Soone Menschen, wua opp to veloten es, hoolen sikj aun Räajlen, hoolen daut, waut see vesproaken haben, un sajen emma de Woarheit. Un doawäajen vetruen dee äare Elren, dee äare Frind un dee äare Wieets uk opp dee.

Meist emma es daut soo, je dolla opp eenem to veloten es, je mea Frieheit woat eena met de Tiet kjrieen.

Sarahi sajcht: “Du kaust diene Elren daut baste wiesen, daut see die vetruen kjennen, wan du an wiest, daut opp die to veloten es; un daut nich bloos, wan du met dee toop best, oba uk, wan du auleen best.”

WAUT DE SCHREFT SAJCHT: “Siet väasechtich, daut jie junt . . . jescheit benämen” (1. Petrus 2:12).

West du haben, daut diene Elren dolla opp die vetruen sellen? Ooda daut dee sikj wada opp die veloten kjennen, wan dee daut Vetruen veloaren haben? Dan kaun dis Rot die halpen:

Saj emma de Woarheit. Wan du Läajes vetalst, dan woaren de Menschen kjeen Vetruen opp die haben. Oba wan du emma de Woarheit sajchst, uk dan, wan du Fäla moakst, dan woaren de Menschen seenen, daut dee sikj opp die veloten kjennen.

Caiman sajcht: “Daut es leicht, bie de Woarheit to bliewen, wan aules jlei rant. Oba wan du mau rajcht dan opprechtich best, wan du eenen Fäla moakst, dan woaren aundre noch dolla opp die vetruen.”

WAUT DE SCHREFT SAJCHT: “Wie wellen en aules, waut wie doonen, opprechtich sennen” (Hebräa 13:18, NW).

Komm diene Oabeit no. Aus se enne Stäts bie de Kompanieen soone befruagen, waut Oabeida aunnämen, säden 78 Prozent von dee, no waut see kjikjen. Dee säden: “Eent von daut wichtichste bie fresche Oabeida es, aus opp dee to veloten jeit.” Wan du nu aul lieescht, diene Oabeit goot notokomen, woat die daut bie groot uk sea halpen.

Sarah sajcht: “Miene Elren jleichen daut, wan opp mie to veloten es un ekj miene Oabeit nokom, onen daut see mie emma motten denkjen halpen. Je bäta ekj aules nokom, je dolla vetruen dee mie.”

WAUT DE SCHREFT SAJCHT: “Ekj weet, daut du mea doonen woascht, aus ekj die saj” (Filemon 21).

Sie jeduldich. Aule kjennen daut seenen, wan eena jrata un stoakja woat. Oba daut es nich soo leicht fa aundre to seenen, wan eena kjlieekja woat un daut opp eenem to veloten es.

Brandon sajcht: “Daut rieekjt nich too, bloos eemol waut goodet doonen, daut eenem siene Elren ooda aundre sikj von dan aun emma opp eenem veloten. Eena mott de Elren emma wada wiesen, daut dee sikj kjennen opp eenem veloten.”

WAUT DE SCHREFT SAJCHT: “Kjleet junt met . . . Jedult” (Kolossa 3:12, NTR).