1-2. Wuarom es daut goot, daut wie ons Simson siene Jeschicht unjastonen?

 WAUT kjemt die em Kopp, wan du dän Nomen Simson hieescht? Veleicht denkjst du aun eenen sea stoakjen Maun; un daut stemt uk. Oba Simson muak eene schlajchte Entscheidunk, wua hee sea unja to lieden kjeem. Un doch weet wie, daut Jehova no daut gaunze kjikjt, woo tru Simson am jedeent haud. Hee leet daut mau rajcht enne Bibel oppschriewen, daut wie doarut lieren kjennen.

² Jehova brukt Simson, om butajeweenelje Sachen fa sien Volkj, de Israeliten, to doonen. Aus Simson aul hundade Joaren jestorwen wia, leet Jehova dän Apostel Paulus Simson sienen Nomen en de List nennschriewen, wua aul deejanje äare Nomes bennen sent, waut eenen grooten Gloowen hauden (Heb. 11:​32-34). Simson sien Biespel kaun ons Moot jäwen. Hee vetrud opp Jehova, wan de Omstend uk schwoa wieren. Well wie mol seenen, woo ons daut Moot moaken kaun un waut wie noch von sien Biespel lieren kjennen.

3. Waut sull Simson doonen?

³ Aus Simson jebuaren wort, deeden de Filista äwa daut Volkj Israel harschen un wieren hunjsch to dee (Rech. 13:1). De Israeliten haben sea unja dee äare Macht jeläden. Jehova wäld Simson, om “Israel ut de Filista äare Jewault to raden” (Rech. 13:5). Oba daut haud werkjlich noch waut opp sikj! Om dise Oppgow notokomen, wudd Simson motten opp Jehova vetruen.

4. Woo holp Jehova Simson, von de Filista frietokomen? (Rechta 15:​14-16).

 ⁴ See wie mol, woo Simson opp Jehova un opp siene Help vetrud. Opp eene Sauz kjeemen waut Soldoten von de Filista no Lehi, woomäajlich en Juda, om Simson fausttonämen. Wiels de Mana von Juda Angst hauden, worden dee sikj eenich, Simson en de Filista äare Henj to jäwen. Dise Menschen, waut von Simson siene Jäajent wieren, bungen am met twee niee Strenj faust un brochten am no de Filista (Rech. 15:​9-13). “Oba däm HARN sien Jeist kjeem äwa am” un hee vereet de Strenj un muak sikj loos. “Dan funk hee eenen freschen Äsel Bakknoaken”, neem dän un muak 1,000 Filista doamet doot (läs Rechta 15:​14-16).

5. Woo wees Simson, daut hee opp Jehova vetrud?

⁵ Wuarom brukt Simson eenen Äsel-Bak-Knoaken? Daut wia je nich waut jeweeneljet toom kjamfen. Secha wist Simson, daut Jehova am halpen wudd, jäajen de Filista to jewennen, krakjt endoont waut hee doatoo brukt. Om Jehova sienen Wellen to doonen, brukt dis trua Maun daut, waut hee dan jroz haud. Wiels Simson sikj opp Jehova veleet, kunn hee jäajen de Filista jewennen.

6. Waut kjenn wie von Simson lieren?

⁶ Jehova kaun ons uk de Krauft jäwen toom onse Oppgowen nokomen; mau rajcht soone, waut ons schwoa väakomen. Un hee kaun ons opp soone Wajch halpen, waut wie kjeenmol wudden jedocht haben. Krakjt soo aus Jehova Simson Krauft jeef, woat hee ons uk halpen, sienen Wellen to doonen, soolang aus wie opp am vetruen (Spr. 16:3).

7. Waut von Biespel wiest, daut daut needich es, doano to kjikjen, waut Jehova sien Wellen es?

⁷ Väl Breeda un Sestren, waut bie de Buwoakjs von de Organisazion methalpen, haben jewäsen, daut see opp Jehova vetruen. Ieeschtemma deeden de Breeda daut jeweenlich selfst plonen, woo de Vesaumlungshiesa un aundre Jebieda jebut sullen. Oba wiels Jehova siene  Organisazion emma jrata woat, wia daut met de Tiet needich, eenjet to endren. De aunjestalde Breeda kjikjten doano, waut Jehova sien Wellen wia, un proowden veschiednet, soo aus foadje Hiesa kjeepen un dee oppfreschen. Robert es een Brooda, waut en de latste Joaren väl biem Buwoakj metjeholpen haft en veschiedne Lenda. Hee sajcht: “Aum Aunfank wia daut fa väle nich leicht, sikj aun dise niee Wajch to wanen, wiels daut gaunz aundasch wia, aus wie daut fa Joaren jedonen hauden. Oba de Breeda wieren reed, daut auntonämen, un daut haft sikj utjewäsen, daut Jehova dise Endrunk jesäajent haft.” Dit es bloos een Biespel, waut wiest, daut Jehova sien Volkj leiden deit un dee halpt, sienen Wellen to doonen. Daut es goot, daut wie noch mol äwa dit nodenkjen: “Kjikj ekj doano, waut Jehova sien Wellen es, un sie ekj reed, eenjet to endren, om am oppe baste Wajch to deenen?”

8. Waut deed Simson opp eene Sauz, aus hee sea darschtich wort?

⁸ Denkjt die noch von aundre butajeweenelje Sachen, waut Simson deed? Hee kjield gaunz auleen eenen Leiw doot un lota uk 30 Filista en de Staut Aschkelon (Rech. 14:​5-6, 19). Simson wist, daut hee dise Sachen kjeenmol wudd haben kunt onen Jehova siene Help doonen. Dit wia kloa to seenen, aus hee opp eene Sauz 1,000 Filista dootjekjielt haud un dan sea darschtich wia. Waut deed hee dan? Enne Städ daut hee selfst jinkj no Wota sieekjen, fruach hee Jehova no Help (Rech. 15:18).

9. Waut deed Jehova, aus Simson am no Help fruach? (Rechta 15:19).

⁹ Jehova horcht no daut, waut Simson jefroacht haud, un jeef am derch een Wunda Wota. Aus Simson von dit Wota drunk, “läwd hee wada opp, un siene Krauft kjeem wada trigj” (läs Rechta 15:19). Daut späat sikj soo, daut et dise niee Wota-Kjwal noch Joaren lota jeef, aus de Profeet Samuel daut Buak Rechta oppschreef. Dee Israeliten, waut dise Wota-Kjwal sagen, dochten woomäajlich doaraun, daut Jehova siene Deena en schwoare Tieden halpen wudd, wan dee opp am vetruden.

10. Waut mott wie doonen, om von Jehova Help to kjrieen? (See uk daut Bilt.)

¹⁰ Wie motten Jehova uk no Help froagen, krakjt endoont met waut wie ons vestonen ooda woo väl wie aul en sienen Deenst jedonen haben. Wie motten deemootich sennen un toostonen, daut wie bloos dan Erfolch haben woaren, wan wie ons opp Jehova veloten. Krakjt soo aus Simson fresche Krauft kjrieech, aus hee daut Wota drunk, waut Jehova am jejäft haud, krakjt soo woa wie em jeisteljen Krauft kjrieen, wan wie daut nutzen, waut hee ons aules jeft (Mat. 11:28).

11. Woo kjenn wie ons opp Jehova veloten? Woo deeden eene Lied daut?

¹¹ See wie mol daut Biespel von Aleksey, een Brooda von Russlaunt, waut sea vefolcht wort. Waut holp am, en dise schwoare Loag staunthauft to bliewen? Hee un siene Fru hauden goode jeistelje Jewanheiten. Hee sajcht: “Ekj proow mie emma aun miene jeistelje Jewanheiten to hoolen, soo aus perseenlich studieren un jieda Dach de Bibel läsen. Ekj un miene Fru läsden jieda Zemorjes dän Varsch fa dän Dach un bäden toop to Jehova.” Waut lieet ons daut? Wie sellen ons nich opp ons selfst veloten, oba opp Jehova. Woo kjenn wie daut? Wan wie pinkjlich soont doonen, waut ons em Gloowen stoakjt, soo aus de Bibel studieren, bäden, bie de Toopkomes sennen  un prädjen. Jehova woat ons doabie säajnen. Krakjt soo aus hee Simson Krauft jeef, krakjt soo kaun hee ons uk Krauft jäwen.

12. (a) Waut vonne schlajchte Entscheidunk muak Simson? (b) Wuarom wia daut bie Delila aundasch aus bie de aundre?

¹² Simson wia krakjt soo onvolkomen aus wie un muak eenjemol schlajchte Entscheidungen. Eene schlajchte Entscheidunk, waut Simson muak, haud sea schlemme Foljen. Aus Simson fa een Stoot aus Rechta jedeent haud, “leewd hee eene Fru em Tol Sorek, äa Nomen wia Delila” (Rech. 16:​4, JHF). Aul ea wull Simson sikj mol met eene Fru von de Filista befrieen, un daut kjeem “vom HARN”, wiels Jehova “socht eene Uasoak jäajen de Filista”. Lota bleef Simson mol bie eene Hua äa Hus en de Filista äare Staut Gaza. Opp dise Sauz jeef Gott Simson de Krauft, daut dee de Stautspuaten kunn rutrieten, wuaderch de Staut nich mea von äare Jäajna beschizt wia (Rech. 14:​1-4; 16:​1-3). Oba bie Delila wia daut aundasch, wiels see woomäajlich eene israelitische Fru wia. Daut Simson sikj met ar aufjeef, jeef am nich de Jeläajenheit, jäajen de Filista to kjamfen.

13. Waut deed Delila?

¹³ Delila leet sikj von de Filista met eene groote Somm Jelt bekjeepen toom Simson veroden. Wia hee soo sea aun ar veleeft un vetrud hee ar soo sea, daut hee daut nich enwort, waut see doonen wull? Endoont woo daut wia, Delila hukt Simson soo lang aun, bat hee ar daut säd, wuarom hee soo stoakj wia. Daut es schod, daut Simson doaderch siene Krauft velua un fa eene jewesse Tiet nich mea Jehova sienen Säajen haud (Rech. 16:​16-20).

14. Woo kjeem daut ut, wiels Simson Delila vetrud?

 ¹⁴ Simson must sea doarunja lieden, wiels hee dolla opp Delila vetrud aus opp Jehova. De Filista neemen am faust un spekjten am de Uagen ut. Hee wort en de Staut Gaza em Jefenkjnis jestopt, wua hee ea mol de Stautspuaten rutjeräten haud. De Menschen von doa muaken am to eenen Sklow, waut doa must Jeträajd molen. Lota, aus de Filista een Fast hauden, muaken dee een grootet Opfa fa dän Aufgott Dagon, wiels dee dochten, daut dis faulscha Gott an jeholpen haud, Simson fausttonämen. Dee holden Simson utem Jefenkjnis un brochten am no daut Fast, om äaren “Spos met am [to] haben” (Rech. 16:​21-25).

15. Woo wees Simson, daut hee sikj wada opp Jehova veleet? (Rechta 16:​28-30). (See daut Bilt oppe väaschte Sied.)

¹⁵ Simson muak eenen grooten Fäla, oba hee jeef doawäajen nich opp. Hee kjikjt wieda doano, woo hee de Oppgow nokomen kunn, waut Jehova am jejäft haud. Hee sull jäajen de Filista kjamfen (läs Rechta 16:​28-30). Simson säd to Jehova: “Ekj well mie aun de Filista rajchen”. De woara Gott horcht doano, waut Simson säd, un jeef am siene besondre Krauft trigj. Doaderch muak Simson opp dise Sauz mea Filista doot, aus hee verhäa haud.

16. Waut kjenn wie ut Simson sienen Fäla lieren?

¹⁶ Wan Simson wäajen sienen Fäla uk sea lieden must, proowd hee doawäajen wieda, Jehova sienen Wellen to doonen. Wan wie eenen Fäla moaken un doaderch eenen strenjen Rot kjrieen ooda een Väarajcht velieren, sell wie uk nich oppjäwen, wiels Jehova jeft nich opp met ons (Psa. 103:​8-10). Wan wie uk Fäla moaken, Jehova kaun ons doawäajen Krauft jäwen, sienen Wellen to doonen, soo aus daut bie Simson wia.

17-18. Wuarom jeft die Michael sien Biespel Moot? (See uk daut Bilt.)

¹⁷ See wie mol, waut een junga Brooda beläwd, waut Michael heet. Hee wia drock em Deenst fa Jehova. Hee wia Deenstaumthelpa un Pionia. Oba hee muak eenen Fäla un velua doaderch siene Väarajchten enne Vesaumlunk. Hee sajcht: “Bat dan wia ekj sea drock em Deenst fa Jehova. Oba met eemol haustich späad sikj mie daut soo, aus wan ekj jäajen eene Zement-Waunt däwad. Ekj wist, daut Jehova mie nich veloten wudd, oba ekj wundad, aus  ekj jeemols wada wudd soon goodet Veheltnis met am haben ooda aus ekj wada wudd soo väl enne Vesaumlunk doonen kjennen aus ea.”

¹⁸ Daut goode es: Michael jeef nich opp! Hee sajcht: “Ekj schauft doaropp, wada een gooda Frint met Jehova to woaren. Ekj bäd foaken von Hoaten to am, ekj studieed un docht doaräwa no.” Met de Tiet kjrieech Michael siene Väarajchten enne Vesaumlunk wada trigj. Hee es nu een Eltesta un Pionia. Hee vetalt noch: “De Breeda un besonda de Eltestasch stunden mie bie un spruaken mie Moot too. Doaderch wort mie daut kloa, daut Jehova mie doawäajen noch leewd. Ekj kaun wada met een reinet Jewessen enne Vesaumlunk deenen. Dit haft mie jelieet, daut Jehova deejanje vejäwen woat, waut werkjlich een Leetsennen haben.” Wie kjennen ons secha sennen, daut wie väl fa Jehova doonen kjennen un daut hee ons säajnen woat, wan wie uk eenen Fäla jemoakt haben. Wie motten bloos wieda opp Jehova vetruen un doano seenen, daut wie nich wada dänselwjen Fäla moaken (Psa. 86:5; Spr. 28:13).

19. Woo haft Simson sien Biespel die Krauft jejäft?

¹⁹ En disen Artikjel hab wie von eenje besondre Sachen jerät, waut Simson deed. Hee wia nich volkomen un muak eenen Fäla wäajen Delila. Oba hee jeef dan noch nich opp un proowd wieda, Jehova to deenen. Un Jehova jeef uk nich opp met am. Gott brukt Simson toom waut grootet derchfieren. Jehova tald am doawäajen fa eenen Mensch, waut eenen butajeweeneljen Gloowen haud un leet sienen Nomen enne List nennschriewen von soone, waut grooten Gloowen beweesen. Dee List finj wie en Hebräa, Kapitel 11. Daut jeft ons väl Moot, doaraun to denkjen, daut wie eenen leeftoljen Voda deenen, waut ons jieren Krauft jäwen well, besonda wan wie daut schwoa haben un ons siene Help fält! Krakjt soo aus Simson well wie Jehova uk no dit froagen: “Denkj aun mie un jeff mie . . . Krauft!” (Rech. 16:28).