Respakjt fa aundre
WUAROM ES DAUT WICHTICH, AUNDRE TO RESPAKJTEN?
Wan wie aundre respakjten, kjenn wie väabieejen, daut et nich too sea utjieet, wan daut Trubbel jeft.
-
De Schreft jeft disen Rot: “Eene jelinde Auntwuat stelt dän Oaja, oba een hoadet Wuat reizt toom Oaja” (Spricha 15:1). Respakjtlooset Räden un Vehoolen moakt eene schlemme Loag bloos noch schlemma. Dauts soo, aus wan eena biem Fia wudd Gess oppjeeten. Foaken kaun daut grooten Schoden aunrechten.
-
Jesus säd: “Von waut daut Hoat voll es, rät daut Mul” (Matäus 12:34). Wan wie respakjtloos räden äwa Menschen von een aundret Volkj, Launt ooda äwa soone, waut aundasch oppjewossen sent, wiest daut, daut wie orrajcht enjestalt sent un eenen Unjascheet manke Menschen moaken.
Nich lang trigj wort 32,000 Menschen en 28 Lenda befroacht, un 65% von dee säden, daut dee kjeenmol ea beläft hauden, daut de Menschen soo respakjtloos wieren aus nu.
WOO KAUST DU AUNDRE RESPAKJTEN?
Wies aule Menschen Respakjt, met dee du to doonen hast, mau rajcht wan du nich met dee stemst. Denkj äwa soont, wua du met dee metstemst. Daut woat die halpen, dee nich to rechten ooda schlajcht von dee to denkjen.
Sie to aundre soo, aus du west, daut dee to die sellen sennen. Wan du frintlich un fein best to aundre, woaren dee uk leichta soo to die sennen.
Doo aundre vejäwen. Moak die daut nich schwoa doamet, wan aundre waut Dommet sajen ooda doonen, un denkj nich fuaz, dee wullen die doamet beleidjen.
WOO WIESEN JEHOWA SIENE ZEIJEN RESPAKJT FA AUNDRE?
Jehowa siene Zeijen respakjten de Menschen rom äant un muntren aundre opp, daut uk to doonen.
Wie beeden jieda eenem aun, emsonst de Bibel kjanen to lieren, oba wie bemotten kjeenem, daut to jleewen ooda soo to denkjen aus wie. Enne Städ daut kom wie dän Rot ut de Schreft no un räden to aundre “leeftolich un respakjtvoll” äwa onsen Gloowen (1. Petrus 3:15; 2. Timotäus 2:24).
Wie moaken kjeenen Unjascheet un kroagen aule Sorten Menschen no onse Toopkomes, waut doa wellen mea von de Schreft lieren. Wie nämen dee wellich opp un jäwen “aule Menschen Respakjt” (1. Petrus 2:17).
Wie respakjten de Rejierunk, waut äwa ons aunjestalt es (Reema 13:1). Wie komen de Jesazen no un betolen dän Taks. Un wan wie ons uk nich en polietische Sachen mankmenjen, doo wie daut oba respakjten, daut jieda eena siene ieejne Meenunk haft äwa de Politikj.
