1-2. Woo paust Liera 11:6 met daut Prädichtwoakj toop?

EN EENJE Lenda horchen de Menschen wellich no de goode Norecht. Daut späat sikj meist soo, aus wan dee doa aul wudden no jeluat haben. Oba en aundre Lenda intressieren de Menschen sikj nich sea fa Gott ooda fa de Schreft. Woo es daut doa bie junt? Endoont woo daut doa es, Jehova well, daut wie wiedaprädjen, bat hee sajcht, daut daut to Enj es.

² Jehova haft aul de Tiet faustjesat, wanea daut Prädichtwoakj woat derch sennen, un “dan woat daut Enj komen” (Mat. 24:14, 36). Woo kjenn wie bat dan de Wieed nokomen: “Hia nich opp”? * (Läs Liera 11:6.)

3. Waut woa wie en disen Artikjel seenen?

³ En dän väajen Artikjel hab wie veatlei jeseenen, woo wie kjennen goode “Menschenfescha” woaren (Mat. 4:19). Dis Artikjel woat ons dreeatlei wiesen, waut ons halpt, daut wie wiedaprädjen, endoont waut fa Schwierichkjeiten wie haben. Daut es needich, (1) daut wie ons nich auflenkjen loten, (2) daut wie jeduldich sent un (3) daut wie ons em Gloowen stoakj hoolen.

4. Wuarom mott wie oppaussen, daut wie bie daut Woakj bliewen, waut Jehova ons oppjejäft haft?

⁴ Jesus säd verut, woo daut en de latste Tiet sennen  wudd. Aul daut, waut doa passieren wudd, wudd siene Nofolja leicht kjennen von daut Prädichtwoakj auflenkjen. Doawäajen säd hee to dee: “Woakt” (Mat. 24:42). En Noah siene Tiet jeef daut väl, waut de Menschen auflenkjen deed, daut dee nich no Noah siene Wieed horchten. Un krakjt soo es daut uk en onse Tiet (Mat. 24:37-38; 24:39, NW; 2. Pet. 2:5). Doawäajen mott wie oppaussen, daut wie bie daut Woakj bliewen, waut Jehova ons oppjejäft haft.

5. Wua wudd aulawäajen jeprädicht woaren, soo aus Aposteljeschicht 1:6-8 wiest?

⁵ Daut Prädichtwoakj saul ons vondoag dän Dach sea wichtich sennen. Jesus säd je, daut siene Nofolja wudden no sienen Doot wiedaprädjen un mea volbrinjen aus hee (Joh. 14:12). No sienen Doot jinjen eenje von siene Jinja wada feschen. Un nodäm aus hee oppjestonen wia, deed hee een Wunda, daut eenje Jinja een deel Fesch opp eemol kjrieejen. Un no daut muak hee de Jinja daut dietlich, daut daut prädjen un lieren wichtja wia aus irjenteene aundre Oabeit (Joh. 21:15, NW; 21:16-17). Jroz ea Jesus nom Himmel fua, säd hee to siene Jinja, daut dit Prädichtwoakj, wua hee met aunjefongen haud, nich bloos wudd en Israel jedonen woaren (läs Aposteljeschicht 1:6-8). Joaren lota wees Jesus dän Apostel Johanes en eene Vision, waut “aum Harrn sien Dach” * woaren wudd. Waut sach Johanes doa biejlikj, waut sea besonda wia? Hee sach eenen Enjel, waut “aule Menschen von aule Velkja, Raussen, Stam un Sproaken” een “eewjet Evangelium” brocht (Opb. 1:10, Friesenbibel; 14:6). Waut Jehova well, es, daut wie uk bie dit groote Prädichtwoakj metmoaken, bat et to Enj es.

6. Waut woat ons halpen, daut wie ons nich soo leicht von daut Prädichtwoakj auflenkjen loten?

 ⁶ Wie woaren ons nich soo leicht von daut Prädichtwoakj auflenkjen loten, wan wie doaräwa nodenkjen, woo väl Jehova deit, om ons to halpen. Hee jeft ons biejlikj äwajenuach jeisteljet Äten, soo aus Bieekja, ellektroonische Bieekja, oppjeschnaktet, Videos un Programs em Internet. Un opp onse Websied jeft daut aul Sachen opp äwa 1 000 Sproaken! (Mat. 24:45-47). De Menschen enne Welt sent sikj oneenich wäajen polietische Sachen un wäajen dee veschiedne Gloowes haben un nich aula jlikjen rikj ooda oam sent. Oba daut jeft aul äwa acht Millionen von Gott siene Deena un dee sent oppe gaunze Welt veeent. Biejlikj Friedach, dän 19. Aprell 2019, kunnen de Zeijen oppe gaunze Welt een Video met dän Varsch fa dän Dach seenen. Un dänselwjen Owent kjeemen 20 919 041 toop toom aun Jesus sienen Doot denkjen. Es daut nich eene groote Iea, aul dit besondre to seenen un doa mettomoaken? Wan wie doaräwa nodenkjen, dan well wie secha flietich prädjen!

7. Woo halpt Jesus sien Biespel ons, daut wie ons nich auflenkjen loten?

⁷ Wan wie Jesus sien Biespel nodoonen, dan woat ons daut uk halpen, daut wie ons nich soo leicht von daut prädjen auflenkjen loten. Hee stunt emma fa de Woarheit en un leet sikj von nuscht aufhoolen (Joh. 18:37). Hee leet sikj daut nich jankren, aus de Soton am “aule Kjennichsrikjs un äare Pracht opp de Ieed” wees ooda aus aundre am wullen toom Kjennich moaken (Mat. 4:8-9; Joh. 6:15). Hee wia uk nich no daut Rikjtum hinjaraun un haud uk nich Angst, aus se am sea vefoljden (Luk. 9:58; Joh. 8:59). Wan ons Gloowen aufjeprooft woat, dan kaun dän Apostel Paulus sien Rot ons halpen, ons nich auflenkjen to loten. Hee rod ons too, daut wie sullen Jesus sien Biespel nodoonen un “nich meed un mootloos woaren”! (Heb. 12:3).

8. Waut deit een jeduldja Mensch, un wuarom sell wie besonda nu jeduldich sennen?

⁸ Een jeduldja Mensch luat ruich, bat sikj eene Loag endat. Wie motten jeduldich sennen, wan wie doano luaren, daut eene schwieeje Loag äwajeit ooda daut doa waut goodet kjemt, waut wie ons aul lang wenschen. De Profeet Habakuk wenscht sikj, daut de Menschen en Juda nich mea soo grausom wieren (Hab. 1:2). Un Jesus siene Jinja hopten, “daut daut Gottesrikj fuaz komen wudd” un an von de Reema friemoaken wudd (Luk. 19:11). Wie luaren aul sea doano, daut Gott sien Kjennichrikj aulet schlajchte oppriemen woat un eene niee Welt brinjen woat, wua aules woat jerajcht sennen (2. Pet. 3:13). Oba wie motten jeduldich luaren, bat daut fa Jehova de rajchte Tiet es. See wie mol, woo Jehova ons lieet, jeduldich to sennen.

9. Aun waut es daut to seenen, daut Jehova jeduldich es?

⁹ Jehova jeft ons daut baste Biespel fa Jedult. Hee jeef Noah jenuach Tiet, daut hee kunn dän Noahkausten buen un “Jerajchtichkjeit [prädjen]” (2. Pet. 2:5; 1. Pet. 3:20). Un aus Jehova de schlajchte Menschen en Sodom un Gomorra venichten wull un Abraham am emma wada Froagen stald, horcht Jehova dän jeduldich too (1. Mo. 18:20-33). Hee wia uk joarenlank sea jeduldich met de ojjehuarsome  Israeliten (Neh. 9:30-31). Un Jehova es uk vondoag dän Dach jeduldich, wiels hee aulem, waut hee no sikj trakjt, jenuach Tiet jeft toom “sikj oppmoaken” (2. Pet. 3:9; Joh. 6:44; 1. Tim. 2:3-4). Daut wiest ons, daut wie uk sellen jeduldich sennen, wan wie prädjen un lieren. Jehova lieet ons uk derch een Jlikjnis en sien Wuat, jeduldich to sennen.

10. Waut kjenn wie von daut Jlikjnis ut Jakobus 5:7-8 lieren?

¹⁰ Läs Jakobus 5:7-8. Daut Jlikjnis von dän Foarma, waut akren deit, wiest ons, woo wie kjennen jeduldich sennen. Eenje Plaunten waussen bosich. Oba bie de mieeschte Plaunten dieet daut lenja, besonda wan dee Frucht droagen. De Waustiet en Israel wia sas Moonat. De Foarma deeden no dän tiedjen Räajen em Hoafst plaunten un no dän loten Räajen em Farjoa arnten (Mar. 4:28). Daut wudd goot sennen, wan wie uk soo jeduldich wieren aus de Foarma. Oba daut es nich emma leicht.

11. Woo woat jeduldich sennen ons em Deenst halpen?

¹¹ Onvolkomne Menschen felt daut foaken schwoa to luaren. Wan wie en onsen Goaden waut akren wellen, dan mott wie ons doa uk eene Tietlank emma om kjemren – wie motten de Ieed opplokren, plaunten, weeden un wesren. Un wan wie Jinja moaken wellen, dan mott wie ons uk aunstrenjen. Daut brukt Tiet, wan wie onse Bibelschiela lieren wellen, kjeenen Unjascheet to moaken un leeftolich to sennen. Jeduldich sennen woat ons halpen, daut wie nich mootloos woaren, wan de Menschen nich no ons horchen. Un mau rajcht dan, wan dee no ons horchen, mott wie jeduldich sennen. Wie kjennen een Bibelstudium nich  bemotten, em jeisteljen verauntokomen. Nich mol Jesus siene Jinja kunnen emma fuaz vestonen, waut hee dee lieed (Joh. 14:9). Well wie emma em Denkj hoolen, daut wie plaunten un wesren doonen, oba Gott lat daut waussen (1. Kor. 3:6).

12. Woo kjenn wie jeduldich sennen, wan wie ons Frintschoft Zeichnis jäwen?

¹² Veleicht es ons daut schwoa, jeduldich to sennen, wan wie ons Frintschoft Zeichnis jäwen. Dan kaun de Gruntsauz ut Liera 3:7 ons halpen. Doa sajcht daut: “Stell sennen haft siene Tiet, räden haft siene Tiet.” Wie kjennen derch ons goodet Benämen Zeichnis jäwen, oba wie sellen uk emma no Jeläajenheiten sieekjen, äwa de Woarheit to räden (1. Pet. 3:1-2). Wie doonen flietich prädjen un lieren, oba wie sent met aulem jeduldich, uk met ons Frintschoft.

13-14. Wäa es een goodet Biespel fa jeduldich sennen?

¹³ Wie kjennen von true Menschen ut de Bibeltiet un ut onse Tiet lieren, jeduldich to sennen. Habakuk luad sea, daut daut schlajchte mol een Enj nämen sull, oba hee bleef jeduldich un säd: “Ekj go aus Wajchta no miene Städ oppem Torm un kjikj” (Hab. 2:1). De Apostel Paulus säd, daut hee sikj wenscht, sienen “Deenst [to] verechten”. Oba hee bleef jeduldich un deed wieda “fa daut Evangelium” enstonen (Apj. 20:24).

¹⁴ Well wie mol seenen, waut een Ehepoa beläwd, waut en de Gilead-School wieren. Dee worden no een Launt jeschekjt, wua de mieeschte nich aun Jesus jleewden un wua daut mau een poa von Jehova siene Zeijen jeef. Nich väl Menschen wullen doa de Schreft studieren. Äare Schoolpoatna von de Gilead-School, waut en aundre Lenda deenden, schreewen an emma wada, met woo väl see doa fein de Bibel studieren kunnen. Oba daut Ehepoa bleef jeduldich un jeef nich opp, wan daut doa, wua see prädjen deeden, uk mau sacht wiedakjeem. Doa wieren mau weinich, waut an toohorchten, oba no acht Joa leet sikj dan eent von äare Bibelstudiums deepen. Waut kjenn wie von dit Ehepoa un von de true Menschen ut de Bibeltiet lieren? Dee leeten nich no un hieeden nich opp, un Jehova beloond an fa äare Jedult. Well wie ons “dee toom Väabilt [nämen], dee derch äa jeduldich sennen, daut jekjräajen haben, waut an vesproaken wia”! (Heb. 6:10-12).

15. Waut es eent, woo de Gloowen ons halpt, daut wie nich oppjäwen?

¹⁵ Wie jleewen selfst aun daut, waut wie prädjen, un doawäajen well wie doa met soo väl Menschen aus mäajlich äwa räden. Wie veloten ons opp daut, waut Gott sien Wuat vesprakjt (Psa. 119:42; Jes. 40:8). Wie haben daut selfst beläft, woo de biblische Profezeiungen sikj erfellen. Un wie haben jeseenen, woo de Menschen äa Läwen bäta woat, wan dee sikj aun dän Rot ut de Schreft hoolen. Doawäajen sent wie ons gaunz secha, daut jieda eena de goode Norecht von daut Kjennichrikj hieren mott.

16. Waut sajcht Psalm 46:2-4, un woo halpt de Gloowen aun Jehova un Jesus ons, wiedatoprädjen?

¹⁶ Wie jleewen aun Jehova, von dän de goode Norecht kjemt, waut wie prädjen. Un wie jleewen uk aun Jesus, dän Jehova aus Kjennich aunjestalt haft (Joh. 14:1).  Jehova woat ons emma Schutz un Krauft jäwen, endoont waut doa oppkjemt (läs Psalm 46:2-4). Un wie veloten ons uk doaropp, daut Jesus daut Prädichtwoakj von utem Himmel leiden deit un daut Jehova am väl Krauft un Macht jejäft haft (Mat. 28:18-20).

17. Wuarom sell wie wiedaprädjen? Jeff een Biespel.

¹⁷ Wie weeten nich emma, woo Jehova ons säajnen woat. Oba wan wie Gloowen haben, dan sent wie ons secha, daut hee daut doonen woat, wan wie biem prädjen ons bastet doonen (Liera 11:6). Jieda Dach seenen biejlikj dusende Menschen onse Bieekjadeschen un Bieekjakrotasch. Deit daut waut aun de Menschen? Gaunz secha! Em Königreichsdienst von Nowamba 2014 räd daut von eene junge Mejal, waut no de Uniwersität jinkj. Dee wull eenen Berecht äwa Jehova siene Zeijen schriewen. See wist nich, wua een Vesaumlungshus wia, oba doa bie de Uniwersität sach see eenen Bieekjadesch un kunn sikj doa waut metnämen, waut ar holp äaren Berecht to schriewen. Met de Tiet leet see sikj deepen un es nu Pionia. Soont aus dit halpt ons mootich wiedatoprädjen, wiels daut es to seenen, daut doa noch emma Menschen sent, waut de goode Norecht hieren motten.

18. Wuarom kjenn wie ons secha sennen, daut daut Prädichtwoakj woat to de rajchte Tiet volbrocht sennen?

¹⁸ Wie kjennen ons secha sennen, daut daut Prädichtwoakj woat to de rajchte Tiet volbrocht sennen. Soo wia daut uk bie Noah. Doa wees sikj daut ut, daut Jehova emma aules to de rajchte Tiet deed. Jehova bestemd aul ojjefäa 120 Joa em verut, wanea de Sintflut aunfangen wudd. Joaren lota säd Jehova to Noah, daut hee de Arche buen sull. Rom 40 ooda 50 Joa ea de Sintflut aunfunk, schauft Noah sea. De Menschen wullen nich horchen, oba hee prädijd wieda, bat Jehova säd, daut hee de Tieren sull en de Arche nenbrinjen. Un krakjt to de rajchte Tiet muak Jehova dan “de Däa hinja an too” (1. Mo. 6:3; 7:1-2, 16).

19. To waut kjenn wie ons freien, wan wie nich oppjäwen?

¹⁹ Boolt woat Jehova ons daut weeten loten, daut daut prädjen von de goode Norecht to Enj es. Hee woat dän Soton siene Welt venichten un eene jerajchte niee Welt brinjen. Well wie bat dan Noah, Habakuk un aundre nodoonen, waut nich oppjeewen. Well wie ons nich auflenkjen loten un jeduldich sennen un onsen Gloowen stoakj hoolen aun aules, waut Jehova vesproaken haft.