40. ARTIKJEL FA DAUT STUDIUM
“Dee, dee väle to Jerajchtichkjeit brinjen”
“Dee, dee väle to Jerajchtichkjeit brinjen, [woaren dachen] soo aus de Stierns, fa emma un eewich” (DAN. 12:3, NW)
LEET 151 Hee woat de Vestorwne roopen
WAUT WIE SEENEN WOAREN *
1. Waut fa besondret woa wie en daut dusentjoasche Rikj beläwen?
WAUT fa een besondra Dach daut nich woat sennen, wan Menschen hia oppe Ieed aunfangen, vom Doot opptostonen en Christus sien dusentjoaschet Rikj! Wan du wäm em Doot veloaren hast, dan west du dän jieren wada seenen. Un Jehova well daut uk (Hiob 14:15). Denkj mol han, woo schaftich aule oppe Ieed sennen woaren, wan äare leewe Aunjehieeje vom Doot oppstonen woaren. En dän väajen Artikjel hab wie jelieet, daut “de jerajchte”, dee äare Nomes em Läwesbuak sent, “toom Läwen” oppstonen (Apj. 24:15; Joh. 5:29). Veleicht woaren väle von onse leewe Aunjehieeje mank dee sennen, dee daut ieeschte vom Doot oppstonen. * Uk “de ojjerajchte”, wua biejlikj dee mank sent, dee nich de Jeläajenheit hauden toom Jehova kjanen lieren ooda am tru deenen, ea dee storwen, “stonen opp toom jerecht woaren.”
2-3. (a) Woont es daut jratste Liawoakj, waut daut jeemols jäwen woat, wua Jesaja 11:9-10 von rät? (b) Waut woa wie en disen Artikjel derchgonen?
2 Aul dee, waut doa vom Doot oppstonen, woat motten jelieet woaren (Jes. 26:9; 61:11). Doawäajen woat daut jratste Liawoakj derchjefieet woaren, waut daut jeemols jejäft haft (läs Jesaja 11:9-10). Daut es needich, wäajen de Ojjerajchte, waut doa vom Doot oppstonen, woaren motten äwa Jesus Christus, daut Kjennichrikj, daut Leesjelt un Jehova sienen Nomen lieren, uk doaräwa, daut hee de eensja es, dee daut Rajcht haft, to rejieren. Soogoa de Jerajchte woat daut motten jelieet woaren, waut Jehova soo bie sacht äwa sien Väanämen fa de Welt openboat haft. Eenje von dise true Deena sent lang ea jestorwen, ea de Schreft foadich wia. Beid Gruppen, de Jerajchte un de Ojjerajchte, woaren een deel lieren motten.
3 En disen Artikjel woa wie dise Froagen beauntwuaten: Woo woat dit groote Liawoakj derchjefieet woaren? Waut haft dit Liawoakj doamet to doonen, aus de Nomes von daut Läwesbuak fa emma kjennen nenjeschräwen woaren ooda nich? De Auntwuaten opp dise Froagen sent sea wichtich fa ons vondoag dän Dach. Wie woaren seenen, daut de Profezeiungen en daut Bibelbuak Daniel un en de Openboarunk ons halpen kjennen, bäta to vestonen, woo daut woat sennen, wan de Vestorwne vom Doot oppstonen. Daut ieeschte well wie von daut besondre räden, waut en Daniel 12:1-2 verutjesajcht wort.
“DEE . . ., DEE EM STOFF SCHLOPEN, WOAREN OPPWAKJEN”
4-5. Waut lat Daniel 12:1 ons äwa de Enjtiet weeten?
4 Läs Daniel 12:1, NW. * Daut Bibelbuak Daniel lat ons weeten, woo Sachen sikj eent no daut aundre en de Enjtiet romnämen woaren. Daniel 12:1 biejlikj rät von Michael, aulsoo Jesus Christus, “waut fa . . . [Gott sien] Volkj ensteit.” Dit Poat von de Profezeiunk funk sikj aune 1914 aun to erfellen, aus Jesus aus Kjennich von Gott sien himlischet Rikj aunjestalt wort.
5 Oba Daniel wort uk jesajcht, daut Jesus “oppstonen” woat, wan doa woat “soone schwoare Tiet sennen, aus doa noch niemols ea jewast es von dan, aus daut een Volkj jeef”, bat dee Tiet. Dise “schwoare Tiet” es de groote Triebsaul, aulsoo de “groote Liedenstiet”, wua Matäus 24:21 (NW) von rät. Jesus steit opp, ooda woat Gott sien Volkj veteidjen, aum Enj von de schwoare Tiet, daut meent en Harmagedon. En de Openboarunk woaren dee de groote Häad jenant, “dee ut de groote Vefoljunk jekomen” es (Opb. 7:9, 14).
6. Waut passieet, nodäm de groote Häad de groote Liedenstiet äwaläft haft? Laj daut ut. (See uk “Waut Läsa weeten wellen” en dise Utgow, wua daut äwa daut Oppstonen oppe Ieed rät.)
6 Läs Daniel 12:2, NW. * Waut es nodäm, daut de groote Häad de schwoare Tiet äwaläft haft? Dise Profezeiunk rät nich von een bilteljet Oppstonen, aulsoo em jeisteljen wada toom Läwen komen, waut en de latste Tiet sennen woat, soo aus wie daut ea vestunden. * Daut rät hia von daut Oppstonen vom Doot en de niee Welt. Woo weet wie daut? De Wieed “em Stoff” woaren en Hiob 17:16 (NW) uk jebrukt, un doa es daut Grauf met jemeent. Dit wiest, daut Daniel 12:2 von daut Oppstonen rät, waut no de latste Doag un no dän Kjrich von Harmagedon sennen woat.
7. (a) Waut meent daut, daut eenje “to eewjet Läwen” oppstonen woaren? (b) Wuarom saj wie, daut dee “toom bätren Läwen” oppstonen?
7 Waut meent Daniel 12:2 doamet, wan daut sajcht, daut eenje “to daut eewje Läwen” oppstonen woaren? Daut meent, daut dee, waut vom Doot oppstonen un Jehova un Jesus kjanen lieren, ooda dee wieda kjanen lieren un an en de 1 000 Joa jehorchen, woaren daut eewje Läwen kjrieen (Joh. 17:3). Dee stonen opp “toom bätren Läwen” aus dee, waut ieeschtemma wada toom Läwen kjeemen (Heb. 11:35). Wuarom? Wiels dee, waut ieeschtemma oppjewakjt worden, wada storwen musten.
8. Wuarom woaren eenje oppjewakjt “to eewjet veachten un Schaund”?
8 Oba nich aule woaren Jehova siene Belierunk aunnämen. De Profezeiunk en Daniel rät doavon, daut eenje woaren oppstonen “to eewjet veachten un Schaund”. Wiels dee eene schlajchte Enstalunk haben, woat dee äa Nomen nich em Läwesbuak jeschräwen woaren, un dee woaren nich eewjet Läwen kjrieen. Enne Städ daut woaren dee “eewjet veachten” kjrieen un venicht woaren. Daniel 12:2 rät aulsoo doavon, woo daut tolatst met dee utkomen woat, dee vom Doot oppstonen. Daut woat doano utkomen, waut dee doonen, nodäm dee vom Doot oppjestonen sent (Opb. 20:12). * Eenje von dee woaren eewjet Läwen kjrieen un aundre oba nich.
“DEE, DEE VÄLE TO JERAJCHTICHKJEIT BRINJEN”
9-10. Waut woat noch no de groote Liedenstiet passieren, un wäa woat “soo kloa dachen aus de Himmel”?
9 Läs Daniel 12:3, NW. * Waut woat noch no de “schwoare Tiet” komen? Buta daut, waut Daniel 12:2 sajcht, rät Varsch 3 uk noch von waut, waut no de groote Triebsaul, ooda groote Liedenstiet, passieren woat.
10 Wäa woat “soo kloa dachen aus de Himmel”? Wie finjen eenen Hanwies en Matäus 13:43 von Jesus, wua hee sajcht: “Dan woaren de jerajchte en äaren Voda sien Kjennichrikj schienen aus de Sonn”. Hia rät Jesus von dee, “dee toom Himmelrikj jehieren”, siene jesaulwde Breeda, dee met am toop woaren en daut himlische Kjennichrikj deenen (Mat. 13:38). Daniel 12:3 rät aulsoo von de Jesaulwde un waut dee doonen woaren en daut dusentjoasche Rikj.
De 144 000 woaren enj met Jesus toopschaufen un daut groote Liawoakj leiden en de 1 000 Joa (See Varsch 11)
11-12. Waut woaren de 144 000 en de 1 000 Joa doonen?
11 Woo woaren de Jesaulwde “väle to Jerajchtichkjeit brinjen”? De Jesaulwde woaren enj met Jesus Christus toopschaufen un daut groote Liawoakj oppe Ieed aunleiden waut en de 1 000 Joa derchjefieet woat. De 144 000 woaren nich bloos aus Kjennichs rejieren, oba dee woaren uk aus Priesta deenen (Opb. 1:6; 5:10; 20:6). Aus Priesta woaren dee “de Velkja to de Jesuntheit” deenen – aulsoo de Menschheit soo bie sacht volkomen moaken (Opb. 22:1-2; Hes. 47:12). Waut fa eene Freid daut nich woat sennen fa de Jesaulwde!
12 Wäa woat mank de väle sennen, dee to Jerajchtichkjeit jebrocht woaren? Mank dise sent dee, waut vom Doot oppstonen, uk dee, dee Harmagedon äwaläwen, toop met de Kjinja, waut veleicht en de niee Welt jebuaren woaren. Opp Enj von de 1 000 Joa woat aules, waut läft, volkomen sennen. Wanea woaren dee äare Nomes dan fa emma met Tint en daut Läwesbuak jeschräwen un nich met de Bliesteft?
DE LATSTE PROOW
13-14. Waut woaren aule volkomne Menschen oppe Ieed bewiesen motten, ea dee daut eewje Läwen kjrieen?
13 Wie motten em Denkj hoolen, daut volkomen sennen nich meent, daut eena veselfst daut eewje Läwen kjricht. Denkj mol aun Adam un Eva. Dee wieren volkomen, oba dee musten bewiesen, daut dee Jehova Gott jehuarsom wieren, ea daut secha wia, daut see daut eewje Läwen kjrieejen. Daut es schod, oba dee wieren ojjehuarsom (Reem. 5:12).
14 Woo woat daut met de Menschen oppe Ieed sennen opp Enj von de 1 000 Joa? Aule woaren volkomen sennen. Woaren aul dise volkomne Menschen Jehova siene Harschoft fa emma unjastetten? Ooda woaren eenje soo sennen aus Adam un Eva, dee ontru wieren, wan see uk volkomen wieren? Daut woat sikj dan utwiesen. Oba woo?
15-16. (a) Wanea woaren aule Menschen wiesen kjennen, daut see Jehova opprechtich tru sent? (b) Waut woat sikj en de latste Proow utwiesen?
15 De Soton woat fa 1 000 Joa jebungen woaren. En dee Tiet woat dee nich de Jeläajenheit haben, wäm to veleiden. Oba opp Enj von de 1 000 Joa woat de Soton loosjeloten woaren. Dan woat dee proowen, aule volkomne Menschen to veleiden. En dise Proow woaren aule volkomne Menschen oppe Ieed de Jeläajenheit haben, gaunz kloa to wiesen, aus see Gott sienen Nomen achten un siene Harschoft unjastetten (Opb. 20:7-10). Doano, waut dee en dise Proow doonen woaren, woat sikj daut utwiesen, aus äa Nomen fa emma kaun en daut Läwesbuak jeschräwen woaren ooda nich.
16 Eenje Menschen woaren soo sennen aus Adam un Eva un Jehova siene Harschoft aufwiesen. Waut woat met de woaren? Openboarunk 20:15 sajcht: “Wan irjentwäm sien Nomen nich em Läwensbuak jeschräwen stunt, wort dee em Fiasee jeschmäten”. Dise schlajchte Menschen woaren dan fa emma venicht woaren. Oba de mieeschte volkomne Menschen woaren dise Proow bestonen. Dan woaren äare Nomes fa emma en daut Läwesbuak jeschräwen woaren.
EN DE “ENJTIET”
17. Waut wort Daniel jesajcht, waut en onse Tiet passieren wudd? (Daniel 12:4, 8-10).
17 Woo wundascheen daut nich es, äwa dise komende Tieden notodenkjen! Dan säd een Enjel noch waut sea wichtjet to Daniel äwa onse Tiet, aulsoo de “Enjtiet” (läs Daniel 12:4, NW; * 12:8-10; 2. Tim. 3:1-5). De Enjel säd to Daniel: “Un doa woat äwajenuach woare Erkjantnis sennen”. Soo, Gott sien Volkj wudd de Profezeiungen emma bäta vestonen kjennen. De Enjel säd uk noch waut äwa dise Tiet. Hee säd: “De beese oba woaren bees sennen; dee woaren nich vestonen”.
18. Waut woat sea boolt met de Beese passieren?
18 Vondoag dän Dach kaun daut soo loten, daut de Schlajchte met äare schlajchte Woakjen derchkomen (Mal. 3:14-15). Oba sea boolt woat Jesus dee, dee soo aus Bakj sent, von dee, dee soo aus Schop sent, uteneen deelen (Mat. 25:31-33). Dise Beese woaren de groote Liedenstiet nich äwaläwen, un dee woaren uk nich toom Läwen oppjewakjt woaren enne niee Welt. Dee äare Nomes woaren nich en daut “Jedenkjbuak” jeschräwen woaren, wua Maleachi 3:16 (JHF) von rät.
19. Waut wudd wie nu sellen doonen, un wuarom? (Maleachi 3:16-18).
19 Nu es de Tiet, daut wie bewiesen, daut wie nich to de Beese jehieren (läs Maleachi 3:16-18). Jehova saumelt dee toop, von dee hee sajcht, daut “woaren . . . gaunz miene sennen”, ooda dee woaren wieetvoll fa am sennen. Secha well wie to dee jehieren.
Waut fa eene Freid daut woat sennen to seenen, wan Daniel, onse leewe Aunjehieeje un väl aundre opp äare Städ “oppstonen” woaren! (See Varsch 20)
20. Waut wort Daniel vesproaken, un wuarom freist du die aul, daut dit Vespräakjen sikj erfelt?
20 Wie läwen en gaunz besondre Tieden. Oba boolt woaren Sachen passieren, dee noch besondra sent! Sea boolt woa wie seenen, woo aul daut schlajchte oppjeriemt woat. No daut woa wie seenen, woo sikj daut erfelt, waut Jehova Daniel vespruak, aus hee säd: “Du woascht oppstonen en de Städ dee fa die es, aum Enj von de Doag” (Dan. 12:13). Sänst du die aul doano, daut diene leewe Aunjehieeje met Daniel toop “oppstonen” woaren? Wan jo, dan doo dien bastet, om tru to bliewen, un du kaust die secha sennen, daut dien Nomen dan woat en Jehova sien Läwesbuak jeschräwen bliewen.
LEET 80 Finj mol selfst ut, woo goot Jehova es
^ Dis Artikjel lajcht ut, waut wie nu aundasch vestonen kjennen äwa daut groote Liawoakj, wua Daniel 12:2-3 von rät. Wie woaren seenen, wanea daut sennen woat un wäa doa aula met en es. Wie woaren uk seenen, woo dit Liawoakj deejanje, waut oppe Ieed läwen, reedmoaken woat fa de latste Proow opp Enj von Christus sien dusentjoaschet Rikj.
^ Veleicht woat daut soo sennen, daut daut ieeschte de True oppstonen woaren, waut en de latste Doag jestorwen sent, un dan woaren dee oppstonen, waut ver an jestorwen sent. Wan daut soo sennen woat, dan woat jieda eena de Mäajlichkjeit haben, dee welkom to heeten, waut hee selfst kjant. Oba wooemma daut dan sennen woat, de Schreft rät doavon, daut daut Oppstonen em Himmel met “Ordnunk” sennen woat, un daut jeft auntovestonen, daut daut Oppstonen oppe Ieed uk eene Ordnunk haben woat (1. Kor. 14:33; 15:23).
^ Daniel 12:1 (NW): “To dee Tiet woat Michael oppstonen, de groota Prins, waut fa dien Volkj ensteit. Un doa woat soone schwoare Tiet sennen, aus doa noch niemols ea jewast es von dan, aus daut een Volkj jeef, bat dee Tiet. Un en dee Tiet woat dien Volkj sikj fuatbrinjen, jieda eena, waut en daut Buak oppjeschräwen es.”
^ Daniel 12:2 (NW): “Un väle von dee oppe Ieed, dee em Stoff schlopen, woaren oppwakjen; eenje to daut eewje Läwen un aundre to eewjet veachten un Schaund.”
^ Soo aus daut nu utjelajcht es, es aundasch, aus wie daut ea vestunden un utjelajcht haben en daut Buak Die Prophezeiung Daniels — achte darauf!, Kapitel 17 un em Wachtturm von 1. Juli 1987, S. 21-25.
^ En Aposteljeschicht 24:15 rät daut von “de jerajchte” un “de ojjerajchte”, un en Johanes 5:29 von dee, “dee doa goodet jedonen haben” un “dee, dee bie äare beese Woakjen jebläwen sent”. En beid Varzhen rät daut von dee äare Woakjen, waut dee deeden, ea dee jestorwen wieren.
^ Daniel 12:3 (NW): “Un dee, dee Ensecht haben, woaren soo kloa dachen aus de Himmel, un dee, dee väle to Jerajchtichkjeit brinjen, soo aus de Stierns, fa emma un eewich.”
^ Daniel 12:4 (NW): “Un du, Daniel, hool de Wieed jeheem un vesäajel daut Buak bat de Enjtiet. Väle woaren daut deep unjasieekjen, un doa woat äwajenuach woare Erkjantnis sennen.”
