1. Wanea kaun daut schwoa sennen, Jehova to deenen?

WANEA es daut schwanda, Jehova to deenen? En schwoare Tieden ooda wan aules soo mea frädlich es? Wan wie Schwierichkjeiten haben, dan vetru wie leicht opp Jehova. Oba waut doo wie, wan aules jlei rant? Lot wie ons dan doavon auflenkjen, Gott to deenen? Krakjt doafäa woarnd Jehova de Israeliten (5. Mo. 6:10-12).

2. Waut kjenn wie von dän Kjennich Asa lieren?

² Wie kjennen väl von dän Kjennich Asa lieren, wiels dee weis wia un sikj gaunz opp Jehova veleet. Hee deend Jehova en schwoare un uk en frädelje Tieden. Von Aunfank aun wia Asa “sien Hoat . . . emma tru toom HARN” (1. Kjen. 15:14). Daut wia biejlikj doaraun to seenen, daut hee de faulsche Aunbädunk ut Juda utrod. De Schreft sajcht: “Hee leet jieda Aultoa un jieda huage Opfastäd von de framde Jetta vestieren, de Jedenkjsteena entwei schlonen un de Ascherabilda omhaken” (2. Chr. 14:2, 4). Hee sad mau rajcht siene Groosmame Maacha rauf, daut dee en sien Kjennichrikj nich mea soo väl Macht haud. Wuarom? Wiels see de Menschen bat doa jebrocht haud, eenen Aufgott auntobäden (1. Kjen. 15:11-13).

3. Waut woa wie en disen Artikjel derchgonen?

³ Asa riemd nich bloos de faulsche Aunbädunk opp. Hee holp de Menschen en Juda uk, daut dee wada Jehova  aunbäden deeden. Jehova säajend Asa un de Israeliten dan un jeef dee Fräd. * Aus Asa de Kjennich wia, “haud daut Launt tieen Joa Fräd” (2. Chr. 13:23; 14:3, 5). En disen Artikjel woa wie seenen, woo Asa dise frädelje Tiet utnuzt un waut de Christen en de Aposteltiet deeden, aus doa Fräd wia. Un tolatst woa wie eene Froag beauntwuaten: Woo kjenn wie daut fein utnutzen, wan wie en een Launt läwen, wua wie Jehova frie deenen kjennen?

4. Woo brukt Asa no 2. Chronik 14:1, 5-6 no de frädelje Tiet?

⁴ Läs 2. Chronik 14:1, 5-6. Asa säd to de Menschen, daut Jehova an “Fräd veschauft haud”. Hee docht nich, daut dise Tiet bloos toom vereiwen wia. Enne Städ daut leet Asa Städa, Mieren, Torms un Puaten buen. Hee säd to de Menschen en Juda: “Daut Launt [jehieet] noch ons”. Waut meend Asa doamet? Hee meend, daut doa kjeene Fiend en daut Launt wieren un de Menschen doa frie romwanken un buen kunnen. Un hee rod dee too, dise frädelje Tiet fein uttonutzen.

5. Wuarom muak Asa sien Kjrichshäa stoakja?

⁵ Asa deed en de frädelje Tiet uk sien Kjrichshäa stoakja moaken (2. Chr. 14:7). Bedied daut, daut hee nich opp Jehova vetrud? Nä. Oba hee wist, daut een Kjennich sien Volkj fa de Trubbels reedmoaken must, waut doa lota oppkomen kunnen. Un Asa wist uk, daut de Fräd en Juda nich fa emma bliewen wudd, un krakjt soo kjeem daut rom.

6. Waut deeden de Christen en de Aposteltiet en de frädelje Tieden?

⁶ De Christen en de Aposteltiet worden foaken vefolcht, oba dee hauden uk frädelje Tieden. Waut deeden dee dan? Dise true Mana un Frues deeden flietich de goode Norecht prädjen. En de Aposteljeschicht sajcht daut, daut dee “en Gottesforcht . . . waundlen” un wieda prädjen deeden. Woo kjeem daut ut? “See worden emma mea”, wäajen Jehova an doafäa säajnen deed, daut see en de frädelje Tiet flietich prädjen deeden (Apj. 9:26-31).

7-8. Waut deeden Paulus un aundre bie jieda Jeläajenheit? Laj daut ut.

⁷ De Jinja nuzten jieda Jeläajenheit ut toom de goode Norecht prädjen. Aus de Apostel Paulus biejlikj mol en Efesus wia, wort hee en, daut hee doa eene feine Jeläajenheit haud toom prädjen. Doawäajen bleef hee doa un räd to väle äwa de goode Norecht (1. Kor. 16:8-9).

⁸ Nodäm daut de Apostel un de Eltestasch en Jerusalem daut aune 49 n. Chr. oppem kloaren brochten, aus Christen sikj musten beschnieden loten, kunnen Paulus un aundre uk fein prädjen (Apj. 15:23-29). Dee brochten de Norecht von de Apostel un de Eltestasch en Jerusalem no de Vesaumlungen, un dee aula deeden von doa wieda flietich “dän Harn sien Wuat” prädjen (Apj. 15:30-35). Woo kjeem daut ut? De Schreft sajcht: “Doaderch worden de Jemeenten em Gloowen jestoakjt, un äare Zol neem aule Dach too” (Apj. 16:4-5).

9. Woo es daut vondoag dän Dach en väl Lenda, un äwa waut wudd wie sellen nodenkjen?

⁹ Vondoag dän Dach es en väl Lenda Frieheit toom prädjen. Wonst du uk en eent von dise Lenda? Dan kaust du mol äwalajen: “Waut doo ekj en dise frädelje Tiet?” Nu en de latste Tiet es Jehova sien Volkj sea drock met daut jratste Prädicht- un Liawoakj, waut et jeemols jejäft haft (Mar. 13:10). Un doa jeft daut uk fa ons väl Jeläajenheiten, mettohalpen.

10. Waut rot 2. Timotäus 4:2 ons too?

¹⁰ Woo kjenn wie de frädelje Tiet utnutzen? (Läs 2. Timotäus 4:2.) Wudd wie kjennen doaräwa nodenkjen, aus wie selfst ooda wäa von onse Famielje wudd mea en daut Prädichtwoakj doonen kjennen ooda mau rajcht Pionia woaren? Nu es nich de Tiet, no Rikjtum un tieteljet to sträwen, wiels soont woat ons en de groote Triebsaul nuscht halpen (Spr. 11:4; Mat. 6:31-33; 1. Joh. 2:15-17).

11. Waut haben eenje jedonen, daut soo väl Menschen aus mäajlich de goode Norecht hieren kjennen?

¹¹ Een deel Vekjindja haben eene niee Sproak jelieet, daut see aundre fein prädjen un lieren kjennen. Gott siene Organisazion unjastett dee un jeft opp emma mea Sproaken Bieekja un aundre Sachen rut. Aune 2010 jeef daut onse Bieekja opp ojjefäa 500 Sproaken. Oba vondoag dän Dach hab wie Bieekja opp mea aus 1 000 Sproaken!

12. Waut deit daut aun de Menschen, wan see de goode Norecht opp äare Muttasproak hieren? Jeff een Biespel.

¹² Waut deit daut aun de Menschen, wan see de Woarheit ut Gott sien Wuat  opp äare Muttasproak hieren? Eene Sesta wia opp eenen dreedoagschen Kongress en Memphis, Tennessee, Stäts. De Kongress wia opp Kinjaruanda; daut es eene Sproak, waut se jeweenlich en Ruanda, en Kongo (Kinshasa) un en Uganda räden. Dise Sesta rät dise Sproak un doawäajen säd see no dän Kongress: “Ekj won aul 17 Joa en de Stäts, oba dit wia daut ieeschte Mol, daut ekj bie eenen Kongress rein aules vestonen kunn.” Dise Sesta jinkj daut sea to Hoaten, daut see dän Kongress opp äare Sproak hieren kunn. Wurscht du kjennen eene aundre Sproak lieren toom eenje en june Omjäajent halpen? Wudd daut goot sennen, wiels eenje doa leewa eene aundre Sproak räden? Wan du daut deist, dan woat sikj daut loonen!

13. Waut deeden onse Breeda en Russlaunt en de frädelje Tiet?

¹³ Nich aule Breeda kjennen frie prädjen. En eenje Lenda es ons Woakj veboden ooda nich en aule Stekjen frie. Soo es daut biejlikj en Russlaunt. Doa worden de Breeda joarenlank sea vefolcht, oba en Moaz 1991 wort ons Woakj doa frie. To jane Tiet jeef et en Russlaunt ojjefäa 16 000 Vekjindja. Oba twintich Joa lota jeef et doa dan äwa 160 000 Vekjindja! Daut wiest, daut onse Breeda daut fein utjenuzt haben, daut see frie prädjen kunnen. Oba de frädelje Tiet wia nich sea lang. Nu haben de Omstend sikj jeendat, oba de Breeda doa deenen Jehova noch emma flietich un doonen aules, waut see kjennen.

14-15. Woo holp Jehova Asa?

¹⁴ De Fräd en Asa siene Tiet bleef nich fa emma. Doa kjeemen äwa eene Million  Soldoten von Kusch, aulsoo von Ätiopien. Dee äa Väaschta Serach docht, daut see Juda wudden jewennen kjennen. Oba de Kjennich Asa kjikjt nich doano, woo väl daut wieren. Hee veleet sikj opp Jehova Gott un bäd: “Halp ons, HAR, ons Gott; wie veloten ons gaunz opp die! En dienen Nomen sent wie jäajen dise Äwamacht jekomen” (2. Chr. 14:10).

¹⁵ De Ätiopia hauden meist noch soo väl Soldoten, aus de Kjennich Asa haud. Oba Asa wist, daut Jehova väl Macht haud un siene Deena raden kunn. Un Jehova deed daut uk un de ätiopische Soldoten vespälden (2. Chr. 14:7-12).

16. Wuarom weet wie, daut de frädelje Tiet nich fa emma bliewen woat?

¹⁶ Wie weeten daut nich krakjt, waut met jiedrem eenen von ons noch woaren woat. Oba wie weeten, daut de Fräd, waut Gott sien Volkj nu woomäajlich noch haft, nich emma soo bliewen woat. Jesus säd je verut, woo daut en de latste Tiet sennen wudd. “Aule Velkja” wudden siene Nofolja “nich lieden kjennen” (Mat. 24:9). Un de Apostel Paulus säd uk: “Aul dee, dee dän fausten Wellen haben aus Christen fromm to läwen, motten met Vefoljunk räakjnen” (2. Tim. 3:12). De Soton es “schrakjlich wuttent”, un wie wudden ons teischen, wan wie jleewden, daut wie ons doavon wudden kjennen utem Stich brinjen (Opb. 12:12).

17. Woo woat ons Gloowen veleicht aufjeprooft woaren?

¹⁷ Boolt woa wie aula aufjeprooft woaren. Doa woat eene “groote Triebsaul senne, soont aus noch nie es jewast fonn Aunfank Welt bott nu, en woat uk nimeols wada paseare” (Mat. 24:21, Reimerbibel). Veleicht woat ons Frintschoft dan jäajen ons sennen un daut kaun, daut ons Woakj veboden woat (Mat. 10:35-36). Woa wie dan aula krakjt soo aus Asa sennen un ons doaropp veloten, daut Jehova ons halpen un beschitzen woat?

18. Waut woat ons no Hebräa 10:38-39 no halpen, daut wie reed sent, wan de frädelje Tiet äwa es?

 ¹⁸ Jehova halpt ons nu aul, daut wie eenen stoakjen Gloowen kjrieen. Hee jeft ons derch dän truen, weisen Kjnajcht “to rajchte Tiet” jeisteljet Äten, daut wie kjennen stoakj bliewen (Mat. 24:45). Oba wie motten ons Poat doonen un doaropp schaufen, daut wie ons gaunz opp Jehova veloten (läs Hebräa 10:38-39).

19-20. Äwa waut sell wie no 1. Chronik 28:9 no nodenkjen, un wuarom?

¹⁹ Soo aus de Kjennich Asa mott wie Jehova sieekjen (2. Chr. 14:3; 15:1-2). Wie fangen aun Jehova to sieekjen, wan wie am kjanen lieren un ons deepen loten. Un wie doonen aules, waut wie kjennen, daut wie Jehova noch dolla leewen. Wie wudden mol kjennen äwalajen: “Sie ekj räajelmässich bie de Toopkomes?” Wan wie doa sent, dan kjrie wie fresch Moot toom wieda Jehova deenen un haben goode Jesalschoft (Mat. 11:28). Wie kjennen uk äwalajen: “Doo ekj pinkjlich fa mie de Bibel studieren?” Näm jie junt jieda Wäakj Tiet fa daut Famieljenstudium? Un wan du auleen wonst, nemst du die dan doawäajen jieda Wäakj Tiet toom fa die selfst studieren? Un deist du soo väl aus mäajlich prädjen un Jinja moaken?

²⁰ Wuarom wudd wie sellen äwa dise Froagen nodenkjen? En de Schreft sajcht daut, daut Jehova onse Jedanken un ons Hoat unjasieekjen deit, un wie sellen uk (läs 1. Chronik 28:9). Un wan wie enwoaren, daut wie ons denkjen endren motten ooda no waut aundret sträwen, dan sell wie Jehova no Help froagen. Nu es de Tiet, daut wie ons fa de Proowen reedmoaken, waut noch komen. Wie motten nu doano seenen, daut wie de frädelje Tiet fein utnutzen!