Flietje Menschen gonen de Oabeit nich utem Stich. Enne Städ daut schaufen dee sea toom fa sikj selfst sorjen un toom aundre halpen un mau rajcht dan, wan daut nich mol eene wundre Oabeit es.

Em Läwen jeft daut välet, waut eena schuldich es to doonen, aus eena daut jleicht ooda nich. Wan väl Menschen bie dise Tiet uk nich jleichen, sea to schaufen, haft daut oba väl goode Sieden, wan eena flietich es (Liera 3:13).

Reyon sajcht: “Ekj sie enjeworden, daut wan eena sea schauft, dan feelt eena sikj ennalich tofräd. Un wäajen ekj mie soo tofräd feel, hab ekj mau rajcht jelieet, miene Oabeit to jleichen. Wan eena flietich schaufen deit, dan moakt eena sikj doaderch uk eenen gooden Nomen.”

WAUT DE SCHREFT SAJCHT: “Aule schwoare Oabeit brinjt vedeenst” (Spricha 14:23).

De Rot, waut hia aunjejäft es, kaun die halpen, äwa de Oabeit rajcht to denkjen.

Doo de Oabeit goot: Wan du tus schaufst ooda Schooloppgowen moakst ooda sest irjenteene Oabeit deist, dan laj die gaunz doahinja. Wan du eene Sach ieescht fein jelieet hast, dan see, woo du daut noch bäta un bosja doonen kaust. Je bäta du daut vesteist, je bäta woat die daut gonen.

WAUT DE SCHREFT SAJCHT: “Sitst du eenen Maun jeschekjt bie siene Oabeit? Dee woat ver Kjennichs deenen, un nich ver jeweenelje Menschen” (Spricha 22:29).

Denkj doaräwa no, woo aundre daut halpen kaun. Meist emma es daut soo, wan eena siene Veauntwuatunk fein nokjemt, kjemt aundre daut uk togood. Saj wie mol diene Oabeit tus: wan du dee fein nokjemst, dan moakst du diene Famielje daut leichta.

WAUT DE SCHREFT SAJCHT: “Jäwen es seelja [ooda jeft mea Freid] aus nämen” (Aposteljeschicht 20:35).

Doo nich bloos daut, waut du afens motst. Enne Städ bloos jroz daut needichste doonen, doo noch mea aus daut. Wan du daut deist, dan woascht du die nich unja Druck feelen, wäajen aundre die väasajen, waut du doonen saust (Matäus 5:41).

WAUT DE SCHREFT SAJCHT: “Daut dien goodet doonen nich jedwungen wia, oba ut dienen frieen Wellen kjeem” (Filemon 14).

Äwadriew daut nich. Menschen, waut flietich sent, sent nich ful, oba dee woaren sikj uk nich äwarakren. Dee kjikjen doano, daut see flietich schaufen, oba uk Tiet haben toom vereiwen. Dee sent aulsoo utjejlikjt.

WAUT DE SCHREFT SAJCHT: “Daut es bäta, wan eena eene Hauntvoll haft, un sikj utreiwen kaun, aus wan eena twee Henj voll haft, un sikj kjwält, un vesieekjt dän Wint to jriepen” (Liera 4:6).