Boolt woat Gott sien Kjennichrikj, siene Weltrejierunk, oppe gaunze Welt fa Fräd un Eenichkjeit sorjen, wua aul soo no jeluat worden es. “Aules woat frädlich sennen”, soo aus Psalm 72:7 vesprakjt. Wanea woat dit Kjennichrikj äwa de gaunze Ieed rejieren? Woo woat daut rejieren? Un woo kaun die dise Harschoft togood komen?

En de Schreft woat eenjet verutjesajcht, waut kloa wiest, daut Gott sien Rikj dicht bie es. Biejlikj Kjrich oppe gaunze Welt, Hungaschnoot, Krankheiten, väl Ieedbäben un Jesazloosichkjeit, waut emma oaja woat, es een “Tieekjen” doafäa (Matäus 24:3, 7, 12; Lukas 21:11; Openboarunk 6:2-8).

En eene aundre Profezeiunk sajcht daut, “daut en de latste Doag jreslich schwoare Tieden sennen woaren. Menschen woaren väl von sikj selfst hoolen, nom Jelt hinjaraun sennen, . . . de Elren nich jehorchen, ondankboa, onheilich sennen, dee woaren sikj nich goot sennen un nich veseenen loten, sikj unjarenaunda spotten un veachten, sikj nich beharschen un onbandich sennen, daut goode nich lieden kjennen, . . . stolt sennen met daut, waut see sikj enbillen, un daut Vejnieejen leewa haben aus Gott” (2. Timotäus 3:1-4). Daut haft emma eenje Menschen jejäft, waut soo wieren, oba nu sent de mieeschte soo.

Vonne 1914 aun erfellen dise Profezeiungen sikj. Jeschichtsforscha, Rejierungsmana un Schriewa haben jesajcht, woo de Welt sikj von daut Joa veendat haft. Biejlikj schreef de Jeschichtsforscha Peter Munch von Dänemark: “De Kjrich aune 1914 haft de jratste Veendrunk en de Menschheit jebrocht. Ver dit Joa dochten de Menschen, daut et enne Welt emma bäta wort, . . . oba dan kjeem doa eene jreselje Tiet von Lieden un Hauss, wua noanich mea Sechaheit es.”

Oba daut goode es, dise Tiet es soo aus een Owwada, wua lota aules ruich woat. Dise Tiet wiest, daut Gott sien Kjennichrikj boolt äwa de gaunze Ieed rejieren woat. Von dit räd Jesus uk en daut Tieekjen von de latste Tiet. Hee säd: “Daut Evangelium von Gott sien Rikj woat en de gaunze Welt jeprädicht woaren, soo daut aule Velkja daut hieren, un dan woat daut Enj komen” (Matäus 24:14).

Dit Evangelium es de wichtichste Sach, waut Jehova siene Zeijen bekauntmoaken. Dee äare wichtichste Tietschreft heet De Woaktorm moakt Jehova sien Kjennichrikj bekaunt. En dän Woaktorm rät daut foaken von daut besondre, waut Gott sien Kjennichrikj fa de Menschen un dän Ieedbaul doonen woat.

Doatoo mott wie veatlei em Denkj hoolen:

1. En Gott sien Kjennichrikj woaren nich Rejierungsmana von dise Welt rejieren.

2. De Harscha von dise Welt woaren äare Macht nich wellen oppjäwen un woaren gaunz vejäfs jäajen Gott sien Rikj kjamfen (Psalm 2:2-9).

3. Gott sien Rikj woat de Rejierungen von dise Welt venichten motten, waut wieda äwa de Menschen harschen wellen (Daniel 2:44; Openboarunk 19:17-21). Dis latsta Kjrich oppe gaunze Welt, woat Harmagedon jenant (Openboarunk 16:14, 16).

4.   Aul dee, waut sikj friewellich unja Gott sien Kjennichrikj stalen, woaren Harmagedon äwaläwen, om en eene niee frädelje Welt to läwen. Dit woaren dee sennen, waut de Schreft de “Häad, dee kjeena talen kunn,” nant. Daut kjennen millionende sennen (Openboarunk 7:9-10, 13-14).

Daut eena kaun unja Gott sien Rikj sennen, mott eena ieescht mol väl lieren. Jesus säd je en een Jebäd to Gott: “Daut eewje Läwen es dit: daut see die, dän eensich woaren Gott, un Jesus Christus, dän du jeschekjt hast, kjanen lieren” (Johanes 17:3).

Wan de Menschen Jehova Gott kjanen lieren, kjemt dee daut en väl Stekjen togood. Räd wie mol äwa twee. Ieeschtens kjrieen dee eenen stoakjen Gloowen aun am. Dis Gloowen, waut eenen Grunt haft, halpt dee to vestonen, daut et Gott sien Kjennichrikj werkjlich jeft un daut et dicht bie es (Hebräa 11:1). Tweedens waust dee äare Leew fa Gott un dän Näakjsten. Leew fa Gott brinjt dee bat doa, am wellich to jehorchen. Leew fa dän Näakjsten halpt dee, Jesus siene Wieed notokomen, waut se foaken de “goldne Räajel” nanen. Jesus säd: “Doot jrod daut fa aundre, waut jie an wudden wenschen fa junt to doonen” (Lukas 6:31).

Soo aus een leeftolja Voda, well ons Schepfa daut baste fa ons. Hee well, daut wie “daut woare Läwen” kjrieen, soo aus de Schreft sajcht (1. Timotäus 6:19). Vondoag hab wie noch nich “daut woare Läwen”. Fa millionende Menschen es daut Läwen sea schwoa – dee kjennen schia nich äwaläwen. Daut du een bät vesteist, woo daut “woare Läwen” sennen woat, besee die mol eenje wundascheene Sachen, waut Gott sien Kjennichrikj fa de Menschen doonen woat.