39. ARTIKJEL FA DAUT STUDIUM
LEET 125 Jlekjlich sent dee, waut Metleet haben
Jäwen woat die mea Freid brinjen
“Daut jeft mea Freid, wan eena jeft, aus wan eena nemt” (APJ. 20:35)
OM WAUT DAUT JEIT
Wie woaren lieren, woo wie opp veschiedne Wäaj waut fa aundre doonen kjennen un woo wie noch mea Freid haben kjennen, wan wie jäwen.
1-2. Wuarom muak Jehowa ons soo, daut wie mea Freid haben, wan wie jäwen, aus wan wie nämen?
JEHOWA haft ons Menschen soo jemoakt, daut ons daut mea Freid jeft to jäwen, aus to nämen (Apj. 20:35). Meent daut nu, daut ons daut kjeene Freid brinjt, wan ons wäa waut jeft? Nä. Wie weeten goot, daut ons daut schaftich moakt, wan wie waut jejäft kjrieen. Oba ons jeft daut doawäajen mea Freid, aundre waut to jäwen. Un ons kjemt daut en Werkjlichkjeit togood, daut Jehowa ons soo jemoakt haft. Wuarom?
2 Wiels Jehowa ons soo jemoakt haft, kjenn wie selfst waut doonen, daut wie noch mea Freid haben. Wie kjennen noch mea Freid haben, wan wie no Jeläajenheiten sieekjen, fa aundre waut to doonen. Es daut nich scheen, daut Jehowa ons soo jemoakt haft? (Psa. 139:14).
3. Wuarom woat Jehowa de freidja Gott jenant?
3 Wiels de Bibel ons vesechat, daut jäwen ons Freid brinjt, wundat ons daut nich, daut Jehowa een freidja Gott es (1. Tim. 1:11). Hee wia de Ieeschta, dee aundre waut jeef, un kjeena jeft soo väl aus Jehowa. Soo aus de Apostel Paulus säd: “Wäajen am hab wie daut Läwen un bewäajen ons un sent hia” (Apj. 17:28). “Aule goode Sachen un aule volkomne Gowen” komen en Werkjlichkjeit von Jehowa (Jak. 1:17).
4. Waut kaun ons halpen, noch mea Freid to haben?
4 Wie aula wudden jleichen, noch mea Freid to haben, waut von jäwen kjemt. Wie kjennen daut, wan wie friejäwrich sent soo aus Jehowa (Efs. 5:1). En disen Artikjel woa wie lieren, woo Jehowa wiest, daut hee friejäwrich es un waut wie doonen kjennen, wan aundre nich wiesen, daut dee dankboa sent fa daut, waut wie fa dee doonen. Dit woat ons halpen, aundre wieda waut to jäwen un noch mea Freid to haben.
SIE FRIEJÄWRICH SOO AUS JEHOWA
5. Waut vonne Sachen jeft Jehowa ons biejlikj?
5 Opp waut vonne Wäaj wiest Jehowa, daut hee friejäwrich es? See wie mol een poa Biespels. Jehowa jeft ons daut Needje. Wie woaren nich aula een jemieteljet Läwen haben, oba Jehowa kjemt doafäa opp, daut wie daut haben, waut ons fält. Biejlikj sorcht hee doafäa, daut wie waut to äten un auntotrakjen haben un uk eene Städ toom wonen (Psa. 4:9; Mat. 6:31-33; 1. Tim. 6:6-8). Oba jeft Jehowa ons dise Sachen, bloos wäajen hee sikj bemott feelt? Oba nä! Wuarom jeft hee ons dee dan?
6. Waut kjenn wie ut Matäus 6:25-26 lieren?
6 Eefach jesajcht, jeft Jehowa ons daut Needje, wäajen hee ons leeft. See wie mol, waut Jesus en Matäus 6:25-26 säd (läs). Doa räd hee von de Väajel un säd: “Dee seien nich un arnten uk nich un saumlen nuscht enne Spikjasch”. Un waut säd hee daut näakjste? “Jun himlischa Voda feet dee”. Dan fruach Jesus: “Sent jie nich mea wieet aus de Väajel?” Waut wull hee doamet lieren? Daut siene true Deena fa Jehowa väl mea wieet sent aus de Tieren. Wan hee aul fa de Tieren sorcht, woat hee dan nich uk fa ons sorjen? Jehowa sorcht fa siene Famielje ut Leew, krakjt soo aus een leeftolja Voda daut deit (Psa. 145:16; Mat. 6:32).
7. Opp waut vonne Wajch biejlikj kjenn wie friejäwrich sennen soo aus Jehowa? (See uk daut Bilt.)
7 Wie kjennen Jehowa nodoonen, wan wie aundre daut jäwen, waut äant fält, wäajen wie äant leewen. Weetst du biejlikj von eenen Brooda ooda eene Sesta, waut daut aun Äten ooda Kjleeda fält? Jehowa kaun die brucken toom dänjanjen daut jäwen, waut am fält. Jehowa siene Deena sent besonda doafäa bekaunt, daut dee aundre en schwoare Tieden uthalpen. En de Tiet von de COVID-19 Krankheit wieren de Breeda un Sestren biejlikj reed von äa Äten, äare Kjleeda un aundre wichtje Sachen soone to jäwen, dee daut doaraun fäld. Väle jeewen uk Gowen fa daut weltwiede Woakj. Dee neemen sikj de Wieed en Hebräa 13:16 to Hoaten, wua daut sajcht: “Vejät nich goodet to doonen un aundre mettohalpen. Daut sent Opfa, dee Gott jefaulen.” Doaderch kunnen een deel Breeda oppe gaunze Welt, wua waut Schlemmet passieet wia, de Help kjrieen, waut äant fäld.
Wie kjennen aula friejäwrich sennen soo aus Jehowa (See Varsch 7)
8. Woo kjemt Jehowa siene Krauft ons togood? (Filippa 2:13).
8 Jehowa jeft ons Krauft. Jehowa haft Krauft onen Enj un hee freit sikj, siene true Deena von dise Krauft to jäwen (läs Filippa 2:13). Hast du aul mol om Krauft jebät, eene Vesieekjunk to wadastonen ooda om eene schwoare Loag uttohoolen ooda daut du aules doonen kust, waut du em Dach doonen sust? Aus du de Krauft kjrieechst, om waut du jebät hautst, wieescht du secha met dän Apostel Paulus met envestonen, aus hee schreef: “Ekj hab fa aules Krauft derch dän, dee mie stoakj moakt” (Filip. 4:13).
9. Woo kjenn wie onse Krauft brucken, om aundre to halpen, soo aus Jehowa daut deit? (See uk daut Bilt.)
9 Wie haben nich Krauft onen Enj soo aus Jehowa un wie kjennen aundre uk nich opp dee Wajch Krauft jäwen, aus hee daut deit. Oba wie kjennen am nodoonen, wan wie onse Krauft brucken, om aundre to halpen. Wie wudden biejlikj kjennen fa de elre ooda kranke Breeda foaren enkjeepen ooda dee äa Hus besorjen. Un wan daut fa ons mäajlich es, wudd wie uk methalpen kjennen, daut Vesaumlungshus reintomoaken un to unjahoolen. Onse Breeda un Sestren woat daut sea togood komen, wan wie onse Krauft brucken, om soone Sachen aus dit to doonen.
Wie kjennen onse Krauft brucken, om aundre to halpen (See Varsch 9)
10. Woo kjenn wie aundre Moot jäwen derch daut, waut wie sajen?
10 Well wie uk nich vejäten, daut wie aundre kjennen Krauft, ooda Moot, jäwen met onse Wieed. Weetst du von wäm, dän daut aun Troost fält ooda dee sikj wudd bäta feelen, wan du dän opprechtich lowen deetst? Dan lot dän daut weeten, daut du om am todoonen best. Du wurscht dän kjennen besieekjen ooda dän fonen ooda dän waut schriewen, biejlikj een E-Mail ooda eene Koat. Waut du dän sajchst, mott nich waut Besondret sennen. Een poa leeftolje Wieed kjennen aul krakjt daut sennen, waut dän Brooda ooda de Sesta fält, daut dee noch eenen Dach tru blift ooda daut dän daut bäta jeit (Spr. 12:25; Efs. 4:29).
11. Waut deit Jehowa met siene Weisheit?
11 Jehowa jeft ons Weisheit. De Jinja Jakobus schreef: “Wan daut bie irjentwäm von junt aun Weisheit fält, dan saul hee Gott doano froagen. Wiels Gott jiedrem jieren jeft un kjeenen schelt” (Jak. 1:5). Dit wiest, daut Jehowa nich jiezich es met siene Weisheit; hee lat aundre wellich von dee. Jakobus säd uk, daut Jehowa “kjeenem schelt”. Daut bediet, hee woat nich doll, wan am wäa no Weisheit frajcht. Hee well nich, daut wie ons schlajcht feelen, am no siene Leidunk to froagen. Dauts krakjt aundasch: Hee muntat ons opp, am doano to froagen (Spr. 2:1-6).
12. Waut vonne Jeläajenheiten hab wie, aundre daut to lieren, waut wie weeten?
12 Kjenn wie Jehowa en dän Stekj nodoonen, daut wie nich jiezich sent met onse Weisheit, aulsoo met daut, waut wie weeten? (Psa. 32:8). Jehowa siene Deena haben väle Jeläajenheiten, aundre daut to lieren, waut see weeten. Biejlikj doo wie foaken de Niee wiesen, woo dee kjennen bäta woaren em Prädichtdeenst. De Eltestasch lieren uk jeduldich de Deenstaumthelpa un aundre jedeepte Breeda, woo dee äare Oppgowen enne Vesaumlunk doonen kjennen. Un woo es daut met soone, waut sikj goot met buen un unjahoolen vestonen? Dee halpen met, soone uttolieren, waut nich väl Erfoarunk haben, soo daut see weeten, woo de Oabeit jedonen mott bie de Jebieda, wua wie Jehowa deenen.
13. Woo kjenn wie Jehowa nodoonen, wan wie aundre utlieren?
13 Proow, Jehowa notodoonen, wan du aundre utlieescht. Denkj doaraun, daut Jehowa aundre wellich von siene Weisheit jeft. Doawäajen doo wie soone, dee wie utlieren, uk wellich aules lieren, waut wie weeten. Wie hoolen nich eenjet plietsch ut Angst, daut deejanja, dän wie utlieren, lota de Oppgow kjricht, waut wie nu haben. Eenje denkjen: “Mie haft daut kjeena jelieet, dan kaun dee sikj daut selfst lieren.” Oba kjeena von Jehowa siene Deena saul jeemols soo aus dit denkjen. Enne Städ daut frei wie ons, dee “ons selfst to jäwen”. Daut bediet, soo väl aus mäajlich to doonen toom aundre utlieren, un dee aules to sajen, waut wie weeten (1. Tes. 2:8). Wie wellen, daut “dee em Staund sent uk aundre to lieren” (2. Tim. 2:1-2). Wan jieda eena aundre wellich daut lieet, waut dee weet, dan woa wie ons selfst un uk de aundre met mea vestonen un mea Freid haben.
WAN DAUT SOO LAT, DAUT DEE NICH DANKBOA SENT
14. Waut doonen de Mieeschte, wan wie waut fa dee doonen?
14 Wan wie friejäwrich sent, besonda to onse Breeda un Sestren, dan loten dee ons daut foaken weeten, daut see dankboa sent. Veleicht schriewen dee ons eene Koat ooda loten ons daut aundasch weeten (Kol. 3:15). Wan dee dankscheen sajen, dan frei wie ons noch dolla, daut wie waut fa dee jedonen haben.
15. Aun waut sell wie denkjen, wan eenje sikj nich bedanken?
15 Oba veleicht woaren eenje sikj nich bedanken. Eenjemol halp wie aundre veleicht met onse Tiet, Krauft un Jelt, oba daut lat soo, daut dee nich dankboa sent. Waut kjenn wie dan doonen, daut wie nich onse Freid velieren ooda mootloos woaren? Well wie onsen Teemavarsch, Aposteljeschicht 20:35, em Denkj hoolen. Woo väl Freid wie haben, wan wie waut fa aundre doonen, henjt nich doavon auf, aus dee doafäa dankboa sent ooda nich. Wie kjennen doawäajen met Freiden jäwen, wan daut uk soo lat, daut dee nich dankboa sent. See wie mol een poa Sachen, waut ons doabie halpen kjennen.
16. Waut kaun ons halpen, wieda met Freiden to jäwen?
16 Doo Jehowa no. Hee jeft aule Menschen Goodet, endoont aus dee doafäa dankboa sent ooda nich (Mat. 5:43-48). Jehowa vesprakjt, daut wan wie uk soo jäwen aus hee, aulsoo “onen daut [wie] waut trigjvelangen, dan woat [onse] Beloonunk groot sennen” (Luk. 6:35). Biejlikj velang wie nich, daut aundre sikj bedanken. Hool em Denkj, daut Jehowa die emma fa daut Goode beloonen woat, waut du fa aundre deist, un wäajen du daut “met Freiden” deist, endoont aus dee dankboa sent ooda nich (2. Kor. 9:7; Spr. 19:17).
17. Woo kjenn wie Jehowa nodoonen, wan wie waut fa aundre doonen? (Lukas 14:12-14).
17 Waut es noch eene Wajch, woo wie Jehowa nodoonen kjennen, wan wie aundre waut jäwen? Wie sellen daut nokomen, waut Jesus en Lukas 14:12-14 säd (läs). Doa es nuscht met orrajcht, to soone friejäwrich to sennen, waut doa uk kjennen friejäwrich sennen to ons. Oba waut es, wan du enwoascht, daut du foaken waut fa aundre deist, wiels du hopst, daut dee uk waut fa die doonen? Dan proow, daut to doonen, waut Jesus säd. Sie to soone friejäwrich, waut nuscht haben, om die daut trigjtotolen. Soo woascht du Jehowa nodoonen un schaftich sennen. Wan wie nuscht von aundre trigjvelangen, dan woa wie nich onse Freid velieren, wan wie waut fa dee doonen, un dee oba nich wiesen, daut see dankboa sent.
18. Waut sell wie nich denkjen, un wuarom?
18 Denkj nich, daut dee ondankboa sent (1. Kor. 13:7). Wan aundre nich wiesen, daut see dankboa sent, dan wudd wie kjennen äwa dit denkjen: “Sent dee werkjlich ondankboa ooda haben dee daut bloos vejäten, sikj to bedanken?” Veleicht sent doa aundre Jrind fäa, wuarom dee äare Dankboakjeit nich wiesen. Eenje sent veleicht sea dankboa, oba dee felt daut schwoa, daut to sajen. Ooda veleicht schämen dee sikj, von aundre Help to kjrieen, besonda wan dee ea bäta auf wieren un selfst aundre holpen. Wan wie onse Breeda un Sestren werkjlich leewen, dan woa wie nich denkjen, daut dee ondankboa sent, un wie woaren wieda met Freiden jäwen (Efs. 4:2).
19-20. Woo kaun de Jedult ons halpen, met Freiden to jäwen? (See uk daut Bilt.)
19 Sie jeduldich. De weisa Kjennich Salomo schreef mol äwa friejäwrich sennen: “Lot dien Broot oppem Wota foaren, dan woascht du daut met de Tiet finjen” (Liera 11:1). Dise Wieed wiesen, daut eenje Menschen sikj ieescht “met de Tiet” bedanken woaren. See wie mol, woo daut bie eene Sesta wia.
20 Väl Joaren trigj schreef eenen Kjreisoppsechta siene Fru eenen sea scheenen Breef no eene Sesta, waut korz jedeept wia. En dän Breef räd see doavon, woo wichtich daut es, Jehowa tru to bliewen. Rom acht Joa lota schreef de Sesta ar eenen Breef trigj. See säd: “Mie jankad daut eefach, die daut to sajen, woo sea du mie de latste Joaren jeholpen hast, onen daut du daut enjeworden best.” See säd wieda: “Daut, waut du mie schreefst, wia sea leeftolich, un de Bibelvarsch jinkj mie sea to Hoaten – ekj hab dän kjeenmol vejäten.” a Nodäm daut see von eenje Schwierichkjeiten vetald, waut see jehaut haud, säd see: “Eenjemol wull ekj gaunz oppjäwen un opphieren met Jehowa deenen. Oba dan docht ekj emma wada aun dän Bibelvarsch, waut du mie schreefst, un daut jeef mie de Krauft, nich opptojäwen.” See säd noch: “En dise acht Joa haft mie nuscht soo sea jeholpen aus dee Breef un dee Bibelvarsch.” De Sesta bedankt sikj ieescht mol väle Joaren lota, oba dän Kjreisoppsechta siene Fru woat sikj doawäajen sea jefreit haben. Daut kaun bie ons uk soo sennen: Eenje woaren sikj veleicht ieescht lang nodäm fa daut bedanken, waut wie mol fa dee deeden.
Eenje woaren sikj veleicht ieescht lang nodäm fa daut bedanken, waut wie mol fa dee deeden (See Varsch 20) b
21. Wuarom west du wieda friejäwrich sennen soo aus Jehowa?
21 Soo aus wie jeseenen haben, haft Jehowa ons besonda jemoakt. Wie kjrieen mea Freid, wan wie jäwen, aus wan wie nämen. Wie feelen ons goot, wan wie onse Breeda un Sestren halpen kjennen un wie freien ons, wan dee äare Dankboakjeit wiesen. Oba endoont aus dee sikj bedanken ooda nich, wie kjennen schaftich sennen, wiels wie daut Rajchte deeden. Vejät kjeenmol: Endoont woo väl du jefst, Jehowa kaun “die väl mea aus daut jäwen” (2. Chr. 25:9). Wie woaren aundre kjeenmol soo väl jäwen kjennen, aus Jehowa ons jeft! Un doa es nuscht, waut ons mea Freid jeft, aus wan Jehowa ons beloont. Well wie ons aulsoo eenich sennen, onsen himlischen Voda notodoonen, waut sea friejäwrich es.
LEET 17 “Ekj well”
a De Bibelvarsch, waut dän Kjreisoppsechta siene Fru en dän Breef schreef, wia 2. Johanes 8. Doa sajcht daut: “Paust opp daut jie daut nich velieren, wuafäa wie jeoabeit haben. Jie sellen junen vollen Loon kjrieen.”
b BILTBESCHRIEWUNK: Opp dit nojemoakte Bilt es to seenen, waut dän Kjreisoppsechta siene Fru deed. See schreef eenen sea scheenen Breef, om eene Sesta Moot tootospräakjen. Väle Joaren lota schreef de Sesta ar trigj un bedankt sikj doafäa.
