FA EHELIED
1: De Ehe iernst nämen
WAUT BEDIET DAUT?
Fa soone Lied, waut äare Ehe iernst nämen, es de Ehe fa emma. Un doawäajen feelen dee sikj unjarenaunda secha. Beid weeten, daut see woaren tru toophoolen, mau rajcht en schwoare Tieden.
Eenje Ehepoaren bliewen bloos doawäajen toop, wäajen dee sikj bemott feelen von de Famielje ooda Frind. Woo väl bäta es daut nich, wan dee toopbliewen, wäajen dee de Ehe iernst nämen un sikj unjarenaunda leewen un respakjten.
WAUT DE SCHREFT SAJCHT: “De Maun saul siene Fru nich felote” (1. Korinta 7:11, NTR).
Micah sajcht: “Wan eena de Ehe iernst nemt, dan es eena nich soo leicht beleidicht. Eena vejeft dän aundren wellich un entschuldicht sikj uk wellich. De Trubbels, waut doa oppkomen, sitt eena nich aus eene Uasoak toom sikj scheeden loten.”
WUAROM ES DAUT WICHTICH?
Ehelied, waut äaren Ehestaunt nich iernst nämen, woaren leichta denkjen: “Wie paussen bloos nich toop”, wan doa eemol Trubbels oppkomen. Un dan wellen dee met de Ehe een Enj moaken.
Jean sajcht: “Wan wäa biem befrieen aul doaräwa nodenkjt: ‘Wan daut nich schaufen woat, dan woa wie ons scheeden loten!’, dan wiest daut, daut dee dän Ehestaunt von Aunfank aun aul nich haft iernst jenomen.”
WAUT KAUN EENA DOONEN?
UNJASIEEKJ DIE SELFST
Waut deist du, wan du die met dienen Ehepoatna oneenich best ooda wan jie strieden?
-
Denkjst du dan, die es daut schod, daut du die hast met dänjanjen befriet?
-
Stalst du die dan väa, woo daut wudd sennen, wan du met sestwäm toop wieescht?
-
Sajchst du soont aus: “Ekj woa die veloten”, ooda “Ekj woa mie wäm sieekjen, waut mie waut räakjent”?
Wan du bie eene ooda mea von dise Froagen wurscht “Jo” sajen, dan wudd daut nu Tiet sennen, daut du dienen Ehestaunt iernsta nemst.
RÄD MET DIENEN EHEPOATNA ÄWA DIT
-
Näm wie onsen Ehestaunt nich mea soo iernst? Wan daut soo es, aun waut licht daut?
-
Waut kjenn wie doonen, daut wie dän Ehestaunt iernsta nämen?
EEN ROT
-
Schriew dienen Ehepoatna bieaun mol een Zadelkje toom sajen, woo sea du dän leefst.
-
Wies, daut du dienen Ehestaunt iernst nemst doaderch, daut du een Bilt von dienen Ehepoatna bie de Oabeit hast.
-
Fon dienen Ehepoatna jieda Dach, wan du oppe Oabeit best ooda wan jie nich toop sent.
WAUT DE SCHREFT SAJCHT: “Waut Gott vebungen haft, saul de Mensch nich von enaunda scheeden” (Matäus 19:6).
