1-2. (a) Woo sell wie no Spricha 16:31 no äwa onse elre Gloowesbreeda denkjen? (b) Waut vonne Froagen woa wie en disen Artikjel unjasieekjen?

EN EENE Jäajent en Arkansas en de Stäts kaun eena eenjemol oppe Ieed wieetvolle Diamaunten seenen. Oba wiels dee noch nich trajchtjeschnäden ooda beschläpen sent, woaren väle goanich en, woo wieetvoll dee sent, un gonen eefach bloos wieda.

² Onse elre Breeda un Sestren sent en jewesse Stekjen soo aus dise Diamaunten. Dee sent sea wieetvoll, un Gott sien Wuat sajcht, daut dee äare greiwe Hoa soo aus eene Kroon sent (läs Spricha 16:31; 20:29). Oba eena wudd dee leicht kjennen äwaseenen. Wan de Jinjre enwoaren, woo wieetvoll de Elre sent, dan kjennen dee waut kjrieen, waut noch väl mea wieet es aus diere Steena. En disen Artikjel woa wie dree Froagen unjasieekjen: Wuarom sent de elre Breeda un Sestren väl wieet bie Jehova? Waut vonne wichtje Oppgow haben dee en Gott sien Volkj? Un waut kjenn wie doonen, daut wie väl von dee lieren kjennen?

3. Wuarom sent de elre Breeda un Sestren no Psalm 92:13-16 no bie Jehova väl wieet?

³ De elre Breeda un Sestren sent bie Jehova Gott väl wieet. Hee weet, waut vonne Menschen dee sent,  un räakjent dee äare goode Sieden väl. Hee weet, daut dee en aul de Joaren, waut see am aul tru deenen, väl Weisheit jekjräajen haben, un freit sikj, wan see de Jinjre doavon lieren (Hiob 12:12, NW; Spr. 1:1-4). Jehova räakjent daut uk väl, daut dee am tru bliewen (Mal. 3:16). Dee hauden väl Schwierichkjeiten, oba dee sent kjeenmol em Gloowen schwak jeworden. Äare Hopninj es nu noch fausta aus dan, aus see de Woarheit kjanen lieeden. Un Jehova leeft an, wiels dee “noch en de oole Joaren” sienen Nomen bekauntmoaken (läs Psalm 92:13-16).

4. Waut kaun de elre Breeda un Sestren Troost jäwen?

⁴ Wan du aul ella best, dan kaust du die secha sennen, daut Jehova daut em Denkj helt, waut du ea aul jedonen hast (Heb. 6:10). Hee freit sikj, daut du soo flietich prädjen deetst. Du hast kjlandre un jratre Trubbels utjehoolen, stunst fa daut en, waut de Schreft fa rajcht tald, hautst väl Veauntwuatunk en sien Volkj un deetst aundre utlieren. Du deetst dien bastet, om aul de Endrungen to unjastetten, waut et en Jehova siene Organisazion jeef. Du deetst uk de Voltietdeena unjastetten un dee Moot toospräakjen. Jehova leeft die sea, wiels du soo tru best, un hee vesprakjt, daut hee “siene heilje [ooda true] nich veloten” woat (Psa. 37:28). Hee vesechat ons uk: “Ekj . . . woa junt droagen bat jie greiwe Hoa kjrieen” (Jes. 46:4). Wan du nu ella best, meent daut dan, daut du en Jehova sien Volkj nu nich mea soone wichtje Oppgow hast? Doch, du hast.

5. Aun waut sellen de Elre denkjen?

⁵ De Elre kjennen väl fa Jehova sien Volkj doonen. Veleicht haben dee nich mea soo väl Krauft aus ea, oba met de Joaren haben dee sea väl Erfoarunk jekjräajen. Nu woa wie ons mol waut Biespels von de Bibeltiet un von de vondoagsche Tiet unjastonen, waut wiesen, daut dee noch väl fa Jehova doonen kjennen.

6-7. Woo beloond Jehova en de Bibeltiet Elre, waut am deenden?

 ⁶ En de Schreft läs wie von true Menschen, waut Jehova flietich deenden, wan dee uk aul ella wieren. Moses wia biejlikj rom 80 Joa, aus hee Jehova sien Profeet un de Leida von daut Volkj Israel wort. Un Daniel wia noch emma Jehova sien Profeet, wan hee uk aul äwa 90 Joa wia. Un de Apostel Johanes wia woomäajlich uk enne 90, aus hee de Openboarunk oppschreef.

⁷ Een deel aundre von Jehova siene Deena wieren nich sea bekaunt un eena wudd leicht von dee vejäten kjennen. Oba Jehova sach dee aula un beloond dee, wiels dee soo tru wieren. De Schreft rät biejlikj nich väl von dän truen Simeon, “dee Gott ferchten deed”. Oba Jehova kjand dän goot un jeef dän de Iea, daut dee dän kjlienen Jesus seenen kunn un von dän un dän siene Mame profezeien (Luk. 2:22, 25-35). Un doa wia uk de Profeetin Hana. Dee wia 84 Joa un eene Wätfru. See wankt pinkjlich nom Tempel un Jehova beloond ar doafäa, wiels hee ar doa dän kjlienen Jesus seenen leet. Jehova räakjend Simeon un Hana sea väl (Luk. 2:36-38).

8-9. Waut kjennen de Wätfrues fa Gott sien Volkj doonen?

⁸ En de vondoagsche Tiet jeft daut uk väl true elre Gloowesbreeda, waut een feinet Biespel fa de Jinjre sent. Eent von dee es Sesta Lois Didur. See wia 21 Joa, aus see en Kanada Sondapionia wort. Lota reisd see met äaren Maun John toop väl Joaren, wiels dee reisenda Oppsechta wia. Lota deenden see dan äwa 20 Joa en Kanada em Betel. Un aus Lois 58 Joa wia, fruagen se John un ar, aus see nich wudden wellen en de Ukraine deenen. Deeden dee daut ooda dochten dee, daut dee aul too oolt wieren toom em Utlaunt deenen? See trocken no de Ukraine un John wia doa em Betelkommitee. No säwen Joa storf dee dan, oba Lois wort sikj eenich, doa to bliewen. Nu es see aul 81 Joa un deent noch emma tru met de Betelfamielje en de Ukraine toop Jehova, un dee räakjnen ar doa aula sea väl.

⁹ Wätfrues, soo aus Lois, kjrieen veleicht nich mea soo väl Oppmoakjsomkjeit, aus see ea kjrieejen, aus äa Maun noch läwd. Oba dee sent doawäajen noch krakjt soo väl wieet. Jehova schazt de Sestren sea, waut äaren Maun joarenlank unjastetten deeden un waut am nu wieda tru deenen (1. Tim. 5:3). Dee äa Biespel jeft uk de Jinjre väl Moot.

10. Wuarom es Tony soon goodet Biespel?

¹⁰ Aul de elre Breeda un Sestren, waut  em Aultenheim sent, sent uk sea wieetvoll. Eent von dee es Tony. Hee leet sikj en August 1942 en Pennsylvanien en de Stäts deepen, aus hee 20 Joa wia. Nich lang no daut wort hee fa tweeunhaulf Joa enjestopt, wiels hee nich wull Soldot sennen. Dan trocken hee un siene Fru Hilda twee Kjinja en de Woarheit opp. Met de Joaren wia Tony en dree veschiedne Vesaumlungen de Leida von de Eltestasch (nu heet daut Plona von de Eltestasch) un hee wia uk Kongressoppsechta. Hee kunn uk en een Jefenkjnis Toopkomes aufhoolen un met de Menschen doa de Bibel studieren. Nu es hee 98 Joa, oba hee lat nich no. Tony deit wieda sien bastet, om Jehova to deenen un fein met siene Vesaumlunk tooptoschaufen.

11. Woo kjenn wie wiesen, daut wie deejanje väl räakjnen, waut em Aultenheim sent?

¹¹ Woo kjenn wie elre Breeda un Sestren ieren, waut em Aultenheim sent? Wan daut mäajlich es, dan kjennen de Eltestasch dee halpen, daut dee no de Toopkomes wanken kjennen ooda sikj dee aunhorchen ooda daut dee prädjen kjennen. Wie kjennen dee uk besieekjen ooda äwa Internet met dee vetalen toom wiesen, daut wie om dee bekjemmat sent. Besonda well wie om soone Elre bedocht sennen, waut wiet auf von äare Vesaumlunk en een Aultenheim sent. Wan wie nich oppaussen, dan wudd wie leicht von soone vejäten kjennen. Fa eenje elre Breeda un Sestren es daut nich leicht, von sikj selfst to räden, ooda dee denkjen, daut daut nich paussent es. Oba wie woaren väl Moot kjrieen, wan wie ons de Tiet nämen, dee Froagen to stalen un dee goot tootohorchen, wan dee von aul daut goode vetalen, waut dee en Jehova sien Volkj aul beläft haben.

12. Waut fa Breeda un Sestren kjenn wie en onse Vesaumlunk finjen?

¹² Veleicht sent wie äwarauscht, waut vonne true elre Breeda daut en onse Vesaumlunk jeft. Eene Sesta, waut Harriette heet, deend Jehova joarenlank tru en äare Vesaumlunk en New Jersey, Stäts. Dan trock see no äare Dochta. De Breeda en de niee Vesaumlunk neemen sikj de Tiet ar kjanen to lieren un worden en, waut vonne feine Sesta see wia. See spruak an Moot too un vetald an, woo se en de 1920ja Joaren prädjen deeden, aus see de Woarheit kjanen lieed. To jane Tiet neem see emma eene Tänenborscht met, wan see prädjen jinkj, daut see reed wia, wan se ar enstoppen wudden. Un aune 1933 stopten se ar dan werkjlich tweemol fa eene Wäakj em Jefenkjnis. Äa Maun deend Jehova nich, oba dee kjemmad sikj en dee Tiet om äare dree kjliene Kjinja un unjastett ar. Soone true Breeda un Sestren aus Harriette haben daut vedeent, daut wie an väl räakjnen!

13. Wuarom sent de Elre en Jehova sien Volkj soo väl wieet?

¹³ De elre Breeda un Sestren haben eene wichtje Oppgow en Jehova sien Volkj. Dee haben jeseenen, woo Jehova siene Organisazion un an selfst opp veschiedne Wäaj jesäajent haft. Dee haben uk väl von äare ieejne Fäla jelieet. Dee sent soo aus eene “Weisheitskjwal”, wua wie väl von lieren kjennen (Spr. 18:4). Wan wie ons de Tiet nämen, dee kjanen to lieren, dan woa wie em Gloowen stoakja woaren un väl goodet lieren kjennen.

14. Waut woat de Jinjre en 5. Mose 32:7 toojerot?

¹⁴ Räd met de Elre (läs 5. Mose 32:7). Veleicht kjennen dee nich mea soo fein seenen ooda gonen un äare Stemm es uk aul schwaka. Oba em Hoat sent dee noch emma junk un dee sent bie Jehova “goot aunjeseenen” (Liera 7:1). Denkj doaraun, wuarom Jehova dee soo väl räakjent, un wies dee wieda Iea. Sie soo aus Elisa. Dän latsten Dach, aus hee met Elia toop sennen kunn, wull hee dicht bie dän bliewen un säd dreemol to dän: “Ekj velot die nich” (2. Kjen. 2:2, 4, 6).

15. Waut wudd wie de Elre froagen kjennen?

¹⁵ Intressia die fa de Elre un stal dee leeftolich Froagen (Spr. 1:5; 20:5; 1. Tim. 5:1-2). Du wurscht dee biejlikj kjennen froagen: “Wuarom wieescht du die soo secha, daut du de Woarheit jefungen hautst, aus du jinja wieescht?” “Woo haft daut, waut du beläft hast, die jeholpen Jehova noda to komen?” “Waut haft die jeholpen Jehova schaftich to deenen?” (1. Tim. 6:6-8). Un no daut horch dee goot too.

16. Woo kaun de Elre un uk de Jinjre daut halpen, wan dee unjarenaunda vetalen?

¹⁶ Wan een Elra met eenen Jinjren vetalt, dan woat dee daut beid toom gooden sennen (Reem. 1:12). De Jinjre woaren dan noch dankboara doafäa sennen, woo Jehova fa siene true Deena sorcht, un de Elre woaren sikj mea wieet feelen un dee woat daut sea scheen gonen to vetalen, woo Jehova an jesäajent haft.

17. Wuarom woaren de true elre Breeda un Sestren emma wieetvolla?

¹⁷ Daut schmocke vejeit jeweenlich met de Joaren, oba fa Jehova sent siene true Deena jieda Joa mea wieet (1. Tess. 1:2-3). Wuarom es daut soo? Wiels dee sikj aul Joaren von Gott sienen Jeist utlieren un vebätren loten. Wan wie onse leewe elre Breeda un Sestren bäta kjanen lieren, ieren un von dee lieren, dan woaren dee fa ons uk emma wieetvolla woaren.

18. Waut woa wie en dän näakjsten Artikjel seenen?

¹⁸ De Vesaumlunk woat stoakja, wan de Jinjre de Elre väl räakjnen un wan de Elre de Jinjre schazen. En dän näakjsten Artikjel woa wie seenen, woo de Elre wiesen kjennen, daut see de Jinjre von de Vesaumlunk väl räakjnen.