1-2. Waut sull Timotäus no 1. Timotäus 6:20 no doonen?

WAUT doo wie foaken, wan wie waut wieetvollet haben? Wie froagen aundre, aus dee doano oppaussen wellen. Doawäajen hab wie biejlikj ons Jelt enne Bank. Un wie veloten ons doaropp, daut et doa secha es un nich veloaren jeit ooda jestolen woat. Wie vestonen, waut daut meent, wan wie eenen aundren waut wieetvollet aunvetruen.

² Läs 1. Timotäus 6:20. De Apostel Paulus säd, daut Timotäus waut wieetvollet jekjräajen haud, wiels hee wist, waut Gott sikj met de Menschen väajenomen haud. Timotäus haud uk de wieetvolle Oppgow jekjräajen “daut Wuat” to prädjen un sienen Deenst soo to doonen, “aus daut eenem Evangelisten tookjemt” (2. Tim. 4:2, 5). Paulus säd to Timotäus, daut hee daut sull secha hoolen, waut Gott am aunvetrut haud. Soo aus Timotäus hab wie uk waut wieetvollet jekjräajen. Waut es daut? Un wuarom mott wie no daut wieetvolle oppaussen, waut Jehova ons aunvetrut haft?

3-4. Wuarom es de biblische Woarheit soo wieetvoll?

³ Jehova lat ons de wieetvolle Woarheit ut sien Wuat vestonen. Wie räakjnen dee väl, wiels dee wiest ons, woo wie kjennen Frind sennen met Jehova un waut ons werkjlich schaftich moakt. Wan wie de Woarheit aunnämen, dan moakt ons daut von faulsche Lieren frie un von een orreinet Läwen (1. Kor. 6:9-11).

⁴ Wuarom es de Woarheit ut de Schreft noch wieetvoll? Wiels Jehova doano jeseenen haft, daut bloos de Deemootje dee vestonen kjennen, waut “rajcht enjestalt” sent (Apj. 13:48, NW). Soone Menschen es daut kloa, daut Jehova ons  vondoag dän Dach derch dän truen, weisen Kjnajcht lieet (Mat. 11:25; 24:45). Daut jeft nuscht, waut wieetvolla es aus de Woarheit, un wie kjennen dee nich auleen vestonen (Spr. 3:13, 15).

5. Waut haft Jehova ons noch jejäft?

⁵ Jehova haft ons uk de feine Oppgow jejäft, aundre äwa am to lieren un waut hee sikj väajenomen haft (Mat. 24:14). Dise Norecht es soo wieetvoll, wiels dee de Menschen halpen kaun, Poat von Jehova siene Famielje to woaren un noch mol eewich to läwen (1. Tim. 4:16). Wie halpen bie daut wichtichste Woakj met, waut daut nu jeft, endoont aus wie väl ooda weinich prädjen kjennen (1. Tim. 2:3-4). Daut es werkjlich eene groote Iea, daut wie kjennen Gott siene Metoabeida sennen! (1. Kor. 3:9).

6. Waut wort met eenje, waut nich väasechtich wieren?

⁶ Eenje en Timotäus siene Tiet räakjenden daut nich väl, daut see kunnen Gott siene Metoabeida sennen. Demas biejlikj schauft nich mea met Paulus toop em Deenst, wiels hee dise Welt soo goot jeworden wia (2. Tim. 4:10). Fiegelus un Hermogenes hieeden met äaren Deenst opp, wiels dee woomäajlich Angst hauden, daut see krakjt soo sea wudden vefolcht woaren aus Paulus (2. Tim. 1:15). Un Hiemenäus, Alexanda un Filetus hieeden opp, Jehova to deenen, un follen vom Gloowen auf (1. Tim. 1:19-20; 2. Tim. 2:16-18). Daut sitt soo, daut dee aula mol stoakj em Gloowen wieren, oba met de Tiet räakjenden dee daut nich mea soo väl, waut Gott an jejäft haud.

7. Woo prooft de Soton, ons opp siene Sied to kjrieen?

⁷ Woo well de Soton ons bat doa brinjen, daut wie daut nich mea väl räakjnen, waut Jehova ons jejäft haft? De Soton prooft veschiednet. Hee brukt biejlikj Tietvedrief, Lässtoff, daut Internet un Films, om waut aun ons denkjen un aun ons Vehoolen to doonen. Un opp dee Wajch well dee ons soo bie sacht von de Woarheit aufbrinjen. Hee well uk, daut wie Menschenforcht haben ooda ons fa Vefoljunk ferchten un doaderch opphieren to prädjen. Un hee well uk, daut wie de Woarheit veloten, wiels wie no Aufjefolne horchen, waut väajäwen, “daut see väl weeten” (1. Tim. 6:20-21).

8. Waut lia wie von daut, waut Daniel beläwd?

⁸ Wan wie nich oppaussen, dan kjenn wie soo bie sacht von de Woarheit aufkomen. Soo jinkj daut eenen Brooda, waut Daniel * heet un sea jleicht Videogäms to  spälen. Hee sajcht: “Ekj funk aun, Videogäms to spälen, aus ekj ojjefäa tieen Joa wia. Aum Aunfank späld ekj soone Gäms, wua nuscht met orrajcht wia. Oba lota späld ekj uk soone, waut met Jewault ooda Zaubarie to doonen hauden.” Met de Tiet späld Daniel jieda Dach ojjefäa 15 Stund Videogäms. Hee sajcht: “En mie wist ekj, daut ekj emma wieda von Jehova aufkjeem, wiels daut nich feine Gäms wieren un wiels ekj doa too väl Tiet nenspend. Oba ekj bild mie en, daut de biblische Gruntsauzen nich fa mie wieren.” Wan wie nich oppaussen, dan kaun ons Tietvedrief ons leicht bat doa brinjen, daut wie von de Woarheit aufkomen. Un dan vespäl wie aul daut wieetvolle, waut Jehova ons aunvetrut haft.

9. Met wäm vejlikjt Paulus Timotäus, soo aus 1. Timotäus 1:18-19 sajcht?

⁹ Läs 1. Timotäus 1:18-19. Paulus vejlikjt Timotäus met eenen Soldot un säd, daut hee “dän Kaumf fa dän Harn” kjamfen sull. Daut wia een jeistelja Kjrich. En waut fa Stekjen sent Christen soo aus Soldoten, waut Kjrich fieren? Woo mott wie sennen, daut wie kjennen Christus siene Soldoten sennen? Well wie mol fief Sachen seenen, waut wie von Paulus sien Jlikjnis lieren kjennen. Daut kaun ons halpen, daut wie nich von de Woarheit aufkomen.

10. Waut bediet daut, sikj en “jetliche Dinja” to eewen, un wuarom es daut needich?

¹⁰ Eew die doarenn, fa Gott to läwen. Een feina Soldot es tru. Dee strenjt sikj em Kjrich sea aun, wiels hee de Menschen ooda Sachen beschitzen well, waut hee väl räakjent. Paulus rod Timotäus too, daut dee sikj en “jetliche Dinja” eewen sull (1. Tim. 4:7). Daut bedied, daut Timotäus daut lieren sull, Jehova truhoatich to leewen un fa am to läwen. Je mea wie Gott räakjnen un am jefaulen wellen, je dolla woa wie de Woarheit wellen fausthoolen (1. Tim. 4:8-10; 6:6).

11. Wuarom mott wie ons aunstrenjen?

¹¹ Strenj die aun, daut rajchte to doonen. Een Soldot mott sikj sea aunstrenjen, daut hee emma reed es fa dän Kjrich. Timotäus bleef em jeisteljen stoakj, wiels hee Paulus sienen Rot nokjeem. Hee strenjd sikj sea aun, orrajchte Wenschen utem Wajch to gonen un no goode Ieejenschoften to sträwen un met siene Gloowesbreeda toop to sennen (2. Tim. 2:22). Daut wia nich emma leicht. Wie motten ons uk aunstrenjen, daut wie dän Kaumf jewennen jäajen onse orrajchte Wenschen (Reem. 7:21-25). Un wie motten wieda doaropp schaufen, von dän oolen Mensch loostokomen un niee Menschen to woaren (Efs. 4:22-24). Un wan wie zeowes meed sent, dan mott wie ons daut eenjemol schia bemotten, daut wie noch no de Toopkomes wanken (Heb. 10:24-25).

12. Woo kjenn wie ons doarenn vebätren, de Schreft rajcht to brucken?

¹² Een feina Soldot mott pinkjlich eewen, daut hee sien Kjrichsjereetschoft rajcht brucken kaun. Un wie motten daut uk lieren, Gott sien Wuat rajcht to brucken (2. Tim. 2:15). Daut lia wie biejlikj bie onse Toopkomes. Oba daut wie aundre daut wiesen kjennen, woo wieetvoll de Woarheit ut de Schreft es, mott wie uk pinkjlich fa ons selfst studieren. Wie motten Gott sien Wuat brucken, om ons em Gloowen to stoakjen. Daut rieekjt nich too, bloos de Schreft to läsen. Wie motten uk äwa daut nodenkjen, waut wie läsen, un ons en onse Bieekja waut nosieekjen, daut wie de Schreft rajcht vestonen un utlajen kjennen (1. Tim. 4:13-15). Dan woa wie uk aundre met de Schreft lieren  kjennen. Wie sellen dee nich bloos Bibelvarzh väaläsen. Wie wellen dee uk halpen, daut dee de Varzh vestonen un weeten, woo see daut nokomen kjennen. Wan wie pinkjlich de Schreft studieren, dan woa wie aundre emma bäta met Gott sien Wuat lieren kjennen (2. Tim. 3:16-17).

13. Woo halpt Hebräa 5:14 ons, väasechtich to sennen?

¹³ Sie väasechtich. Een Soldot mott doa em verut äwa nodenkjen, wua doa eene Jefoa sennen kaun, un dee dan utem Stich gonen. Krakjt soo mott wie daut lieren, opptopaussen, aus ons waut schoden kaun, un daut dan utem Stich gonen (Spr. 22:3; läs Hebräa 5:14). Wie motten biejlikj sea oppaussen, waut fa Tietvedrief wie haben. Em Tellewizhen ooda en Films kjricht eena foaken waut orreinet to seenen. Jehova jleicht soont nuscht un daut woat ons sea schoden, wan wie no soowaut kjikjen. Doawäajen lot wie aulen Tietvedrief toch, waut ons soo bie sacht von Gott aufbrinjen kaun (Efs. 5:5-6).

14. Waut wort Daniel en, un waut deed hee doamet?

¹⁴ Daniel, wua wie aul ea von jerät haben, wort daut en, woo schlajcht daut wia, Videogäms to spälen, waut met Jewault ooda met Zaubarie to doonen hauden. Hee socht sikj dan en de Watchtower Library waut no, waut am met sienen Trubbel holp. Waut deed daut aun am? Hee hieed opp, schlajchte Gäms to spälen. Un hee muak sikj loos von de Gäms em Internet, wua hee sikj enjeschräwen haud, un deed nich mea met aundre toop spälen. Daniel sajcht: “Ekj funk aun, buten to sennen un met de Frind von de Vesaumlunk waut to doonen, enne Städ Videogäms to spälen.” Un nu es Daniel een Pionia un een Eltesta.

15. Wuarom sent de Aufjefolne äare oppjemoakte Jeschichten soo jefäadlich?

¹⁵ Krakjt soo aus Timotäus mott wie uk doaraun denkjen, woo jefäadlich de Aufjefolne äare Läajes sent (1. Tim. 4:1, 7; 2. Tim. 2:16). Veleicht moaken dee Jeschichten opp äwa onse Breeda ooda wellen ons enbillen, daut wie ons nich opp Jehova siene Organisazion veloten kjennen. Soone Läajes kjennen ons em Gloowen schwak moaken. Wie motten oppaussen, daut wie ons nich teischen loten. Wuarom? Wäajen soone Jeschichten komen von “Menschen, dee em denkjen vedunkelt sent, un de Woarheit nich haben”. Dee sent bloos  opp strieden (1. Tim. 6:4-5). Dee wellen, daut wie äare Läajes jleewen un schlajcht äwa onse Breeda denkjen.

16. Von waut sell wie ons nich auflenkjen loten?

¹⁶ Lot die nich auflenkjen. Aus “een gooda Soldot fa Christus Jesus” must Timotäus sienen Deenst em Uag hoolen. Hee sull nich no daut tietelje ooda no aundret sträwen (2. Tim. 2:3-4). Krakjt soo aus Timotäus sell wie ons uk nich von daut tietelje auflenkjen loten. “De Freid aum Rikjtum” kaun daut bat doa brinjen, daut wie Jehova un sien Wuat nuscht mea räakjnen un daut wie opphieren, met aundre doaräwa to räden (Mat. 13:22). Wie motten ons Läwen eefach hoolen un onse Tiet un Krauft brucken, om “daut ieeschte no Gott sien Rikj” to sieekjen (Mat. 6:22-25, 33).

17-18. Waut kjenn wie doonen, daut wie nich em jeisteljen Schoden lieden?

¹⁷ Sie reed, fuaz waut to doonen. Een Soldot mott em verut plonen, woo hee sikj beschitzen kaun. Wan wie daut fausthoolen wellen, waut Jehova ons aunvetrut haft, dan mott wie fuaz waut doonen, wan wie eene Jefoa seenen. Waut kaun ons doabie halpen? Wie motten em verut plonen, waut wie doonen woaren, wan doa waut oppkjemt.

¹⁸ See wie mol een Jlikjnis. Ea een grootet Toopkomen aunfangt, woat doa foaken bekauntjemoakt, daut de Toohiera doano kjikjen sellen, wua de Däaren sent. Wuarom? Daut see doa bosich rutkomen, wan doa eene Jefoa oppkjemt. Biejlikj soo kjenn wie daut em verut plonen, waut wie doonen woaren, wan wie em Tellewizhen, em Internet ooda en eenen Film met eenst waut seenen, waut orrein ooda sea grausom ooda von Aufjefolne es. Wan wie ons fa soont reedmoaken, dan kjenn wie fuaz waut doonen, daut wie nich em jeisteljen Schoden lieden un daut Jehova ons wieda fa rein talen kaun (Psa. 101:3; 1. Tim. 4:12).

19. Waut fa goodet woa wie beläwen, wan wie no daut oppaussen, waut Jehova ons jejäft haft?

¹⁹ Wie motten no daut oppaussen, waut Jehova ons jejäft haft. Daut es biejlikj de wieetvolle Woarheit ut de Schreft un daut wie aundre doavon vetalen kjennen. Dan woa wie een reinet Jewessen haben un een Läwen, waut opp iernst waut enhelt, un wie woaren ons uk freien, daut wie aundre halpen kjennen, Jehova kjanen to lieren. Hee woat ons halpen, daut wie no daut oppaussen kjennen, waut hee ons aunvetrut haft (1. Tim. 6:12, 19).