1. Woo feeld Petrus sikj, aus Jesus am derch een Wunda holp, soo väl Fesch to kjrieen?

 PETRUS wia de gaunze Nacht äwa oppem Wota jewast un haud kjeene Fesch jekjräajen. Dan kjeem Jesus no am un säd: “Foa nopp, wua daut deep es, un lot de Nats rauf, to feschen!” (Luk. 5:4). Petrus docht, daut hee nich eenen Fesch wudd kjrieen, oba hee deed daut, waut Jesus säd. Dan kjrieejen see soo väl Fesch, daut de Nats aunfungen tweitorieten. Aus hee dan sach, daut et een Wunda wia, wieren Petrus un de aundre, waut met am toop wieren, bloos noch aum staunen. Petrus säd: “Har, go von mie wajch! Ekj sie een sindja Mensch” (Luk. 5:​6-9). Petrus feeld sikj daut nich wieet, met Jesus toop to sennen.

2. Waut halpt ons daut, mea von Petrus sien Biespel to weeten?

² Petrus haud rajcht – hee wia “een sindja Mensch”. De Schreft wiest von eenjemol, daut Petrus waut säd un deed, waut hee lota dan beschod. Feelst du die eenjemol uk soo aus Petrus? Hast du irjenteene Ieejenschoft, wua du die wurscht sellen en vebätren ooda eene Schwakheit, wua du met to kjamfen hast? Wan jo, dan kaun die daut Moot jäwen, äwa Petrus to studieren. Äwalaj mol: Jehova wudd Petrus siene Fäla nich haben durft enne Bibel oppschriewen, oba hee deed daut, daut wie doa waut ut lieren kjennen (2. Tim. 3:​16-17). Wan wie lieren, daut Petrus sikj krakjt soo feeld un krakjt soone Schwakheiten haud aus wie, kaun ons daut halpen to seenen, daut Jehova nich de Volkomenheit von ons velangt. Hee well eefach, daut wie ons aunstrenjen un nich oppjäwen,  krakjt endoont waut vonne Schwakheiten wie haben.

3. Wuarom sell wie ons aunstrenjen?

³ Wuarom es daut needich, daut wie ons aunstrenjen? Doa woat eenjemol jesajcht: “Eewen moakt volkomen.” Vejlikj wie daut mol: Een Musikjspäla brukt veleicht Joaren, bat dee een Instrument fein spälen kaun. En dise Tiet woat hee veleicht een deel Fäla moaken, oba wan hee wieda eeft, woat hee sikj vebätren. Wan hee uk een gooda Späla woat, woat hee doawäajen noch mol eenen Fäla moaken. Hee woat wieda eewen un nich oppjäwen. Krakjt soo es daut uk bie ons. Wan wie uk denkjen, daut wie eene Schwakheit äwakomen haben, woa wie veleicht doawäajen wada dänselwjen Fäla moaken. Oba wie sellen nich opphieren, doaraun to schaufen. Wie aula sajen un doonen mol waut, waut wie lota beschoden. Oba wan wie nich oppjäwen, woat Jehova ons halpen, ons to vebätren (1. Pet. 5:10). See wie nu mol daut Biespel von Petrus, waut am holp nich opptojäwen. Wan hee uk Fäla muak, wees Jesus am oba wieda Metjefeel. Daut kaun ons Moot jäwen, nich opptohieren, Jehova to deenen.

4. Waut säd Petrus äwa sikj selfst en Lukas 5:​5-10, un waut säd Jesus to am?

⁴ De Bibel sajcht nich, wuarom Petrus säd, daut hee “een sindja Mensch” wia ooda aun woone Sinden hee krakjt docht (läs Lukas 5:​5-10). Daut kaun sennen, daut hee mol growe Fäla jemoakt haud. Jesus wist, daut Petrus Angst haud, wiels Petrus veleicht docht, daut hee nich goot jenuach wia. Oba Jesus wist uk, daut Petrus kunn een trua Mensch woaren. Doawäajen säd hee to am: “Fercht die nich!” Daut Jesus een Vetruen opp Petrus haud, endad sien Läwen. Petrus un sien Brooda Andreas jeewen daut feschen opp un foljden dän Messias no, un Jehova haft an doafäa rikjlich jesäajent (Mar. 1:​16-18).

5. Waut kunn Petrus doaderch beläwen, daut hee sikj nich von siene Angst unjakjrieen leet un Jesus wieda nofoljen deed?

⁵ Aus eent von Jesus siene Nofolja beläwd Petrus een deel butajeweenelje Sachen. Hee sach biejlikj, woo Jesus Kranke heeld, beese Jeista utdreef un Doodes oppwuak (Mat. 8:​14-17; Mar. 5:​37, 41-42). b Petrus sach uk en eene Vision, waut vonne Harlichkjeit Jesus en sien Kjennichrikj haben wudd, un dit haft Petrus kjeenmol vejäten (Mar. 9:​1-8; 2. Pet. 1:​16-18). Wan Petrus nich haud Jesus  nojefolcht, wudd hee aul dit nich jeseenen haben. Hee mott sikj sea jefreit haben, daut hee aul dit goode beläwd, wäajen hee sikj nich leet von siene schlajchte Jefeelen unjakjrieen!

6. Kunn Petrus siene Schwakheiten fuaz äwakomen? Laj daut ut.

⁶ Wan Petrus uk aul dit beläft haud, must hee doawäajen noch jäajen siene Schwakheiten kjamfen. Hia sent een poa Biespels: Aus Jesus säd, daut hee wudd lieden un stoawen motten, soo aus daut enne Schreft verutjesajcht wia, muak Petrus daut tonuscht (Mar. 8:​31-33). Petrus un de aundre Apostel deeden sikj uk foaken doaräwa strieden, wäa de jratsta mank an wia (Mar. 9:​33-34). Dän Owent ver Jesus sienen Doot hakt Petrus eenen Maun daut Ua auf (Joh. 18:10). Noch dänselwjen Owent veluach Petrus daut dree mol, daut hee Jesus sien Frint wia, ut Angst fa de Menschen (Mar. 14:​66-72). Doawäajen must Petrus grulich sea roaren (Mat. 26:75).

7. Waut vonne Jeläajenheit kjrieech Petrus, nodäm Jesus vom Doot oppjestonen wia?

⁷ Petrus wia sea mootloos, oba Jesus veleet am nich. Nodäm daut Jesus vom Doot oppjestonen wia, jeef hee am de Jeläajenheit to wiesen, daut hee am noch leewd. Jesus fruach Petrus, aus hee wudd kjennen een Hoad äwa siene Schop sennen (Joh. 21:​15-17). Un Petrus wia reed, daut to doonen. Hee wia en Jerusalem aum Pinjstdach un wia mank de ieeschte, waut met dän heiljen Jeist jesaulft worden.

8. Waut von Fäla muak Petrus en Antiochia?

⁸ Wan hee uk met dän heiljen Jeist jesaulft wia, must Petrus oba jäajen siene Schwakheiten kjamfen. Aune 36 n.Chr. schekjt Gott am no Kornelius, waut een Nichjud wia. Don saulwd Jehova Kornelius met dän heiljen Jeist un daut bewees, “daut Gott manke Menschen kjeen Unjascheet moakt” un daut de Nichjuden uk kunnen Poat von de Christenvesaumlunk sennen (Apj. 10:​34, 44-45). Nodäm eet Petrus wellich met de Nichjuden toop, un daut wia soont, waut hee ea kjeenmol wudd jedonen haben (Gal. 2:12). Oba eenje judische Christen hauden daut soo tohoolen, daut de Juden un de Nichjuden nich sullen toop äten. Aus eenje Breeda, waut soo dochten, no Antiochia kjeemen, wull Petrus dee nich beleidjen un doawäajen eet Petrus nich mea met de Nichjuden toop. De Apostel Paulus sach, waut Petrus deed, un wees am ver aulem trajcht (Gal. 2:​13-14). Oba Petrus jeef nich opp, wan hee uk disen Fäla jemoakt haud. Waut holp am?

9. Woo wiest Johanes 6:​68-69, daut Petrus tru wia?

⁹ Petrus wia tru. Hee leet nich too, daut am irjentwaut bat doa brocht opptojäwen. Opp eene Sauz säd Jesus waut, waut de Nofolja nich vestonen kunnen (läs Johanes 6:​68-69). Oba Petrus wees, daut hee tru wia. Väle wachten nich, bat Jesus an daut utläd, waut hee meend, oba veleeten am fuaz. Oba Petrus deed daut nich. Hee wia tru un säd, daut bloos Jesus siene Wieed “eewjet Läwen” sent.

10. Woo wees Jesus, daut hee opp Petrus vetrud? (See uk daut Bilt.)

¹⁰ Jesus veleet Petrus nich. Aun dän latsten Owent ver Jesus sienen Doot wist hee, daut Petrus un de aundre Apostel am wudden veloten. Oba Jesus säd to Petrus, daut hee sikj secha wia, daut dee wada wudd daut rajchte doonen un am tru bliewen (Luk. 22:​31-32). Fa Jesus wia daut kloa: “De Jeist es wellich, oba daut Fleesch es schwak” (Mar. 14:38). Doawäajen veleet Jesus Petrus nich, uk wan dee am dree mol veluach.  Nodäm aus hee oppjestonen wia, kjeem hee ver Petrus, aus dee auleen wia (Mar. 16:7; Luk. 24:34; 1. Kor. 15:5). Petrus wia mootloos wäajen daut, waut hee jedonen haud, un doawäajen mott am dit secha sea jestoakjt haben.

11. Woo vesechad Jesus Petrus, daut Jehova fa am sorjen wudd?

¹¹ Jesus vesechad Petrus, daut Jehova am aules jäwen wudd, waut am fäld. Nodäm Jesus vom Doot oppjestonen wia, holp hee Petrus un de aundre Apostel wada derch een Wunda, een deel Fesch to kjrieen (Joh. 21:​4-6). Derch dit Wunda woat Petrus daut secha sennen dietlich jeworden, daut daut fa Jehova kjeene groote Sach wia, am emma daut needje to jäwen. Veleicht haft de Apostel doaraun jedocht, waut Jesus mol säd, daut Jehova deejanje emma daut needje jäwen wudd, waut “daut ieeschte no Gott sien Rikj” sochten (Mat. 6:33). Doawäajen stald Petrus dän Prädichtdeenst aun de ieeschte Städ en sien Läwen un nich daut feschen. Aum Pinjsten 33 n.Chr. deed Petrus sea äwanäment prädjen un holp Dusende de goode Norecht auntonämen (Apj. 2:​14, 37-41). Lota lieed hee de Samarita un de Nichjuden äwa Jesus un holp an, am notofoljen (Apj. 8:​14-17; 10:​44-48). Daut es kloa, daut Jehova Petrus opp eene besondre Wajch brukt, om veschiedne Sorten Menschen to halpen, en de Christenvesaumlunk nenntokomen.

12. Woo halpt Petrus sien Biespel ons, wan wie met eene Schwakheit to kjamfen haben?

¹² Jehova kaun ons met onse Aunstrenjunk halpen. Daut kaun schwoa sennen, besonda wan wie aul lang met eene Schwakheit to kjamfen haben. Eenjemol feelt sikj daut veleicht soo, daut onse Schwierichkjeiten noch jrata sent, aus Petrus siene wieren. Oba Jehova kaun ons de Krauft jäwen, daut wie nich oppjäwen (Psa. 94:​17-19). Een Brooda fieed biejlikj joarenlank een homoseksuellet Läwen, ea hee de Woarheit kjanen lieed. Oba hee endad sien Läwen rein gaunz un läwd no de Bibel no. Eenjemol kjeemen dise schlajchte Wenschen wada opp. Waut holp am, sikj wieda auntostrenjen? Hee sajcht: “Jehova jeft ons de Krauft. Ekj hab jelieet, . . . daut wie met Jehova sienen heiljen Jeist [wieda] en de Woarheit bliewen kjennen. . . . Ekj hab een deel kunt fa Jehova doonen. Un wan ekj uk met de Onvolkomenheit to kjamfen hab, jeft Jehova mie oba de Krauft.”

13. Woo kjenn wie Petrus nodoonen, soo aus Aposteljeschicht 4:​13, 29, 31 wiest? (See uk daut Bilt.)

 ¹³ Petrus muak eenje groote Fäla, wäajen hee Menschenforcht haud. Oba wiels hee om Moot bäden deed, kunn hee äwanäment sennen (läs Aposteljeschicht 4:​13, 29, 31). Wie kjennen uk met Angst foadich woaren. See wie mol, woo daut bie Horst wia, een junga Brooda, waut to de Nazi-Tiet en Dietschlaunt wond. Hee wort enne School unja Druck jesat un doawäajen jeef hee no un säd een poa mol “Heil Hitler!” Siene Elren grunzten am nich ut, oba bäden met am toop un fruagen Jehova om Moot. Doaderch daut siene Elren am holpen un hee sikj opp Jehova veleet, kjrieech hee met de Tiet de Krauft, daut hee kunn fa sienen Gloowen enstonen. Lota säd hee: “Jehova haft mie kjeenmol veloten.” c

14. Woo kjennen de Eltestasch von de Vesaumlunk soone halpen, waut mootloos jeworden sent?

¹⁴ Jehova un Jesus woaren ons nich veloten. Nodäm Petrus Jesus veloagen haud, must hee eene sea wichtje Entscheidunk moaken. Waut wia daut? Hee must entscheiden, aus hee wudd oppjäwen ooda aus hee sikj wudd aunstrenjen, Christus notofoljen. Jesus haud Jehova iernstlich doarom jebät, daut Petrus sienen Gloowen nich velieren sull. Jesus vetald Petrus daut von dit Jebäd un vesechad am, daut hee siene Breeda lota wudd stoakjen kjennen (Luk. 22:​31-32). Dit mott Petrus sea väl Moot jejäft haben, wan hee aun dise Wieed docht! Wan wie waut wichtjet entscheiden motten, kaun Jehova de Hoads von de Vesaumlunk brucken, om ons to halpen, tru to bliewen (Efs. 4:​8, 11). Daut es krakjt daut, waut Paul deit, waut aul lang Eltesta es. Hee muntat dee opp, waut doa batem oppjäwen sent, doaräwa notodenkjen, woo Jehova an no de Woarheit jetrocken  haft. Dan sajcht hee to dee, daut Jehova an kjeenmol veloten woat, wäajen siene truhoatje Leew. Hee sajcht: “Ekj hab väle jeseenen, waut mootloos wieren un sikj met Jehova siene Help wada kunnen aunstrenjen.”

15. Woo es daut aun Petrus un aun Horst to seenen, daut et werkjlich soo es, waut Matäus 6:33 sajcht?

¹⁵ Krakjt soo aus Jehova fa Petrus un de aundre Apostel em tieteljen sorjd, krakjt soo woat hee uk fa ons sorjen, wan wie dän Deenst aun de ieeschte Städ stalen (Mat. 6:33). No dän Tweeden Weltkjrich wull Horst Pionia sennen. Oba hee wia sea oam un wist nich, aus hee wudd soo väl vedeenen kjennen, daut hee wudd kjennen em Voltietdeenst sennen. Waut deed hee dan? Hee stald Jehova oppe Proow un wia de gaunze Wäakj äwa em Deenst, en dee Tiet, aus de Kjreisoppsechta doa wia. Hee vefieed sikj, aus de Kjreisoppsechta am opp Enj von de Wäakj een Kwarkj met Jelt enne Haunt jeef, oba nich säd, von wua daut kjeem. Daut wia soo väl, daut hee fa miere Moonat kunn Pionia sennen. Horst sach dit Jeschenkj aus eenen Bewies aun, daut Jehova emma fa daut needichste sorjen wudd. Von doa aun stald hee daut Kjennichrikj emma aun de ieeschte Städ (Mal. 3:10).

16. Wuarom sell wie mea von Petrus un siene Breew lieren?

¹⁶ Woo schaftich mott Petrus nich jewast sennen, daut Jesus nich von am wajchjinkj, aus hee daut haben wull! Jesus lieed Petrus wieda ut, daut hee kunn een trua Apostel sennen un een goodet Biespel fa de Christen sennen. Wie kjennen väl doavon lieren, woo Jesus Petrus utlieed. En twee von siene Breew aun de Vesaumlungen ieeschtemma räd Petrus von eenjet, waut hee jelieet haud. En dän näakjsten Artikjel woa wie ons eenjet von daut unjastonen un woo wie daut nu bie dise Tiet nokomen kjennen.