38. ARTIKJEL FA DAUT STUDIUM
LEET 25 Gott sien ieejnet Volkj
Kjemst du daut no, waut wie von Jesus siene Jlikjnisen lieren kjennen?
“Eenen woat metjenomen woaren un dän aundren woat doa auleen jeloten” (MAT. 24:40)
OM WAUT DAUT JEIT
Wie woaren ons dree Jlikjnisen unjastonen, waut Jesus vetald, un wie woaren seenen, waut dee met de Jerechtstiet todoonen haben, waut jroz ver daut Enj von dise Welt sennen woat.
1. Waut woat Jesus boolt doonen?
WIE läwen en eene Tiet, wua besondre Sachen passieren woaren! Jesus woat boolt jiedrem eenen rechten. Jesus säd, waut enne Welt passieren wudd, ea hee aulem rechten wudd. Hee jeef een “Tieekjen”, aun woont de Tiet wudd to seenen sennen, daut hee doa wia, wan am uk kjeena met de Uagen seenen wudd. Daut Tieekjen wudd uk wiesen, daut daut Enj von dise Welt dicht bie wia (Mat. 24:3). Dit Tieekjen finjt eena en Matäus, Kapitel 24 un 25, en Markus, Kapitel 13 un en Lukas, Kapitel 21.
2. Von waut woa wie en disen Artikjel räden, un wuarom woat ons daut togood komen?
2 Jesus vetald dree Jlikjnisen, om ons eenje goode Woarnungen to jäwen. Daut sent de Jlikjnisen von de Schop un de Kosen, von de väabedochte Mejalen un dee, waut nich kluak wieren, un von de Talenten. Jieda Jlikjnis moakt dietlich, daut Jesus de Menschen doano rechten woat, waut dee nu doonen. Well wie mol seenen, waut wie ut dise Jlikjnisen lieren kjennen un woo wie daut nokomen kjennen. Daut ieeschte well wie von daut Jlikjnis von de Schop un de Kosen räden.
DE SCHOP UN DE KOSEN
3. Wanea woat Jesus de Menschen rechten?
3 En daut Jlikjnis von de Schop un de Kosen säd Jesus, daut hee de Menschen doano rechten woat, aus dee de goode Norecht aunjenomen haben un siene jesaulwde Breeda unjastett haben ooda nich (Mat. 25:31-46). Wanea woat Jesus de Menschen rechten? Enne “groote Liedenstiet”, jroz ver Harmagedon (Mat. 24:21). Krakjt soo aus een Hoad de Schop von de Kosen deelt, soo woat Jesus dee, waut siene jesaulwde Nofolja tru unjastetten, von dee uteneendeelen, waut daut nich doonen.
4. Wuarom kjenn wie ons no Jesaja 11:3-4 no secha sennen, daut Jesus jerajcht rechten woat? (See uk daut Bilt oppe .)
4 De Bibel sajcht, daut Jehowa Jesus aunjestalt haft toom rechten, un daut dee jerajcht rechten woat (läs Jesaja 11:3-4). Jesus kjikjt doano, waut de Menschen doonen, waut dee denkjen un waut dee sajen – biejlikj woo dee siene jesaulwde Breeda behaundlen (Mat. 12:36-37; 25:40). Jesus woat krakjt weeten, wäa siene Jesaulwde Breeda un daut Woakj, waut dee doonen, unjastett haft. a Woo deit eena Christus siene Breeda unjastetten? Eent von daut Wichtichste es, wan wie bie daut Prädichtwoakj metmoaken. Dee, waut de Jesaulwde opp dise Wajch unjastetten, woaren mank de “Jerajchte” jetalt woaren un de Mäajlichkjeit haben, “fa emma [to] läwen” hia oppe Ieed (Mat. 25:46; Opb. 7:16-17). Es daut nich eene wundascheene Beloonunk? De Nomes von dee, waut enne groote Liedenstiet un uk lota tru bliewen, woaren fa emma em Läwesbuak jeschräwen stonen (Opb. 20:15).
Jesus woat boolt aulem rechten un entscheiden, wäa soo sent aus Schop un wäa soo sent aus Kosen (See Varsch 4)
5. Waut sell wie no daut Jlikjnis von de Schop un de Kosen no doonen, un wäa saul daut doonen?
5 Wies, daut du tru best. Jesus sien Jlikjnis von de Schop un de Kosen jeit mieeschtens om dee, waut de irdische Hopninj haben. Dee wiesen, daut see Gloowen haben, doaderch daut see Christus siene Breeda bie daut Prädichtwoakj unjastetten un sikj tru aun de Leidunk von dän truen, väabedochten Sklow hoolen, dän Jesus aunjestalt haft (Mat. 24:45). Oba uk dee, waut de himlische Hopninj haben, motten de Woarnunk en dit Jlikjnis iernst nämen. Wuarom? Wiels dee motten uk wiesen, daut see tru sent. Jesus kjikjt doano, waut see doonen, waut see denkjen un waut see sajen. Jesus vetald noch twee aundre Jlikjnisen, waut uzhent Woarnungen sent fa de Jesaulwde. Dise Jlikjnisen finj wie biejlikj en Matäus, Kapitel 25. Well wie ons nu daut Jlikjnis unjastonen von de väabedochte Mejalen un dee, waut nich kluak wieren.
DE VÄABEDOCHTE MEJALEN UN DEE, WAUT NICH KLUAK WIEREN
6. Woo weesen fief Mejalen, daut see väabedocht wieren? (Matäus 25:6-10).
6 En daut Jlikjnis von de Mejalen räd Jesus von tieen Mejalen, waut rutjinjen toom sikj met dän Briegaum trafen (Mat. 25:1-4). Dee wullen aula met dän Briegaum toop no siene Kjast gonen. Jesus säd, daut fief Stekj “väabedocht” wieren un fief Stekj “nich kluak” wieren. De väabedochte Mejalen wieren reed. Dee hauden aules met, daut see soo lang no dän Briegaum luaren kunnen, aus daut needich wia; mau rajcht wan hee lot enne Nacht kjeem. Dee hauden Eelj-Laumpen met, daut see de Nacht Licht hauden. Un dee hauden bowenenn noch Eelj met, daut äare Laumpen nich utjinjen, wan daut met dän Briegaum lenja dieed, aus see dochten (läs Matäus 25:6-10). Aus de Briegaum dan kjeem, jinjen de väabedochte Mejalen met am toop no de Kjast. Krakjt soo es daut met de jesaulwde Christen: Soone, waut reed un waka un tru bliewen, bat Jesus enne groote Liedenstiet kjemt, woaren beloont woaren. Dee woaren met dän Briegaum toop, aulsoo Jesus, en sien himlischet Kjennichrikj sennen (Opb. 7:1-3). b Oba waut wia met de Mejalen, waut nich kluak wieren?
7. Woo kjeem daut met de Mejalen ut, waut nich kluak wieren, un wuarom?
7 Aus de Briegaum kjeem, wieren de väabedochte Mejalen reed. Oba dee, waut nich kluak wieren, wieren nich reed. Dee äare Laumpen wieren batem utgonen un dee hauden nich biesied noch Eelj metjenomen. Aus dee daut enworden, daut de Briegaum boolt komen wudd, musten dee ieescht mol gonen Eelj kjeepen. Un dee wieren noch nich trigj, aus de Briegaum kjeem. “De Mejalen, waut reed wieren, jinjen [dan] met am toop no de Kjast, waut utjereet wia, un de Däa wort toojemoakt” (Mat. 25:10). Aus de Mejalen, waut nich kluak wieren, dan trigjkjeemen, wullen dee uk bie de Kjast sennen. Oba de Briegaum säd to dee: “Ekj kjan junt nich” (Mat. 25:11-12). Dise Mejalen wieren nich reed jewast, soo lang no dän Briegaum to luaren, aus daut needich wia. Waut kjennen de Jesaulwde doavon lieren?
8-9. Waut kjennen de Jesaulwde von daut Jlikjnis von de Mejalen lieren? (See uk daut Bilt.)
8 Wies, daut du reed best. Jesus säd nich verut, daut doa twee Gruppen Jesaulwde wudden sennen – soone, waut wudden reed sennen, no am to luaren, bat hee enne groote Liedenstiet kjeem, un soone, waut nich wudden reed sennen. Hee wull bloos dietlich moaken, woo daut met de Jesaulwde utkomen wudd, wan dee nich reed wieren, bat aum Enj tru uttohoolen. Dee wudden äare Beloonunk spretz gonen (Joh. 14:3-4). Dauts werkjlich iernst! Endoont aus wie de himlische ooda de irdische Hopninj haben, wie sellen ons aula de Woarnunk en daut Jlikjnis von de Mejalen to Hoaten nämen. Jieda eena saul reed sennen, bat aum Enj staunthauft to bliewen (Mat. 24:13).
9 Nodäm daut Jesus daut Jlikjnis von de Mejalen vetalt haud, om dietlich to moaken, daut wie sellen reed sennen, vetald hee daut Jlikjnis von de Talenten. Dit Jlikjnis moakt kloa, daut wie sellen flietich sennen.
Jieda eena saul de Woarnunk en daut Jlikjnis von de Mejalen iernst nämen un reed sennen, batem Enj staunthauft to bliewen (See Varsch 8-9)
DE TALENTEN
10. Woo weesen twee Sklowen, daut see tru wieren? (Matäus 25:19-23).
10 En daut Jlikjnis von de Talenten räd Jesus von twee Sklowen, waut äaren Harn tru wieren, un von eenen, waut nich tru wia (Mat. 25:14-18). Ea dis Maun wajchreisd, jeef hee siene Sklowen Talenten, aulsoo eene groote Somm Jelt. Twee Sklowen weesen, daut see tru wieren, wiels see flietich wieren un Jeschaften dreewen, om mea Jelt fa äaren Harn to vedeenen. Woo kjeem daut ut? Aus de Har trigjkjeem, hauden de Sklowen dobbelt soo väl Jelt, aus hee äant jejäft haud. Hee lowd äant doafäa un säd to jiedrem eenen: “Komm un frei die met dienen Harn met” (läs Matäus 25:19-23). Oba waut wia met dän aundren Sklow? Waut deed hee met daut Jelt, waut sien Har am jejäft haud?
11. Waut wort met dän fulen Sklow, un wuarom?
11 De aundra Sklow kjrieech een Talent, oba hee wia ful. Sien Har räakjend doamet, daut hee met daut Talent mea Jelt vedeenen wudd. Oba enne Städ daut growd hee daut bloos unja. Aus sien Har trigjkjeem, jeef de Sklow am bloos daut eene Talent trigj. Dis Sklow haud nich eene goode Enstalunk. Enne Städ sienen Harn om togood hoolen to froagen, wäajen hee kjeen Jelt vedeent haud, nand hee sienen Harn “een sea strenja Mensch”, waut oba nich soo wia. Sien Har wia nich bloos ontofräd met am, oba dän wort uk daut Talent wajchjenomen un hee wort von dän Harn sien Hus wajchjeschekjt (Mat. 25:24, 26-30).
12. Wäm stalen de twee true Sklowen vondoag dän Dach väa?
12 De twee true Sklowen stalen de true jesaulwde Christen väa. De Har es Jesus, un hee sajcht to jiedrem eenen von dee: “Komm un frei die met dienen Harn met”. Derch daut ieeschte Oppstonen kjrieen de Jesaulwde äare Beloonunk em Himmel (Mat. 25:21, 23; Opb. 20:5b). Oba daut schlajchte Biespel von dän fulen Sklow es uk eene Woarnunk fa dee. Waut vonne?
13-14. Waut kjennen de Jesaulwde von daut Jlikjnis von de Talenten lieren? (See uk daut Bilt.)
13 Wies, daut du flietich best. Met daut Jlikjnis von de Talenten, krakjt soo aus met daut Jlikjnis von de Mejalen, wull Jesus nich verutsajen, daut de Jesaulwde wudden ful woaren. Enne Städ daut muak hee dietlich, woo daut utkomen wudd, wan dee opphieeden, flietich to sennen. Wan dee uk “beroopen un utjewält sent”, wudden dee daut vespält gonen un wudden nich kjennen en daut himlische Kjennichrikj nennkomen (2. Pet. 1:10).
14 Jesus siene Jlikjnisen von de Mejalen un von de Talenten wiesen kloa, daut aule jesaulwde Christen motten reed un flietich sennen. Oba jeef Jesus noch eene aundre Woarnunk fa de Jesaulwde? Jo, hee deed! Dee finj wie en Matäus 24:40-41.
Jesus well, daut de Jesaulwde wiesen, daut see flietich sent (See Varsch 13-14) d
WÄM WOAT “METJENOMEN WOAREN”?
15-16. Woo halpt Matäus 24:40-41 de Jesaulwde to vestonen, daut see motten waka bliewen?
15 Jroz ea Jesus dise dree Jlikjnisen vetald, räd hee von twee Mana, waut oppe Stap schauften, un twee Frues, waut toop Jeträajd fien muaken. Daut sach soo, daut de Mana dautselwje schauften, un de Frues krakjt soo. Oba Jesus säd, daut “eenen woat metjenomen woaren un dän aundren woat doa auleen jeloten” (läs Matäus 24:40-41). Dan rood hee siene Jinja too: “Blieft waka, wiels jie weeten daut nich, woonen Dach jun Har komen woat” (Mat. 24:42). Sea dautselwje säd hee uk, aus hee daut Jlikjnis von de Mejalen vetald (Mat. 25:13). Jehieet daut toop, waut Jesus säd, aus hee dise beid Jlikjnisen vetald? Daut schient soo. Jesus räd doavon, daut doa woat eene latste Entscheidunk jemoakt woaren äwa jiedrem eenen von de Jesaulwde, waut doa wiesen woat, woone von dee daut wieet sent, de himlische Beloonunk to kjrieen. Bloos soone, waut werkjlich jesaulft sent un tru bliewen, woaren “metjenomen woaren” un von Jesus en daut himlische Kjennichrikj oppjenomen woaren (Joh. 14:3).
16 Wies, daut du waka best. De Jesaulwde, waut em Jeisteljen nich waka bliewen, woaren nich met de “Utjewälde” toop jesaumelt woaren (Mat. 24:31). Oba aul Gott siene Deena sellen Jesus siene Wieed aus eene Woarnunk seenen, daut see sellen waka un tru bliewen, endoont aus dee de Hopninj haben, em Himmel ooda oppe Ieed to läwen.
17. Wuarom sell wie ons nich sorjen, wan Jehowa eenje en onse Tiet saulwen deit?
17 Wiels wie Jehowa goot kjanen, sent wie ons secha, daut hee emma rajcht rechten deit. Doawäajen moak wie ons nich Sorjen, wan Jehowa eenje von siene true Deena en de lotre Joaren jesaulft haft. c Wie hoolen uk em Denkj, waut Jesus en daut Jlikjnis von dän Wiengoaden säd äwa de Oabeida, waut mau en de alfte Stund aunfungen to schaufen (Mat. 20:1-16). Soone, waut mau lota em Dach aunfungen em Goaden to schaufen, kjrieejen dautselwje Loon aus dee, waut von zemorjes jeschauft hauden. Krakjt soo woaren aule Jesaulwde, waut tru bliewen, äare Beloonunk em Himmel kjrieen, endoont wanea dee jesaulft worden.
HORCH NO JESUS SIENEN ROT
18-19. Waut hab wie von dise Jlikjnisen jelieet?
18 Waut hab wie jelieet? Daut Jlikjnis von de Schop un de Kosen wiest dee, waut de Hopninj haben, fa emma oppe Ieed to läwen, woo wichtich daut es, Jehowa tru to bliewen – nu aul un enne groote Liedenstiet, waut boolt komen woat. Jroz ver Harmagedon woat Jesus bestädjen, daut soone, waut tru jebläwen sent, daut wieet sent, “fa emma [to] läwen” (Mat. 25:46).
19 Wie haben uk twee Jlikjnisen jeseenen, waut eene Woarnunk sent fa de Jesaulwde. En Jesus sien Jlikjnis von de väabedochte Mejalen un dee, waut nich kluak wieren, wieren mau fief weis. Dee wieren reed, no dän Briegaum to luaren, soo lang aus daut needich wia. Oba de Mejalen, waut nich kluak wieren, wieren nich reed. Doawäajen leet de Briegaum dee nich bie siene Kjast sennen. Wie motten uk reed sennen to wachten, bat Jesus daut Enj von dise Welt brinjt, endoont woo lang daut dieet. En Jesus sien Jlikjnis von de Talenten hab wie noch jeseenen, daut de twee true Sklowen flietich wieren. Dee schauften sea fa äaren Harn un doawäajen wia hee tofräd met dee. Oba de fula Sklow wort aufjewäsen. Waut es de Lia? Wie motten ons en Jehowa sienen Deenst drock hoolen bat aum Enj. Tolatst hab wie uk jeseenen, daut de Jesaulwde motten waka bliewen, soo daut dee von Jesus “metjenomen woaren”, om äare Beloonunk em Himmel to kjrieen. De Jesaulwde freien sikj doa aul sea too, met Jesus em Himmel vesaumelt to woaren. No dän Kjrich von Harmagedon woaren dee Jesus siene Brut sennen opp daut Laum siene Kjast (2. Tes. 2:1; Opb. 19:9).
20. Woo woat daut met dee utkomen, waut no Jehowa siene Woarnungen horchen?
20 De Tiet, wan Jesus rechten woat, kjemt bosich noda, oba wie brucken nich Angst haben. Wan wie tru bliewen, woat ons leeftolja Voda ons de Krauft jäwen, “dee von Gott kjemt”, soo daut wie “ver dän Menschensän stonen kjennen” (2. Kor. 4:7; Luk. 21:36). Wan wie no de Woarnungen horchen, waut en Jesus siene Jlikjnisen sent, woat ons Voda tofräd met ons sennen, endoont aus wie de himlische ooda de irdische Hopninj haben. Un wäajen Jehowa soon grootet Metleet haft, woaren onse Nomes em “Läwensbuak” fa emma jeschräwen stonen (Opb. 3:5; Dan. 12:1).
LEET 26 Daut deed jie fa mie
a See dän Artikjel “Waut weet wie doaräwa, woo Jehowa de Menschen boolt rechten woat?” em Woaktorm vom Mei 2024.
b Bie dän Artikjel “Wirst du wachsam bleiben?” em Woaktorm vom 15. Moaz 2015 jeit noch mea doaräwa notoläsen.
d BILTBESCHRIEWUNK: Eene jesaulwde Sesta studieet de Bibel met eene junge Fru, dee see em Deenst jetroffen haft.
