Waut es fa junt een goodet Benämen? Es junt Elren daut biejlikj wichtich, en aules opprechtich to sennen? Secha well jie dan uk, daut june Kjinja sikj aunstrenjen, uk opprechtich to sennen.

Secha well jie dee uk lieren, waut fa rajcht un orrajcht jetalt woat. Biejlikj daut see flietich sent, om aundre todoonen un jerajcht sent. Daut es väl leichta fa Kjinja, wan dee soont von kjlien aun lieren.

WAUT DE SCHREFT SAJCHT: “Lia een Kjint dän rajchten Wajch gonen; dan woat dee uk doabie bliewen wan dee oolt woat” (Spricha 22:6).

Nu en onse Tiet es daut besonda wichtich, daut de Kjinja lieren, waut rajcht un orrajcht es. Eene Mame, waut Karyn heet, sajcht: “Doa es emma de Jefoa, daut de Kjinja äwa Fon ooda Tablet met waut schlajchtet to doonen haben. Mau rajcht, wan dee biesied eenem setten, wudden dee kjennen waut orreinet kjikjen, onen daut wie daut enworden!”

WAUT DE SCHREFT SAJCHT: “Utjewosne Menschen, dee [haben] sikj doarenn jeeeft . . ., tweschen goot un schlajcht to unjascheeden” (Hebräa 5:14).

Aun aundre denkjen es uk wichtich. Doa es biejlikj met en, sikj fein to benämen un “toom Jefaulen” un “dankscheen” sajen. Daut es uk wichtich, om aundre bekjemmat to sennen. Un daut es nu meist nich mea Mood, wiels de Menschen sikj foaken dolla fa äare Fons ooda Tablets intressieren aus fa aundre Menschen.

WAUT DE SCHREFT SAJCHT: “Doot jrod daut fa aundre, waut jie an wudden wenschen fa junt to doonen” (Lukas 6:31).

Sajcht an, waut jie fa rajcht un orrajcht talen. Biejlikj fungen Forscha rut, daut junge Menschen nich soo leicht verem befrieen Sex haben, wan dee daut kloa un dietlich jesajcht woat, daut soont orrajcht es.

EEN ROT: Prooft uttofinjen, waut june Kjinja fa rajcht un orrajcht talen. Biejlikj wan enne Norechten jesajcht woat, daut doa wäa waut schlemmet jedonen haft, dan kjenn jie sajen: “Daut es je oba schlemm, waut dee dän aundren aunjedonen haft. Woo jleefst du, komen Menschen bat doa, soont to doonen?”

Brandon sajcht: “Daut es fa Kjinja väl schwanda to weeten, waut rajcht un waut orrajcht es, wan se dee daut nich jelieet haben.”

Lieet june Kjinja, aun aundre to denkjen. Mau rajcht kjliene Kjinja kjennen daut aul lieren, om aundre bekjemmat to sennen un biejlikj “toom Jefaulen” un “dankscheen” sajen. Een Buak sajcht: “Kjinja motten lieren, daut see een Poat von eene Grupp sent, biejlikj vonne Famielje, vonne School ooda von een Darp. Je ea dee daut lieren, je ea woaren dee uk reed sennen, fa aundre waut goodet to doonen un nich bloos fa sikj selfst” (Parenting Without Borders).

EEN ROT: Lieet june Kjinja wua bietofoten. Soo lieren dee, woo wichtich daut es, aundre to halpen.

Tara sajcht: “Wan june Kjinja daut nu aul lieren, tus to halpen, dan woat dee daut nich soo schwoa sennen, wan dee ieescht oppoat wonen. De Oabeit, waut eena tus deit, woaren dee dan aul gaunz jewant sennen.”