FA EHELIED
3: Sikj respakjten
WAUT BEDIET DAUT?
Ehelied, waut sikj respakjten, leewen sikj, wan dee sikj eenjemol uk nich eenich sent. Een Buak sajcht: “Soone Ehelied bliewen nich opp äa Stekj stonen. Enne Städ daut räden dee unjarenaunda dän Trubbel derch. Dee achten dän Ehepoatna siene Meenunk un woaren sikj to waut eenich, waut fa beid goot es” (Ten Lessons to Transform Your Marriage).
WAUT DE SCHREFT SAJCHT: “Leew . . . es nichnosikj” (1. Korinta 13:4-5).
Micah sajcht: “Miene Fru to achten bediet, daut ekj dee fa wieetvoll tal un daut ekj nuscht well doonen, waut ar ooda onse Ehe schot.”
WUAROM ES DAUT WICHTICH?
Wan doa tweschen de Ehelied nich Respakjt es, dan kjemt daut foaken soo wiet, daut dee sikj unjarenaunda veachten, utgrunzen un mau rajcht strieden. Un Forscha sajen, daut daut dan aul een Tieekjen es, daut de Ehe kaun tweigonen.
Brian sajcht: “Sikj domm haben äwa eenem siene Fru ooda von dee schlajcht räden, woat dee tonuscht moaken un dän Ehestaunt schoden.”
WAUT KAUN EENA DOONEN?
UNJASIEEKJ DIE SELFST
Pauss mol fa eene Wäakj krakjt opp, waut du sajchst un deist. Un dan denkj äwa dise Froagen no:
-
“Woo foaken grunzt ekj äwa mienen Ehepoatna un woo foaken lowd ekj dän?”
-
“Woo krakjt hab ekj jewäsen, daut ekj mienen Ehepoatna respakjt?”
RÄD MET DIENEN EHEPOATNA ÄWA DIT
-
Woo kjenn wie ons daut baste Respakjt wiesen met daut, waut wie sajen un doonen?
-
Wanea feelst du die veacht wäajen waut, waut ekj saj ooda doo?
EEN ROT
-
Schrieft aule beid dreeatlei opp, woo jie wellen, daut de aundra junt respakjten saul. Dan tuscht june Zadels un prooft daut notokomen, waut opp dän aundren sienen Zadel steit.
-
Moak eene List von daut, waut du aun dienen Ehepoatna jleichst. Un dan saj dän daut, woo sea du aul daut jleichst.
Megan sajcht: “Mienen Ehemaun to respakjten bediet, daut ekj am wies, daut hee bie mie väl wieet es un daut ekj well, daut hee schaftich es. Daut mott nich bloos bie groote Sachen sennen; derch kjliene Stekjen kaun ekj wiesen, daut ekj am werkjlich respakjt.”
To goodalatst sajcht daut nich soo väl, aus eena jleeft, daut eena sienen Ehepoatna respakjt; waut talt es, daut dee daut späaren kaun, daut eena dän respakjt.
WAUT DE SCHREFT SAJCHT: Doot junt “von Hoaten erboarmen, frintlich sennen, deemootich, saunftmootich un jeduldich sennen” (Kolossa 3:12).
