ONSE IEED ES EN JEFOA!
De Loft
ONS Menschen fält Loft – oba nich bloos toom odmen. De Loft, waut rom onsen Planeet es, beschizt dän fa soone Strolen von de Sonn, waut dän schoden. Wan doa nich Loft rom de Ieed wia, dan wudd daut soo kolt sennen, daut aules wudd enfrieren.
Wuarom mott wie ons äwa de Loft sorjen?
Bloos 1% von aule Menschen oppe Ieed kjennen soone Loft odmen, waut no de World Health Organization no werkjlich rein es. Daut es soo oajch, daut et enne Lenjd wudd kjennen bat doa komen, daut nuscht mea wudd oppe Ieed läwen kjennen.
Von schwiensche Loft komen biejlikj Lungen-Krankheiten, Kjräft enne Lungen un Trubbels met daut Hoat. Jieda Joa stoawen doa rom 7 Millionen Menschen ea, aus dee jeweenlich wudden jestorwen sennen – bloos wäajen de schwiensche Loft.
Onse Ieed es soo jemoakt, daut dee fa emma bliewen kaun
Onse Ieed es soo enjerecht, daut doa jeweenlich emma jenuach reine Loft es fa aules, waut läft. Oba daut es bloos mäajlich, wan de Menschen oppaussen un nich soo sea väl schwienschet enne Loft nennloten. See wie mol een poa Biespels, woo de Ieed prooft, de Loft reintohoolen.
-
De mieeschte weeten, daut de Woolt sea väl Kolendioxid von de Loft rutfiltren kaun. Oba waut nich soo väle weeten es, daut Mangroowen-Beem, waut en wotajet Launt dicht biem Mäa waussen, daut noch väl bäta doonen kjennen! Dise Beem kjennen meist krakjt fief mol mea Kolendioxid ut de Loft rutnämen, aus de Räajenwoolt kaun.
-
Korz haben se utjefungen, daut eenje groote Wotaplaunten Kolendioxid von de Loft rutfiltren un dan oppbewoaren. De Bläda von dise Wotaplaunten haben Blosen voll Loft, wuaderch dee oppem Wota bliewen. Wan dee ieescht wiet oppem Mäa sent, dan däwren dise Blosen opp un de Plaunten gonen unja. Doa oppem Grunt vom Mäa bliewen dee dan fa hundade Joaren, toop met daut Kolendioxid, waut ons dan nich mea schot.
-
Aune 2020 musten de mieeschte wäajen de COVID-Krankheit tus bliewen. Dan wees sikj daut ut, woo bosich de Loft wada kaun reina woaren. Dan dreiden väl Fabrikjen nich un väle deeden äare Foatieja nich soo sea brucken aus ea. Doaderch wort de Loft reina. En dän Berecht 2020 World Air Quality Report säd daut, daut äwa 80% von aul de Lenda, waut se unjasocht hauden, bätre Loft hauden, nodäm daut de Menschen wäajen de Krankheit tus bliewen musten.
Woo de Menschen daut proowen to fiksen
Metem Beisikjel no de Oabeit ooda no de School foaren halpt, daut de Loft nich soo schwiensch woat
De Rejierungen sajen de Fabrikjen un Kompanies daut emma wada, woo wichtich daut es, daut dee de Loft nich soo sea veorreinjen. Un de Forscha finjen uk emma mea doaräwa ut, woo eena kaun de Loft wada reina moaken. Eene Wajch, woo dee daut doonen, es met Baktierieen, waut schwienschet ut de Loft soo wiet veendren, daut et nich mea schoden deit. Un de Menschen aulawäajen woat uk sea toojerot, daut dee sellen leewa tofoot gonen ooda metem Beisikjel foaren, enne Städ jieda Bietskje metem Foatich to foaren. Dee wudden uk sellen äare Hiesa soo enrechten, daut dee weinja Fia un Brennstoff brucken.
Eenje Rejierungen jäwen äare Menschen niemootsche Owes, waut de Loft nich soo sea veorreinjen; oba lang nich aule kjennen soone Owes kjrieen
Oba bloos daut woat nich toorieekjen. Daut wia en eenen Berecht kloa to seenen, waut aune 2022 von veschiedne internazionale Organisazionen toopjestalt wort, biejlikj von de World Health Organization un von de World Bank.
En disen Berecht säd daut, daut aune 2020 ojjefäa een Dreddel von aule Menschen oppe Welt soone Owes brukten, waut de Loft veorreinjen deeden. En väl Jäajenden sent de Menschen soo oam, daut dee sikj nich kjennen bätre Owes kjeepen, un dee kjennen uk nich aundret Brennstoff brucken toom koaken.
Waut fa Hopninj jeft de Schreft ons?
“Gott, de HAR dee dän Himmel jemoakt un utjespreet haft, dee de Ieed un waut doabowen es, jemoakt haft, dee de Menschen, dee oppe Ieed sent, dän Odem toom läwen . . . jeft”. (Jesaja 42:5)
Gott haft de Loft jemoakt, waut wie odmen. Hee haft daut uk soo enjerecht, daut dee emma wada reinjemoakt woat. Hee es aulmajchtich un haft uk groote Leew fa de Menschen. Wan wie aun aul daut denkjen, wudd daut dan nich kloa sennen, daut hee sikj doarom kjemren woat, daut de Loft aulawäajen wada woat gaunz rein sennen? Wan du mea doaräwa weeten west, dan läs dän Artikjel “Gott vesprakjt, daut onse Ieed fa emma bliewen woat” opp de näakjste Sied.
