1-2. Wuarom sent Jehowa siene Deena schaftich? (Jakobus 1:22-25).

 JEHOWA un Jesus wellen, daut wie Freid haben. De Schriewa von Psalm 119:2 säd: “Seelich sent dee [ooda Freid haben dee], dee sien Jesaz hoolen, un am von gaunzem Hoaten sieekjen.” Jesus säd uk noch: “Freid haben dee, waut Gott sien Wuat hieren un sikj doaraun hoolen” (Luk. 11:28).

² Jehowa siene Deena sent schaftje Menschen. Wuarom? Daut jeft väle Jrind doafäa. Oba eene wichtje Sach es, daut dee jieda Dach Gott sien Wuat läsen un sikj aunstrenjen, daut notokomen, waut dee lieren (läs Jakobus 1:22-25).

3. Woo kjemt ons daut togood, daut notokomen, waut wie ut Gott sien Wuat lieren?

³ Daut to “doonen waut daut Wuat sajcht”, kjemt ons opp veschiedne Wäaj togood. Biejlikj jeft ons daut Freid to weeten, daut Jehowa schaftich es, wan wie daut nokomen, waut wie ut sien Wuat lieren (Liera 12:13). Un wan wie ons no de Bibel rechten, dan hab wie uk een scheenret Famieljenläwen un sent goode Frind met onse Breeda un Sestren. Hast du dit uk aul beläft? Noch eene Sach es, daut wie de Trubbels utem Stich gonen, waut soone haben, dee sikj nich no Jehowa siene Jesazen rechten. Dauts krakjt soo, aus de Kjennich David säd. Hee räd en een Leet von Jehowa siene Jesazen, Befälen un Jerechten, un dan säd hee: “Wäa dee hoolen deit haft een grooten Loon” (Psa. 19:8-12).

4. Wuarom es daut nich emma leicht, daut to doonen, waut Gott sien Wuat sajcht?

⁴ Daut wie daut doonen kjennen, waut Gott sien Wuat sajcht, mott wie de Bibel läsen un dee studieren, soo daut  wie weeten kjennen, waut Jehowa von ons haben well. Oba wie motten toostonen, daut et nich emma leicht es, wiels wie drock sent. Doawäajen mott wie ons eene Tiet oppoat saten toom daut doonen. Soo, räd wie mol von een poa Iedeeen, waut ons halpen kjennen, jieda Dach de Bibel to läsen. Wie woaren uk seenen, waut ons halpen kaun, doaräwa notodenkjen, waut wie läsen, un woo wie daut em Läwen nokomen kjennen.

SAT DIE EENE TIET OPPOAT, OM GOTT SIEN WUAT TO LÄSEN

5. Waut vonne Sachen hoolen ons Drock?

⁵ De mieeschte von Jehowa siene Deena sent sea drock. Daut brukt een deel Tiet, aul daut notokomen, waut ons enne Schreft väajeschräwen es. Biejlikj motten de Mieeschte utschaufen, om fa sikj selfst ooda fa de Famielje to sorjen (1. Tim. 5:8). Väle motten sikj om soone von äa Frintschoft kjemren, waut krank ooda aul ella sent. Un wie aula motten doano seenen, daut wie jesunt bliewen, un daut brukt uk Tiet. Dan hab wie noch Oppgowen enne Vesaumlunk. Eene wichtje Oppgow es, daut wie soo väl aus mäajlich em Deenst gonen. Soo, woo kjenn wie Tiet finjen toom jieda Dach de Bibel läsen, doaräwa nodenkjen un daut nokomen, wan wie soo väl Veauntwuatungen haben?

6. Waut kaun die halpen, jieda Dach de Schreft to läsen? (See uk daut Bilt.)

⁶ De Schreft to läsen, es fa ons Christen eent von “daut gaunz wichtichste”; doawäajen mott wie daut doonen (Filip. 1:10). De gaunz ieeschta Psalm sajcht, daut een schaftja Mensch “siene Freid aun däm HARN sien Jesaz haft, un sikj Dach un Nacht doamet beschafticht” (Psa. 1:1-2). Daut wiest kloa, daut wie motten eene Tiet oppoat saten toom de Schreft läsen. Wanea es de baste Tiet, de Schreft to läsen? Daut kaun fa jiedrem eenen veschieden sennen. Om daut ruttofinjen, denkj mol äwa no: “Woa ekj jieda Dach to dise Tiet de Bibel läsen kjennen?” Een Brooda, waut Victor heet, sajcht: “Ekj jleich zemorjes  de Schreft to läsen. Wan ekj daut uk nich jleich, tiedich zemorjes opptostonen, sent to dise Tiet oba nich soo väl Sachen, waut mie auflenkjen kjennen. Ekj sie dan gaunz waka un mie es daut leichta, bie de Sach to sennen.” Es daut bie die uk soo? Denkj mol äwa no: “Wanea es daut fa mie de baste Tiet, de Schreft to läsen?”

DENKJ ÄWA DAUT NO, WAUT DU LÄST

7-8. Waut sell wie nich doonen, daut ons daut kaun togood komen, waut wie läsen? Met waut jeit daut to vejlikjen?

⁷ Mau rajcht wan wie ons eene Tiet oppoat saten toom de Bibel läsen, mott wie doawäajen noch opp waut aundret achten. Hast du mol waut jeläst un best een Stootje lota enjeworden, daut du daut aul vejäten hast? Ons haft daut aula mol soo jegonen. Daut kaun biejlikj sennen, daut wie ons daut väanämen, jieda Dach miere Kapitels enne Bibel to läsen. Dauts sea fein; wie sellen ons eenjet väanämen un ons Bastet doonen, ons doaraun to hoolen (1. Kor. 9:26). Oba de Bibel läsen, es bloos de Aunfank. Wie motten noch mea doonen, daut wie doa eenen jratren Nutzen von haben.

⁸ Denkj wie mol äwa dit Biespel: De Plaunten brucken Wota, daut dee nich dootgonen. Oba woo es daut, wan daut en eene korte Tiet sea räajent? Dan es de Ieed gaunz naut. Un wan daut dan wieda räajent, halpt de Plaunten daut nuscht, wäajen daut Wota nich en de Ieed nenntrakjt. Dauts bäta, wan daut nich soo sea räajent, wäajen soo kaun daut Wota en de Ieed nenntrakjen un de Plaunten halpen to waussen. Krakjt soo es daut, wan wie de Bibel läsen: Wan wie daut bloos bosich doonen, dan woa wie nich kjennen äwa daut nodenkjen, daut em Denkj hoolen un daut nokomen, waut wie läsen (Jak. 1:24).

9. Waut sell wie doonen, wan wie enwoaren, daut wie de Bibel bloos bosich läsen?

⁹ Best du daut mol enjeworden, daut du de Bibel bloos bosich läsen deetst? Waut saust du dan doonen? Läs sachta. Proow, doaräwa notodenkjen, waut du jroz läsen deist ooda waut du aul jeläst hast. Dauts  nich soo schwoa. Du wurscht die kjennen väanämen, een kjlien bät lenja to studieren, daut du Tiet hast toom nodenkjen. Ooda een bät weinja to läsen un de äwaje Tiet to brucken toom nodenkjen. Victor, von dän wie ea aul räden, sajcht: “Ekj doo nich väl opp eemol enne Bibel läsen, veleicht bloos een Kapitel. Oba wäajen ekj aum zemorjes läs, kaun ekj dän Dach äwa wieda äwa daut nodenkjen, waut ekj jeläst hab.” Endoont woo väl du läst, dauts wichtich, sach to läsen, soo daut du doaräwa nodenkjen kaust (Psa. 119:97; see daut Hock “ Kaust du äwa dise Froagen nodenkjen?”).

10. Waut von Biespel wiest, woo eena daut nokomen kaun, waut eena lieet? (1. Tessalonicha 5:17-18).

¹⁰ Endoont wanea ooda woo lang du de Bibel läst, kjikjt emma doano, woo du daut nokomen kaust, waut du doa läst. Wan du ieescht een poa Varzhen en Gott sien Wuat jeläst hast, dan denkj doaräwa no: “Woo kaun ekj dit nu aul ooda lota mol brucken?” Saj wie mol, du hast 1. Tessalonicha 5:17-18 jeläst (läs). Doahinja wurscht du kjennen stellhoolen un doaräwa nodenkjen, woo foaken un woo iernst du bäden deist. Du wurscht uk kjennen äwa eenjet denkjen, wua du fäa dankboa best. Un veleicht woascht du die eenich, Jehowa fa dreeatlei dankscheen to sajen. Soogoa wan du bloos een poa Minuten nodenkjst, woat die daut aul halpen, Gott sien Wuat bäta to vestonen un daut notokomen, waut daut sajcht. Denkj mol han, woo sea die daut wudd togood komen, wan du daut jiedatsmol soo deetst, wan du de Bibel läst! Met de Tiet woascht du Jehowa bäta deenen kjennen. Oba waut es, wan sikj die daut soo väakjemt, daut du die en veschiedne Stekjen vebätren motst?

NEMM DIE NICH TOO VÄL VÄA

11. Wuarom feel wie ons eenjemol veleicht mootloos? Jeff een Biespel.

¹¹ Wan wie de Bibel läsen, feel wie ons eenjemol veleicht mootloos, wiels wie enwoaren, daut wie ons en väl Stekjen vebätren motten. Saj wie mol, du läst eenen Dach de Bibel un doa rät daut von, daut et nich goot es, aundre väatotrakjen (Jak. 2:1-8). Du woascht en, daut du die doarenn vebätren kaust, woo du aundre behaundelst, un du nemst die daut väa, doaraun to schaufen. Sea goot! Dän näakjsten Dach läst du doaräwa, woo wichtich daut es, daut wie oppaussen, waut wie sajen (Jak. 3:1-12). Du woascht en, daut du eenjemol waut sajchst, waut nich leeftolich es ooda waut aundre nich oppbut. Doawäajen woascht du die eenich, dolla äwa soont to räden, waut aundre oppbut.  Noch dän näakjsten Dach läst du doaräwa, daut wie nich sellen Frind woaren met de Welt (Jak. 4:4-12). Du woascht en, daut du dolla oppaussen motst, waut fa Tietvedrief du die wälst. Bat dän vieeden Dach best du veleicht aul mootloos, wiels du die en soo väl Stekjen vebätren motst.

12. Wuarom saust du nich mootloos woaren, wan du enwoascht, daut du die en väl Stekjen vebätren motst? (See uk de Footnoot.)

¹² Wan du enwoascht, daut du die noch en väl Stekjen vebätren motst, dan woa nich mootloos. Daut wiest, daut du een goodet Hoat hast. Deemootje Menschen läsen de Bibel, om to seenen, wua dee sikj vebätren kjennen. a Hool uk em Denkj, daut eena sikj emma wada met “de niee Natua” kjleeden mott (Kol. 3:10; see uk de Erkjläarunk toom studieren “erneuert wird” en de Studiabibel). Soo, waut woat die halpen, wieda daut to doonen, waut Gott sien Wuat sajcht?

13. Waut kaun die halpen, daut notokomen, waut du lieescht? (See uk daut Bilt.)

¹³ Proow, bloos een poa Sachen notokomen enne Städ aules, waut du läst (Spr. 11:2). Du wurscht dit kjennen proowen: Schriew die daut opp, aun waut du die vebätren saust un sieekj die eent ooda twee Sachen ut, wua du daut ieeschte aun schaufen west – aun daut aundre kaust du dan lota schaufen. Aun waut saust du daut ieeschte schaufen?

14. Aun waut wurscht du daut ieeschte kjennen schaufen?

¹⁴ Veleicht woascht du die eenich, daut ieeschte aun soont to schaufen, waut die leichta es to volbrinjen ooda aun soont, wua du die daut needichste en vebätren motst. Wan du die ieescht eenich best, aun  waut du schaufen west, dan sieekj die en onse Bieekja mea doaräwa no. Du wurscht kjennen de Woaktorm online-Bibliotäkj ooda de Help toom nosieekjen fa Jehowa siene Zeijen brucken. Saj Jehowa daut, waut du die väajenomen hast, un froag dän, daut hee die “beides jeft: dän Wunsch un uk de Krauft, daut to doonen” (Filip. 2:13). Dan proow, daut notokomen, waut du jelieet hast. Wan du ieescht sitst, daut du die en eenen Stekj vebätat hast – biejlikj aun eene Ieejenschoft – dan woascht du mea Moot haben un die woat daut leichta sennen, die noch en aundre Stekjen to vebätren.

LOT GOTT SIEN WUAT EN DIE WIRKJEN

15. En woonen Stekj sent Jehowa siene Deena aundasch aus aundre, waut uk de Bibel läsen? (1. Tessalonicha 2:13).

¹⁵ Väle sajen, daut see de Bibel mieremol derchjeläst haben. Oba jleewen dee werkjlich, waut de Bibel lieet? Proowen dee, doano to läwen un sikj to endren? Foaken nich. Oba Jehowa siene Deena denkjen gaunz aundasch äwa de Bibel! Soo aus de ieeschte Christen nämen dee de Bibel “aus Gott sien Wuat aun, waut daut uk werkjlich es”. Un dee doonen äa Bastet, dän Rot ut de Bibel notokomen (läs 1. Tessalonicha 2:13).

16. Waut kaun ons halpen, daut to doonen, waut daut Wuat sajcht?

¹⁶ Dauts nich emma leicht, Gott sien Wuat to läsen un daut notokomen. Veleicht hab wie meist nich de Tiet, doabennen to läsen. Ooda wie läsen väl too bosich un denkjen doa nich äwa no. Ooda veleicht woa wie mootloos, wäajen doa soo väl Sachen sent, wua wie ons en vebätren motten. Endoont waut die schwoa felt, met Jehowa siene Help kaust du daut äwakomen. Well wie ons eenich sennen, siene Help auntonämen un nich een vejätsoma Hiera sennen, oba daut doonen, waut daut Wuat sajcht. Un wie wellen dit em Denkj hoolen: Je mea wie en Gott sien Wuat läsen un daut en ons Läwen nokomen, je mea Freid woa wie haben (Jak. 1:25).