Respakjt fa daut Läwen
WUAROM ES DAUT WICHTICH, DAUT LÄWEN TO RESPAKJTEN?
Wan eena kjeenen Respakjt haft fa daut Läwen, deit eena veleicht soont, waut eenem schot ooda aundre äa Läwen en Jefoa brinjen kaun.
-
Von schmieekjen kaun eena nich bloos Kjräft kjrieen, oba daut moakt daut fa dän Kjarpa uk schwanda, jäajen dise Krankheit to kjamfen. Rom 90% von aul dee, waut wäajen Lungen-Kjräft stoawen, haben selfst jeschmieekjt ooda musten sikj aundre äaren Ruak enholen.
-
Groote Scheetarieen veuasoaken jieda Joa väl Narfenlieden. Een Berecht äwa Scheetarieen en Schoolen säd, daut mau rajcht soone, waut doa nich velazt worden, daut noch joarenlank schwoa haben un Narfentrubbel haben.
-
Wan wäa Stoakjet drinkjt ooda Droggs brukt un dan metem Foatich hinjawäajes es, es daut fa aulem, waut doa foat ooda jeit, eene groote Jefoa. Foaken motten soone Menschen, waut nuscht orrajcht deeden, sea lieden, wiels aundre nuscht om daut Läwen romjäwen.
WOO KAUST DU DAUT LÄWEN RESPAKJTEN?
Denkj aun diene Jesuntheit. Dauts kjeenmol too lot, met schlajchte Jewanheiten opptohieren, soo aus schmieekjen, sikj besupen ooda Droggs ooda ellektrische Zegoaren brucken. Soont schot die un wiest kjeenen Respakjt fa daut Läwen von diene Famielje un aundre rom die.
Denkj aun de Sechaheit. Du kaust waut doonen, om Ojjlekjs väatobieejen. Hool dien Hus un dien Foatich goot emstaund un foa secha. Lot die nich von aundre metrieten, soont to doonen, wua eena sikj wudd kjennen sea velazen ooda mau rajcht stoawen.
Sie frintlich. Respakjt fa daut Läwen to haben meent uk, daut wie aule Menschen frintlich behaundlen, endoont aus dee von een aundret Launt komen, aus dee oam ooda rikj sent un aus dee eene goode School hauden ooda nich. Wuarom es daut soo wichtich? Wiels Hauss un eenen Unjascheet manke Menschen moaken es eent von de jratste Uasoak von Grausomkjeit un Kjrich.
WOO WIESEN JEHOWA SIENE ZEIJEN RESPAKJT FA DAUT LÄWEN?
Wie lieren aundre, jesunda to läwen. Wäajen wie aundre halpen, de Schreft bäta to vestonen, kunnen väle von Droggs ooda aundre Jewanheiten looskomen, waut äant sea schoden deeden.
Wie kjikjen bie onse Buwoakjs sea no de Sechaheit. Friewelje, waut methalpen, Vesaumlungshiesa ooda aundre von onse Jebieda to buen, woat sea utjelieet, daut dee kjennen Ojjlekjs väabieejen. Aul onse Jebieda woaren räajelmässich unjasocht, daut dee met de Jesazen äwa de Sechaheit stemmen.
Wie halpen em Nootfaul ut. Mau bloos aune 2022 hab wie oppe gaunze Welt bie rom 200 groote Ojjlekjs un Owwadasch utjeholpen un meist krakjt 12 Millionen Dola von de Gowen jebrukt toom dee biestonen, waut doa Schoden jekjräajen hauden.
Aune 2014 wort daut en Wast-Afrika sea oajch met de Ebola-Krankheit, un aune 2018 uk en de Demokratische Republikj Kongo. Wie lieeden de Menschen doa, waut dee jäajen dise äwaschlapende Krankheit, waut foaken toom Doot fieet, doonen kunnen. Wie schekjten doa soone han, waut äwa daut Teema räden: “Jehuarsom sennen rat Läwes”. Ver jieda Vesaumlungshus stald wie waut opp toom Henj wauschen un muaken daut sea dietlich, woo wichtich Henj wauschen es un waut dee noch doonen kunnen, daut de Krankheit sikj nich soo bosich vespreed.
En Sierra Leone lowden se Jehowa siene Zeijen äwa Rädio, wiels dee nich bloos äare Menschen, oba uk aundre holpen, sikj nich de Ebola-Krankheit opptoschlapen.
Een Vesaumlungshus wua waut reedjemoakt es toom Henj wauschen, aus daut aune 2014 en Liberia soo oajch wia met de Ebola-Krankheit
a En de Lenda von de Bibeltiet hilden de Menschen sikj foaken opp äare plaute Däakja opp. Dit Jesaz wees, woo wichtich daut wia, om de Sechaheit von de Famielje un von aundre Menschen bedocht to sennen.
