Wie haben kjeene Uasoak to denkjen, daut Jesus de 70 Jinja aufjewäsen haud ooda daut dee am veloten hauden, wäajen dee doa nich met bie wieren, aus hee daut Owentmol enfieed. Jesus wull eefach bloos met siene Apostel toop sennen bie dit besondre Toopkomen.

De 12 Apostel un de 70 Jinja wieren aula Jesus siene Nofolja. Daut ieeschte wäld Jesus sikj von mank aul siene Nofolja 12 Mana ut, dee hee Apostel nand (Luk. 6:12-16). Aus hee en Galiläa wia, “roopt Jesus de 12 toop … un hee schekjt dee ut, Gott sien Kjennichrikj to prädjen un Kranke to heelen” (Luk. 9:1-6). Een Stoot lota, aus Jesus en Judäa wia, “socht hee … sikj noch 70 aundre ut un schekjt dee veropp, emma twee un twee” (Luk. 9:51; 10:1). Soo, Jesus haud opp veschiedne Städen Nofolja, waut aula siene Norecht prädjen deeden.

Een Poa Doag ver Jesus sienen Doot jinjen hee un siene Apostel no Jerusalem. Oba hee bestald nich, daut aul siene Nofolja – von Judäa, Galiläa un Peräa – doa uk sullen hankomen, om daut Passafast to hoolen. De Juden, waut Jesus siene Nofolja wieren, fieeden je jieda Joa daut Passafast met äare Famieljes toop (2. Mo. 12:6-11, 17-20). Daut schient soo, daut Jesus ditmol bloos met siene Apostel wull toop sennen. Hee säd je to dee: “Ekj hab aul sea doano jeluat, dit Passamol met junt toop to äten, ea ekj lieden woa” (Luk. 22:15).

Jesus haud goode Uasoak doafäa. Hee wudd boolt stoawen motten aus “Gott sien Laum, dee de Welt äare Sinden wajchnemt” (Joh. 1:29). Hee wudd en Jerusalem stoawen, wua se aul fa hundade Joaren emma Opfa jemoakt hauden fa Gott. Daut Passalaum holp de Israeliten doaraun denkjen, daut Jehowa äant von Ägipten friejemoakt haud. Oba derch sien Opfa wudd Jesus noch väl mea doonen. Hee wudd dee friemoaken von Sind un Doot (1. Kor. 5:7-8). Derch sien Opfa wudden 12 Apostel Poat von daut Ferment von de Christenvesaumlunk woaren (Efs. 2:20-22). Daut Bibelbuak Openboarunk sajcht, daut daut heilje Jerusalem “12 Gruntsteena [haft], un opp de Steena … [sent] daut Laum siene 12 Apostel äare Nomes nopp jeschräwen” (Opb. 21:10-14). Daut wiest, daut de true Apostel wudden een wichtjet Poat doatoo doonen, daut Gott sien Väanämen sikj erfellen kunn. Doawäajen es daut to vestonen, daut Jesus bloos met dee wull toop sennen fa daut latste Passamol un fa daut Owentmol, waut hee fuaz doahinja enfieed.

De 70 un de aundre Jinja wieren nich biem Owentmol met bie. Oba aule, waut Jesus nofoljden un tru bleewen, wudd daut Owentmol togood komen. Aul dise Jinja, waut lota jesaulft worden, wudden en dän Bunt met en sennen, om een Kjennichrikj to kjrieen, wua Jesus dän Zeowes to siene Apostel von räd (Luk. 22:29-30).