1. Waut vonne Oabeit kjrieech Petrus een Stootje ver sienen Doot?

 DE Apostel Petrus deend Jehova fa väle Joaren tru. Hee deed met Jesus toop prädjen, hee wia de ieeschta, waut de Nichjuden prädijd, un lota wort hee eena von dän Väastaunt. Aus sien Läwen meist to Enj wia, wist hee daut, daut hee boolt stoawen wudd, un Jehova jeef am noch mea Oabeit. Rom aune 62-64 n.Chr. leet Jehova Petrus twee Breew oppschriewen. Daut sent de Bibelbieekja 1. un 2. Petrus. Petrus hopt, daut dise Breew de Christen no sienen Doot wudden halpen (2. Pet. 1:​12-15).

2. Wuarom wieren Petrus siene Breew krakjt paussent?

² Petrus schreef siene Breew en eene Tiet, aus de Breeda un Sestren derch väl schwoaret gonen musten (1. Pet. 1:6). Schlajchte Menschen proowden, faulsche Lieren enne Christenvesaumlunk nenntobrinjen un dee bat doa to brinjen, waut orreinet to doonen (2. Pet. 2:​1-2, 14). De Christen en Jerusalem wudden boolt beläwen, “daut aules een Enj haft” – de Staut un de Tempel wudden von de reemische Soldoten venicht woaren (1. Pet. 4:7). Petrus siene Breew haben de Christen secha jeholpen to seenen, woo see äare Schwierichkjeiten uthoolen kunnen un sikj fa dee reedtomoaken, waut noch komen wudden. b

3. Wuarom sell wie ons Petrus siene Breew unjastonen?

³ Petrus schreef siene Breew aun de Christen ieeschtemma,  oba Jehova sach doano, daut dee Poat von sien Wuat worden. Doawäajen kjenn wie doa uk eenen Nutzen von haben (Reem. 15:4). Wie läwen en eene Welt, waut orreinet deit, un doawäajen kaun ons daut schwoa sennen, Jehova to deenen. Un wie woaren boolt eene groote Liedenstiet beläwen, waut väl schlemma sennen woat aus don, aus Jerusalem un de Tempel venicht worden. Oba en siene beid Breew halpt Petrus ons äwa wichtje Sachen denkjen. Daut kaun ons halpen, fa Jehova sienen Dach reed to sennen, jäajen de Menschenforcht to jewennen un onse Breeda un Sestren werkjlich von Hoaten to leewen. Doaderch kjennen de Eltestasch uk weeten, woo see de Breeda un Sestren enne Vesaumlunk halpen kjennen, stoakj to bliewen.

4. Waut kaun onsen Gloowen oppe Proow stalen no 2. Petrus 3:​3-4 no?

⁴ Menschen vondoag dän Dach jleewen daut nich, waut de Bibel verutsajcht. Jäajna spotten veleicht äwa ons, wiels wie aul fa väl Joaren jesajcht haben, daut daut Enj boolt komen woat. Un eenje sajen mau rajcht, daut et kjeenmol komen woat (läs 2. Petrus 3:​3-4). Wan een Oabeitspoatna, wäa von onse Famielje ooda wäa em Prädichtdeenst soont sajcht, dan kaun daut onsen Gloowen oppe Proow stalen. Oba Petrus sajcht, waut ons halpen kaun.

5. Waut kaun ons halpen, jeduldich no daut Enj von dise Welt to luaren? (2. Petrus 3:​8-9).

⁵ Daut lat veleicht soo, daut Jehova too lang wacht met daut Enj von dise Welt brinjen. Oba Petrus siene Wieed halpen ons, doa rajcht nauntokjikjen, wiels dee wiesen ons, daut Jehova de Tiet aundasch sitt aus wie Menschen (läs 2. Petrus 3:​8-9). Fa Jehova sent dusent Joa soo aus een Dach. Jehova es jeduldich un well nich, daut doa wäa veloaren jeit. Oba wan sien Dach komen woat, woat hee een Enj moaken met dise Welt. Waut vonne groote Iea es daut nich, daut wie dise Tiet, waut wie noch haben, utnutzen kjennen, om aule Menschen oppe Welt to prädjen!

6. Woo kjenn wie Jehova sienen Dach “faust em Denkj hoolen”? (2. Petrus 3:​11-12).

⁶ Petrus rot ons too, Jehova sienen Dach “faust em Denkj [to] hoolen” (läs 2. Petrus 3:11; 3:​12, NW). Woo kjenn wie daut? Wan wie emma – woomäajlich jieda Dach – äwa de Säajnungen en de niee Welt nodenkjen. Stal die väa, woo scheen daut woat sennen, sikj reine Loft entoholen, waut jesundet to äten, de Vestorwne wada opptonämen un de Menschen, waut hundade Joaren trigj jeläft haben, to lieren, woo de biblische Profezeiungen sikj erfelden. Äwa dit notodenkjen, woat die halpen, nich endoontich to woaren äwa de Tiet, en woone wie nu läwen, un wieda jeduldich to wachten. Wiels wie “dit em verut weeten”, waut boolt komen woat, woa wie nich “veleit woaren” von faulsche Liera (2. Pet. 3:17).

7. Waut kaun de Menschenforcht aun ons doonen?

⁷ Wiels wie weeten, daut Jehova sien Dach boolt komen woat, well wie soo väl Menschen aus mäajlich de goode Norecht prädjen. Oba en jewesse Omstend felt ons daut veleicht schwoa, daut to doonen. Wuarom? Veleicht hab wie Menschenforcht. Petrus jinkj daut krakjt soo. Aun dän Owent aus Jesus jerecht wort, haud Petrus Angst un säd, daut hee nich eent von Jesus siene Jinja wia; hee säd mau rajcht, daut hee Jesus nich mol kjand (Mat. 26:​69-75). Oba Petrus jewonn jäajen de Menschenforcht un lota säd hee: “Fercht junt nich fa äa dreiwen un lot junt nich enenjsten”  (1. Pet. 3:14). Daut, waut Petrus säd, jeft ons de Sechaheit, daut wie uk jäajen de Menschenforcht jewennen kjennen.

8. Waut kaun ons halpen, jäajen de Menschenforcht to jewennen? (1. Petrus 3:15).

⁸ Waut kaun ons halpen, jäajen de Menschenforcht to jewennen? Petrus sajcht: “Heilicht Christus, däm Harn, en june Hoaten” (läs 1. Petrus 3:​15, JHF c). Daut bediet, daut wie doaräwa nodenkjen sellen, daut Jesus ons Kjennich es un daut hee väl Macht haft. Woascht du oppjeräacht ooda jerettelt, wan du de Jeläajenheit hast, wäm de goode Norecht to prädjen? Dan denkj aun onsen Kjennich; stal die väa, woo hee em Himmel rejieet un daut dee doa dusende Enjel haft. Denkj uk doaraun, daut am wort “aule Jewault jejäft em Himmel uk oppe Ieed” un daut hee bie die es “batem Enj von de Welt” (Mat. 28:​18-20). Petrus säd uk, daut wie sellen “jieda Tiet reed” sennen, fa onsen Gloowen entostonen. Wurscht du jleichen, oppe Oabeit, enne School ooda sestwua opp Jeläajenheit Zeichnis to jäwen? Dan denkj doaräwa no, wanea du wurscht kjennen de Jeläajenheit haben, un moak die reed, waut du dan sajen west. Bäd om Moot, un vetru doaropp, daut Jehova die halpen woat, jäajen de Menschenforcht to jewennen (Apj. 4:29).

9. Woo wudd Petrus opp eene Sauz haben kunt Leew wiesen? (See uk daut Bilt.)

⁹ Petrus lieed, woo hee aundre Leew wiesen kunn. Hee wia doa met bie, aus Jesus säd: “Ekj jäw junt een nieet Jeboot, jie sellen junt unjarenaunda goot sennen, krakjt soo aus ekj junt goot jewast sie. June Leew fa eenaunda saul jrod soo groot sennen, aus miene Leew fa junt” (Joh. 13:34). Lota wull Petrus oba ut Angst fa de judische Christen nich mea met siene nichjudische Breeda un Sestren toop äten. De Apostel Paulus säd, daut Petrus doamet “heicheld” (Gal. 2:​11-14). Petrus neem daut aun, daut Paulus am trajchtwees, un lieed doavon. En siene beid Breew räd hee doavon, daut wie nich bloos sellen Leew haben fa onse Breeda un Sestren, oba dee uk wiesen.

10. Waut halpt ons, onse Breeda “werkjlich von Hoaten goot” to sennen? (1. Petrus 1:22).

¹⁰ Petrus säd, daut wie onse Breeda un Sestren sellen “woare Broodaleew” wiesen (läs 1. Petrus 1:22). Soone Leew hab wie, wan wie ons “aun dee Woarheit hoolen”. Biejlikj de Woarheit, “daut Gott manke Menschen kjeen Unjascheet moakt” (Apj. 10:​34-35). Wan wie bloos wesse enne Vesaumlunk Leew wiesen un aundre oba nich, dan kom wie daut nich no, waut Jesus äwa de Leew lieed. Na jo, met eenje sent wie veleicht bätre Frind aus met aundre, un krakjt soo wia daut bie Jesus uk (Joh. 13:23; 20:2). Oba Petrus halpt ons denkjen, daut wie sellen “woare Broodaleew” haben fa aule enne Vesaumlunk, krakjt soo aus en eene Famielje (1. Pet. 2:17).

11. Waut bediet daut, aundre “werkjlich von Hoaten goot” to sennen?

¹¹ Petrus säd, daut wie ons sellen “unjarenaunda werkjlich von Hoaten goot” sennen. Aundre “werkjlich” goot to sennen meent hia, daut wie dee Leew wiesen, wan ons daut uk schwoa felt. Woo es daut biejlikj, wan een Brooda ons beleidicht ooda velazt haft? Wie haben de Natua, ons auftorajchnen un nich dän Leew to wiesen. Oba Jesus lieed Petrus, daut Gott nuscht von soont helt (Joh. 18:​10-11). Petrus schreef lota: “Tolt orrajcht nich met orrajcht trigj. Schelt nich trigj wan jie jeschullen woaren” (1. Pet. 3:9). Wan wie aundre werkjlich von Hoaten goot sent, dan woa wie dee frintlich un leeftolich behaundlen, wan dee uk waut doonen, waut ons weedeit.

12. (a) Waut woa wie noch doonen, wan wie groote Leew haben? (b) Waut west du doonen, soo aus opp daut Video Onse Eenichkjeit es sea väl wieet to seenen es?

¹² En sienen ieeschten Breef räd Petrus uk doavon, daut wie sellen “groote Leew” haben. Soone “Leew dakjt een deel Sinden too”, nich bloos eenje (1. Pet. 4:​8, NW). Veleicht docht Petrus doaraun, waut Jesus am Joaren trigj äwa vejäwen jelieet haud. Petrus docht veleicht, daut hee een feina Mensch wia, aus hee säd, daut hee sienen Brooda “säwen mol” vejäwen wudd. Oba Jesus säd to am, daut hee “77 mol” vejäwen sull. Daut bediet, onen Enj vejäwen – un daut jelt uk fa ons (Mat. 18:​21-22, Footnoot). Wan die daut schwoa es, disen Rot notokomen, dan woa nich mootloos! Jehova siene Deena sent aula onvolkomen un dee felt daut aula schwoa, aundre to vejäwen. Daut wichtichste es, daut du aules deist, waut du kaust, om met dienen Brooda Fräd to moaken un dän to vejäwen. d

13. Wuarom es daut fa de Eltestasch nich emma leicht, de Breeda un Sestren Moot tootospräakjen?

¹³ Petrus woat daut kjeenmol vejäten haben, waut Jesus no sien Oppstonen to  am säd: “Weid miene [kjliene] Schop!” (Joh. 21:16). Wan du een Eltesta best, dan weetst du, daut dit uk fa die es. Oba daut kaun fa eenen Eltesten schwoa sennen, de Tiet to kjrieen, om dise wichtje Oppgow to doonen. Eltestasch motten ieescht doano kjikjen, daut äare Famieljes daut needje haben, daut dee sikj jeleeft feelen un daut dee Jehova emma noda komen. Dee motten em Prädichtdeenst uk veroppgonen un dee haben bie onse Toopkomes un Kongressen veschiedne Oppgowen. Aundre sent biejlikj Poat von een Hospitol-Vemedlungs-Kommitee ooda von de Aufdeelunk fa daut Buwoakj. Eltestasch sent werkjlich sea drock!

14. Waut kaun Eltestasch halpen, fa Gott siene Häad to sorjen? (1. Petrus 5:​1-4).

¹⁴ Petrus säd to aule Eltestasch: “Sorcht fa Gott siene Häad” (läs 1. Petrus 5:​1-4). Wan du een Eltesta best, dan leefst du secha diene Breeda un Sestren un west dee Moot toospräakjen. Oba eenjemol feelt sikj die daut veleicht soo, daut du too drock ooda too meed best toom daut doonen. Waut kaun die dan halpen? Saj Jehova, woo du die feelst. Petrus schreef: “Wäa doa deent, saul daut en dee Krauft doonen, wuamet Gott am vesorcht” (1. Pet. 4:11). De Breeda un Sestren haben veleicht soone Trubbels, waut en dise Welt nich woaren gaunz jeleest woaren. Oba vejät nich, daut de bowaschta Hoad, Jesus Christus, väl bäta halpen kaun aus du. Hee kaun daut nu aul doonen, oba uk enne niee Welt. Gott velangt von junt Eltestasch bloos, daut jie june Breeda leewen, daut jie dee Moot toospräakjen un daut jie dee wiesen, “woo see läwen sellen”.

15. Woo moakt een Eltesta de Breeda un Sestren Moot? (See uk daut Bilt.)

¹⁵ William es aul lang Eltesta jewast un hee weet, woo wichtich daut es, de Breeda un Sestren Moot tootospräakjen. Aus daut met de COVID-19-Krankheit aunfunk, wia daut fa am un de aundre Eltestasch von siene Vesaumlunk sea wichtich, daut dee jieda Wäakj met jieda Brooda un Sesta von äare Deenstgrupp räden deeden. Hee sajcht, wuarom: “Väle Breeda wieren tus auleen un fa dee wudd daut sennen leicht jewast, mootloos to woaren.” Wan een Brooda ooda Sesta Trubbels haft, dan horcht William dee goot too. Soo kaun hee weeten, waut an Sorjen moakt un waut an fält. Dan  sieekjt hee opp onse Websied no een Buak ooda Video, waut an Moot jäwen kaun. Hee sajcht: “De Breeda un Sestren Moot to jäwen, es nu väl wichtja aus jeemols ea. Wie strenjen ons sea aun, aundre äwa Jehova to lieren. Oba wie motten ons uk krakjt soo sea aunstrenjen, de Schop Moot tootospräakjen un dee halpen, en de Woarheit to bliewen.”

16. Woo kjenn wie daut nokomen, waut wie von Petrus siene Breew lieren?

¹⁶ Wie haben bloos von een poa Sachen jerät, waut wie von Petrus siene beid Breew lieren kjennen. Veleicht hast du waut jefungen, wua du die en vebätren west. Jankat die biejlikj, foakna äwa de Säajnungen notodenkjen, waut wie enne niee Welt kjrieen woaren? Hast du die daut väajenomen, oppe Oabeit, enne School ooda sestwua opp Jeläajenheit Zeichnis to jäwen? Hast du aun eenjet jedocht, woo du de Breeda un Sestren wiesen kaust, daut du groote Leew hast? Eltestasch, sent jie junt eenich jeworden, Jehova siene Schop wellich Moot tootospräakjen? Sie opprechtich met die selfst un kjikj doano, wua du die vebätren kaust, oba woa nich mootloos. “De Har [es] goot” un hee woat die halpen, die to vebätren (1. Pet. 2:3). Petrus vesechat ons: “Gott [woat] junt selfst gaunz utlieren. . . . Hee woat junt stoakj moaken, hee woat junt halpen Gloowen to hoolen, hee woat junt oppem fausten Grunt stalen” (1. Pet. 5:​10, NW).

17. Woo woat daut utkomen, wan wie ons aunstrenjen un daut loten, daut Jehova ons utlieet?

¹⁷ Petrus docht eemol, daut hee daut nich wieet wia, met Jesus toop to sennen (Luk. 5:8). Oba Jehova un Jesus stunden am leeftolich bie, un doaderch kunn hee Jesus tru nofoljen. Doawäajen kunn Petrus “en onsen Harn un Heilant Jesus Christus sien eewjet Rikj nenn” (2. Pet. 1:11). Daut wia werkjlich eene besondre Beloonunk! Wan du die wieda aunstrenjst un daut latst, daut Jehova die utlieet, woascht du uk met daut eewje Läwen beloont woaren. De “Loon fa jun Gloowen” woat sennen, “daut june Seelen jerat woaren” (1. Pet. 1:9).