, wan  dise Kjennichs toopjebrocht sent. Woo weet wie, daut Harmagedon nich werkjlich een Plauz oppe Ieed es? Ieeschtlich jeft et dän Boajch von Megiddo goanich opp iernst. Tweedens es de Jäajent doa dicht bie Megiddo väl too kjlien fa aul “de Kjennichs opp de Ieed” met äare Soldoten un äa Kjrichsjereetschoft. Un dreddens woa wie lota noch seenen, daut de Kjrich von Harmagedon aunfangen woat, wan de Welt äare “Kjennichs” jäajen Gott siene Deena komen, waut je äwa de gaunze Ieed vestreit sent.

4. Wuarom jeef Gott sienen latsten grooten Kjrich eenen Nomen, waut met Megiddo to doonen haft?

⁴ Waut haft Megiddo met Jehova sienen latsten grooten Kjrich to doonen? En Megiddo un doa dicht bie en daut Jesreel-Tol jeef et ieeschtemma foaken Kjrich. Un eenjemol holp Jehova siene Deena doa, daut dee jewennen kunnen. Biejlikj holp hee “bie daut Wota von Megiddo” dän israelitischen Rechta Barak, daut dee de kanaanitische Soldoten un äaren Väaschten Sisera jewennen kunn. Barak un de Profeetin Debora dankten Jehova fa dit Wunda. Dee sungen: “Vom Himmel rauf kjamften de Stierns . . . [jäajen] Sisera . . . De Kischon . . . reet de Fiend aula met sikj wajch” (Rech. 5:19-21).

5. Waut es een groota Unjascheet tweschen dän Kjrich von Harmagedon un dän Kjrich, wua Barak kjamft?

⁵ Opp Enj von äa Leet sungen Barak un Debora: “Soo . . . saul daut aulem gonen, waut die, HAR, fientlich entjäajen komen! Waut am oba leewen, sellen soo sennen, aus wan de Sonn en äare Pracht oppjeit!” (Rech. 5:31). En Harmagedon woaren Gott siene Fiend uk venicht woaren un dee, waut am leewen, woaren jerat woaren. Oba daut jeft eenen grooten Unjascheet tweschen dise beid Kjriej. En Harmagedon woaren Gott siene Deena nich kjamfen. Dee woaren nich mol Kjrichsjereetschoft haben! Dee woaren “stoakj sennen”, wiels dee “stell bliewen” un opp Jehova un opp siene himlische Armeeen vetruen (Jes. 30:15; Opb. 19:11-15).

6. Woo woat Jehova en Harmagedon woomäajlich siene Fiend venichten?

⁶ Woo woat Gott en Harmagedon siene Fiend venichten? Woomäajlich woat hee veschiednet brucken, soo aus Ieedbäbens, Hoagel un Blitzen (Hiob 38:22-23; Hes. 38:19-22). Hee kaun daut uk bat doa brinjen, daut de Fiend sikj unjarenaunda dootmoaken (2. Chr. 20:17, 22-23). Un veleicht brukt hee uk de Enjel toom de Schlajchte venichten (Jes. 37:36). Endoont woo Gott daut doonen woat, hee woat jewennen. Siene Fiend woaren aula oppjeriemt un aul de Jerajchte woaren jerat (Spr. 3:25-26, NW).

7-8. (a) Waut fa eene besondre Norecht woaren de Harscha bekauntmoaken, soo aus 1. Tessalonicha 5:2-6 sajcht? (b) Wuarom woat dise Lieej soo jefäadlich sennen?

⁷ Ver “dän Harn sien[en] Dach” woaren se sajen: “Aules es ruich un secha” (läs 1. Tessalonicha 5:2-6). Met “dän Harn sien[en] Dach” en 1. Tessalonicha 5:2 es de “groote Triebsaul” jemeent (Opb. 7:14, Reimerbibel). Waut woat daut Tieekjen sennen, daut dee meist fuaz aunfangen woat? De Schreft wiest, daut doa waut gaunz besondret woat bekauntjemoakt woaren.

⁸ Soo aus verutjesajcht, woaren se sajen: “Aules es ruich un secha”. Wuarom woaren de Harscha daut sajen? Woaren de Gloowesleidasch daut uk sajen? Daut es goot mäajlich. Oba daut woat bloos eene Lieej sennen, waut en Werkjlichkjeit von de beese Jeista kjemt. Wuarom woaren dee, waut daut jleewen, en groote Jefoa sennen? Wiels dee jroz ver de jratste Triebsaul, waut et jeemols jejäft haft, denkjen woaren, daut see secha sent. Oba “dan woat äa vedoawen  plazlich äwa an komen soo aus de Weedoag äwa eene Fru komen, dee een Kjint to Welt brinjt”. Woo woat Jehova siene true Deena daut dan gonen? Dee woaren reed sennen, wan dee sikj veleicht uk wundren, woo plazlich de groote Triebsaul aunfangt.

9. Woat Gott aules en dän Soton siene Welt opp eemol venichten? Laj daut ut.

⁹ Jehova woat nich aules en dän Soton siene Welt opp eemol venichten, soo aus en Noah siene Tiet. Hee woat ieescht een Poat von dise Welt venichten un dan daut äwaje. Daut ieeschte woat hee daut groote Babel äwatsied schaufen, waut aule faulsche Gloowes oppe Welt väastalt. Un tweedens woat hee en Harmagedon daut äwaje von dän Soton siene Welt oppriemen, biejlikj de polietische Machten, de Armeeen un äa Kjrichsjereetschoft un de Haundelswelt. Well wie ons dise twee Sachen mol unjastonen.

10. Wuarom woat Jehova no Openboarunk 17:1, 6 un 18:24 no daut groote Babel venichten?

¹⁰ “Daut Jerecht . . . äwa de groote Hua” (läs Openboarunk 17:1, 6; 18:24). Daut groote Babel haft väl Schaund opp Gott sienen Nomen jebrocht. Daut haft de Menschen Läajes äwa Gott jelieet. Daut groote Babel haft uk doaderch met de Harscha oppe Ieed jehuat, daut daut foaken eenen Bunt met dee muak. Daut haft siene Macht doatoo jebrukt, de Menschen to unjadrekjen un uttonutzen. Un daut haft väl Bloot vegoten, mau rajcht daut von Gott siene Deena (Opb. 19:2). Woo woat Jehova daut groote Babel venichten?

11. (a) Waut es “daut dunkelroode Tia”? (b) Woo woat Gott dit Tia jäajen daut groote Babel brucken?

¹¹ Jehova woat “de groote Hua” derch de “tieen Hieena” von “een dunkelroodet Tia” venichten. Dit Tia stalt de Veeende Nazionen (UNO) väa, un de tieen Hieena stalen de Rejierungen väa, waut de Veeende Nazionen unjastetten. Gott haft aul eene Tiet bestemt, wanea dee jäajen de groote Hua komen woaren. Woo woaren dee ar “en de Grunt brinjen, bat see noaktich un vewillat  es”? Dee woaren aulemaun dietlich moaken, woo schlajcht see es, un woaren äare wieetvolle Sachen fuatnämen (Opb. 17:3, 16). Daut groote Babel woat en eenen Dach venicht woaren, aulsoo soo haustich, daut deejanje sikj sea vefieren woaren, waut daut unjastetten deeden. Dee woaren sikj wundren, wäajen daut groote Babel ea emma met sikj pucht un säd: “Ekj sett aus Kjennichsche un sie nich eene Wätfru, un woa kjeene Trua seenen” (Opb. 18:7-8).

12. Waut woat Jehova nich tooloten, un wuarom nich?

¹² Gott woat daut nich tooloten, daut siene Deena venicht woaren, wiels dee sikj freien, daut see no sienen Nomen jenant woaren, un sien Jeboot jehorcht haben, ut daut groote Babel ruttogonen (Apj. 15:16-17; Opb. 18:4). Dee haben sikj uk sea aunjestrenjt, aundre to halpen, doa ruttogonen. Doawäajen woaren de Ploagen, waut äwa daut groote Babel komen, nich äwa an komen. Un doch woat äa Gloowen aufjeprooft woaren.

13. (a) Wäa es Gog? (b) Wanea woat no Hesekiel 38:2, 8-9 no de Kjrich von Harmagedon aunfangen?

¹³ Gog kjemt jäajen Gott sien Volkj (läs Hesekiel 38:2, 8-9). Nodäm daut aule faulsche Gloowes venicht sent, woat Gott sien Volkj soo sennen aus de eensja Boom, waut bie eenen grooten Storm stonen jebläwen es. De Soton woat sea doll woaren un Läajes brucken, waut von de “beese Jeista” staumen, daut de Velkja sikj toopstonen, om jäajen Gott siene Deena to komen (Opb. 16:13-14). Dise Velkja, waut sikj toopstonen, woaren “Gog . . . en daut Launt Magog” jenant. Wan dee jäajen Gott siene Deena komen, dan fangt de Kjrich von Harmagedon aun (Opb. 16:16).

14. Waut woat Gog motten enseenen?

¹⁴ Gog woat sikj opp “menschliche Krauft” veloten toom Kjrich fieren (2. Chr. 32:8). Oba wie woaren ons opp onsen Gott Jehova veloten. De Velkja woaren daut fa onkluak talen. Wuarom? De faulsche Gloowes hauden je groote Macht un een deel Jetta, un  doch kunnen “daut Tia un de tieen Hieena” dee venichten (Opb. 17:16). Doawäajen woaren de Velkja jleewen, daut see ons leicht venichten kjennen. Dee woaren jäajen ons komen, soo “aus eene Wolkj, dee daut gaunze Launt bedakjt” (Hes. 38:16). Oba Gog woat boolt enwoaren, daut hee sikj enne Enj jejoacht haft. Krakjt soo aus de Farao bie daut Roode Mäa woat Gog motten enseenen, daut hee jäajen Jehova kjamft (2. Mo. 14:1-4; Hes. 38:3-4, 18, 21-23).

15. Waut woat Christus em Kjrich von Harmagedon doonen?

¹⁵ Christus un siene Armeeen em Himmel woaren Gott siene Deena veteidjen un Gog un siene Helpa venichten (Opb. 19:11, 14-15). Oba waut woat met Jehova sienen jratsten Fient, dän Soton, woaren, waut de Velkja derch siene Läajes bat doa brocht, em Kjrich von Harmagedon jäajen Gott siene Deena to komen? Jesus woat am un de beese Jeista em Aufgrunt nenschmieten, wua dee fa dusent Joa woaren faust sennen (Opb. 20:1-3).

16. (a) Woo bewies wie, daut wie Gott kjanen? (b) Waut woat en Harmagedon met deejanje woaren, waut Jehova kjant?

¹⁶ Daut wie en Harmagedon jerat woaren, mott wie bewiesen, daut wie Gott kjanen un “no daut Evangelium vom Harn Jesus . . . horchen”, endoont woo lang wie aul enne Woarheit sent (2. Tess. 1:7-9). Wie kjanen Gott, wan wie weeten, waut hee fa rajcht un fa orrajcht talt un waut hee von ons velangt. Wie bewiesen uk, daut wie am kjanen, wan wie am leewen un jehorchen un bloos am deenen (1. Joh. 2:3-5; 5:3). Wan wie daut doonen, dan “kjant Gott” ons uk un haft eenen Jefaulen aun ons (1. Kor. 8:3). Un dan woa wie uk en Harmagedon jerat woaren.

17. Waut bediet daut, “no daut Evangelium vom Harn Jesus . . . [to] horchen”?

¹⁷ Bie “daut Evangelium vom Harn Jesus” es aul daut met en, waut Jesus jelieet haft, un daut kjenn wie en de Schreft finjen. Wie horchen doano, wan wie daut nokomen. Doa es met en, daut daut Kjennichrikj  en ons Läwen daut ieeschte kjemt un daut wie soo läwen, aus Gott daut fa rajcht talt, un sien Kjennichrikj bekauntmoaken (Mat. 6:33; 24:14). Un doa es uk met en, daut wie Christus siene jesaulwde Breeda bie äare wichtje Oppgowen unjastetten (Mat. 25:31-40).

18. Wuarom kjennen Christus siene jesaulwde Breeda boolt deejanje beloonen, waut an biestunden?

¹⁸ Gott siene jesaulwde Deena woaren de “aundre Schop” boolt beloonen kjennen fa aul daut, waut dee fa an deeden (Joh. 10:16). Wuarom? Wiels aule von de 144 000 woaren ver dän Kjrich von Harmagedon aul em Himmel sennen. Dee woaren doa eenen jeisteljen Kjarpa haben un onstoaflich sennen. Lota woaren dee to de himlische Armeeen jehieren, waut Gog venichten woaren un “eene [groote] Häad” von Jehova siene Deena raden (Opb. 2:26-27; 7:9-10). Dan woat de groote Häad sea schaftich sennen, daut see kunnen Jehova siene jesaulwde Deena hia oppe Ieed biestonen!

19-20. Woo kjenn wie nu ver Harmagedon tru bliewen, wan wie uk Schwierichkjeiten haben?

¹⁹ Nu läw wie en de latste Tiet un väle von ons moaken groote Schwierichkjeiten derch. Oba wie kjennen doawäajen met Freiden uthoolen (Jak. 1:2-4). Eent, waut ons sea halpen woat, es aunhoolent un von Hoaten bäden (Luk. 21:36). Un wie motten uk jieda Dach Gott sien Wuat studieren un doaräwa nodenkjen, biejlikj äwa de Profezeiungen, waut sikj boolt erfellen (Psa. 77:13). Wan wie daut aules doonen un uk em Deenst ons bastet doonen, dan woat ons Gloowen un onse Hopninj stoakj bliewen.

²⁰ Woo scheen woat daut nich sennen, wan daut groote Babel ieescht venicht es un wan Harmagedon äwa es! Stal die mol väa, woo sea wie ons freien woaren, wan aule Gott sienen Nomen ieren woaren un am aus äaren Harscha jehorchen! (Hes. 38:23). Daut es werkjlich soo, daut deejanje sikj to Harmagedon freien kjennen, waut Gott kjanen un sienen Sän jehorchen un bat aum Enj uthoolen (Mat. 24:13).