1. No Maleachi 3:16 no, waut fa een Buak schrift Jehova aul lang, un waut steit doa bennen?

 FA DUSENDE Joaren schrift Jehova aul en een besondret Buak. En dit Buak sent een deel Nomes, un daut fangt aun met dän ieeschten truen Zeij, waut Abel wia (Luk. 11:50-51). * Met de Joaren haft Jehova doa emma mea Nomes nenjeschräwen, un vondoag dän Dach sent doa millionende Nomes bennen. En de Bibel woat dit Buak daut “Jedenkjbuak” jenant, ooda uk daut “Läwensbuak”. En disen Artikjel woa wie daut daut Läwesbuak nanen (läs Maleachi 3:16, JHF; Opb. 3:5; 17:8).

2. Wäms Nomes sent en daut Läwesbuak jeschräwen, un waut kjenn wie doonen, daut ons Nomen doa uk bennen jeschräwen steit?

² En dit besondre Buak sent de Nomes von aul dee bennen, waut Jehova met Ieaforcht aunbäden un sienen Nomen väl wieetachten. Dee woaren de Mäajlichkjeit haben, noch mol eewich to läwen. Onse Nomes kjennen uk en dit Buak jeschräwen sennen, wan wie emma bätre Frind met Jehova woaren. Daut kjenn wie wäajen daut Leesjelt von sienen Sän Jesus Christus (Joh. 3:16, 36). Wie wellen aula, daut ons Nomen en daut Buak jeschräwen es – endoont aus wie de Hopninj haben, noch mol em Himmel to läwen ooda oppe Ieed.

3-4. (a) Woa wie eewich läwen kjennen, wan ons Nomen nu jroz en daut Läwesbuak jeschräwen steit? Laj daut ut. (b) Waut woa wie en disen un en dän näakjsten Artikjel derchgonen?

³ Meent daut nu, wan een Nomen en daut Läwesbuak jeschräwen es, daut dee dan fa secha woat daut eewje Läwen  haben? De Auntwuat finj wie en daut, waut Jehova en 2. Mose 32:33 to Moses säd. Doa säd Jehova: “Dee, dee jäajen mie jesindicht haben, dee äa Nomen woa ekj ut mien Buak laschen”. Soo, Nomes, waut nu jroz en daut Buak stonen, kjennen jelascht woaren. Daut es een bät soo, aus wudd Jehova de Nomes ieescht mol haben met eene Bliesteft jeschräwen (Opb. 3:5). Wie motten sea oppaussen, daut ons Nomen uk en daut Buak blift, bat dee ieescht soo to sajen fa emma met Tint jeschräwen es.

⁴ Oba nu komen veleicht eenje Froagen opp, soo aus: Waut sajcht de Schreft äwa dee, dee äare Nomes en daut Läwesbuak bennen sent, un äwa dee, dee äare Nomes doa nich bennen sent? Wanea woaren dee, dee äare Nomes en daut Buak bennen sent, daut eewje Läwen kjrieen? Un waut es met dee, waut jestorwen sent, onen daut dee eene Jeläajenheit hauden, Jehova kjanen to lieren? Kjennen dee äare Nomes uk en daut Buak jeschräwen stonen? Dise Froagen woaren en disen un en dän näakjsten Artikjel beauntwuat.

WÄMS NOMES STONEN EN DAUT LÄWESBUAK?

5-6. (a) Wäms Nomes sent uk en daut Läwesbuak jeschräwen, no Filippa 4:3 no? (b) Wanea woaren dee äare Nomes dan fa emma em Läwesbuak jeschräwen sennen?

⁵ Wäms Nomes stonen en daut Läwesbuak jeschräwen? Om de Auntwuat to finjen, woa wie mol äwa fief Gruppen Menschen räden. Doa sent eenje mank, dee äare Nomes en daut Buak jeschräwen sent un aundre, waut nich sent.

⁶ De ieeschte Grupp sent dee, waut utjewält worden, om met Jesus toop em Himmel to rejieren. Sent dee äare Nomes nu jroz em Läwesbuak jeschräwen? Jo. De Apostel Paulus säd to siene “Metoabeida” en Filippi, daut de Nomes von de Jesaulwde, waut  met Jesus toop rejieren woaren, nu aul en daut Läwesbuak jeschräwen sent (läs Filippa 4:3). Oba daut dee doa uk bliewen, motten dee tru bliewen. Dee äare Nomes woaren soo to sajen ieescht dan met Tint em Buak jeschräwen, wan dee äaren latsten Stampel jekjräajen haben, ooda jetieekjent sent. Daut woat sennen, ea dee stoawen ooda ea de groote Triebsaul, ooda Liedenstiet, aunfangt (Opb. 7:3).

7. Wanea woaren de Nomes von de groote Häad aundre Schop fa emma en daut Läwesbuak jeschräwen woaren, soo aus wie daut no Openboarunk 7:16-17 no vestonen kjennen?

⁷ De tweede Grupp es de groote Häad aundre Schop. Sent dee äare Nomes nu aul en daut Läwesbuak jeschräwen? Jo. Woaren dee äare Nomes noch emma em Buak jeschräwen stonen, nodäm daut dee Harmagedon äwaläft haben? Jo (Opb. 7:14). Jesus säd äwa dise Menschen, waut soo aus Schop jetalt woaren, daut dee daut “eewje Läwen” haben woaren (Mat. 25:46). Oba dee, waut Harmagedon äwaläwen, woaren nich fuaz daut eewje Läwen kjrieen. Dee äare Nomes woaren wieda soo to sajen met eene Bliesteft en daut Läwesbuak jeschräwen sennen. En daut dusentjoasche Rikj woat Jesus an “weiden un no läwendje Wotakjwalen leiden”. De Nomes von dee, waut sikj no Jesus siene Leidunk rechten, un opp Enj von Jehova aus tru jetalt woaren, woaren fa emma em Läwesbuak jeschräwen stonen (läs Openboarunk 7:16-17).

8. Wäms Nomes stonen nich em Läwesbuak jeschräwen, un waut woat met dee woaren?

⁸ De dredde Grupp sent de Bakj, waut en Harmagedon venicht woaren. Dee äare Nomes stonen nich em Läwesbuak jeschräwen. Jesus säd, daut dee “en äare eewje Strof nenn gonen” woaren (Mat. 25:46). Un Jehova säd derch Paulus, daut “äare Strof es, eewich veloaren to gonen un von Gott jetrant to sennen” (2. Tess. 1:9; 2. Pet. 2:9). Uk aul dee, waut met Fliet jäajen dän heiljen Jeist jesindicht haben, woaren venicht woaren, enne Städ daut eewje Läwen kjrieen. Dee woaren nich vom Doot oppstonen (Mat. 12:32; Mar. 3:28-29; Heb. 6:4-6). Well wie nu mol twee Gruppen dolla unjasieekjen, waut hia oppe Ieed oppstonen woaren.

DEE, WAUT VOM DOOT OPPSTONEN

9. (a) Waut vonne twee Gruppen woaren oppstonen toom oppe Ieed läwen, soo aus Aposteljeschicht 24:15 wiest? (b) Waut es de Unjascheet tweschen dise beid Gruppen?

⁹ De Bibel rät von twee Gruppen, waut oppstonen, om noch mol fa emma oppe Ieed to läwen, aulsoo “de jerajchte” un “de ojjerajchte” (läs Aposteljeschicht 24:15). “De jerajchte” sent dee, waut aul Jehova tru jedeent haben, aus dee noch aum Läwen wieren. Oba “de ojjerajchte” haben Jehova nich tru jedeent. Dee äa Läwen wia mau rajcht wiet auf von daut, waut jerajcht es. Beid Gruppen woaren oppstonen. Oba meent daut, daut aul dee äare Nomes em Läwesbuak jeschräwen stonen? Om de Auntwuat to finjen, unjasieekj wie mol jieda Grupp oppoat.

10. Wuarom woaren “de jerajchte” oppstonen, un waut vonne Iea woaren eenje von dee kjrieen? (See uk “Waut Läsa weeten wellen” en dise Utgow, wua daut äwa daut Oppstonen oppe Ieed rät.)

¹⁰ De vieede Grupp sent “de jerajchte”. Dee äare Nomes wieren aul em Buak jeschräwen, ea dee storwen. Worden dee äare Nomes ut daut Buak jelascht, aus dee storwen? Nä, wäajen en Jehova sien Jedajchnis sent dee noch emma aum Läwen, wiels Jehova “es nich de doodje äa Gott, oba de läwendje äara, wiels en am läwen dee aula” (Luk. 20:38). Soo, wan de Jerajchte oppe Ieed oppstonen, dan woaren  dee äare Nomes em Läwesbuak jeschräwen stonen, wan uk noch soo aus met de Bliesteft jeschräwen (Luk. 14:14). Eenje von dee, waut oppstonen, woaren de groote Iea haben, “en aule Welt aus Prinsen” aunjestalt to woaren (Psa. 45:17).

11. Waut woat “de ojjerajchte” fälen to lieren, ea dee äare Nomes woaren kjennen em Läwesbuak jeschräwen?

¹¹ Besee wie ons nu noch de fefte Grupp – “de ojjerajchte”. Veleicht kjanden dee Jehova siene Jesazen nich un fieeden nich een goodet Läwen, ea dee storwen. Dee äare Nomes wieren nich em Läwesbuak jeschräwen. Oba Gott woat dee oppwakjen, daut dee de Mäajlichkjeit haben, daut äare Nomes doa noch mol kjennen nenjeschräwen woaren. Dise “ojjerajchte” woaren een deel Help brucken. Eenje von dee deeden sea schlemme Sachen, ea dee storwen. Doawäajen mott an daut jelieet woaren, woo dee soo läwen kjennen, aus Jehova daut fa rajcht talt. Om dee dit aula to lieren, woat Gott sien Kjennichrikj daut jratste Liawoakj derchfieren, waut et jeemols jejäft haft.

12. (a) Wäa woat de Ojjerajchte lieren? (b) Waut woat met dee passieren, waut daut nich aunnämen woaren, waut see lieren?

¹² Wäa woat de Ojjerajchte lieren? Daut woat de groote Häad doonen, met de Jerajchte toop, dee vom Doot oppjestonen sent. Daut de Ojjerajchte äare Nomes kjennen em Läwesbuak jeschräwen woaren, motten dee emma jratre Frind met Jehova woaren un sikj am hanjäwen. Jesus Christus un de Jesaulwde woaren vom Himmel ut krakjt beoobachten, aus de Ojjerajchte daut nokomen, waut see lieren (Opb. 20:4). Un wan doa wäa daut nich nokomen well, woat dee nich mea wiedaläwen kjennen – mau rajcht wan dee uk aul hundat Joa jeläft haft (Jes. 65:20, NW). Jehova un Jesus kjennen de Hoaten seenen un woaren daut nich tooloten, daut doa irjentwäa Schoden aunrecht en de niee Welt (Jes. 11:9; 60:18; 65:25; Joh. 2:25).

 EEN OPPSTONEN TOOM LÄWEN UN EEN OPPSTONEN TOOM JERECHT WOAREN

13-14. (a) Woo kunn wie Jesus siene Wieed von Johanes 5:29 ea vestonen? (b) Aun waut sell wie bie Jesus siene Wieed denkjen?

¹³ Jesus räd uk von dee, waut oppe Ieed oppjewakjt woaren. Hee säd biejlikj: “De Tiet kjemt, daut aul dee, dee en de Jräwa ligjen, siene Stemm hieren woaren. See woaren dan verendach komen. Dee doa goodet jedonen haben, stonen opp toom Läwen, un dee, dee bie äare beese Woakjen jebläwen sent, stonen opp toom jerecht woaren” (Joh. 5:28-29). Waut wull Jesus doamet sajen?

¹⁴ Soo aus wie daut ea vestonen kunnen, docht wie, daut Jesus siene Wieed von daut räden, waut de Menschen doonen, nodäm daut dee oppjewakjt woaren; aulsoo, daut eenje toom Läwen komen un goodet doonen, un aundre toom Läwen komen un schlajchtet doonen. Oba es die oppjefollen, daut Jesus nich sajcht, daut dee, waut en de Jräwa ligjen, woaren goodet doonen ooda woaren schlajchtet doonen? Hee rät en de Vegonenheit. Hee rät von dee, waut “goodet jedonen haben” un von dee, waut “bie äare beese Woakjen jebläwen sent”. Daut jeft auntovestonen, daut dee daut deeden, ea dee storwen. Daut es goot to vestonen, wäajen wäa schlajchtet deit, wudd aulmols nich kjennen en de niee Welt bliewen. De Ojjerajchte motten dise schlajchte Sachen jedonen haben, ea dee storwen. Oba woo kjenn wie Jesus siene Wieed dan vestonen, wan hee sajcht, eenje “stonen opp toom Läwen” un aundre “stonen opp toom jerecht woaren”?

15. Wäa woat mank dee sennen, waut “toom Läwen” oppstonen, un wuarom?

¹⁵ De Jerajchte, waut goodet deeden ver äaren Doot, “stonen opp toom Läwen”, wäajen dee äare Nomes woaren aul em Läwesbuak stonen. Daut meent, daut daut Oppstonen von dee, “dee doa goodet jedonen haben” von Johanes 5:29 dautselwje Oppstonen es aus daut von “de jerajchte” von Aposteljeschicht 24:15. Daut paust uk toop met daut, waut en Reema 6:7 steit, wua daut sajcht: “Wiels wäa jestorwen es, es frie von Sind.” Jehova haft de Jerajchte äare Sinden vejäft, aus dee storwen, oba hee woat aul daut goode em Denkj hoolen, waut dee fa am deeden, aus dee noch aum Läwen wieren (Heb. 6:10). Oba uk de Jerajchte, waut oppstonen, woaren fa wieda tru bliewen motten, daut dee äare Nomes uk kjennen em Läwesbuak bliewen.

16. Om waut jeit daut bie daut Oppstonen “toom jerecht woaren”?

¹⁶ Oba waut es met dee, de schlajchtet deeden ver äaren Doot? Dee äare Sinden haft Jehova uk vejäft, aus dee storwen, oba dee haben Jehova nich tru jedeent, aus dee aum Läwen wieren. Dee äare Nomes sent nich em Läwesbuak jeschräwen. Doawäajen es daut Oppstonen von “dee, dee bie äare beese Woakjen jebläwen sent”, dautselwje Oppstonen aus daut von “de ojjerajchte” von Aposteljeschicht 24:15. Daut woat een Oppstonen “toom jerecht woaren” sennen. * Daut bediet, daut Jesus dee krakjt beoobachten woat, waut dee doonen un woo dee sikj oppstalen (Luk. 22:30). Daut woat een Stootje dieren, bat Jesus weet, aus dee daut werkjlich wieet sent, daut dee äare Nomes em Läwesbuak jeschräwen woaren. Oba dee kjennen doa bloos bennen stonen, wan dee nich mea  daut schlajchte doonen, waut dee ea deeden, un sikj Jehova hanjäwen.

17-18. (a) Waut woat jieda eena doonen motten, waut oppjewakjt woat toom oppe Ieed läwen? (b) Waut es met de “Woakjen” jemeent, wua Openboarunk 20:12-13 von rät?

¹⁷ Aus dee, waut oppstonen, nu von de Jerajchte ooda Ojjerajchte sent, dee woaren sikj aula aun de Jesazen hoolen motten von de niee Bieekja, waut en de 1 000 Joa opjemoakt woaren. De Apostel Johanes sajcht, waut hee en eene Vision sach: “Un ekj sach de Doodes, kjlien un groot, ver Gott un dän Troon stonen, un doa worden Bieekja opjemoakt. Dan wort noch een Buak opjemoakt, un daut wia daut Läwensbuak. Un de Doodes worden doano jerecht, waut en dee Bieekja von äare Woakjen jeschräwen stunt” (Opb. 20:12-13).

¹⁸ No waut vonne “Woakjen” woaren dee jerecht woaren, waut dan oppstonen? Woaren daut de Woakjen sennen, waut dee deeden ver äaren Doot? Nä! Aus dee storwen, worden dee frie von äare Sinden, waut see ea deeden. Dee “äare Woakjen”, von dee daut hia rät, sent aulsoo nich dee, waut see ea deeden. Hia rät daut von dee Woakjen, waut see en de niee Welt doonen woaren, aulsoo waut see met de Belierunk doonen, waut see kjrieen. Mau rajcht soone true Mana aus Noah, Samuel, David un Daniel woaren äwa Jesus Christus lieren motten un aun sien Leesjelt jleewen. Wan dise Mana aul soo väl to lieren haben, woo väl mea woaren dan de Ojjerajchte lieren motten!

19. Waut woat met dee woaren, waut dise besondre Jeläajenheit aufsajen?

¹⁹ Waut woat met dee woaren, waut dise besondre Jeläajenheit aufsajen? En Openboarunk 20:15 sajcht daut: “Wan irjentwäm sien Nomen nich em Läwensbuak jeschräwen stunt, wort dee em Fiasee jeschmäten”. Dee woaren aulsoo fa emma venicht woaren. Doawäajen es daut sea wichtich, daut wie doano kjikjen, daut ons Nomen em Läwesbuak jeschräwen steit un doa uk blift!

20. Waut fa een besondret Woakj woat en daut dusentjoasche Rikj derchjefieet woaren? (See daut Bilt oppe väaschte Sied.)

²⁰ Daut woat eene sea besondre Tiet sennen en daut dusentjoasche Rikj! Doa woat daut jratste Liawoakj derchjefieet woaren, waut Gott siene Deena jeemols jedonen haben. Oba daut woat uk eene Tiet sennen, wua de Jerajchte uk de Ojjerajchte äa Vehoolen woat unjasocht un beoobacht woaren (Jes. 26:9; Apj. 17:31). Woo woat dit Liawoakj jedonen woaren? Daut wie daut bäta vestonen kjennen un noch mea wieetschazen, woat ons de näakjsta Artikjel halpen.